Read Berik Roma 11 Bible Online

Roma 11 - Berik bible

Roma 11

¹Jepga ai tenna, Uwa Sanbagiri Jei ke mes gutena enggame angtane Israelem temawer, “Angtane jeiserem jei Amanyan.”? Fas, Uwa Sanbagiri Jei gam Jam guyon. Ana jegme angtane Israelsam. Aiba asal-asala Abrahammana, tewe Benyaminminiwer.

²Uwa Sanbagiri Jei Jam guyon angtane Israelmanaiserem jem temawer enggame, “Jei Amanyan.” Angtane Israelmana jeiba angtane Uwa Sanbagiri gwanan aa jes destabaabilim. Sa sarbistaabon Taterisi Uwa Sanbagirmana Eliyam temawer. Eliya jei Uwa Sanbagiri jeber-jeber balwel angtane Israelmana jem temawer, ane etam-etama kapka jei aa jes ne eyebilim jem temawer.

³Eliya aa gul, “Tuhan, angtane jei nabi-nabi Imna mes ne munbobili. Ane jei tampata mes ne kwirtabaipmisini, tampata ai sembayanga Ibe Is ajeba gwebabawenaram. Jengga ai anfentowai gwena, ane ai mese safe ase jam ne munbof.”

⁴Aamke imsa dirinswebili Uwa Sanbagiri aa gam tamawolam? Jei aa gul, “Angtane Amna 7.000, angtane jeiserem jei Ai As jei ne tikwebaatini. Jei sembayanga jam ne gwebabayan tiborma jam kwirulu Baalmanaiserem.”

⁵Gwanan jes gamserem aaiserem jengba gamam, namwer aas jepserem Uwa Sanbagiri Jei angtane safna bastantouya mesam destabaabili. Jei waakena Jelemanaiserem jep mesam golmini, ane Jei ga aa gunu, “Angtane jeiserem jei Amna.”

⁶Jei ga enggalem temawer destabaabili, Jei waakena Jelemanaiserem jep jewer golmif. Jei jam destabaabiyen enggalem temawer angtane jeiserem jei waakenfer aa jewer ne eyebilirim. Afa jei waakenfer aa jewer ne eyebilirim jem temawer gam destabaabilirim, gam jega Jei waakena Jelemanaiserem jep Jam golmiyen.

⁷Gam jega enggam ga as gunu, angtane Israelmana jei jam ne domolyan jei aa jes ne terelbilim. Jei ga aas ne terelbil, Uwa Sanbagiri Jei enggam gam balbabif, “Ini imna waakena.” Jengga angtane safna bastantouya Uwa Sanbagiri aa jes destabaabilim, jengga jenefener ne domol. Ane angtane tomna unggwanfer afwer jeiserem, ini jemna jam ge kekelesweipmil.

⁸Taterisi Uwa Sanbagirmanaiserem jem temawer jep ga enggam baatultel: “Uwa Sanbagiri aa eyebili, jega angtane jeiserem taterisi Jemna jei waakenfer jam ne sarbiyen. Jei nweme jam ge anggabiyen, ane imwam jam ge sarbiyen, jamer namwer aas jepserem.”

⁹Ane Raja Daud aa gunu angtane Israelmanaiserem jem temawer: “Ai sembayanga enggam ai gwebana, masara seyafter jei aa jes ne eyebaabuwenaram sege etamweipmini jerata gamserem jena jei tebabife. Ane ga sege janbiton o mwonap jam janona gamserem, ane fwaina jemnaiserem jei ga kapka.

¹⁰Gwini nwena jemna se matabaipmini, jega enggalf jei jam ge anggabiyen. Jei daran-darna sene tingginbili, jamere duruwer sege faangenwebili jamer abak-abaksus.”

¹¹Ai gamjon ajam tenna, angtane Israelmana jei jam gangge janbilirim, gamjon ke gangge irwebili? Ngga, jei bunarsusfer gamjon gangge irwebili, ane taterisi Uwa Sanbagirmana ga gane saribaasini. Jengga fwater galapserem jei Taterisi Uwa Sanbagirmana jam ne sarbiyene, Uwa Sanbagiri Jei gase towaiwulu anggwabura nafsi jam waakentababisife. Angtane Israelmana jei jam sene damtabilirim, ini jemna ga sege uskamswebamini.

¹²Angtane Israelmana jei etam-etama kapkaiserem jam gane eyebilirim enggame, jei Kristus jam ne tebayan. Jega jem temawer angtane nafsiserem jei ga waakena Uwa Sanbagirmanaiserem ga gane taabili. Angtane Israelmana galap jei seyafter aa jep ge waraubisirim Uwa Sanbagirminibe, angtane ogirip seyafter gemerserem jei ga waakena Uwa Sanbagirmanaiserem bunarsusfer ga sene taabisi unggwanfer.

¹³Ai namwer is ajam nasipmif ibe, aamei angtane Yahudimanyan. Aiba Rasulsam Uwa Sanbagiri aa jes destabanaram enggalfe, ai angtane Yahudimanyanaiserem jei agam towas-towastababif. Ane ai gunu awelna amnaiserem je igsusu.

¹⁴Ai engbar samfer as eyebili, jega anggwabura amnaiserem jei Yesus gam ne tebaf, aamei gamserem. Jepga Uwa Sanbagiri Jei anggwabura amnaiserem Israel gase waakentababisini.

¹⁵Jei gwanan galapserem Yesus jam ne tebayan, jes galapserem Uwa Sanbagiri Jei nele ga gaarmini anggwabura nafsiserem jebe, ane ini jemna Uwa Sanbagirem gwetmanap ga sege folbamini. Ane angtane Yahudimana galap Yesus aa jep ne tebanaram, jeime gwela ibirmi ga sene domolsa.

¹⁶Ga enggam, tumilgala afa daamfen woga Uwa Sanbagirfe jam gane gulbanaram, gam jega tumilgala seyafter jes gemerserem Jep ga gane gulbana. Tisakara Uwa Sanbagirfe jam gane gulbanaram, gam jega tini tirniserem jes mese seyafter Jep gane gulbana. Jes gemerserem gamjon aaiserem jegme gemer angtane Yahudimana jem temawer, afa Abraham, ane asal-asala nemna fwatermanaiserem jei Uwa Sanbagirmana, gam jega tane mesna namwer aaiserem, jes mese Uwa Sanbagirmana.

¹⁷Angtane ti tirni jam gane targabaabisinirim tini Yahudiminiwer, jepga aamei angtane Yahudimanyanaiserem ti tirni nafsi gamserem, jep gane gurtenaram tini Yahudiminibe. Ane aamei jegme nata waakena igama domola tisakara jeiserem jemniwer.

¹⁸Jega jem temawer aamei ina ijama tetenanayan ti tirni aa jes ne targabaabisinirim jem sagabe. Aas sa sarbistaabon, tini tirniserem tumilgala jam gulbayan tisakara jeiserem jebe. Jengga enggam, tisakara jeiserem jei tumilgala ga je gam golmini tini tirniserem jebe.

¹⁹Aamei ga enggam ima gunu, “Angtane jei ti tirni afwer jam sene targabaabisini, jega samfer ai jem urgunup ga sene gurtena.”

²⁰Ngga, jeiserem bunar. Jei sene targabaabisini, aam temawer jei Uwa Sanbagiri jam ne tebayan. Ane aamei ga jeber isa nwini, aam temawer aamei Uwa Sanbagiri imsa tebana. Jengga in ina ipsama tetenaram jeiserem jem temawer. Sa erebe Uwa Sanbagiri, ane bai se etamwena imnibe.

²¹Afa Uwa Sanbagiri Jei tirni igsusu Yahudiminiwer jam se targabaabisinirim, Jeime samfer tirni afweraiserem se targabaabisini, afa aamei Uwa Sanbagiri ijama tebayana.

²²Gamjon ijama dirinsweyan enggame, Uwa Sanbagiri Jei angtanefe waakenaiserem gam golmini, ane Jeime angtanefe tamtamtalaiserem gam golmini. Jei tamtamtala gam golmini angtane Jei aa jei ne tebayanaiserem, jengga Jei waakenaiserem is gam golmini aamei angtane Yahudimanyan ibe, aamei Jei gemer ijeya tebasinirim. Afa aamei Jei ijama tebayana, galap Jei is targabaabisini tiniwer.

²³Ane angtane Yahudimanaiserem jem temawer, afa jei gamjon Uwa Sanbagiri jam sene tebanaram, Uwa Sanbagiri Jei gamjon gase tonoltena tini jeiserem jebe. Uwa Sanbagiri Jei baabetabara gamjon jam tonoltefe.

²⁴Aamei angtane Yahudimanyan, aamei ga sibir tirni gamserem. Angtane gam fortya sibir tirni jeiserem ga gam targasini, gamjon ga gam gurtena eremu tinibe, ane jep ga gam kokosa. Angtane Yahudimana jei ga eremu tini gamserem. Afa Uwa Sanbagiri Jei eremu tirni jeiserem jam gam tagalsinirim, galap Uwa Sanbagiri Jei gamjon Jam gam gurtenaram eremu tinibe. Jei tatarmersus ga gam kokosa sibir tirniminiwer.

²⁵Am afelen mesna, ai taterisi isa ajam towas-towasulmif, taterisi bunarsusfer aaiserem Uwa Sanbagiri gwanan ibe is jam towasulmiyeneiserem jamer abaka. Taterisi aaiserem aamei ga is jei se batobaabili, jega aamei in ina ijama tetenanayan, ane jega enggam ijama guyon, “Ai towasusu.” Taterisi jeiserem ga enggam, ini angtane Israelmana abakfer jam ge kekelesweipmiyen. Ini jemna sege kekelesweipmini jamere angtane Yahudimanyan Uwa Sanbagiri unggwanfer aa jep mwangbabilirim, mwangga jeiserem jep se fitna.

²⁶Mwangga jeiserem jep jase fitnaram, Uwa Sanbagiri Jei angtane Israelmana seyafter gase waakentababisini. Taterisi Uwa Sanbagirmana jep ga enggam baatultel: “Mesias angtane aa Jei waakentababisiliserem Jei se jela Siyonwer. Jei se eyebili jega asal-asala Yakubmana etam-etama kapkaiserem gamjon jam ne eyebiyen.

²⁷Ai taterisi Ajes bilipminirim, taterisi jeiserem jebar Amsama bili enggame, jei Abar Asa gwesa jamer abak-abaksus, Ai etam-etama kapka jemna jam Ajep wirtabaipmisinirim.”

²⁸Angtane Yahudimanaiserem jei Uwa Sanbagirem ginanggwasam, aam temawer jei Taterisi Waakenaiserem fas jam ne taabiyen, jengga aamei imsa taabili jeiserem. Jengga Uwa Sanbagiri Jei angtane Yahudimana gemer nesiktababili, aam temawer jeiba angtane Jena gwanan aa jes destabaabilim, ane aam temawer mese Jei mesam ge nasbawel Abrahamfar, ane Isakfar, ane Yakubfar.

²⁹Uwa Sanbagiri Jei gamjon jam surbobiyen angtane gwanan Jena aa jes destabaabilim, ane Jei gamjon jam amsonmiyen waakenaiserem Jei aa jes golminirim.

³⁰Aamei mese, aamei angtane Yahudimanyan, gwanan aamei Uwa Sanbagiri waakenfer ijama onsobayan. Jengga namwer Uwa Sanbagiri Jei ims nesiktababili, aam temawer angtane Yahudimana jei Uwa Sanbagiri gwanan jam ne tebayan.

³¹Aaiserem jeba jes gamserem, namwer angtane Yahudimana jei Uwa Sanbagiri waakenfer jam ne onsobayan, jengga galap Uwa Sanbagiri Jei nesiktele jam is golmisirim ibe, Jeime gamjon gase golmisi nesiktele Jelemanaiserem angtane Yahudimanaiserem jebe.

³²Uwa Sanbagiri mesam gunu enggame, angtane seyafter, angtane Yahudimana ane angtane Yahudimanyan jes mese, seyafter Taterisi Jemnaiserem jam ne onsobiyen, jega Jei samfer nesiktele Jemnaiserem gase golmisi angtane seyafter gemerserem jebe.

³³Uwa Sanbagiri nemna Jei unggwan-girsusu! Jei towasusu, Jei tousa seyafter gemerserem. Nei teisyena Jei seyafter aa gam mwangbisinirim. Ane nei teisyena awelna Jemna aa jes gwebilirim.

³⁴Taterisi Uwa Sanbagirmana jep ga enggam baatultel: “Nane towaswena Tuhan Jei bas bili Jelem inibe? Nane se towastana Tuhan Jei bas eyebifi?

³⁵Gwanan nane gulbanant Tuhanfe, jega gamjon gase waraulbono jelefe? Angtane afa fasfasus jes gamserem gam jam ne eyebiyen.”

³⁶Tuhan Jei seyafter eyebaabil, seyafter ga baabeta Jemnaiserem ga jem naawena. Ane seyafter jei Jelemanfenna. Ai sembayanga ai gwebana enggalfe, angtane seyafter Uwa Sanbagiri gan pujitef jamere abak-abaksus! Amin.