Read Berik Roma 12 Bible Online

Roma 12 - Berik bible

Roma 12

¹Am afelen mesna, Uwa Sanbagiri Jei nei nes uskambar nesiktababili. Ga jem temawer, ai aamei isa ititmer balbabili enggame, tifni seyafter ijema gwenaram ina ga jam isa tete Uwa Sanbagirfe, domba tane jam munbolo gamserem ane Uwa Sanbagirfe ga gane gerbana. Tifni imna seyafter jes gamserem ga jam isa kitulbono Uwa Sanbagirfefener, jega ini Jemna saaser-saaserfer ga gam folbana. Afa aamei awelna Uwa Sanbagirmana jam igama gweyibenerem ga jes gemerserem, awelna ga gemer igama gwebili bunarsusfer.

²Ijama onsobaabiyen angtane kapka ogirip aaiserem jebe. Jengga aamei Uwa Sanbagiri Jes isa bala, ane Jei ga is kitulmini miri yo ini ibirmi. Jepga aamei isa towaswena Uwa Sanbagiri Jei ip is jes gam bilipminirim aamei ijesa eyebife. Jei ga enggam gunu, aamei igama towaswebif waakenaiserem ga fwersa, jega ini Jemna saaser-saaserfer gase folbana, jega aamei waakenfer ga isa gwena.

³Uwa Sanbagiri Jei waakena Jelemanaiserem ga ap gulbana, ane jega jem temawer ai ga aamei seyafter isa jewer esoroltababili enggame, ina enggam ijama gitmiyen, “Ai unggwan-gwana angtane seyafter gemerserem jemniwer.” Jengga aamei ina ga jam isa onabersona. Ane aamei taterisi aaiserem ga isa sarbili ilem inibe, aamei fwersaiserem iner infentowai ga jes isa eyebili baabeta Uwa Sanbagirmanaiserem jeme, aam temawer aamei Yesus imsa tebana.

⁴Neiba tafa, tof, nwe, ane aarem galabaram, jengga tifni nemna daamfenna. Ane tafa, tof, nwe, ane aarem, jemna awelna nafis-nafsi.

⁵Jes gamserem aaiserem jegme gemer, nei angtane Kristus nejeya tebanaram safe unggwanfer, jengga nei seyafter tifni daamfennam, aam temawer nei Yesus nemsa tebana, ane nei Jebar daamfennaber gwena. Nei seyafter nesa dupdupwesini tifni daamfenna, tifni Kristusmanaiserem jebe.

⁶Au, awelna nemna ganma gwebi, baabeta nafis-nafsi Uwa Sanbagiri nep nes jes kitulminirim jeme, ane waakena Jelemanaiserem Jei nep nes jes kitulminirim jeme. Afa Uwa Sanbagiri Jei baabeta ibe is jam gam gulbanaram enggalfe taterisi Jei aa jes gam gulbanaram jem gam nasbinennef, sya, aamei taterisi ga jam igam nasbili iner gemer igam taabilirim Uwa Sanbagirminiwer.

⁷Afa Uwa Sanbagiri Jei baabeta ibe is jam gam gulbanaram enggalfe angtane nafsi jem batobaabif, sya, aamei angtane nafsi ga jam igam batobaabili. Afa Uwa Sanbagiri Jei baabeta ibe is jam gam gulbanaram enggalfe angtane nafsi jem towas-towastababif, sya, aamei angtane nafsi ga jam igam towas-towastababili.

⁸Afa Uwa Sanbagiri Jei baabeta ibe is jam gam gulbanaram enggalfe angtane nafsi jemna ini gam kanautabaipmif, sya, aamei angtane nafsi ini jemna ga jam igam kanautabaipmini. Afa aamei apgal jigala angtane nafisef jam igam gularam, jem fwaina ijam bilipmiyen. Afa aamei jematem sanbakf igam gwenaram, aamei awelna ga jeber-jeber igam gwebuwena. Afa aamei angtane im sarabosna jam igam batobanaram, aamei ga ini saaser-saasermer igam batobana.

⁹Enggamfener ijama guyon, “Ai ims nesiktene.” Jengga angtane bunarsusfer igama nesiktababili, seiseyam ijama gweyan. Gasa irfwena kapkaiserem jewer, ane jeber-jeber waakenaiserem ga isa eyebuwena.

¹⁰Aamei in ina jam isa nesiksonanna enggam gamserem, ayana jei oson mesna aa gemer gane nesiktababilirim. Gwan ga aamei igama gunu angtane nafsiserem jem temawer, jei waakena.

¹¹Gamjon ijama kwaalaamitsweyan, jengga awelna baabetfer isa gwebili. Se gwebi awelna Tuhanmana ini saaser-saasermer.

¹²Ini imna saaser-saaserfer sege folbamini, aam temawer aamei igemera fibili Uwa Sanbagiri igalaba tebanaram. Angtane nafsi afa jei kapkaiserem ibe is jam gam ne eyeipminirim, aamei ini kanaufer igama fina, ane sembayanga jeber-jeber isa gwebabuwena.

¹³Afa angtane Kristen jei tumilgal afa fene fas, aamei jep isa kitulmini. Angtane afa jam gam wofenaram, ga gam fortyaram im jenabe, ga igama tebabili ilem jenabe.

¹⁴Sembayanga Uwa Sanbagirf igama gwebabana, jega Jei waakena Jelemanaiserem ga gam golmini angtane ip kapkaiserem is jei gane eyeipminirim. Enggam Uwa Sanbagiri ijama balyan, “Aamei kapkaiserem jes Is golmini jebe.” Jengga enggam igama gunu, “Waakena Ilemanaiserem ga jes Is golmini jebe.”

¹⁵Angtane ini saaser-saaserfer aa jemanem gangge folbaminirim, ini iman mesna jebar ga is saaser-saaserfer gangge folbamini. Angtane jam gangge syebuwenaram, aamei jebar seyafter isa syawena.

¹⁶Im afelen mesna ane angtane nafsi mese, jei nawersamer waakenaiserem jes isa eyeipmini jebe. Angtane naura jeiserem jebe, nafis-nafismer ijama eyeipmiyen. In ina tefner ijama teteyan, jengga isa gwebili awelna igsususerem galyan. In ina ijama gitmiyen enggame, “Ai tousa seyafter.”

¹⁷Angtane afa kapkaiserem ise jam sene eyeipminirim ibe, aamei safnant, kapkaiserem ijama fwayenulmiyen jebe. Jengga angtane seyafter aa jes gane bilirim waakeneme, aamei ga jes isa eyeipmini jebe.

¹⁸Waakenfer isa gwena angtane nafsiserem jebar, afa enggam igama gunurum, “Aaiserem samfer, ai jebar waakenfer agma gwef.”, ane aamei baabeta ga isa domola jeiserem jem temawer.

¹⁹Am afelen mesna, fwaina kapkaiserem ijama golmiyen angtane kapka is jei ne eyeipminirim ibe. Jengga aamei Uwa Sanbagiriserem Jes is bala, “Uwa Sanbagiri Aamei angtane jeiserem jam Is tamtamtababili.” Taterisi Uwa Sanbagirmanaiserem jep ga enggam baatultel: “Ai Aner As golmisi fwaina kapkaiserem, Ai As tamtamtababisi angtane kapka aa jei ne eyebilirim.”

²⁰Jeiserem ipsama eyebilirim, jengga aas isa eyebili Taterisi Uwa Sanbagirmana jep aa gam tulisulum: “Afa ginanggwana imna wisi jam gam folbanaram, aamei ga tumilgala jebe jam isa gulbana. Afa jei fo botona jam gam folbanaram, aamei ga fona jam isa gulbana jam telbife. Ga enggam, afa aamei jes gamserem gam jam igama waakenfer eyebilirim, gam jega aamei jes igama gwebana jei ga gam seferswena.”

²¹Afa angtane jei kapka ip is jam gane eyeipminirim, fwaina kapka ijama golmiyen, aam temawer aamei isa kalaswena. Jengga aamei isa menangswena, afa aamei waakenaiserem jem isa fwainulminirim.