Read Berik Roma 6 Bible Online

Roma 6 - Berik bible

Roma 6

¹Uwa Sanbagiri Jei waakena Jelemanaiserem nebe nes unggwanfer golmini. Gam jega ibas sarbisnenne ilem inibe? Ke samfer nei jeber-jeber etam-etama kapka nesa eyebuwena, jega Uwa Sanbagiri Jei jeber-jeber waakena Jelemanaiserem uskambar nes gase golmini?

²Wowo, gamyan! Nei nemsa tere Kristusfar, ane nei nemsa mirulu etam-etama kapkaiserem. Jega jem temawer, afa nei jeber-jeber etam-etama kapka jam nesa eyebilirim, jeiserem je kapka.

³Bunar-bunarsus aamei imsa towaswena enggame, aamei igalaba baptiswenaram Kristusem boseme, aamei Jebar daamfennaber igangge nwini, ane Jebar igangge tere.

⁴Ga enggam, angtane nei jam nes galap ne baptistababilirim, baptisana jeiserem jeme nei ga Kristusfar seyafter ga jem negama tere, ane nes gane tatarbaabunurum Kristusfar. Nei gam neya eyebilirim jega nei ga nesa gwena ibirmi. Aaiserem Kristusminip aa gam etamwelaram jes galserem, Uwa Sanbagiri Jei aa galap irtestenantam terewer, baabeta unggwandusa Jemnaiserem jeme.

⁵Afa nei Jebar daamfennaber Jei aa galap tererem, gam jega nei bunarsusfer Jebar daamfennaber nei nejeba irwesaram terewer Jei gemerserem.

⁶Angtane jam gam tererem, etam-etama kapka jemnaiserem gamjon jem sanbakefe jam nwinyen. Jes gemerserem nei enggam neya towaswebili, nei Kristusfar nemsa tere, ane etam-etama kapka nemnaiserem jei mes tere Kristusfar ti salibibe. Tere Yesusmanaiserem jeme, baabeta etam-etama jem mesam borola, jega etam-etama kapka jeiserem nem sanbakfe jam nwinyen.

⁸Nei nemsa tere Kristusfar. Gam jega nei waakenfer neya tebana enggame, nei nesa nwinsi Jebar.

⁹Nei nemsa towaswena enggame Kristus Jeiba mesam irwenant terewer, ane gamjon Jei Jam teryen, ane tere gamjon baabeta fas Jemnibe.

¹⁰Jei daamfenfener ter, ane Jei aa galap terem, Jei mes borolsinint baabeta etam-etama kapka jeiserem. Ane Jei namwer aa jep gwenaram, Jei ga awelna Uwa Sanbagirmana gam eyeibene.

¹¹Ane jes gemerserem, aamei iner isa sarbili enggame, aameiba imsama tere, ane etam-etama kapkaiserem jei baabeta fas imnibe. Gasa gwe, awelna Uwa Sanbagirmana jes gweyibefe, Kristus Yesusfar daamfennaber isa gwena.

¹²Jes gamserem gamba waakenam, jengga aayai, etam-etama kapkaiserem im sanbakfe galap se nwini im tifinibe, tifni jam tereserem. Ane ini imna unggwan-giri is jep ge folbaminirim etam-etama kapkaiserem jam eyebife, seyafter jeiserem ijama eyebiyen.

¹³Jengga tafa mese, tof, nwe imnaiserem, ane tifin safna afweraiserem, aayai, jei etam-etama kapka jep ne gwebit. Jengga enggam angtane gwanan tere gamserem ane gamjon gam irwena, aamei ga ina isa tete Uwa Sanbagiri Jebe, jega tafa mese, tof, nwe, ane tifin safna afweraiserem ga waakenaiserem jetefener sene eyebili Uwa Sanbagirfe.

¹⁴Gam jega enggam, etam-etama kapkaiserem jei im sanbakefyan, aam temawer aamei gamjon ijama gweyan Hukumu aa gam towas-towastababilirim. Namwer Uwa Sanbagiri Jei im Sanbakef nwini, ane Jei waakena Jelemanaiserem jeber-jeber ip golmuwena.

¹⁵Namwer aamei ibasa sarbisnenne ilem inibe? Nei gamjon nejama gweyan Hukumu jes nes gam towas-towastababilirim. Nei Uwa Sanbagirfar nesa gwena Jei nem Sanbaka, ane Jei waakena Jelemanaiserem nep nes mes golmini. Nei etam-etama kapka ke jeber-jeber nesa eyebuwena? Wowo, gamyan!

¹⁶Aameiba imsama towaswena, afa aamei enggam igama gunurum, “Ai awelna imna isas eyeibene, ane asa eyebili awelna seyafter ijes bilirim.”, jepga aamei jeber-jeber ga igama eyebili ilem sanbaka is jes gam bilipminirim. Afa etam-etama kapkaiserem jei im sanbakef gam nwinirim, aamei igama tere. Afa Uwa Sanbagiri Jei im Sanbakef gam nwinirim, ane aamei igama eyebili seyafter Jes gam bilirim, jepga Jei enggam ga gam gunu, “Ini imna waakena.”

¹⁷Jengga au, nei Uwa Sanbagirfe, “Ase samfer gulbana.” ganma bilibe, aam temawer gwanan galapserem etama-etama kapka je im sanbakef nwinint, jengga namwer aas jepserem Uwa Sanbagiri Jei Taterisi Jemna is mes golmini. Ane aamei bunarsusfer Taterisi jeiserem ga imsa onsobili.

¹⁸Gwanan jepserem etam-etama kapkaiserem je im sanbakef nwinint, jengga namwer Uwa Sanbagiri Jei is mes aftabunnu etam-etama kapkaiserem jewer, ane Jei im Sanbakef nwini, jega aamei ga waakena ga isa eyebili Jei aa jes bilirim.

¹⁹Ai surta aaiserem ai tulistababili kata-kata waakenfer aaiserem jeme enggalfe aamei waakenfer igama sarbif, aam temawer imna ini gemerje, jei weren-werna. Gwanan jes galapserem aamei etam-etama kapkaiserem ima eyebunant tafam, tofem, nwem, ane aaremem, ane aamei waakenfer ijama gweyan. Jengga namwer aas jepserem, imna tafa, tof, nwe, ane aarem ga waakenaiserem aam ga jetefener isa eyebili, ane waakenfer isa gwena.

²⁰Gwanan etam-etama kapkaiserem im sanbakef aa galap nwinintim, aamei bunarsusfer ijama eyebiyen, Uwa Sanbagiri aa jes bilirim.

²¹Etam-etama kapka jeiserem igalaba eyebilintim, waakenaiserem ke mes etamwena? Wowo! Ane namwer aamei ijama sefersona, etam-etama kapka gwananmanaiserem jem temawer. Angtane etam-etama kapka galserem aa jei gam eyebilirim, jei ga jei gam tere.

²²Jengga namwer Uwa Sanbagiri Jei aamei is mes aftabunnu etam-etama kapkaiserem jewer, ane Jei im Sanbakef nwini. Waakenaiserem aa je etamwenaram ga enggam, aamei isa eyebili Uwa Sanbagiri aa jes bilirim, ane aamei ga isa domola waakenfer gwelaiserem jamer abak-abaksus.

²³Etam-etama kapkaiserem jem fwaina ga ter. Jengga Uwa Sanbagiri Jei nes golmini waakenfer gwelaiserem jamer abak-abaksus, ane jeiserem nei nejama armanulyon. Jei ga jeiserem Jei nese jafner golmini, aam temawer nei Yesus Kristus Tuhan nemnaiserem nejewera tebanaram.