Read Berik Roma 7 Bible Online

Roma 7 - Berik bible

Roma 7

¹Am afelen mesna, aamei imsa towaswebili hukumem temawer. Bunar, ai namwer ajes tulistababilirim, aamei imsa towaswebili. Hukumu jei baabetabara angtane gemer jep gam gwenaram. Jengga angtane jam gam tererem, hukumu je baabeta fas angtane jeiserem jemnibe.

²Ai enggamfener ai gunu, hukumu wi anggwa je gamserem. Wini aasaje anggwafar jena jam gangge teterem, ane anaiserem jam teryen, jei anggwana nafsi jam geryan. Jengga anaiserem jam gam tererem, jei gamjon jam onsobiyen hukumu wi anggwa jeiserem, anggwana gwananaiserem jebar. Jei samfer anggwana nafsi gam gera.

³Jengga anaiserem gemer gam nwinirim, afa jei anggwana nafsi gamjon jam gam geraram, nei negama bili jei maaryens gwebili. Jengga anaiserem jam gam tererem, jei ga gam ferwetini. Afa jei anggwana nafsi gam geraram, jei maaryena jam gwebiyen.

⁴Afa jes gamserem am afelen mesna, Hukumu Nabi Musa aa jes tulistababilim ga enggala anggwana imna je galserem. Jengga aamei imsama tere Kristusfar, jega jem temawer Hukumu jei gamjon baabeta imnip fas. Namwer aamei imsa etamwena Kristusmanfe, aa Jei irwenantam terewer. Ane aamei samfer Jebar isa gwena, ane waakena isa gwebili jega ini Uwa Sanbagirmana saaser-saaserfer gase folbana.

⁵Nei gwanan ini nemna kapkaiserem jesma onsobaabili, Hukumu aa jes bilirim, “Enggam ijama eyebiyen.” Jega jem temawer ini nemna unggwan-giri kapkaiserem jes eyebife, ane nei etam-etama kapkaiserem unggwanfer ga nejesa eyebili. Jega jem temawer, nei nemsa tere.

⁶Namwer Hukumu jam nwinyen nem sanbakfe, aam temawer nei nemsa tere Kristusfar, ane nei nes mes aftabunnu Hukumminiwer. Ane Mafnana Uwa Sanbagirmanaiserem Jei baabeta nes mes golmini, ane nei nele ibirmi nemsa damtana awelna Uwa Sanbagirmanaiserem nejama gweyibefe. Nei gamjon nejama onsobiyen Hukumu gwananmana aa jes ne tulistababilim.

⁷Afa ga gam jes gamserem, nei ga bas nesa bili nelem inibe? Hukumu jei ke kapka? Fasfasus! Jengga enggam, Hukumu jei ams towas-towastana etam-etama kapkaiserem jem temawer. Hukumu ga enggam gunu, “Apgal jigala angtane nafsimana, ipsama bilt ilem inibe.” Jengga enggam, aiba uskambara bili alem inibe. Afa Hukumu gam as jam towas-towastayana, ai ajam towasweyan enggame jigala angtane nafsimana ai alem inibe jes agam bilirim, jeiserem jei ga etam-etama kapkaiserem jes ajam eyebili.

⁸Hukumu as galap towas-towastanaram, jigala angtane nafsimana ai jes agam bilirim inibe, etam-etama je baabetabara, jamere ini amna jewer jon unggwanfersus as gam folbana enggalfe, jigala unggwanfer jewer gam damtabif. Afa Hukumu fas, etam-etama kapkaiserem je baabeta fas.

⁹Gwanan jes jepserem ai Hukumu ajam towaswebiyen, ane ai waakenfer ai gwenant, daran-darna fas. Jengga nunu Hukumu ai as galap towas-towastanantam, ai ga jep ai towaswena enggame, etam-etama amna jei kapka. Jega jem temawer, ai ajam tere gamserem.

¹⁰Hukumu jeiserem aane golmil angtanefe, jega angtane waakenfer gam naawef. Jengga Hukumu jeiserem je abe as ters gulbanant.

¹¹Etam-etama kapka je baabetabara, Hukumu ase galap towas-towastanaram etam-etama kapka jem temawer. Etam-etama ams afaftana, ane ai etam-etama kapka unggwanfer ajes eyebif. Ane jega jem temawer ai ga ajam tere gamserem.

¹²Nei enggam neya towaswena, Hukumu Nabi Musa aa jes tulistababilim seyafter jeiserem je Uwa Sanbagirminiwer. Ane daamfen-daamfennem jeime Uwa Sanbagirminiwer, ane jeiserem je bunar, ane je waakena.

¹³Enggame, Hukumu waakena jeiserem je ke ai as jam se munbono? Fas! Jengga Hukumu jeiserem enggam gunu, “Etam-etama jeiserem ijam eyebiyen.” Jengga ai etam-etama kapka jeiserem ajam eyebif, jepga etam-etama kapka jeiserem ga ai eyebili, ane jepga ai tere. Jega jem temawer, etam-etama kapka jeiserem gamjon jam sowesiyen, ane ai jepga ai towaswena enggame, etam-etama jeiserem jeba kapkam. Hukumu je ai as enggam towas-towastana, etam-etama kapka je bunarsusfer ba kabwaksusum.

¹⁴Nei nemsa towaswena enggame Hukumu jeba waakenam, aam temawer Mafnana Uwa Sanbagirmanaiserem Hukumu jeiserem nep ga nes Jei golmil. Jengga ai angtane kapka, ai angtane ogirmana. Etam-etama kapka je am sanbakf nwini.

¹⁵Ai teisyena ai ajes eyebilirim jem temawer. Ai jam ajes eyebiliserem, jeiserem ai ajam eyebiyen. Ane ai bunarsusfer baife jes agam gwebilirim jam eyebiyenfe, jeiserem ai ga jes agam eyebili.

¹⁶Ai kapkaiserem jam agalap eyebilirim ai baife jes agam gwebilirim jam eyebiyenfe, ai enggam ai gwerauwulu alem inibe ai tousa enggame Hukumu jeiserem ba waakenam.

¹⁷Ai enggam ai towaswena, etam-etama kapka jeiserem gam ke ai antowai eyebuwena. Jengga etam-etama kapka am inip aaiserem ga jei gam eyebili. Ini kapka amnaiserem ga as jei gam bala enggalfe etam-etama kapka jeiserem ajam eyebife, ane ai jeiserem ga agam eyebili.

¹⁸Ai enggam ai towaswena waakena fas alem inibe. Ini amna jei kapka. Ai waakenaiserem ajes eyebif, jengga gam ai ajam eyebiyen.

¹⁹Ai jam ajes eyebif waakena jeiserem, jengga ai jei ajam eyebiyen. Ane ai kapka baife jes agam gwebilirim jam eyebife, ga jes agam eyebili.

²⁰Afa ai jam agam eyebilirim, ai baif jes agam gwebilirim jam eyebiyenfe, gam jega jeke aner agam eyebili. Fas. Jengga etam-etama kapka am inip aaiserem ga je gam eyebili.

²¹Gam jega ai enggam ga ai towaswena am inip aa gam etamwenaram; ai waakena jam jep agam eyebilirim, kapka jeiserem je nele ga as gam isinbaabisini.

²²Ai bunarsusfer enggam ai towaswena, ai Hukumu Uwa Sanbagirmanaiserem jes as nesikulu.

²³Jengga ai enggam ai towaswena nafsi am tifni seyafter jep aa gam etamwenaram. Ga enggam, etam-etama kapka jeiserem seyafter am tifinip nwini, ane je Hukumu Uwa Sanbagirmanaiserem ai ajes nesikulurum ga jebar ge doksona. Ane kapka jeiserem je am sanbakef nwini.

²⁴Ai gamjon ai gunu, ai aner Hukumu Uwa Sanbagirmana jes as nesikulu, ane jeiserem ai jes onsobif. Jengga etam-etama kapkaiserem je am inip nuniton. Etam-etama kapkaiserem je am sanbakef nwini, ane ai ter nels onsobana. Wa, ai kabwaksusu gam enola! Ai as nane se waakentaasini ter nele jeiserem jewer? Ai bunarsusfer Uwa Sanbagiri as bala, “Ase samfer gulbana.”, aam temawer Jei Tuhan nemna Yesus Kristus mes baftatnant, ane Jei ai as mes waakentababisini.