Read Berik Roma 9 Bible Online

Roma 9 - Berik bible

Roma 9

¹Ai ajes nasbilirim ai bunarsusfer ai nasbili, aam temawer ai Kristusmana, ane ai ajam afafweyan. Mafnana Uwa Sanbagirmana Jeime as towastana alem inibe enggame, ai bunarsusfer ai nasowena.

²Ini amna as unggwanfersus jenbawena, anggwabura amna Israel jem temawer.

³Ai unggwanfersus enggam ai gunu alem inibe, jega anggwabura Israelmana jei Yesus ga sene tebasa. Jepga Uwa Sanbagiri gase waakentababisisi. Jei am afelen mesna, anggwabura amnaiserem jewer. Ai safe Kristus jam as mirtetefala, ane babapsobala Uwa Sanbagirmana as tenbene, ai samfer jeiserem as eyebili, jega Uwa Sanbagiri anggwabura jeiserem gase waakentababisisi.

⁴Gwanan jes jepserem, Uwa Sanbagiri anggwabura Israelmana mesam destabaabil enggame anggwabura Jelemana. Jei aa gul anggwabura jeiserem jem temawer jei ga tantantane Jemna. Uwa Sanbagiri Jei jebar ge nwinbel, ane baabeta Jemna ga aa ge saamil. Jei taterisi igsusu jep aa jes bilipmilim, ane Jei Hukumu jep ga golmil. Ane Jei jep ga towastababil Jei jam pujitele gamserem, ane Jei aa gul jem se batobaabili.

⁵Asal-asal jemna ba Abraham ane nafis-nafsi, ane anggwabura jeiserem Kristus ga jewer surnu. Kristus Jei seyafter Sanbakef nwini. Nei bosna Uwa Sanbagirmana nesa pujiwulbono abak-abaksusfer! Amin.

⁶Jengga ai enggam ajam guyon, Taterisi Uwa Sanbagirmanaiserem anggwabura Israelem temawer aa jes bilim, jei gemerje fas etamwena. Ai gam ajam guyon. Jengga enggam, angtane anggwabura Israel seyafter gemerserem jei gam ke bunarsusfer angtane Israelmanfenna. Wowo.

⁷Ane gamjon ga enggam, asal-asala Abraham gemerserem jei gam ke bunarsusfer tantantane Abrahammanfenna. Uwa Sanbagiri Jei Abraham mes bal, tane nawan jelemana Ismael ane Isak jem temawer, “Isak tane imnaiserem, ane asal-asala jemna gemerserem, Ai enggam Ai gunu jei bunarsusfer asal-asala imna, ane jam Ajes kitulstef aaiserem Alem angtanefe.”

⁸Jemna igi ga enggam, Uwa Sanbagiri Jei enggam Jam guyon seyafter asal-asala Abrahammanaiserem enggame, “Jei angtane Alemana, jei bunarsusfer asal-asala Abrahammana.” Jengga Tateris Uwa Sanbagiri aa jes nasbilim, angtane taterisi jeiserem aa jei ne taabilirim, jei ga jetefener asal-asala Abrahammana bunarsusfer ga jes. Jeiba angtane Uwa Sanbagirmanam.

⁹Uwa Sanbagiri Jei Abraham ga enggam bal, “Nunu Aner isa jep mwanggibenerem, Ai gamjon ga As waraulfaltya, ane wini imna Sara jei tane girtowai gase damtana.”

¹⁰Ane gam ke tane nauna Abrahammanaiserem Ismaelo Isak gam ke jem temawenefener. Ribka jei tane naura gam tosona, Esau yo Yakub, ane jemna jeta jei daamfenna, Isak asal-asala nemnaiserem.

¹¹Ane Ribkam temawer, jei tane naura jeiserem galap jes tosolaiserem, Uwa Sanbagiri Ribka ga enggam bil, “Osonaiserem jei ayanem sanbakef se nwini.” Uwa Sanbagiri Jei taterisi jeiserem ga jes bil nalefe tane nauna jeiserem jam tosoyan, ane jei nalefe waakena afa kapka jam eyebiyen. Jeiserem ga enggalf etamwel, jega samfer Uwa Sanbagiri Jei nes gase towas-towastababili enggame Uwa Sanbagiri Jei se gaartena angtane Jen aa jes balaram jem gaartefe. Jei angtane jam gaarteyan enggalem temawer angtane jeiserem jei waakena aa jes gam eyebilirim, afa kapka aa jes gam eyebilirim.

¹²

¹³Taterisi Uwa Sanbagirmanaiserem jep ga enggam tulisul, “Ai Yakubs As nesiktene, jengga Esau jei fas.”

¹⁴Gam jega nei ga fomfom nesa gunu jeiserem jem temawer? Nei ke enggam nesa gunu, Uwa Sanbagiri Jei bunarsusfer Jam eyebiyen? Fas! Jei seyaftersus bunarsusfer eyebili.

¹⁵Uwa Sanbagiri Jei Nabi Musas bal, “Ai angtane As nesiktene angtane Ai Aner Ajes balaram jam nesiktefe, ane Ai angtane As batobana angtane Ai Aner Ajes balaram jam batobafe.”

¹⁶Gam jega Uwa Sanbagiri Jei angtanefe waakena Jam eyeibeyen aam temawer angtane jeiserem jei jener aa gemer gam gunurum, afa enggam angtane jeiserem jei waakenfer aa jewer gam eyebilirim. Wowo, gamyan. Uwa Sanbagiri Jei angtanefe waakenaiserem gam eyeibene, aam temawer Jei Jeneram gunu jam eyebife.

¹⁷Uwa Sanbagiri Jei Raja Mesir ga enggam bal Taterisi Jelemanaiserem jebe: “Ai aamei is Ai gaartena enggalfe aamei rajaf igam nwinf. Ai kabwaktalaiserem jam isAs eyeipminirim im nenennabe, angtane seyafter baabeta Amna ga Asene domolbana. Ane angtane ogirip seyafter gemerserem ga sene towaswebili, ane bosna Amnaiserem jem temawer ga sege nasbawena.” Jepga Uwa Sanbagiri Jei raja jeiserem ini jemna kekeletabasil, ane jei angtane Israelmana jam balbabiyen jam totyefe.

¹⁸Gam jega Uwa Sanbagiri Jei angtane gase nesiktene Jei Jener aa jes balaram jam nesiktefe, ane Uwa Sanbagiri Jei ini angtanemana se kekeletabaipmisini angtane Jei Jener aa jes balaram ini jam kekeletabasife.

¹⁹Jengga aamei ga as im tenebana, “Afa jeiserem bunare, ane angtane Uwa Sanbagiri Jei aa jes mwangbisinirim jei afa jam kwirulsiyen, jeje bafa Uwa Sanbagiri Jei fwaina kapka ga aa golmini angtane kapkaiserem aa jei ne eyebilirim jebe?”

²⁰Jengga ai enggam ai tamawola, aamei angtane tefner. Bunarsusfer aamei Uwa Sanbagiri gam ijam teneyan. Pot bungana jeke angtane aa jei gam eyebilirim jei ke gam tenebana enggame, “Jeje bafa aamei ai enggam ga as im eyebili?”

²¹Nei nemsa towaswena enggame, angtane aasaje pot bungana onnawer gam eyebili. Jei ona aa jes gam murmurulurum, ona jeiserem gam waksosini. Jei afwer ga pot bungana waaken-waakensususerem ga galf gam eyebili nudwasfe. Ane afwer jei ga pot bungana bastantowaifer waakenaiserem ga galf gam eyebili nunu jeber-jeberfe. Ane jei samfer jei jener biliserem.

²²Ane nei gamjon nemsa towaswena enggame, aaiserem jeme bunar Uwa Sanbagiri aa jes eyebilirim. Jei safe kakala Jemna ane baabeta Jemna saf jam gwerauwulf, jengga Jei abakfer fina angtane kapkaiserem aa jei ne gwebanaram jamer Jei aa kakalswena, angtane Jei jam jes kabwaktababiliserem.

²³Jei abakfer fina angtane kapka jeiserem, aam temawer Jei angtane nafsiserem ga jem temawer sarsnenne, angtane Jemna nesiktele Jam jep golmiliserem. Angtane jeiserem jeiba jesam Jemna nafdusa jam jep gwerauwulmiliserem, angtane Jei fwater aa jes kitulstelam enggalfe Jemna nafdusa gam ne taayibef.

²⁴Ga enggam, neiba angtane Jei aa jes kitulstelam, anggwabura Yahudimana jemniwer ane anggwabura Yahudimanyanaiserem jemniwer.

²⁵Uwa Sanbagiri mesam gul bukunu Nabi Hosea jebe enggame: “Angtane Amanyanaiserem jem temawer, Ai Agam balbabili, ‘Angtane jeiserem jei Amna.’ Ane angtane Ai Ajes nesikteyeneiserem, Ai Agam balbabili, ‘Angtane aaiserem jeiba Ajesam nesiktababili.’ ”

²⁶Ane gamjon, “Tampata Ai aamei isa Ajep balbabilirim, ‘Aamei angtane Amanyan’, tampata jeiserem Ai aamei ga isa jeber As balbabisi enggame, ‘Aameiba tantantane Amna, ane Aiba Uwa Sanbagiri aa jei gwenaram.’ ”

²⁷Ane Nabi Yesaya jei uskambarsus ga gutena anggwabura Israelmanaiserem jem temawer: “Angtane Israelmana safe unggwanfer sege unggwanswebili, uskambar enggam fi dwisi gemerserem, Tuhan Jei safna bastantouya tefner se waakentababisisi jemniwer.

²⁸Ane Tuhan Jei angtane aa jep tamtamtababisirim ogiri seyafter aaiserem jebe, Jei se tamtamtababisi tatarfer ane baabeta Jelemanaiserem jeme.”

²⁹Ga enggam Yesaya gwanan aa gam gulum: “Afa Tuhan, baabeta Jemnaiserem jeme Jei angtane seyafter fwater jam gam tamtamtababilim, gam jega namwer tamna nemna je taman teten, kotana Sodomo Gomora jes gamserem. Jengga Jei safna bastantouya gam nesiksona, ane ga nes waakentababisini.”

³⁰Igi jame ajes tulisulurum ga enggam: Angtane Yahudimanyanaiserem jei enggam jam ne terelbiyen jam sarbife Uwa Sanbagiri aa jes bilirim, “Aamei angtane waakena.” Jengga jei Uwa Sanbagiri Jei tefner ne tebasini, ane Jei ga aa gunu, “Aamei waakena.”

³¹Jengga angtane Israelmana Hukumu jei ne onsobili, jega Uwa Sanbagiri samfer se balbabili “Aamei waakena”. Jengga masef, Uwa Sanbagiri Jei gam Jam guyon.

³²Jeje bafa Uwa Sanbagiri Jei gam Jam balbabiyen? Jei Jam balbabiyen game, aam temawer jei Hukumu sene onsobili jega jewer gam ge sarbife Uwa Sanbagiri aa jes balbabilirim enggame, “Aamei waakena”. Jei Kristus jam ne tebayan. Jepga jei enggam ga aa ge janbiton, angtane aas galserem jei ton-giri nelep aa jei falaram jep aa gam ge dargaswebilirim, ane ga aa ge janbiton.

³³Taterisi Uwa Sanbagirmanaiserem jep ga enggam baatultel ton-giri jeiserem jem temawer: “Sa domol, Ai ton-giri ga Kota Siyon ga Ajep gaarantena. Angtane jei ton-giri jeiserem jebe sege dargaswebisi, ane ga sege janbiton. Jengga angtane Jei aa jei ne tebanaram, jemna ini jam ge jenbamiyen.”