Read Berik 1Korintus 12 Bible Online

1Korintus 12 - Berik bible

1Korintus 12

¹Surta aamei gwanan ap as ijesa tulisulbonontom, aamei ga ams ima tenebana baabetem temawer, baabeta afa karunya Mafnana Uwa Sanbagirmana angtane Kristus aa jei ne tebanaram jep aa jes kitulminirim. Am afelen mesna, baabeta Mafnana Uwa Sanbagirmana aa jes kitulminirim, baabeta jeiserem ga nafis-nafsim kitulmuwena. Ai enggam ai gunu, ai aafe isa ajam towasulmif baabeta nafis-nafsiserem jem temawer enggalfe, aamei waakenfer gam isa sarbili.

²Aamei imsa sarbistaabona enggame, aamei Kristus nalef ijama tebayan, jes galapserem bwat kapka unggwanfer jei aamei is jeteram afaf-afaftababuwenant, ane jega jem temawer aamei tiborma jam kwirtabaabiliserem igama pujitababif, tiborma baabetyenaiserem.

³Jega jem temawer, ini amna ga as enggam folbana, aamei taterisi aaiserem waakenfer ijama towaswebif: Angtane aa jei gam nasounaram baabeta Mafnana Uwa Sanbagirmanaiserem jeme, angtane jeiserem jei fasfasus enggam jam guyon, “Yesus se babapsoba!” Angtane aa jei gam nasounaram baabeta Mafnana Uwa Sanbagirmanaiserem jeme, angtane jeiserem jei enggam gam gunu, “Yesus Jeiba Tuhansam.”

⁴Baabeta Mafnana Uwa Sanbagirmana nep nes jes kitulminirim nei Kristus nejeya tebanaram, baabeta jeiserem jeba nafis-nafsim aa jes kitulmuwenaram. Jengga baabeta seyafter jeiserem safe nafis-nafsi, Mafnana daamfennaiserem ga Jei gam kitulmuwena.

⁵Nei Kristus nejeya tikwebaatinennerem, awelna nei nejesa gwebilirim, awelna jeiserem nafis-nafsi. Jengga awelna nei seyafter nejesa gwebilirim, awelna jeiserem ga Tuhan daamfennaiserem ga neJeba gweyibene.

⁶Uwa Sanbagiri Jeiba daamfennam, jengga Jei awelna nafis-nafismer gam gwebili, nei angtane Kristen seyafter gemerserem gwela nemnaiserem jebe.

⁷Mafnana Uwa Sanbagirmana Jei baabeta Uwa Sanbagirmana nebe nes daamfen-daamfennem kitulmuwena, jega enggalf angtane Kristen seyafter gemerserem gam gane batobaabili.

⁸Mafnana Uwa Sanbagirmana Jei tousaiserem enggalf se golmini angtane Kristen afweraiserem jebe, taterisi waakenfer gam ne nasbinennef, taterisi Uwa Sanbagirem temawer, ane Taterisi Waakena bunarsusferaiserem.

⁹Mafnana daamfenna jeiserem Jei baabeta enggalf golmini angtane Kristen afweraiserem jebe, jega jei kanaufer gane tebaf enggame, Uwa Sanbagiri Jei ga etam-etama unggwandwasususerem gase eyebili. Ane angtane nafsiserem jep jegme baabeta enggalf golmini, angtane gam waakentababif bwerna nafis-nafsiserem jewer.

¹⁰Mafnana Uwa Sanbagirmana Jei baabeta enggalf golmini angtane Kristen afweraiserem jebe, jei bwembwema waakensusu jem gane eyebif. Ane angtane nensa jep jegme baabeta enggalf golmini, jei taterisi gane nasbinennef, taterisi Uwa Sanbagirminiwer namwer aa jes gane domolaram. Mafnana jeiserem Jei angtane nafsiserem baabeta jep jegme enggalf golmini, angtane jeiserem jei gam gangge towaswebili angtane aa jei gam nasbilirim jem temawer. Jei enggam gangge towaswebili angtane jeiserem jei ke baabeta bwata kapkaiserem jem gam nasowena, afa jei ke baabeta Mafnana Uwa Sanbagirmanaiserem jem gam nasowena. Ane Mafnana Uwa Sanbagirmana Jei angtane Kristen afweraiserem jep jegme baabeta enggalf golmini, jei gam ge nasbawef ula nafis-nafsiserem jeme, ula jei jener jam ne towaswebiyeneiserem, ula jeiserem angtane fas jam ne towas-towastayan. Ane angtane nafsiserem jep jegme baabeta enggalf golmini, jega jei ula nafis-nafsi jeiserem jei jam towaswebiyeneiserem jem igiserem ga gam sarbili, ane angtane n(...)

¹¹Baabeta seyafter jeiserem safe nafis-nafsi, jengga Mafnana Uwa Sanbagirmana daamfenna jeiserem nebe ga nes Jei kitulmuwena. Ane Mafnana Uwa Sanbagirmana Jei nei seyafter gemerserem nebe nes daamfen-daamfennem se kitulmuwena, Jei Jener aa gemer gam gunurum.

¹²Tifni imna seyafter ba daamfennam, jengga tifni imna jeiserem jebe safna anesus. Ane tifni imna jeiserem safan mesna safe unggwanfer, jengga tifni imna ga daamfenna, safna seyafter jeiserem jemniwer. Jes gemerserem aaiserem jegme gemer, nei angtane Kristus nejeya tebanaram safe unggwanfer, jengga nei seyafter tifni daamfennam, tifni Kristusmanaiserem.

¹³Nei seyafter Kristus nejeya tebanaram, nei nes mesam baptistababili Mafnana daamfennaiserem jeme, jega enggalf nei gam nesa etamwena daamfen tifniber Kristusfar. Angtane afweraiserem nemniwer jei angtane Yahudimana, ane afwer ga angtane Yahudimanyanaiserem. Angtane afwer nemniwer jei angtane bastowaisusu, ane afweraiserem jei angtane sanbaka. Safe gam, neiba tifni daamfennam, ane Uwa Sanbagiri Jei nei seyafter gemerserem Mafnana daamfenna nes mesam golmini nem inibe.

¹⁴Tifini seyafter imna ga daamfenna, jengga tifini seyafter imna jemna safna daamfenyan, safna tifinmanaiserem ga unggwanfersus, ane awelna safanemana ga nafis-nafsi. Awelna nei jes negama eyebilirim baabeta nafis-nafsiserem Mafnana Uwa Sanbagirmanaiserem nep nes jes gam kitulminirim jeme, jeiserem ga safna nafis-nafsi tifinmana gemerserem. Angtane Kristen afweraiserem jei ga enggam ge gubili, “Awelna amnaiserem je igyen, ane jega jem temawer ai safna daamfenna tifin Kristusmanyan.” Angtane jei gam aa jewer gangge gubilirim, jeiserem ga enggalam:

¹⁵Afa tufa angtanemana jam gam gunurum enggame, “Ai tafayan, jega jem temawer ai safna tifinmanyan.” Tufa safe jes gamserem gam gang gunu, tufa jeiserem jei jenfentowai jam nulayan tifinminiwer, tufa jeiserem gemer nulna tifinibe.

¹⁶Ane afa imwana jam gam gunurum enggame, “Ai nweyan, jega jem temawer ai safna tifinmanyan.” Imwana safe jes gamserem gam gang gunu, imwana jeiserem jei jenfentowai jam tensiyen tifinminiwer.

¹⁷Afa tifni imna is jam gam etamwebanaram nwefefener, gam jega aamei ga fomfom igam sara? Ane afa enggam tifni imna seyaftersus gemerserem is jam gam etamwenaram imwafe, gam jega aamei apgal jigala fomfom igam aalumbili?

¹⁸Jengga bunarsusfer Uwa Sanbagiri Jei tifni nemna aa galap eyebaabilim, Jei tifni nemnaiserem jem safanfe unggwanfersus eyebaabil, tof mese imwa, nwe, aarem. Jei tof teten fas Jam eyemiyen. Ane tof mese imwa, nwe, aarem seyafter gemerserem, daamfen-daamfennemer mesam bunulntenannal tampata jeberserem jebe, Jei Jener aa gemer gulum. Tafa je jelem tampataber, ane nwe jeme jelem tampataber.

¹⁹Afa tifini seyafter imna is tof tefner gam eyebaipmilim, gam jega tifni imna fas!

²⁰Jengga bunar-bunarsusfer ga enggam, tifini imnaiserem safna jemna unggwanfersus, ane safna seyafter gemerserem aamei ga ijesa balbabili, jengga tifni imna ga daamfenna. Jes gemerserem aaiserem jegme gemer: Uwa Sanbagiri Jei mes eyebili jega nei seyafter Kristus nejeya tebanaram, nei ga safna tifini Kristusmanfe ga neya etamwena. Ane Uwa Sanbagiri Jei ga angtane Kristenf ga awelna daamfen-daamfennem kitulmini jematabe, Jei Jener aa gemer gam gunurum.

²¹Nei angtane Kristenfe nejeya gwenaram, Mafnana Uwa Sanbagirmana Jei baabeta daamfen-daamfennem nep kitulmuwena enggalfe, angtane Kristen seyafter gemerserem jem negama batobaabuwef. Jega jem temawer, nei nen nena nejama tetenanayan baabeta Mafnana Uwa Sanbagirmana nep nes jes kitulmuwenaram jem temawer. Ane nei angtane Kristen nafsiserem enggam nejama balyan, “Ai aamei isa baif gwebana jemata aaiserem jebe.” Tifni imnaiserem jem temawer, nwena imna, tafna imna enggam fasfasus jam gitmiyen, “Afa aamei amnip fas, ai samfer anfentowai as gwena.” Ane duka imna, tufa imna enggam fasfasus jam gitmiyen, “Ai aamei isa bai gwemini. Ai anfentowai gwef.”

²²Gamyan! Safna tifinmanaiserem aa jes gane balbabilirim enggame werna, jeba bunarsusfer safna igsusu.

²³Ane safna tifinmanaiserem aa jes gane balbabilirim enggame safna jeiserem jei igyen, nei safna jeiserem bunarsusfer ga negama gerebaabisnenne. Ane safna tifinmanaiserem aa jes gane balbabilirim angtane nafsi fas jam ne domolyanaiserem, nei safna jeiserem jeber-jeber jam negama matabaabisiwena.

²⁴Jengga safna tifinmanaiserem aa jes gane balbabilirim angtane samfer jam ne damtabiliserem, nei safna jeiserem nejama matabaabisiyen. Uwa Sanbagiri Jei tifni nemna nes mesam eyebaipmil. Ane tof mese imwa, nwe, aarem, Uwa Sanbagiri Jei safna seyafter gemerserem daamfen-daamfenneme waakenfer mesam bunulntenannal tampata jeberserem jebe, jega enggalf safna tifinmanaiserem aa jes gane balbabilirim igyene, safna jeiserem ga waakensusfer gane gerebaabisnenne.

²⁵Uwa Sanbagiri Jei tifni ga gam eyebaabil jes gemerserem, jega tifni seyaftersus jeiserem jam wagwagweyan, jengga safna seyafter gemerserem jei jena ga jam gane batominenne.

²⁶Afa safna tifinmana daamfennaiserem jei gam siginswenaram, tifni seyafter gemerserem ga gam sigin-ginswena. Ane jes gemerserem aaiserem jegme gemer, afa safna tifinmana daamfennaiserem waakenfer gane gerebaabisnennerem, tifni seyafter gemerserem ga saaser-saaserfer gam fala.

²⁷Nei Kristus nejeya tebanaram, nei seyafter gemerserem neiba tifni Kristusmanam. Ane aamei daamfen-daamfennemer seyafter gemerserem, aamei ga safan mesna tifni Kristusmanaiserem jebe.

²⁸Uwa Sanbagiri Jei tampata daamfen-daamfennem is mesam destabaipmini jematabe, aamei Kristus ijeya tebanaram seyafter gemerserem. Jei angtane aas galserem mesam destabaabili: Nabal-nabalsusu ga rasuls destabaabili. Naurabarf ga, angtane taterisi Uwa Sanbagirminiwer namwer aa jei gane domolaram enggalfe taterisi jeiserem jei gane nasbinennef. Nawer-ningginf ga, guru-guru taterisi Uwa Sanbagirmana aa jei ne towas-towastababilirim, Jei ga jes destabaabili. Ane Jeimba mesam destabaabili angtane aas galserem: angtane bwembwema aa jei ne eyebuwenaram jei mese; angtane baabeta aa jep ne kitulminirim enggalfe angtane jem waakentababif; angtane, angtane nafsi aa jei ne batobaabuwenaram; angtane awelna jematabe aa jei ne taabilirim; ane angtane ula nafis-nafismer aa jei ne nasbabuwenaram, ula jei jener jam ne towaswebiyeneiserem.

²⁹Bunar-bunarsusfer, angtane jematabe jei seyafter rasulyan. Jei seyafter taterisi Uwa Sanbagirminiwer namwer aa jes gane domolaram jam ne nasbabiyen. Jei seyafter guruyon. Fas angtane seyafter jematabe jei baabeta jam ne domolyan enggalfe, bwembwema jem gam eyebaabife.

³⁰Jei seyafter angtane nafsi jam ne waakentababiyen. Jei seyafter ula nafis-nafsiserem jam ne towaswebiyeneiserem fas jam ne nasbabuweyan. Ane jei seyafter ula nafis-nafsi jeiserem jem igiserem jam ne sarbiyen, ane jei jam ne nasbiyen.

³¹Jega jem temawer, ini imna unggwanfer ga is enggalf sege folbamuwena, aamei baabeta igsususerem igama damtabif. Ane ai nele waakenaiserem isa jes ge saamisini ibe, nele aaiserem jei waaken-waakensusu nele seyafter afweraiserem jemniwer. Nele jeiserem ga aas: nei angtane nafsi ga jam nesa nesiktababuwena.