Read Berik 1Korintus 16 Bible Online

1Korintus 16 - Berik bible

1Korintus 16

¹Namwer aas jepserem, ai aamei isa ajam nasipmif doim temawer, doini aamei ijesa dupduptalaiserem enggalfe, nem afelen mesna Kristus aa jei ne tebanaram kota Yerusalemwer jep jam gaarmif. Ai aamei isa enggam ai balbabili, aamei ga enggammer isa eyebili, ai jemat-jemata propinsi Galatyamana agemer balbabilirim jam ne eyebife. Aamei ga jes gemerserem ga gemer isa eyebili.

²Nunu nabal-nabalsusu minggunu seyafter gemerserem jeme, aamei seyafter gemerserem daamfen-daamfenneme, doini ga jamer isa egantababisiwena enggalfe angtane nafsiserem jep gam gaarmif. Doini jes igama damtabilirim, doini jeiserem afwer ga jam igama egantababisini. Afa doini unggwanfer jam igama damtabilirim, unggwanfer ga jam isa egantababisini. Afa aamei doini bastowaifer jam igama damtabilirim, bastowaifer ga jam isa egantababisini. Doini jeiserem ga jam isa egantababisini jamere ai as fortya imnibe, jega ai jam ajep fortyaram, jes jepserem aamei doini ijama terelbaabiyen jam gaarmife, aamei doini ijesa egantababisinirim, doini jeiserem jamer gam isa dupduptana.

³Ai jam ajep fortyaram, angtane aamei ijesa destabaabilirim, ai angtane jeiserem gam as baftabili enggalfe, jei doini jeiserem ijesa gaarminirim, jei ga sene girinfele kota Yerusalemwer. Ane ai ga surta as golmini angtane jeiserem ai ajes baftabilirim jebe, jega angtane Kristen Yerusalem je jei ga sege towaswebili enggame, angtane jeiserem jei doini ijesa gaarminirim jei ga jes ne girinfele jemnibe.

⁴Ane afa ai as gunu, “O samfer ai as sofwa.”, ai mese ai ga as sofwa Yerusalemwer, gam jega jei abaner ga asa sofwa.

⁵Ai nalefe ibar nejama dorweyan kota Korintus je, ai gwanan ajam sofwa propinsi Makedonya jebe. Ai jam ajep sofnaram, ai enggam ai mwangbisini ai jep ga jafner as wofena tamna nafis-nafsiserem jebe, ai abakfer jep ajam nwinyen.

⁶Jengga ai imnip ajep fortyaram, ai enggam ai gunu, ai ibar abakfer nesa nwini. Afa musim arouwa yo deye uskambar ane ona wisimsusu jam ajep falaram, ai engbar abakfer ibar ga galap nesa nwini jamer musim jeiserem se barwena. Musim jeiserem jam se barwenaram, aamei samfer ai ga as isa batobana ai gamjon jam as sofnaram imniwer, ai ajewer gunurum jam sofwefe.

⁷Afa ai gwanan propinsi Makedonyawer as sofwa, gamjon ai imnip as sofwa, afa ga gam jes gamserem, gam jega ai abakfer ibar nejama nwini. Afa ai gwanan imnip jam as sofnaram, gam jega ai abakfer ibar nejama nwinyen. Ai bai jes gamserem. Jengga afa Tuhan Jei ai as Jam se balaram, ini amna ase enggam folbana, ai ibara nwinf jamer abaka.

⁸Ai namwer aas jepserem ajam sofweyan propinsi Makedonya je. Ai kotana aaiserem ajep nwinf, kota Efesus je, jamere nunu angtane Yahudimana masar aa jep ne eyebilirim se fala, masara Pentakostamana, jeba masara nananisi jem igiserem aa jep ne fulurum.

⁹Ai aafe as nwini, aam temawer angtane safe unggwanfer baif aa jei naawenaram ai Taterisi Waakena ajam nasipminennefe, ai aafe dwona unggwanfersus ai domola enggalfe ai awelna Tuhanmana ajes gweyibenerem jem igi agam damtabif.

¹⁰Timotius jei jam aa jep fornaram imnibe, aamei waakenfer isa tebana jei, jega ini jemna saaser-saaserfer gase folbana ibar ijama nwinfe. Aamei Timotius waakenfer isa gaarnnu, aam temawer jeimba ai galaterserem, jeime awelna Tuhanmana gam gweyibene.

¹¹Angtane fas Timotius jam ne balyan enggame, “Timotius jei igyene.” Jengga jei ga jam isa batobana, jega jei gamjon waakenfer gase warautna amnibe. Ai Timotius fibana, ane am afelen mesna afweraiserem jei mese jeime Timotiuster ne fibana.

¹²Ai aamei isa enggam ai towastababili nem afelnaiserem Apolos jem temawer. Ai Apolos unggwanfer ititmer amsam balwena enggalfe, jei nem afelen mesnabar afweraiserem jam ge sofobif imnibe. Jei namwer aas jepserem ini jemna gemerje jam folbayan enggalfe imnip jam sofwefe. Jengga jei dwona jam aa jep domolaram, jei gase sofwa imnibe.

¹³Aamei ga angtane Kristenf ima gwena, gwela imna jeiserem ina jewer ga jamer isa gaaramisnenne. Aamei Yesus ga kanaufer isa tebana. Aamei Yesus weren-werenmer ijama tikwebaatiyen, jengga baabetmer isa tikwebaatini.

¹⁴Seyaftersus aamei ijesa eyebilirim, ga waakenfer isa eyebili ini imna ga is enggammer sege folbamini, angtane jam nesiktababif.

¹⁵Aamei bunarsusfer Estefanus wi tannabar jem temawer ba imsa towaswemini. Jei nabal-nabalsusu Kristus jeyam ge tebana propinsi Akaya je, propinsi imna. Jei awelna ini jemna seyafter gemerserem ga jem ge gwebili enggalfe, jei angtane Uwa Sanbagirmanaiserem gangge batobaabif.

¹⁶Ini amna seyafter gemerserem ai ga aamei isa ajem balbabili, angtane seyafter Estefanus galserem, aamei ga esorola jemna ga jam isa onsobaipmini. Ane esorola angtane nafsi, awelna Tuhanmana Estefanusfar aa jei ne gwebilirim ane jemata aa jei ne batobaabuwenaram, esorola jemnaiserem jes mese ga jam isa onsobaipmini.

¹⁷Ini amna saaser-saasersusu Estefanus, Fortunatus, ane Akaikus jei aaf aa jewer ge forobityerem. Aamei ijama jelyan ams batobafe, jengga jei ge jalbili ai ga ase jei ne batobana.

¹⁸Jei taterisi im temawer ap as mes ne nasbaibene, ane ai taterisi jeiserem ai sarbabilirim, ini amna ga as jem ne kanautabana, ini imna is gemer ne kanautabaipminirim, taterisi am temawer ip aa jes ne nasbinennerem jeme. Angtane jes galserem, bosna jemna ga jam isa kitulmitena.

¹⁹Jemat-jemata aaf propinsi Asya je, jei ims ne balbabili, “Kelek, waakenfer sa gwe!” Akwila yo wini jemna bosna Priskila ane jemata jem jenap aa jei ge betwebilirim jei mese, jei uskambarsus ga is enggam ne balbabili aamei seyafter Kristusfar ijeya gwenaram, “Kelek, waakenfer sa gwe!”

²⁰Angtane Kristus aaf aa jei ne tebanaram kota Efesus je, jeime is enggam ne balbabili, “Kelek, waakenfer sa gwe!” Aamei ijeba betwenaram, aamei tafna ga jam isa tenanna enggalfe, aamei igama gwerauwulf aamei in ina ba ijama nesiksonanna.

²¹Ai taterisi aaiserem ip ga aner tulisulmini: Kelek, waakenfer sa gwe!

²²Angtane Tuhan jam nesikteyeneiserem, Uwa Sanbagiri Jei angtane jeiserem jamer se babapsobana! Maranata! Kata jeiserem igi jemna ga aas “Tuhan Yesus, au se forya!”

²³Ai sembayang as gwebana, Tuhan Yesus Kristus Jei waakena Jelemanaiserem ip ise golmini aamei seyafter gemerserem.

²⁴Ai aamei seyafter isas nesiktababili, aam temawer nei seyafter Kristus Yesusfar daamfennaber nei jewera gwenaram. Tabana ga aaf, amniwer Paulus, kota Efesus je.