Read Berik 1Korintus 6 Bible Online

1Korintus 6 - Berik bible

1Korintus 6

¹Angtane Kristen naura im nenennap jei jam gangge doksonaram, jei angtane Kristenyenaiserem safnant jam ge balbabiyen enggalfe, taterisi aa jes gangge doksobilirim, taterisi jeiserem gam ne borolmife. Ai baibaisus aamei jes gamserem gam ijewera eyebilirim, jeiserem ba kabwaksusum! Jengga waakenfer ga enggam, angtane Kristen jeiserem jei angtane Kristenter gam balbabili enggalfe, taterisi jei aa jes gangge doksobilirim, taterisi jeiserem gam ne borolmife.

²Nei angtane Kristus nejeya tebanaram, neiba Uwa Sanbagirem angtanesam. Aamke ijama towasweyan enggame, angtane Uwa Sanbagirmanaiserem jei angtane galap sene teneba-tenebaabuwesa, angtane seyafter ogiri aaiserem jep aa jei ge nwinbenerem. Jewer ga aamei bunarsusfer angtane seyafter ogiri aaiserem jebe, aamei jei galap isa teneba-tenebaabuwesa. Afa ga gam jes gemerserem, gam jega bunarsusfer aamei taterisi bastouya angtane aa jes gangge doksobilirim im nenennabe, aamei taterisi jeiserem samfer iner igama borolmini.

³Aamke ijama towasweyan enggame, nei angtane Uwa Sanbagirmanaiserem, nei malaikata taman waaken-girip aaiserem, nei galap nesa teneba-tenebaabuwesa jei? Afa ga gam, gam jega aamei taterisi aa jes gangge doksobilirim gwela ogirmanaiserem jem temawer, aamei taterisi jeiserem samfer iner igama borolmini.

⁴Ga jem temawer, afa angtane Kristen im nenennabe jei jam gangge doksobanaram taterisi gwela ogirmanaiserem jem temawer, aamei angtane Kristus jam tebayanaiserem jemnibe safnant ijama sofweyan enggalfe, aamei jes igama doksobilirim jeiserem jemnip gam ne borolmife.

⁵Ai taterisi aaiserem ip tulistabaipmini enggalfe, aamei ijema seferswef. Angtane tousa im nenennap afa ke fas enggalfe, angtane Kristen taterisi aa jes gane doksobilirim, taterisi jeiserem angtane tousa jeiserem ga jei is gam borolmif? Angtane tousa bunar jere im nenennabe.

⁶Safe gam, angtane Kristen daamfenna jei jelem afelnabar jam gangge doksonaram, ane jei ga gam sofwa angtane Kristenyenaiserem jemnibe enggalfe, taterisi jeiserem gam ne borolmif. Jeiserem ba kabwaksusum!

⁷Aamei angtane Kristen, aamei in ina jam igama doksonaram, aamei jes gamserem gam jam igama gwenaram, gam jega gwela imna jeiserem jeme aamei ga jem igama gwerauwulu enggame, aamei gwela Kristusmana ijama onsobiyen. Jengga waakenfer ga enggam, afa angtane Kristen nafsi kapka is jam gane eyeipminirim ibe, afa galgala imnaiserem is jes gane komkomtabaipmisini, aamei safnant fwaina kapkaiserem jebe ijama eyeipmiyen. Aamei safnant taterisi jeiserem angtane nafsiserem jemnip ijama gwirinfelyen enggalfe, taterisi jeiserem jep gam ne nasipmife.

⁸Jengga aamei waakena jeiserem ijama eyebiyen. Aamei kapkaiserem imsa eyeipmini. Ane apgal jigala angtane nafsife im jematabe ijama komkomtababisnenne. Aamei gam ima eyeipmini angtane Kristen ilem sarabosenfe! Jeje bafa aamei gam ga ima eyebili?

⁹Aamei in iner ina ijama afaf-afafsonanayan. Angtane kabwakfer aa jei naawenaram, Uwa Sanbagiri Jei Jam gweyan angtane jeiserem jem Sanbakfe. Aamei aaiserem imsa towaswebili: angtane bwat kapkaiserem aa jei gane sarwebabilirim; angtane maaryena aa jei gane gwebuwenaram; tansi yo yafonsiwir jei maaryena gam gangge gwebili; anggwa nawan jei gam ge gwef wi anggwa gamserem; wi nawan jei gam ge gwef wi anggwa gamserem; Uwa Sanbagiri Jei Jam gweyan angtane jes galserem jem Sanbakfe.

¹⁰Ane angtane aas galserem: angtane komkomaiserem; angtane ini unggwan-giri aa jemanei ge folbaminirim enggalfe galgala unggwanfer gam damtabif; angtane aa jei ge mabukswebuwenaram; angtane taterisi syefer aa jei gam nasbilirim angtane nafsiserem jem temawer; angtane komkoma uskam-uskamsususerem; — angtane seyafter jes galserem jei Uwa Sanbagirem gwonabe jam naaweyan, nunu Uwa Sanbagiri Jei aa jep gwenaram anggwabura seyafter gemerserem jem Sanbakfe.

¹¹Aamei nalef Kristus ijama tebayan, jes galapserem angtane afwenefener im nenennabe jei ga angtane kapka jes galserem ga gemer naawena. Jengga aamei etam-etamawer is mes wirtabaabili, ane aamei imsa etamwena angtane Uwa Sanbagirmanfe. Aamei Tuhan Yesus Kristus imsama tebana, jega jem temawer baabeta Mafnana Uwa Sanbagirmanaiserem jeme, aamei Uwa Sanbagirfer ga imsa waakenswena.

¹²Angtane afweraiserem im nenennabe jei enggam ge gubili, “Kristus Jei nei nes mes aftabunnu, ga jem temawer nei samfer nesa eyebili, seyafter nei nejesa bilirim afa waakena afa kapka jam eyebife.” Jengga ai enggam ai gunu, seyafter jam eyebiliserem jeiserem nei nes jam batobaabiyen enggalfe, jega nei waakenfer negama gwefe Tuhan jam onsobalabe. Ai bai ajes eyebilirim as je isinbaasnenefe.

¹³Angtane afweraiserem im nenennabe jei gamjon enggam ge gubili, “Uwa Sanbagiri Jei tumilgala nebe nese enggalf eyebaipmil, nei negama tombaabif jamer unubuguf. Ane Jei witifini nemna nese enggalf eyebaipmil, tumilgala jes negama tombaabilirim jep gangge falbinonf.” Ane ai enggam ai gunu, tumilgala jam tombaabiliserem ba waakenam, jengga Uwa Sanbagiri Jei enggam gunu, tumilgala ane witifin nemna galap gase borolsisi. Ane Jei bai nei tumilgala uskambar nejama faarenswebabife jam tombaabiliwer. Jes gemerserem aaiserem jegme gemer, afa wini yo anggwana jei jena jam gangge teterem jeba samfer, waakenam. Jengga Uwa Sanbagiri Jei tifni nemna enggalf nes Jam eyebaipmiyen nei maaryena negama gwebif. Fasfasus, gamyan! Uwa Sanbagiri Jei tifni nemna nese enggalf eyebaipmini, tifni nemna Tuhanfefener negama kitulbof. Ane tifni nemna jeiserem Tuhan ga jes gam gerebaabisnenne.

¹⁴Uwa Sanbagiri Jei Tuhan Yesus mesam irtestena terewer. Jes gamserem baabeta Uwa Sanbagirmana jeime gemer, Jei tifni nemna nese irtebaipmisi terewer.

¹⁵Aamke ijama towasweyan enggame, tifni nemnaiserem ga daamfenna tifni Kristusmanaiserem jebar? Ga jem temawer tifni nemna daamfenna Kristusfar aaiserem, nei tifni nemna jeiserem nei nejama eyebiyen daamfennaber falfe wini maaryens gwebiliserem jebar. Fasfasus, gamyan!

¹⁶Aamke ijama towasweyan enggame, anggwana wini maaryen-maaryenaiserem jei jena jebar maaryena jam gangge gwebilirim, jei ga mes gangge etamwena tifni daamfennaiserem jebar. Nei nemsa towaswena jei daamfen tifniber mes ge etamwena, aam temawer Taterisi Uwa Sanbagirmana jep enggam baatultel: “Anggwana jei winabar tifni daamfennaber ga gangge etamwena.”

¹⁷Jengga angtane Tuhanfar daamfennaber aa jei gangge gwenaram, mafnana Tuhanmanaiserem ane mafnana angtane jeiserem jemna jeime daamfennaber.

¹⁸Aamei ina ga jam isa bijausona etam-etama maaryen gwebili galserem jewer. Bunarsusfer ga enggam, angtane maaryena aa jei gam gwebilirim, angtane jeiserem tifni jemna ga gam kabwakswebana, mes gam etamwebana tabalyamer, etam-etama maaryena jena aa jes gam gwebilirim jeme. Jengga angtane etam-etama kapka nafsiserem aa jei gam eyebilirim, tifni jemna jam kabwakswebayan.

¹⁹Aamke ijama towasweyan enggame, tifni imnaiserem jeba Jena Mafnana Uwa Sanbagirmanaiserem ba Jemnam. Uwa Sanbagiri Jei Mafnana Jelemana ip ise Jener golmini, ane Mafnana Uwa Sanbagirmana jeiserem Jei im inip nuniton. Tifni imna jeiserem ilemanfenenyan, jengga tifni imnaiserem jeba Uwa Sanbagirmanam.

²⁰Uwa Sanbagiri Jei aamei is mesam armantababili, hargana unggwandwasusfer jeme, hargana jeiserem ga aawisi Tane Uwa Sanbagirmana aa Jei tererem ti salibibe. Ga jem temawer, tifni ilemanaiserem aamei jem ga waakena tefner isa eyebili, jega tifni imna jeiserem aamei Uwa Sanbagiri jem gam isa pujitene.