Read Berik 1Korintus 7 Bible Online

1Korintus 7 - Berik bible

1Korintus 7

¹Surta aamei gwanan ap as ijesa tulisulbonontom, surta jeiserem jebe aamei taterisi gala-gala ap as ijesa tenebaaibowenantam. Namwer aas jepserem aamei as ijesa tenebaaibowenantam, ai ga isa jes tamawolbaipmif. Aamei as enggam ima tenebanantam, afa anggwana wini jam gulyana, jeiserem ke samfer? Ai is enggam ai tamawolbaabili, jeba samferam.

²Jengga bunar-bunarsus ai bai angtane jei maaryens ne gwebuwefe. Jega jem temawer waakenfer ga enggam, anggwana ga wini jelef jam gam gula. Ane wini jegme gemer anggwana jelef jamer gam gera.

³Wini yo anggwana jafner jam gangge tananaram, wi afa anggwa jei ini jam gam folbanaram jam gwefe wi anggwa gamserem, afa wi gam gunurum, anggwana jei baife jam gweyan. Ane afa anggwa gam gunurum, wini jei baife jam gweyan. Ini jemna nawersamer ga saaser-saaserfer gam nulamini,

⁴aam temawer tifni winemanaiserem jei jelemanfenenyan, jengga tifni wimanaiserem jeba anggwana jelemanaiserem jemanam. Ane tifni anggwamanaiserem jegme gemer, tifni anggwamanaiserem jei jelemanfenenyan, jengga tifni anggwamanaiserem jeba wini jelemanaiserem jemnam.

⁵Aamei wi mese anggwa ina ijeya tetwenaram, jam tala jepserem wi afa anggwa jam gam gunurum, baife ijam gweyan. Jengga afa wini yo anggwana jei enggam gangge gunurum, “Au, nei nomkef nejam ne gweyan enggalfe, nei sembayanga ne gam ne gwebaf, ane Uwa Sanbagiri ne gam ne pujitef.” Afa wi anggwana jei gam jam gangge gunurum, jeba samferam. Jengga sembayanga jeiserem jam gangge tabantanaram, wi anggwana gemerserem gamjon gam ga gangge gwena. Afa jei gamjon jam ge gweyana wini yo anggwana gamserem, bawasa jei wi afa anggwa afelna jam aa jep gam unggwasbanaram maaryen gwebife angtane nensa jebar, wi afa anggwa jeiserem jei bawasa ga gam onsobana, aam temawer ini jemna unggwan-giri aaf gam nulamini jam ge gwef wi anggwa gamserem.

⁶Ai aamei isa ajam balbabiyen anggwana wini jam golfe, jengga afa aamei ini is jam gam folbanaram wis golfe, aamei samfer wini saf igam gula.

⁷Ai wini fas, ane ai enggam ai gunu, ini amna saaser-saasersus afa aamei jegme wini ijama ketabaabiyen, ai gemerserem. Jengga Uwa Sanbagiri Jei baabeta angtanefe daamfen-daamfenneme jeber-jeber mesam golmuwena. Wini yo anggwana jena aa jei gangge teterem, jei baabeta gangge domola enggalfe, jei nawersamer waakenfer jem gangge gwef. Ane tanis mese yafonsiwir jeime baabeta gane domola enggalfe, jeime jena waakenfer gam naawefe.

⁸Yafonsiwir mese tanis, aamei gemer ijeya gwenaram ina ijama tetyamer, ane aamei saamirawi mese, ai aamei isa enggam ai balbabili, enggam jei samfer, afa aamei jafner isa gwena ina ijama tetyen, ai gemerserem.

⁹Jengga afa ini tanismana unggwanfersus gam folbanaram yafonsiwirfar ge gwefe wi anggwa gamserem, ane jei jen jena jam uftayan, ai enggam ai gunu tanis jeiserem waakenfer ga wini jamer gam gula. Ane yafonsiwirem temawer jegme gemer. Afa ini jemna unggwanfersus jam gam falbilirim tanisfar ge gwefe wi anggwa gamserem, ane jei jen jena baife jam gweyan, waakenfer ga enggam jei anggwana jamer gam gera. Wini yo anggwana jei jena gam gane teterem jeba waakenam. Jengga tansi yo yafonsiwiri ini jemna afa jeber-jeber unggwan-girsusfer gangge folbaminirim jam gwefe wi anggwa gamserem, jengga jena jam ne tetyen, jeiserem jeba kabwaksusum. Ga jem temawer, waakenfer ga enggam, jei samfer jena ga jamer gangge tete.

¹⁰Aamei angtane Kristen ina ijeya teterem, ai aamei isa enggam ai balbabili — (taterisi aaiserem bunarsusfer ai aner ajam bilyen, jengga taterisi aaiserem ga ise Tuhane bilipmini ibe:) Wini anggwana jemna jam mirtetefalyan. Ane anggwana jegme gemer wini jemna jam mirultefalyan. Jengga afa wini jei anggwaminiwer jam gam yoswetinirim, jei safnant gamjon anggwana nafsi jam geryan. Afa jei gamjon jam warauf anggwana gwanan aa jes gam mirtetefalaram, jei samfer gam warauwa jemnibe.

¹¹

¹²Ai angtane Kristen nafsiserem ai jei enggam ai balbabili — esorola aaiserem ga amniwer, Tuhanminiweryan: Afa anggwana Yesus aa jei gam tebanaram, ane wini jemnaiserem jei Yesus jam tebayan, ane wini jei ini jemna saaser-saaserfer gam falbilirim anggwana jemna jeiserem jebar ge nwinfe, afa ga gam jes gamserem, gam jega anggwana jeiserem jei wini jemna jam mirultefalyan.

¹³Ane wi jegme gemer, afa wini Yesus aa jei gam tebanaram, ane anggwana jemnaiserem jei Yesus jam tebayan, ane anggwa jeiserem ini jemna saaser-saaserfer gam folbanaram wini jemna jeiserem jebar ge nwinfe, afa ga gam jes gamserem, gam jega wini jeiserem jei anggwana jemna jam mirtetefalyan.

¹⁴Jei anggwana jemna jam mirtetefalyan, aam temawer anggwana Yesus jam tebayanaiserem, afa wini jemna jei Yesus mes gam tebana, Uwa Sanbagiri Jei anggwana jeiserem baife jam gweyan. Ane wini Yesus jam tebayanaiserem, afa anggwana jemna jei Yesus mes gam tebana, Uwa Sanbagiri Jei wini jeiserem baife jam gwebiyen. Wi anggwa jeiserem tane jemnaiserem Uwa Sanbagiri jeime baife jam gwebaipmiyen. Afa Uwa Sanbagiri Jei tane jemnaiserem baife jam gam gwebaipminirim, gam jega tane jemnaiserem ga enggala angtane Yesus jam tebayanaiserem tane jemna galserem.

¹⁵Anggwana Yesus jam tebayanaiserem, afa jei baif jam gam gwenaram wini jemna Yesus aa jei gam tebanaram jebar seyafter gwefe, sya wini jei anggwana jeiserem jam tebasneneyen, saf gam aftannu. Ane wini Yesus jam tebayanaiserem, afa jei baif jam gam gwenaram anggwana jemna Yesus aa jei gam tebanaram jebar seyafter gwefe, sya anggwana jei wini jeiserem jam taabisneneyen, saf gam aafulnu. Jei jes gamserem gam samfer gane eyebili, aam temawer Uwa Sanbagiri Jei enggam gunu angtane Jelemana waakenfer gangge gwef.

¹⁶Wini Yesus aa jei gam tebanaram, afa jei anggwana Yesus jam tebayanaiserem jei jamer gam tebana, jam aftannuyon, wini jeiserem jei bunarsusfer jam towasweyan enggame, afa jei se eyebili jega annaiserem jei Yesus galap gase tebana, afa fas. Ane anggwana Yesus aa jei gam tebanaram jeime gemer, afa jei wini Yesus jam tebayanaiserem jei jamer gam taabili, jam aafulnuyon, anggwana jeiserem jei jam towasweyan enggame, afa jei se eyebili jega wini jemna jei Yesus galap gase tebana, afa fas.

¹⁷Aamei jeber-jeber etam-etamyamer ijes eyebuwenantam, Uwa Sanbagiri jei aamei nalefe is jam jenbeyen enggalfe Yesus jam tebafe, jeiserem jei Tuhan mes mwangbisini. Aamei Yesus ijep tebanaram, aamei ga gemer jam is eyebuwena, aamei gwanan jes gemerserem igam eyebuwenantam. Jeiserem ai safna Yesus aa jei ne tebanaram seyafter gemerserem jebe, ga jes ajes nasipminenne.

¹⁸Ga enggam, afa aameiba angtane Yahudimanam, Uwa Sanbagiri Jei aamei nalef is jam jenbeyen enggalfe Yesus jam tebafe, ane aamei nunu jeber-jeber is eyebuwena angtane Yahudimana aa gam gane eyebaabuwenaram, aamei Yesus ijep tebanaram, aamei safnant ijam towaiwulyon jam eyebife angtane Yahudimanyan gamserem. Ane afa aameiba angtane Yahudimanyan, Uwa Sanbagiri Jei nalefe is jam jenbeyeneye enggalfe Yesus jam tebafe, aamei Yesus ijep tebanaram, aamei safnant ijam towaiwulyon jam eyebife angtane Yahudimana gamserem.

¹⁹Ga enggam, angtane Yahudimanaiserem jei jam sunattababili, ane angtane Yahudimanyanaiserem jei jam sunattababiyen. Angtane jam sunattabasiliserem, afa angtane jam sunattababiyeneiserem, nawersamer jeiserem je igyen. Jengga igsususerem ga aas: Uwa Sanbagiri aa jes bilirim jam eyebife, angtane ga jes gase eyebili.

²⁰Angtane etam-etamyamer jeber-jeber aa jes eyebuwenantam, Uwa Sanbagiri nalefe angtane jeiserem jam jenbeyen enggalfe Yesus jam tebafe, angtane jeiserem Yesus jep gam tebanaram, jei ga gemer jam se eyebuwena, jei gwanan jes gamserem gam eyebuwenantam.

²¹Ga enggam, afa aamei awelna angtane is jei gam armantanaram jemans igam gweyibenerem, Uwa Sanbagiri Jei aamei nalef ijam jenbeyen, safnant gwela imna jeiserem jem temawer. Jengga afa dwona is jam gane gulbanaram angtane jeiserem aamei is jam aftannufe, dwona jeiserem is jam gane gulbanaram aamei samfer dwona jeiserem jamer igam onsobili.

²²Afa angtane aa jes gam armantanaram jei Yesus mes gam tebana, jei awelna angtane aa jei gam armantanaram jemna safe gemer gam gweyibuwena, Tuhanem Jei Jelem inibe angtane jeiserem jem temawer enggam gam gunu, angtane jeiserem jei ga enggala angtane jam armantayana galserem. Ane angtane jafner gwelaiserem, angtane nafsi fas jam armantayanaiserem, jei Yesus jam gam tebanaram, jei enggam gam gwena Kristus se armantala gamserem, jei awelna Kristusmana gam gweyibene.

²³Uwa Sanbagiri Jei aamei is mesam armantababili hargana unggwandwasusfer jeme, hargana jeiserem jeba aawisi Tane Uwa Sanbagirmanaiserem aa Jei terem ti salibibe, ane jega jem temawer aameiba Uwa Sanbagirem angtanesam. Jewer ga, aamei angtane Uwa Sanbagirmanyanaiserem jei safnant ijama onsobaabiyen, jengga aamei Uwa Sanbagiri tefner isa onsobana.

²⁴Am afelen mesna, ga jem temawer, aamei etam-etamyamer gwanan igemera eyebuwenantam, Uwa Sanbagiri Jei aamei nalefe is jam jenbebiyen enggalfe Yesus jam tebafe, aamei Yesus ijeba tebanaram, gwela imna ga is gemer sege folbamini Uwa Sanbagirfar, gwela imna gwanan is gemer ge folbaminintim.

²⁵Surta aamei gwanan ap as ijesa tulisulbonontom, surta jeiserem jebe, aamei ga angtane Kristen jena jam ne tetyeneiserem jem temawer ap as ijesa tenaibenentem. Ai aaf ga isa ajes tamawolmif. Tuhan Jei taterisi angtane Kristen jena jam ne tetyeneiserem jem temawer ai as Jam balyan, jengga esorola amna aaiserem ai isa ajam nasipmif ibe. Tuhan Jei ams nesiktene, jega jem temawer angtane taterisi amna samfer as ga sene taayibene.

²⁶Namwer aas jepserem nei angtane Kristen nejeya gwenaram, tamtamtalaiserem ga nes jes ne kitulmini. Ga jem temawer ai enggam ai gunu, waakenfer ga enggam, aamei namwer aas igemera gwenaram, gwela imna jeiserem gamjon ga gemer isa gwena.

²⁷Afa aamei winibere, aamei wini imna baife ijam gwebiyen jebar gwefe. Afa wini imna fas, safnant aamei wini ijam terelbiyen.

²⁸Jengga afa aamei wini jam golfe, jeiserem etam-etama kabwakyan. Ane wini jegme gemer, afa jei anggwana jam gaarfe, jei etam-etama kapka jam eyebiyen. Jengga wini yo anggwana jena aa jei gangge teterem, jei tamtamtalaiserem aa jep gane golminirim, ini jemna tamtamsusu gam nulamini angtane jena jam ne teteyanaiserem jemniwer. Ane ini amna ase unggwan-girem folbana aamei ini tamtamsusu jeiserem ijama domolyan.

²⁹Am afelen mesna, ai aamei isa enggam ai balbabili, nunu nemna unggwanferyan enggalfe nei awelna Uwa Sanbagirmana nejama gweyibefe ogiri aaiserem jebe. Jega jem temawer aamei seyafter namwer isa towaiwena, Tuhan aa jes bilirim jam eyebife, jeiserem ga jamer isa eyebili ini ilemana seyafter gemerserem jeme. Anggwana winibereiserem jei ga enggammer se gwena, tanismer gwela gamserem. Igi jemna ga enggam, anggwana winibereiserem enggam jam ge gubiyen, “Ai winibere, jega jem temawer ai awelna Tuhanmana ajam gweyibeyen.”

³⁰Ane angtane ini aa jemanem gangge jenbaminirim, jei ga enggam se naawena, angtane ini jam jenbayana galserem. Ane angtane ini saaser-saaserfer aa jemanem gangge folbaminirim, jei ga enggam se naawena, angtane ini jam jenbamili galserem. Ane angtane galgalabaraiserem jei mese jegme gemer se naawena, angtane galgalabaryena galserem. Igi jemna ga enggam, angtane ini aa jemanem gangge jenbaminirim, enggam jam ge gubiyen, “Ini amna mes jenbana, jega jem temawer ai awelna Tuhanmana ajam gweyibeyen.” Ane angtane ini saaser-saasersusu aa jeman gangge folbaminirim, ane angtane galgalabaraiserem jes mese, jeime jes gamserem jam gangge gubiyen. Angtane seyafter jeiserem awelna Uwa Sanbagiri aa jes bilirim jei jamer sene eyebili ini jelemana seyafter gemerserem jeme.

³¹Ga enggam, ini imna unggwanfersus is jam ge folbamiyen gwela imnaiserem jem temawer ogiri aaiserem jebe, aam temawer ogiri aaiserem aa jei falaram se wasferwesa.

³²Ini amna ase enggam folbana, aamei ini is jam ge eseswebamiyen gwela ilemanaiserem jem temawer. Tansi Kristen jei ini awelna Tuhanmanaiserem jepfener gam folbana, aam temawer jei ini Tuhanmana gam saaser-saasertabaf.

³³Jengga anggwana Kristen winibereiserem, ini jemna unggwan-girem gam folbana gwela ogirmanaiserem jem temawer enggalfe, jei wini jelemanaiserem ini jemna gam saaser-saasertaabif.

³⁴Jega jem temawer anggwana Kristen winibereiserem ini jemna ga naura gam nulabana: jei awelna Tuhanmanaiserem jes gweyibef, ane wini jelemanaiserem ini jemna jes saaser-saasertaabif. Nawersamer jeiserem ini jemna ga jei gangge dektebene. Yafonsiwiri yo wini anggwanabaraiserem jeime gemer jes gemerserem. Yafonsiwir Kristen jei awelna Tuhanmanaiserem ini jepfener gam falbili enggalfe, tifni yo mafnana, gwela jemna jeiserem seyaftersus gam kitulbof Tuhanfe. Jengga wini Kristen anggwanabaraiserem, ini jemna unggwan-giri gam falbili gwela ogirmanaiserem jem temawer enggalfe, jei anggwana jelemanaiserem ini jemna gam saaser-saasertabaf.

³⁵Ai taterisi seyafter jeiserem ibe isa enggalf ai tulistaipmini, ai aamei isa ajem batobaabif, jeke enggalem temawer ai aamei isa ajam isinbaabisnenef wini jam golem temawer, ane anggwana jam gaarem temawer. Ini amna ase enggam folbana, aamei ga waakenfer isa gwena, ane ini imna seyaftersus ga ise Tuhanminiber sege folbamini.

³⁶Afa tanis jei yafonsiwirs jam gam nesikulu, ane ini jemna unggwanfersus jam gam folbanaram yafonsiwirfar jam ge gwef, afa ga gam jes gamserem, ai enggam ai gunu tanis yo yafonsiwir jeiserem waakenfer ga jei jena jamer gangge tete. Jeiserem etam-etama kabwakyan.

³⁷Jengga afa angtane tansi jam gane balyanaye enggame jei wini jam gulyansus, ane tansi jeiserem jei jener enggam jam gam gunurum jelem inibe, “Ai bai wini jam golfe.”, ane afa tanis jeiserem jei ini jemna aa jei gam folbanaram wifer jam ge gwef, afa ini jemna jeiserem waakenfer jam gam gerebaasnennerem, jeiserem ga waakensusu afa jei wini jam gulyana.

³⁸Ga jem temawer tansi wini aa jei gam gularam jei waakenfer gam eyebili, jengga tansi wini jam gulyanaiserem jei waaken-waakensusuter gam eyebili.

³⁹Wini Kristus aa jei gam tebanaram, afa anggwana jemna gemer gam gwenaram, wini jeiserem jei anggwana jemna jam mirtetefalyan. Jengga afa anggwana jemna jam gam tererem, wini jeiserem jei anggwa nafsiserem jei aa jes gam balaram jam garfe, jei samfer anggwana jeiserem gam gera. Jengga anggwana jeiserem jeime Kristuster gam tebana.

⁴⁰Jengga ai aner enggam ai gunu, afa wini jeiserem jei gamjon anggwana jam geryana, jemna ini saaser-saasersusfer gam falbili anggwana jam gaarfe jemniwer. Taterisi jeiserem ai isa aner ai bilipmini ibe. Jengga ai enggam ai gunu, jeiserem ai baabeta Mafnana Uwa Sanbagirmanaiserem ai ga isa jem balbabili.