Read Berik 1Korintus 9 Bible Online

1Korintus 9 - Berik bible

1Korintus 9

¹Bunar-bunarsusfer ai angtane nafsi jem gwonap ajam gweyan. Bunar-bunarsus ai Yesus Tuhan nemnaiserem amsam damtana, ane Jei ams baftana enggalfe ai rasulfe agam gwef, awelna Jemna agam gweyibef. Ane ai awelna Jemna ames gweyibene im nenennabe, ane jega jem temawer aamei Yesus imsa tebana.

²Angtane afweraiserem jei enggam ge gubili, “Paulus jei Rasulyan.” Safe gam, imsa towaswena aiba rasulsam, aam temawer ai taterisi Kristusem temawer ames nasbili, ane aamei taterisi jeiserem imsa taabili. Ane aamei Tuhanfar daamfennaber ima gwena, ane aamei Tuhanfar daamfennaber ijewera gwenaram, aamei ga ijema gwerauwulmini angtane nafsiserem jebe, enggame aiba rasulsam.

³Angtane afweraiserem jei taterisi kapka am temawer ne nasbili enggame ai Rasulyan. Ai ga enggam as tamawola:

⁴Aiba bunarsusfer Rasulsam, ane je kabwakyan afa ai tumilgala jam as tebabilirim awelna ajes gwebilirim jem fwainfe, Rasulu nafsi afwer gamserem.

⁵Rasulu afweraiserem, Yesusem oson mesnaiserem ane Petrus mese, jei wini jemna Yesus aa jei ne tebanaram ga gemer ne aftabifele jei aa jewer ge sofobilirim. Jeke kapka afa ai jegme gemer as eyebilirim, ane wini ga as afolfala ai ajewer sofnaram, ane ai jem fwaina ga as ge taabili ai ajes ge bilirim jem temawer? Jeiserem kabwakyan.

⁶Rasulu afweraiserem jei awelna jelem tafam jam gwebiyen enggalfe, jei tumilgala ane seyafter nafsiserem gam damtabif jei aa jes ne balbabilirim jam damtafe. Jeje bafa ai ane Barnabas ai awelna anfentowaifener alem tafamer ga ai ge gwebili enggalfe, ai agam ge damtabif tumilgala ane seyafter nafsiserem ai ajes ge balbabilirim jam damtabife?

⁷Bunarsusfer, ginanggwana jei awelna jelemana aa jep gane wofebilirim, jei aa jes gane balbabilirim, tumilgal mese fen enggalfe jei awelna jeiserem jebar ne wofobif, seyafter jeiserem jei jener jam ne armantababiyen. Makan anggwana jei samfer nananisi makanawer aa jes gane damtabilirim, jei jes gane tombaabili. Ane angtane dombana aa jei gane gerebaabisnennerem, jei samfer susunu dombana jeiserem jewer aa jes gane damtabilirim, jei susunu jeiserem ga jes gane telbebili.

⁸Angtane jeber-jeber jei ga jes gemerserem ga gemer ne eyebuwena. Jengga ai angtane aa jes gane eyebuwenaram, ai jem temawenefener ajam nasbiyen. Aime Hukumu Nabi Musa aa jes tulistababilim Taterisi Uwa Sanbagirmanaiserem jebe, ai ip ga isa ajes nasipmini.

⁹Hukumu jeiserem jep ga enggam baatultel: “Sapini gandum tanna jeiserem jam gam jubobinennerem, jega enggalf gandum tanna jewer gangge fatibitiyef otamawer, ane angtane gandum tanna jeiserem ga gane damtabili, sapini jeiserem aarema jemna ijam motsobaasiyen, jega jeme samfer gandum tanna jeiserem bastanfer ga gam tombaabili.” Uwa Sanbagiri taterisi aa jes bilim, taterisi jeiserem sapim temawenefener Jam guyon.

¹⁰Bunar-bunarsusfer taterisi jeiserem Jeiba am temaweram bilipmil, ai Taterisi Waakena ajeya nasbinennerem. Jei ga jes gemerserem ga gam bil enggalf gam gweraulmife, angtane awelna Kristusmana aa jei ne gwebilirim, jei samfer fwaina gam taabif, angtane jei aa jes gam batobaabilirim jemniwer. Angtane makana aa jei gane menetababisinirim, ane angtane nananis aa jei gane fulurum, ini jemna ga enggalf gangge folbamini jei nananis aa jes gane fulurum afwer tomnawer gane tebabif.

¹¹Jes gemerserem aime taterisi Uwa Sanbagirmana ga agemera tonolnanna im inibe. Afa ga gam jes gemerserem, aime samfer jem fwainfe galgala asa damtabili.

¹²Angtane nafsi taterisi Uwa Sanbagirmana ip is jei ne towas-towastabaipminirim, jei fwaina gane taabif imniwer, jega jem temawer aiba waakensusum afa aime fwaina ajama taabife imniwer. Safe gam, ai apgal jigala afa fas imniwer fwainfe isa ajama bilipmiyen. Fas. Bunarsusfer ga enggam, ai safe kabwaktala seyafter gemerserem jam agma damtabili, ai jafner agma fina. Ane ai awelna alem tafamer agma gwebili enggalfe, ai seyafter jes agma bilirim jam damtabife gwela alemanaiserem jem temawer, ai seyafter jeiserem agma damtabili. Ai apgal jigala imniwer fwainfe isa ajama bilipmiyen, aam temawer ai bai angtane enggam jam ge gubife, “Rasulu jeiserem jei awelna Kristusmana enggalfefener gwebili, doini gam ne taabif.” Afa angtane jei jes gemerserem gam jam gangge gubilirim, gam jega, engbar jei baif gam naawena Taterisi Waakena Kristusem temawer jam taabife.

¹³Aamei bunarsusfer imsa towaswena, angtane awelna Jena Uwa Sanbagirmanaiserem jebe aa jei gane gwebilirim, jei tumilgala gane tebabili Jena Uwa Sanbagirmana jeiserem jewer. Ane imam tumilgala aa jei gane bunulnsounaram mejana Jena Uwa Sanbagirmanaiserem jebe enggalfe Uwa Sanbagirfe gam gulbaf, imam-imam jeiserem jei tumilgala jeiserem afwer ga gane syenulu.

¹⁴Angtane jeiserem jei gemerserem angtane Taterisi Waakena aa jei ne nasbinennerem jeime gemer. Tuhan mesam balbabili, angtane Taterisi Waakena aa jei ne nasbinennerem, jei fwaina sene taabili angtane Taterisi Waakena aa jei ne sarbilirim jemniwer.

¹⁵Jeiserem safe waakena ini amna as jewer folbanaram enggalfe, awelna ajes gwebilirim jem fwaina agam taabif, ai fwaina angtaneminiwer aner ajam bilipmiyen. Ane ai surta aaiserem jebe, ajam tulisulyon enggalfe ai fwaina ajam taabif imniwer. Fasfasus! Ai gam ajam tulisulyon. Ini amna saaser-saasersusfer ga as enggam folbana, ai Taterisi Waakena ip isa ajes nasbaipmuwenaram, taterisi jeiserem jem fwaina isa ajam bilipmiyen. Ai safe ase wisei se folbana jamer ai afom tere, ai fwaina imniwer isa ajam bilipmiyen.

¹⁶Ai Taterisi Waakena ajewer nasbabuwenaram, ai jem temawer ajam guyon enggame ai waakenfer eyebili, aam temawer Uwa Sanbagiri Jei ams baftana ai Taterisi Waakena jeiserem agam nasbinennef. Afa ai Taterisi Waakena ajam nasbineneyeneye, galap kapka as etamwesa abe!

¹⁷Afa ai aner agam gunurum ai Taterisi Waakena jam as nasbinennefe, afa ga gam jes gemerserem, gam jega ini amna samfer ga as jep gam folbana enggalfe ai doini jam tebafe, awelna amna jeiserem jem temawer. Jengga ai aner ajam guyon Taterisi Waakena jam nasbinennefe. Jengga Uwa Sanbagiriserem ai ga ase Jei bala, ane awelna Jei ap as jes gulbanaram, ai awelna Jemna jeiserem ga waakenfer as gweyibene.

¹⁸Afa ga gam jes gemerserem, gam jega ai jem fwainfe ga basas taabili? Fwainaiserem ga aas: ini amna ase saaser-saasersusfer se folbana, aam temawer ai Taterisi Waakena jam agam nasipminirim angtanefe, ai angtane jeiserem jemniwer doini ajam bilipmiyen, taterisi ai jes agam nasipminirim jem fwayenfe. Aiba taterisi Uwa Sanbagirmana ba ayam nasibenenewena. Jega jem temawer ai taterisi jeiserem jam jep agam nasipminirim angtanefe, ai samfer fwaina jemniwer agam taabili. Jengga ai fwaina ajam taabiyen, ane jem temawer ga ini amna saaser-saaserfersus folbana. Ini amna jes gamserem gam ajewer folbanaram, fwaina amna ba jesam ai ajes taabife.

¹⁹Bunar-bunarsus angtane afa fas am sanbakfe afa jam gweyan ai ajem olem gwefe. Safe gam, ai ga enggam as gwena, angtane seyafter am sanbaka gamserem. Jes gemerserem ai ga gemer as gwena, jega enggalf angtane unggwanfer Kristus gam sene tebana.

²⁰Ga enggam, ai angtane Yahudimanaiserem jebar agalap nwinirim, ai ga agemer gwena gwela jemna gemerserem. Ai agemer gwena jes gemerserem, jega ai samfer Taterisi Waakena gam agam nasipmini jebe, ane jei Yesus ga sene tebana. Bunarsusfer ai ajam gweyan Hukumu Nabi Musa aa jes tulistababilim jem gwonabe. Jengga ai angtane Hukumu jeiserem jem gwonap aa jei naawenaram jebar agalap nwinirim, ai Hukumu jeiserem ga ai onsobili, jega aime samfer Taterisi Waakena gam agam nasipmini angtane Hukumu jeiserem jem gwonap aa jei naawenaram jebe, ane jei Yesus ga sene tebana.

²¹Ane aime angtane Yahudimanyanaiserem jebar agalap nwinirim, ai ga agemer gwena gwela jemna gemerserem. Angtane Yahudimanyanaiserem jei Hukumu angtane Yahudimanaiserem fas jam ne onsobiyen. Ane ai angtane Yahudimanyanaiserem jebar agalap nwinirim, aime gemer Hukumu ajam onsobiyen, jega enggalf ai Taterisi Waakena jebe samfer gam agam nasipmini, ane jei Yesus ga sene tebana. Ai safe Hukumu ajam onsobiyen, jengga Uwa Sanbagiri aa jes bilirim jeiserem ai ajam mirultefalyan, aam temawer Kristus aa jes bilirim jeiserem ai ajesam onsobili.

²²Ane ai agalap nwinirim angtane Yesus kanaufer jam ne tebayanaiserem jebar, ai ajam eyebiyen seyaftersus ai ajes towaswebilirim enggame, angtane Kristen jei samfer jam ne eyebife. Ai ga jetefener agam eyebili angtane jeiserem jei aa jes gane bilirim, jega enggalf angtane jeiserem jei Yesus kanaufer ga sene tebana. Ai angtane jebar agalap nwinirim enggalfe, Taterisi Waakena agam nasipmif, ai ga gemer ai gwena angtane jeiserem jei aa gemer gwenaram. Gwela amna nafis-nafismer folbana, angtane nafis-nafsiserem jemna gwela gemerserem, jega ai Taterisi Waakena samfer gam as nasipmini angtane unggwanfersus jebe, ane angtane afwer Yesus ga sene tebana.

²³Ai seyafter jeiserem ajewer eyebilirim, ai ga enggalf ai eyebili, angtane unggwanfersus jei Taterisi Waakena Yesusem temawer ga sene taabili. Ane seyafter jeiserem aime enggalf ai eyebili, jega ai angtane seyaftersus Yesus aa jei ne tebanaram, ai jebar waakena Uwa Sanbagirmanaiserem ga asa taabili.

²⁴Aamei bunarsusfer imsa towaswena enggame, angtane jam gangge nunggirbenerem enggalfe, gane damtabif tatarfersus nane se nunggiri, jei seyafter tatarfersus gangge nunggirbene jamere garis tabanabo. Jengga jei aa jei gangge nunggirbenerem jemniwer, angtane daamfensususerem angtane nabal danalaiserem baabetfersus aa jei gam nunggiririm, fwaina ga jei gam taabili. Angtane jeiserem jei aa gemer ge nunggirbilirim enggalfe fwaina gam taabif, gwela imna waakenfer ga is gemer se falmini Kristus jam tebafe, jega enggalfe aamei fwaina Uwa Sanbagirminiwer gam isa taabili.

²⁵Angtane aa jei gam olaragawenaram, jei nalef olaragana angtane unggwanfer aa jes gane onsobilirim jebe jam kawiyen, jei jeber-jeber uskambarsus gam latihansouna jamer tifni jemna baabetfer gam folbana. Jei jewer gane eyebilirim, jega enggalf jei olaragana jeiserem jep jam gam kawewilirim, jei fwaina gam taabili angtane nabal danalaiserem jei aa jes gam taabilirim. Fwaina olaragaminiwer aa jes gane taabilirim, fwaina jeiserem abakfer jam falyan. Jengga nei Kristus nejeya tebanaram, gwela nemna waakenfer nesa gerebaabisnenne enggalfe, nei fwaina Uwa Sanbagirminiwer gam nesa taabili. Fwaina jeiserem abak-abaksusfer ga je gam fala.

²⁶Ga jem temawer, ai jam as gwenaram ini amna ga ase nornormer se folbana Uwa Sanbagirminibe, angtane lombana tatarfer nunggiri jam onsobili gamserem. Angtane jeiserem jei jam gangge nunggirbenerem ga garis tabana jep tikwelaiserem, ga jewer gangge nunggirbifele nornormer, jei irsime syefer jam ge nunggirbifelyen. Jei nornormer gemer gangge nunggirbifelerem, ai jes gemerserem ga agemer gwena. Ai jam as gwenaram ini amna ga ase nornormer se folbana Uwa Sanbagirminibe, enggam mese angtane olaraga tinju jam onsobili gamserem, jei olaragana jeiserem jam gam onsobilirim tafna syefer tamanfennap jam firsonuweyan. Jei ga angtane olaragana jeiserem aa jebar gangge onsobilirim ga jeter gam saftawena.

²⁷Angtane aa jei gam olaragawenaram jei jeber-jeber uskambarsus gam latihansouna enggalfe, tifni gam baabetabarulsif jamere gam mesmeswesini, jega jei olaragana waakenfer ga gam onsobili. Ai ga jes gamserem ga agemer gwena. Ai ini waakensusfer ai gerebaasnenne enggalfe, ai baabetfer gam as gwena Uwa Sanbagiri aa jes bilirim jetefener gam as eyebili. Ai angtane nafsiserem amsam towas-towastababili Kristus waakenfer jam onsobalem temawer, ane ai ga gemer as gwena angtane nafsi ai agemer towas-towastababinennerem. Afa ai gam ajam gweyana, ai ajam taabiyen fwaina Uwa Sanbagiri aa jes golminirim angtane Kristen waakenfer aa jei naawenaram jebe.