Read Berik 2Korintus 4 Bible Online

2Korintus 4 - Berik bible

2Korintus 4

¹Ini amna ga as jem ge kanausweipmuwena awelna aaiserem jam gwebife, aam temawer ai amsama towaswena Uwa Sanbagiri Jeiba waaken-waakensusum am temawer, ane Jei awelna aaiserem Taterisi Waakena jam nasbinennefe ap ga as golmini.

²Etam-etama kapka angtane basyamer aa jes ne eyebilirim, ane angtane jena jem ge seferswebiliserem, seyafter jeiserem ai baif aya gwebili, ane ajama eyebiyen. Ai angtane ajama afaf-afaftababiyen, angtane nafsi gamserem. Ai taterisi afaf-afafaiserem Taterisi Waakenaiserem jebar ajama dupdupbulyon enggalfe, nawersamer gam nasbinennef angtane jem malin-malintababif enggalf Yesus jam ne onsobafe. Fas, gamyan. Jengga enggam, ai taterisi Uwa Sanbagirmana bunarsusferaiserem ga jetefener aya nasipminenne angtanefe, Uwa Sanbagirem nwenabe. Jes gemerserem ai gam ajewera eyebilirim, aam temawer ini amna ga ase enggam ge folbamini angtane seyafter gemerserem gangge towaswebif enggame, ai ajesa nasipminennerem jeiserem ba bunaram.

³Bunarsusfer angtane afwer ini jemna mata, jei fas Taterisi Waakena ai ajesa nasipminennerem jam ne sarbiyen. Angtane jeiserem jeiba angtane Uwa Sanbagiri jam waakentababisiyeneiserem ba jesam.

⁴Angtane jeiserem jei Taterisi Waakena Yesusem temawer aaiserem jam ne taabiyen, aam temawer bawasa sanbakf aa jei gwenaram kapka seyafter gemerserem ogiri aaiserem jebe, jei angtane jeiserem ini jemna ga jei gwebaipmini jam matabaipmisife. Bawasa jei ini jemna enggalf matabaipmisini, jega angtane jeiserem jei Taterisi Waakenaiserem jemna nafa fas jam ne domolyan. Taterisi Waakena jeiserem jeyam gwerauwulu enggame Kristus ba waakensusum. Ane Kristus Jei Uwa Sanbagiriserem ga jes gweretana, aam temawer Kristus Jeiba Uwa Sanbagiri galserem.

⁵Taterisi ai ajesa nasipminennerem, taterisi jeiserem jeke alem temawer aya nasbinenne, jengga Kristusem temawer aya nasipminenne. Ai ga enggam aya nasipminenne, Yesus Kristus Jeiba Tuhansam. Ane ai ga Yesus sa tikwebaatini, ane Jei ams baftabili enggalfe ai aamei isa ajama batobaabif, awelna ai ajesa gwebilirim jeme.

⁶Gwanan-gwanansus Uwa Sanbagiri seyafter gemerserem aa galap eyebaabilim, jes jepserem seyafter ga gwin-gwinsusu. Ane Uwa Sanbagiri Jei enggam gul, “Je ge nafwe!”, ane jepga nafwel. Uwa Sanbagiri Jeime ini nemna nes mesam nafabartabaipmini, jega nei ga nesa damdamulsini seyafter Uwa Sanbagirem temawer, Uwa Sanbagiri aasaje sanbagirsusum apgal jigala seyafter gemerserem jemniwer. Seyafter jeiserem Uwa Sanbagirem temawer ga Yesus Kristus se gwerauwulu.

⁷Ai safe angtane igyene ane weren-werna, jengga Uwa Sanbagiri Jei am inibe ap as mesam eyeipmini, jega ai ga aya damdamulsini seyafter Uwa Sanbagirem temawer, ane Taterisi Waakena Yesusem temawer. Uwa Sanbagiri Jei jes gemerserem mesam eyebili enggalfe angtane gangge towaswebif enggame, baabeta unggwandwasusu ai ajesa domolaram enggalfe awelna Uwa Sanbagirmana ajama eyebife, baabeta jeiserem ba Uwa Sanbagirminiweram jela, jeke amniwer, ai angtane weren-wernaiserem.

⁸Ai safe kabwaktala unggwanfer nafis-nafismer aya damtabili, jengga ai ajama tikweyan Taterisi Waakena jam nasbinennefe. Ini amna safe ase isar-isarmer ge folbamini, jengga ini amna uskambarsus as jam ge jenbamiyen.

⁹Ginanggwana amna jei ai as jeber-jeber ne tamtamtababuwena, jengga Uwa Sanbagiri Jei ai as Jam mirtebitefalyan. Ginanggwana amna jei ai ase uskambarsus ne safsaftababuwena, jengga jei fas as jam ne munbobiyen.

¹⁰Angtane jei ai as kakalmer ne nasbabuwena, ane jei ai as jam ne munbobuwef, Yesus jam munbolo gamserem, jengga jei ai as jam ne munbobiyen. Aamei gwela amna ijewera domolaram, aamei ga enggam ima towaswena Yesus Jeiba amnibam nuniton. Ane jeiserem ga enggam gwerauwulu Yesus Jeime gemer gwena.

¹¹Ai ajeba gwenaram, ai jeber-jeber aya domolwena enggame ai safe as jam ne munbobif, aam temawer ai awelna Yesusmanaiserem ajewera gwebilirim. Ai tamtamtala jes gamserem gam ajewera domolwenaram, jega enggalf angtane ga sene damtabili enggame Yesus Jei am inip gwena. Jei ga sege towaswebili enggame Yesus Jeiba gemeram gwena, aam temawer jei ams ne damtabili, tifni amna safe baabetyena, ai gemer aya gwena baabeta Yesusmanaiserem jeme.

¹²Ai tamtamtala unggwandusa amkom fom tere jeber-jeber aya domolwena, aam temawer ai Taterisi Waakena ajewera nasbinenewenaram. Jengga tamtamtala jeiserem igi jemnaiserem ga enggam, aamei gwela waakena abakfer gwelaiserem gam isa domola.

¹³Taterisi Uwa Sanbagirmanaiserem jep ga enggam baatultel: “Ai Uwa Sanbagiri ames tebana, ane jega jem temawer ai taterisi Uwa Sanbagirem temawer ga ajewer nasbinenne.” Aime gemer. Ai Uwa Sanbagiri aya tebana, ane jem temawer ai Taterisi Waakena ga aya nasbinenne.

¹⁴Ai ini amna seyafter gemerserem jeme enggam aya towaswena, Uwa Sanbagiri Jei Tuhan Yesus mesam irtestena terewer. Ane jega jem temawer aime enggam aya towaswena, Uwa Sanbagiri Jei ai as gase irtebaabisi terewer, aam temawer ai Kristusfar daamfennaber aya gwena. Ane Uwa Sanbagiri Jei aamei mese ai seyafter nese aftabifelse Jelem tarnabe.

¹⁵Ai rasulfe ajewera gwenaram, ai seyafter ajesa eyebilirim, ane tamtamtala seyafter ai ajesa damtabilirim, seyafter jeiserem ga enggalf ge etamwebili aamei is jem batobaabif. Namwer nesiktele Uwa Sanbagirmanaiserem angtane bastowaifer jei ne towaswebili. Taterisi Waakena Yesusem temawer angtane bastowaifer jei ne taabili. Jega jem temawer Uwa Sanbagirfe “Ase samfer golmini” bastowaifer gane gweyibene. Jengga ai awelna Uwa Sanbagirmana ajesa gwebili enggalfe angtane unggwanfersus nesiktele Uwa Sanbagirmana gam ge towaswebif, ane angtane unggwanfersus Taterisi Waakena Yesusem temawer gam ne taabif. Gam jega Uwa Sanbagirfe “Ase samfer golmini” unggwanfer gane gweyibene. Ane jei Uwa Sanbagiri jes gamserem gam aa jewer gane balaram, Uwa Sanbagiri ga jem gane pujitene.

¹⁶Nei nemsa towaswena enggame Uwa Sanbagiri Jei nei nes batobaabili baabeta Jelemanaiserem jeme. Jega jem temawer ini nemna ga nes jeber-jeber ge kanausweipmuwena. Tifni nemna safe nes jam gangge werensweipmini jeber-jeber, jengga ini nemna nes jeber-jeber gangge kanausweipmuwena.

¹⁷Kabwaktala nei nejesa domolaram, kabwaktala jeiserem ga nomkefefener negama domola, abakfer jam falyan. Ane kabwaktala jeiserem nei nejesa domolaram, kabwaktala jeiserem bastowaisusu, nei waakena unggwanfersus galap nejesa domolsaram taman waaken-giribe kabwaktala jeiserem jemniwer. Kabwaktala nei namwer nejesa domolaram, jemna igi ga enggam — nei gwela waakena nesa domolsa Uwa Sanbagirfar jamer abak-abaksus.

¹⁸Jewer ga ini nemna unggwan-girsusu ga nesege folbamini apgal jigala nei nejama damtabiyeneiserem jem temawer, aa jei ge falbilirim taman waaken-giribe, jeke apgal jigala nei nejesa damtabilirim ogiri aaiserem jebe. Apgal jigala nei nejesa damtabilirim ogiribe, jeiserem abakfer jam ge falbiyen, jengga apgal jigala jeiserem nei nejama damtabiyeneiserem taman waaken-giribe, jeiserem ga gemer sege falbili jamer abak-abaksus.