Read Berik 2Korintus 6 Bible Online

2Korintus 6 - Berik bible

2Korintus 6

¹Awelna amna ai ajesa eyebilirim, ai Uwa Sanbagirfar seyafter aya eyebili. Ai ga aamei isa jem temawer aya balbabili unggwanfer, waakenaiserem Uwa Sanbagirmana aamei ijesa taabilirim, waakena jeiserem aamei ijama elsiyen jam taabiliwer. Jengga aamei ijewera eyebilirim seyafter Uwa Sanbagiri aa jes bilirim, ga jem aamei isa gwerauwulu enggame aamei waakenaiserem Uwa Sanbagirmana imsama taabili.

²Taterisi Uwa Sanbagirmanaiserem jep ga Uwa Sanbagiri enggam gul: “Nunu Ai jam Ajem gunurum Ai aamei isa Ajem batobaabife, nunu jes jemserem aamei Ai As imsa balant Ai aamei isa Ajam batobaabife, ane Ai aamei isa Amsam sarbabilint. Nunu Ai jam Ajem gunurum angtane jem waakentababisife, jes galapserem Ai aamei isa Amsam batobaabilint.” Uwa Sanbagiri ga gam gul. Ane ai aamei isa enggam ai balbabili: Nunu namwer aas jepserem, Uwa Sanbagiri Jei aamei is jam batobaabif! Nunu namwer aas jepserem ga enggalf Jei aamei is Jam waakentababisif!

³Ai ajama unggwasa baabeta amna seyafter gemerserem jeme, ai waakena tefner agma eyebili enggalfe, angtane gwela amna aa jei ne domolminirim, jei amnibe kapkaiserem jam ne domolyan. Gam jega angtane afa fas jam irfweyan Yesus jam tikwebaatiliwer ai ajesa eyebilirim jem temawer. Ai waakena jes galserem ai jetefener ajewera eyebilirim, ai ga enggalf aya eyebili, jega angtane fas kabwakfer jam ge gubiyen awelna amna Uwa Sanbagiri ap aa jes golminirim jem temawer.

⁴Seyafter ai ajesa eyebilirim, ai ana ga ajema gweraasona enggame, ai awelna Uwa Sanbagirmanaiserem aiba ajesma gwebili. Jega jem temawer ai kanaufer aya fibuwena kabwaktala yo tamtamtala nenes-nenesmer ai jam agalaba domolwenaram.

⁵Ai ga asene safsaftababili. Ai bwiyip asene katabaabuntowena. Ai asene sigin-gintababili, angtane unggwanfer jei jame aa jep ge erabanaram. Ai awelna uskambarsus aya gwebili, jamere baabeta ase fom ge barweipmini. Ane gwini afweraiserem jem ajama tayan, ane nunu afweraiserem jem afa ajama twenyan.

⁶Ai aaiserem ana ga ajema gweraasona enggame, aiba awelna Uwa Sanbagirmana ajesma gweyibene: Seyafter ai ajesa eyebilirim, ai ini tabalmer aya eyebuwena. Ai Taterisi Uwa Sanbagirmana waakenfer aya towaswebili. Angtane kabwaktala ap as jem gane eyeipminirim, ai kabwakfer jeiserem jafner agma fibili abakfer. Ai angtane nafsiserem agma batobaabili. Mafnana Uwa Sanbagirmana Jei am inip nuniton. Ai bunarsusfer angtane nafsiserem agma nesiktababili.

⁷Ai taterisi bunarsusfer aaiserem aya nasbinenne, ane awelna jeiserem baabeta Uwa Sanbagirmanaiserem ga ajema gwebili. Ai waakenfer aya gwena, Uwa Sanbagiri aa jes bilirim ai ga jetefener aya eyebili. Ane jega jem temawer, ai samfer bwat kapka agma orolstefala. Ai waakena tefner jam eyebiliserem ai ga ase jei isinbaabisnenne, jega ai kanaufer gam asa fina bawasa ai jam as jep unggwasbaabilirim.

⁸Angtane afweraiserem jei am temawer waakenfer gane nasbili, ane angtane afweraiserem jei am temawer kabwakfer gane nasbili. Angtane afwer jei ai asene kitultena, ane afwer ai as jei sene imei-imeitababili. Jei gangge gubili aiba angtane afaf-afafam. Jengga bunarsusfer gamyan, ai taterisi ba bunarsusfer aya nasbinenne.

⁹Angtane afwer jei enggam gangge gubili am temawer, ai angtane igyene, ane angtane jei ai as jam ne towaswebabiyen. Jengga gamyan, angtane unggwanfersus jei ai as mes ne towaswebabili. Ai tamtamsusu jeber-jeber aya domolwena enggame, angtane ai safe as jam ne munbobif, jengga ai gemer aya gwena. Ai ase uskambarsus ne tamtamtababili, jengga ai as jam ne munbobiyen.

¹⁰Ini amna safe ase jam gangge jenbamini kabwaktala ai ajesa domolwenaram jem temawer, jengga ini amna jeber-jeber ase saaser-saaserfer gangge folbamini. Aiba angtane galgalyenaiserem, jengga ai Taterisi Waakena Uwa Sanbagirmana ajewera nasibenennerem, ai ga apgal jigalfe Uwa Sanbagirminiwer aaiserem ai ga unggwanfersus angtanef ga ajesa kitulmini. Ga enggam, ai bunarsusfer galgala fas, jengga seyafter Uwa Sanbagirmanaiserem jeiserem ba amnam.

¹¹Am afelen mesna Korintusmanaiserem, seyafter ajesa entebilirim am inibe, seyafter jeiserem ai bunarsusfer isa amsama nasbaipmini ibe. Ini amna seyafter gemerserem, ai aamei ga isa jema nesiktababili.

¹²Safe gam, ini nemna gemerje daamfennaber nes jam ge folbamiyen. Afa ini nemna daamfennaber nes jam ge folbamiyeneye, jeiserem ga enggalem temawer aamei ai as ijama nesiktababiyen, jeke enggalem temawer ai aamei isa ajama nesiktababiyen. Fas gamyan, ai bunarsusfer ba isa jamerma nesiktababili uskambar.

¹³Ai ip isa agemer nasipminirim aameiba enggala tanna amna galserem: Aamei ai as jam isa nesiktababili, ai aamei isa gemera nesiktababilirim.

¹⁴Aamei safnant angtane Yesus jam tebayanaiserem jebar ijama batenwesiyen. Ai ga jes gemerserem aamei ga isa gam balbabili, aam temawer nele waakenfer jem gwelaiserem ane nele kabwakfer gwelaiserem, gwela naura jeiserem jam dupdupsosiyen. Nafa gwinfar jam ge dupweyan.

¹⁵Kristus ane bawas daamfennaber fas jam ge batenweyan. Ga jem temawer angtane Yesus jam tebalaiserem, jei angtane Yesus jam tebayanaiserem jebar daamfennaber fas jam ge batenweyan.

¹⁶Jena Uwa Sanbagirmana ane jena tiborma jam kwiruluserem fas daamfennaber jam eyebiyen. Neiba Jena Uwa Sanbagirmanam, Uwa Sanbagiri aa Jei gwenaram. Uwa Sanbagiri Jeneram gul enggame: “Ai angtane Amnaiserem jem nenennap As nwini, ane Ai jebar seyafter ga Asa gwena. Ai jem Uwa Sanbagirf As gwena, ane jei Am angtanef se naawena.”

¹⁷Ga jem temawer, Tuhan namwer angtane Jelemanaiserem enggam balbabili, Jei gwanan aa gemer balbabilim jes gemerserem: “Angtane jeiserem ga jam isa mirtebitefala, ane aamei ina jemniwer jam isa bijausona. Aamei etam-etama kapkaiserem seyafter gemerserem ijama eyebiyen, ane Ai aamei ga isAs tebabili.

¹⁸Ai im Uwaf As gwena, ane aamei Am tanef isa gwena. Uwa Sanbagiri baabeta uskambarsus Jemanserem Jei ga jes gamserem ga gam gunu.”