Read Berik 1Tesalonika 4 Bible Online

1Tesalonika 4 - Berik bible

1Tesalonika 4

¹Am afelen mesna umwef ga enggam, ai ibar gwanan negalaba nwinintim, ai aamei isa amsama towas-towastababilint aamei fomfom isa gwena, jega ini Uwa Sanbagirmana saaser-saaserfer gase folbana. Ane ai amesa towaswena aamei jes gamserem gam ba imsama gwena. Ane namwer aas jepserem bosna Tuhan Yesusmanaiserem ai aamei uskambarsus ga isa ajema balbabili, ane ga isa asa tergenbaabili, jega aamei waakenfersus gamjon gam isa gwena.

²Taterisi ai isa ajesa nasipminintim ibe baabeta Tuhan Yesusmanaiserem jeme, aamei taterisi jeiserem imsama towaswebili.

³Aaiserem Uwa Sanbagiri ga is jes bilipmini ibe: Uwa Sanbagiri aa jes bilirim aamei ijema eyebife, aamei seyafter jeiserem aamei ga jetefner isa eyebili. Ane aamei seyafter maaryena ijama gwebiyen.

⁴Anggwana seyafter gemerserem jeime jam sege towaswebili, jei tifni jelemana fomfom gane gerebaabisnenne, jega Uwa Sanbagiri aa jes bilirim jei jeiserem gam sene eyebili, ane jei angtane nafsiber waakenfer gase naawena.

⁵Maaryena ijama eyebiyen, angtane Uwa Sanbagiri jam towaswebayanaiserem galserem.

⁶Taterisi seyafter jeiserem jewer, angtane jelem afelenfe kapka jam eyeibeyen, jei maaryena jam gwebiyen. Ai gwanan aamei ititmer isa mesama towastababilint enggame, angtane etam-etama jes galserem gala jam eyebiliserem, Tuhan Jei angtane jeiserem se tamtamtababisi.

⁷Uwa Sanbagiri Jei nei nes mesam jenbebili enggame, “Au, aamei enggam isa gwena anggwabura Amna gamserem, ane aamei maaryena ijama gwebiyen, jengga aamei ini tabalbalmer isa gwena.”

⁸Gam jega, afa angtane taterisi aaiserem baife aa jei ne gweyibenerem jam onsobiliwer, jei gam ke taterisi angtanemanaiserem baife jes gane gwebili jam onsobife, jengga jei taterisi Uwa Sanbagirmanaiserem baife ga jes gane gweyibene jam onsobiliwer, Uwa Sanbagiri Mafnana Jelemanaiserem ibe is Jei golminirim.

⁹Ai ibe gamjon isa ajama tulisulmiyen enggalem temawer, aamei ilem afelen mesna Yesus aa jei ne tebanaram ifomfoma nesiktababili. Uwa Sanbagiri Jei fwater aamei is mesam towastababilint enggame, aamei fomfoma in ina ijama nesiksonanafe.

¹⁰Ane aamei jes gamserem gam imsama eyeipmini, ilem afelen mesenfe seyafter aa jei ge nwinbenerem propinsi Makedonya je. Jengga am afelen mesna, ai aamei isa gamjon aya balbabili unggwanfer enggame, aamei angtane unggwanfer isa nesiktababuwena.

¹¹Aamei enggam isa gwena, ai gwanan aamei isa agemera balbabilintim. Aamei ijama wofoweyan aaremfener ga igama doksona. Angtane nafsiserem taterisi jemnaiserem jep ijama taawiyen. Jengga aamei awelnabe iner igama gwena enggalfe aamei tumilgala igama damtabif.

¹²Aamei afa jes gamserem gam jam isa gwenaram, angtane Yesus jam tebayanaiserem jei ga sege gubili aamei waakena. Ane aamei awelnabe ijewera gwenaram, aamei apgal jigala afa ijama balbabiyen angtane nafsiserem jemniwer.

¹³Am afelen mesna, ai aamei isa ajama towastababif angtane jam tereserem jem temawer. Afa aamei taterisi bunarsusfer aaiserem jam isa towaswebilirim, ini imna is jam ge jenbamiyen, angtane nensa gamserem. Angtane jeiserem ini jemna enggam jam ge folbamiyen terewer jam irwelaiserem jem temawer.

¹⁴Nei aaiserem Yesusem temawer jes nesa taabili, Yesus mes tere ane Jei gamjon mes irwena terewer. Jega jem temawer aaiserem jes mese jam nesa taabili: Nunu Yesus aa jem warausanyaram, nunu jes jemserem angtane jam tereserem Yesus aa jei ne tebanaram, Uwa Sanbagiri Jei angtane seyafter jeiserem se iretebabisi terewer, ane jei Yesusfar ga sege jalbisi.

¹⁵Taterisi aaiserem ai ibe isa ajesa towas-towasulminirim, taterisi aaiserem jeba Tuhanminiweram jela enggame: Nunu Tuhan Yesus aa jem forsanyaram, nunu jeiserem jeme nei gemer nejeya gwenaram, angtane gwanan aa jei ge terbuwenaram, nei fas angtane jeiserem nejama danabaabiyen.

¹⁶Uwa Sanbagiri gase nasousa ititmer, malaikata sanbagirsususerem ititmer se nasousa, ane trompeta Uwa Sanbagirmana gase forolsa, ane jes jepserem Tuhan Yesus Jener gase iresanya taman waaken-giriwer. Ane angtane gwanan aa jei ge terbuwenaram Kristus aa jei ne tebanaram, jei nabala ga jei sege irwebisi nemniwer.

¹⁷Ane jes jepserem nei gemer nejeya gwelaiserem, Uwa Sanbagiri Jei nei seyafter ga nes kitultesa angtane jeiserem jebaner, ane winsibaner ga nes erbifelse enggalfe Tuhanfar negama dorwef winsibe. Jepga nei Tuhanfar ga nesa gwena jamer abak-abaksus.

¹⁸Ga jem temawer aamei ini imna in ina ga jam isa kanautababuwena taterisi jeiserem jeme.