Read Berik 2Tesalonika 3 Bible Online

2Tesalonika 3 - Berik bible

2Tesalonika 3

¹Umwef ga enggam am afelen mesna, aamei sembayanga am temawer jam isa gwebana, jega angtane unggwanfer taterisi Tuhanmana gamjon tatarmer ga sene sarbili, jegme taterisi jeiserem ga sene taabili, aamei gwanan igemera taabilirim.

²Aamei sembayanga gamjon jam isa gwebana, Uwa Sanbagiri Jei ai as gase isinbaabisnenne waakenfer, jega angtane kakalsususerem jei abe kapkaiserem as jam ne eyeipmiyen. Ai jes gamserem gam ajewera gunurum, ai ga aam temawer aya gunu angtane unggwanfer jei taterisi Tuhanmana jam ne taabiyen, ane jei kapkaiserem ap ne eyeipmif.

³Jengga Tuhan Yesus Jei jeber-jeber gam eyebili Jei aa jes bilirim jam eyebife. Jei ini imna is kanautabaipmini, ane Jei waakenfer is gerebaabisnenne Kabwaksusu Jeiserem jewer.

⁴Ai Tuhan Yesuster aya tebana, ane ini amna unggwan-giri ase Jemniber ge folbamini im temawer, aam temawer aamei Yesus waakenfer imsa tebana. Ane ai alem inibe enggam aya gunu, ai ibe isa ajesa towas-towastabaipminintim ibe, aamei jeiserem waakenfer imsa sarbili, ane aamei ima onsobili. Ane aime enggam aya gunu, aamei taterisi ai ajesa tulistaabilirim surta aaiserem jebe, aamei taterisi aaiserem jes mese isa sarbili, ane ga isa onsobili.

⁵Ai sembayanga Tuhanfe asa gwebabana enggalfe, aamei igama towaswef enggame Uwa Sanbagiri Jei aamei is uskambarsus nesiktababili. Ane enggalf mese aamei igama towaswef Yesus Jei baabeta is golmini, angtane kapkaiserem jam is jep ne eyeipminirim ibe.

⁶Am afelen mesna, bosna Tuhan Yesus Kristusmanaiserem jeme, ai aamei ga isa ajama balbabili unggwanfer enggame, angtane kwaalaamitiserem awelnap jam naaweyanaiserem, aamei angtane jeiserem jemniwer iner jam isa bijausona. Angtane jeiserem jei taterisi ai isa ajesa towas-towasulminintim jam ne onsobiyen.

⁷Ai ibar gwanan negalaba nwinintim, ai ajama kwaalaamitsweyan. Ane aamei iner imsa towaswena, aamei ga gemer isa gwena, aamei iner isa eyebili ai agemera eyebilirim.

⁸Ai tumilgala angtane nafsimana ajama tombaabiyen, jengga jam agma armanulu. Gwerem ane gwinem ai awelnap agma gwena unggwanfer, jega apgal jigala ai ajesa balbabilirim jam damtabife, angtane imniwer jeiserem abe as jam ne armanulmiyen.

⁹Aaiserem jeba bunaram, aamei iner imsa towaswena ai tumilgala imniwer samfer agma bili, jengga ai ajama bilyen. Ai awelnap agma gwena enggalfe ai tumilgala aner agma armanulf. Ai jeiserem ajewera eyebilirim, ai enggalf aya eyebili aamei igama gaarasif jega aamei awelna jem towasfar gam isa eyebili.

¹⁰Ai gwanan ibar negalaba nwinintim, ai aamei unggwanfersus isa mesama towas-towastababili enggame, “Afa angtane awelnap jam gwefe baif gam gwenaram, angtane jeiserem jei safnant jam twenyan.”

¹¹Ai jes gamserem gam isa ajewera tulisulminirim surta aaiserem jebe, ai ga aam temawer tulisulu angtane nafsi jei ai as enggam ne balbabili, angtane afweraiserem im nenennabe jei bai awelnap jam gwefe. Jei jafner gam wofena, awelna angtane nafsimanaiserem ga jes jep gam taayiwena.

¹²Bosna Tuhan Yesus Kristusmanaiserem ai angtane kwaalaamiti jeiserem awelnap jam naaweyanaiserem ga ajema balbabili unggwanfer enggame, jeime jam ge kwaalaamitswebiyen, baabetmer se naawena. Jei awelna jamer gam naawena, jega jei tumilgala gam gane domola.

¹³Ane aamei am afelen mesna, aamei baife ijama gweyan waakenaiserem jam eyebife.

¹⁴Angtane afa jei taterisi aaiserem ai ajesa tulistaabilirim surta aaiserem jebe waakenfer jam sarbiyeneiserem, bosna jemna ga jam isa baatulbotena, ane jebar ijama betweyan jega enggalfe jei ga gam seferswena.

¹⁵Jengga aamei jei enggam ijama gwebayan ginanggwana gamserem, jengga aamei jei jafner igma esoroltana ilem afelna gamserem.

¹⁶Tuhan Yesus Jei ini angtanemana se gwebaipmini enggalfe, ini jemna waakenfer gam ge folbamif. Jega jem temawer ai sembayanga Tuhanfe ga asa gwebabana, Jei ini imna is gase gwebaipmini jega ini imna waakenfer is ga sege folbamuwena gwela imna seyafter gemerserem jeme. Ane ai sembayanga asa gwebana Tuhan Jei ibar gam isa gwena aamei seyafter gemerserem.

¹⁷Ai Paulus, ai taterisi aaiserem ga aner tulisulu: Ai ga is enggam ai balbabili, kelek, waakenfer sa gwe! Ai aner jes gamserem gam ajewer tulisulurum, jega enggalf igama towaswef surta aaiserem ba amniweram.

¹⁸Ai sembayanga asa gwebabana Tuhan Yesus Kristus, Jei waakena Jelemanaiserem ip is gase golmini aamei seyafter gemerserem. Tabana ga aaf, amniwer Paulus, Silas, ane Timotius.