Read Berik 1Timotius 2 Bible Online

1Timotius 2 - Berik bible

1Timotius 2

¹Timotius, taterisi nabal-nabalsusu ane igsususerem ai ajes bilipminirim angtane Kristenfe, taterisi jeiserem ga aas: Angtane Kristen aa jes ne balbabilirim jam damtabife, seyafter jeiserem ga Uwa Sanbagirf sene balbaibene. Jei seyafter sembayanga sene gwebana angtane seyafter gemerserem jem temawer. Ane jei Uwa Sanbagiri sene bala, “Ase samfer golmini waakena seyafter Aamei ap as Ijes eyeipminirim.”

²Igiserem ga aas: Angtane Kristen jei angtane sanbakfe aa jei ge nwinbenerem seyafter gemerserem sembayanga jem temawer gane gwebana, jega nei waakenfer gam nesa gwena, ane Uwa Sanbagiri tefner ga nesa tikwebaatini, ane nei ga waakena tefner ga nesa eyebili.

³Uwa Sanbagiri Jei nei nes Jei waakentababisini. Nei angtane seyafter gemerserem jem temawer sembayanga nesa gwebana, aam temawer jeiserem waakensusu, ane ini Uwa Sanbagirmana saaser-saasersusfer ga gam folbana jeiserem jem temawer.

⁴Ini Jemna saaser-saasersusu, aam temawer Jei angtane seyafter gemerserem jam waakentababisif. Jei enggam gunu, angtane seyafter gemerserem jei Taterisi Waakenaiserem jam ne towaswebif.

⁵Uwa Sanbagiri Jeiba daamfennam. Ane Angtane daamfensusu angtane aa Jei aftabifelerem Uwa Sanbagirminibe, Angtane jeiserem Jeiba Kristus Yesusam, ane Jeiba angtanesam.

⁶Uwa Sanbagiri Jei nunu Jener destabili, nunu Yesus Jem tereserem ti salibibe enggalfe etam-etama angtanemana seyafter gemerserem jem gam wirtabaipmif. Nunu jeiserem ga jem ge saasini Uwa Sanbagiri Jei angtane seyafter gemerserem jem waakentababisif.

⁷Jega jem temawer Uwa Sanbagiri Jei ams bala enggame, “Aamei rasulu Amna. Se sofwe, taterisi Amnaiserem angtane Yahudimanyanaiserem jep ga is nasipminenne, jega jei Yesus ga sene tebana.” Ai ajam afafweyan, taterisi aaiserem ai ajes nasbilirim Uwa Sanbagiri ams balaiserem jeba bunaram.

⁸Ai enggam ai gunu, anggwana aa jei ge nwinbenennerem taman-tamna seyafter gemerserem jebe, jei sembayanga jam gane gwebanaram, tafna ga nawersamer gam tetena. Anggwana sembayanga jam gane gwebanaram, jei ini tabalmer gane gwebana, jelem inip ga Uwa Sanbagiri tefner ne onsobaf. Ane jei angtane nafsi jam ne nasbayan, jei angtane nafsi jelem inip jam ne gatasiyen kapkaiserem jam fwayenulbofe.

⁹Timotius, ai enggam ai gunu wim temawer: Wini Kristenmanaiserem jei jena jam ne tetenanayan fene waakenaiserem jeme enggalfe anggwana jewer gam ne damtabif. Wini Kristenmanaiserem jei jena jam ne tetenanayan fene hargana unggwanfersus aaiserem jei aa jes gane kabwabilirim jeme, ane inanai hargana unggwanfersus — emas ane mutyara galserem.

¹⁰Jengga wini Kristenmanaiserem jei ga angtane nafsiserem ga jes gane batobaabili. Wini enggam aa jei gangge gubilirim, “Aiba angtane Kristensam.”, jei ga waakenater gane eyebili.

¹¹Wini gerejanap taterisi aa jes gane towas-towasulminirim jebe, jei taterisi seyafter jeiserem ga jafner gane sarbisini ini jam onabertalaiserem jeme.

¹²Ai enggam ai gunu unggwanfer, wini gerejanabe anggwana jam ne towas-towastababiyen, ane jei anggwa sanbakfe jam naaweyan. Jengga wini jafner gangge nwinbene.

¹³Jei anggwana jam ne towas-towastababiyen, aam temawer Uwa Sanbagiri Jei gwanan ga Adams eyebal, ane amnup ga Hawas eyebil.

¹⁴Ane bawasa jei Adam jam afaftayan, jengga bawasa ga wis afaful, ane jes jepserem wini jeiserem ga eyebil Uwa Sanbagiri aa jes bilipmilim enggame, “Aaiserem ijam ge eyebiyen.”

¹⁵Jega jem temawer Uwa Sanbagiri ga wini seyafter enggam balbabil, “Aamei tane jam gerelabe jes jepserem, witifini imna ga siginsusufer igam ensona.” Safe gam, wini Uwa Sanbagiri jeber-jeber waakenfer aa jei ne tebanaram, ane angtane nafsi aa jei ne nesiktababilirim, ane waakenaiserem aa jei ne eyebilirim, ane jena jam tetenanayanaiserem, afa jeiserem seyafter jam gane eyebilirim, Uwa Sanbagiri Jei ga wini jeiserem ga gam batobili, jei jam jep gam sartenaram tanes gerefe.