Read Berik Ibrani 9 Bible Online

Ibrani 9 - Berik bible

Ibrani 9

¹Taterisi fwatermanaiserem Uwa Sanbagiri Nabi Musafe aa jes bilibelem, taterisi jeiserem imam-imam jam towasulmife jei awelna fomfom sene gwebili. Ane ogiri aaiserem jebe jena aasaje ga jep imama awelna jep ne gwebife.

²Jena jeiserem ga tenda galserem, mwona naura. Mwona daamfennaiserem lampunu ga jep gam fina, ane meja mese jem tumilgala jep gangge falbunnu Uwa Sanbagirfe aa jes gane kitulbonorom. Mwona jeiserem ga enggam gane bili, Mwona Waakena.

³Ane mwona afelnaiserem kaina unggwan-giri jep aa jei gam taantetyaram jem duruwer, mwona jeiserem ga enggam gane bili, Mwona Waakensususerem Uwa Sanbagirmana.

⁴Mwona jeiserem je mejanabara, mejana emasem gwemiliserem. Wili jep gane giranbaabisini, wili jeiserem asna waakena. Ane mwona jeiserem jep jegme ti petini, taterisi fwatermana Uwa Sanbagiri Nabi Musaf aa jes bilibelem ga jep faliton. Petini jeiserem seyafter cat emasem gwebili. Ane petini jeiserem jem aaremap jegme mangko emasa jep faliton, igi ga roti mana gam faliton. Ane dumu Harunmana gwanan aa jei kokosabarswelam jeme jeber faliton. Ane petini jem aaremap ga ton felfele naura jep nulaiton, Uwa Sanbagiri Jei sepulu Hukumu aa jep tulisulum.

⁵Malaikata Kerub naura aa jes ne kwirsolam, jei ga peti gwar sagap ge nontena. Farta jemnaiserem ga tampata jeiserem ga jes ge matabaabisini, etam-etama kapka aa jep ne wirtabaabisiwenaram. Malaikata naura ga jep, jega samfer angtane gam ge towaswebif enggame, Uwa Sanbagiri nafabaraiserem ba jebam. Jengga taterisi apgal jigala seyafter jeiserem jem temawer waakenfer namwer ajama nasbiyen.

⁶Imam-imam jei apgal jigala seyafter jeiserem gane bunulntena mwona naura jeiserem jebe. Jepga jei nunu jeber-jeber gangge kabwitena mwona gwananmanaiserem jebe. Jei ga awelna jep ga gane gwebili.

⁷Jengga imam sanbagirsususerem jei jentowai mwona afwer aaiserem jep gam kawetena, Mwona Waakensususerem jebe, ane tahunu jeber-jeber jei jep ga daamfenfener gam kautena. Ane jei tafafsamer jam kauteyan, jengga jei aawisiber gam kautena. Aawisi jeiserem ga gam kitulbono Uwa Sanbagirfe, jega enggalf etam-etama kapka jelemana ane etam-etama kapka angtane nafsimana jes gam wirtabaabif.

⁸Seyafter jeiserem jewer ga Mafnana Uwa Sanbagirmana nes mes gwerauwulmini enggame, afa Tenda Jena jeiserem gemer se finaram, nele Mwona Waakensususerem Uwa Sanbagirmana jewer kautefe je gemerje, jam ne tertesiwiyen.

⁹Taterisi jeiserem ga awelna jam gwebife Jena Uwa Sanbagirmanaiserem jebe ga nes enggam towas-towastababili namwer, angtane apgal jigala, domba tane aawis, ane kambing tane aawis aa jei gane erbuwenaram, jei ga gane kitulbono Uwa Sanbagirfe. Jengga seyafter jeiserem jei angtane jeiserem jemna ini jam wirtabaipmiyen.

¹⁰Awelna seyafter jeiserem je ga tumilgalem temawenefener, ane fos telbilim temawer, ane tifni seyafter wirtabaabilim temawer. Awelna jeiserem je ga angtanemanaiserem, ini jem jam wirtabaipmiyen. Ane angtane jei jes gamserem ga sene eyebili jamere Kristus se fortya, ane nele ibirmi gase destabana.

¹¹Ane Kristus Jei mes fortya. Jeiba Imam Sanbagirsususerem bunarsusfer nes Jei aftabifelfe Uwa Sanbagirminibe. Jei mes kautena mwona waakensususerem jebe, mwona tagarsusup ane waakensus. Angtane mwona jeiserem jam ne eyebiyen tafame, je ogiri aaiserem jemanyan.

¹²Kristus Jei kambing tane ane sapi tane Jam targabaabiyen, ane aawisiserem ga gam erbuwena enggalfe Mwona Waakensususerem Uwa Sanbagirmana jep ga gam kawetefe. Jengga Jei Jener terent, ane aawisi Jemnaiserem jes enggalf gulbanant jep gam kawetefe. Jega jem temawer Jei daamfenfener mes kawetenant mwona waakensususerem jebe, ane nei nes mes aftabuwenant Uwa Sanbagirem gwetmanap jamere abak-abaksus.

¹³Angtane jei angtane futunu aa jei gam tebanaram tafame, jei jam kaweteyan Jena Uwa Sanbagirmanaiserem jebe. Jega jem temawer imam ga gam sukuskutabaabili kambing aawisem, ane sapini giriserem jem aawisem, ane sapi tane sonem. Jengga jeiserem tifni angtanemana seyafter aaiserem ga jetefener gane wirtabaipsini.

¹⁴Jengga aawisi Yesusmana je baabetabara, je kambing aawis ane sapi aawisi mes ayebaabinni. Kristus Jei etam-etama kapka jam eyebiyen. Mafnana Uwa Sanbagirmana aa Jei gwenaram abak-abaksusfer, baabeta ga Jei gulbana Jebe, Jen Jena gam gaarf Uwa Sanbagirfe. Ane aawisi Jemnaiserem ga nes wirtabaipmini ini nemna, ane etam-etama kapka nei nes jei aftabifelerem terebe ga jes borolsini, jega nei ga nesa gwena, awelna Uwa Sanbagirmana ga nesa gweyibene, Uwa Sanbagiri abak-abaksusfer aa Jei gwenaram.

¹⁵Bunarsusfer Kristus Jei Jen Jena mes gera Uwa Sanbagirfe, aawisi Jemnaiserem mes tenbentetya etam-etama nemnaiserem jem temawer. Ga jem temawer, Kristus ba angtane daamfensusum taterisi nep nes Jei gwirinmifeltyerem, taterisi ibirmiserem Uwa Sanbagiri aa jes bilipminirim angtanefe. Kristus enggalfe mesam tere angtane gam aftabunnuf etam-etama kapkaiserem jewer, etam-etama angtane aa jes ne eyebuwenaram jei gwanan aa galap naawenaram taterisi fwatermanaiserem Uwa Sanbagiri aa jes bilipmilim jem gwonabe. Jega jem temawer Kristus Jei taterisi Uwa Sanbagirmana ibirmiserem nep ga nes Jei gwirinmifeltye enggalfe, angtane Uwa Sanbagiri aa jes jenbebilirim jei waakenaiserem Uwa Sanbagirminiwer ga sene domola abak-abaksus. Uwa Sanbagiri Jei fwater mesam gul Jei waakena Jelemanaiserem jam golmife jebe.

¹⁶Nei seyafter nemsa towaswena enggame angtane afweraiserem jei nalef jam teryen, jei angtane bosna ga jase tulistabaipmini galgala jelemana jei tebabife jei aa jep tererem. Angtane jei nalef jam teryen, angtane afa fas galgala jemna jam tebabife. Jengga jam gam tererem, ane jei ga gam gwerauwulu enggame jei bunarsusfer mes tere, jepga taterisi jeiserem jei aa jes gam tulistababilintim ba igiberem. Ane angtane jes jepserem galgala samfer ga sene tebabili, galgala gwanan aa jes gam tulistababilintim jam tebabife.

¹⁷

¹⁸Jeiserem ga enggala taterisi fwatermanaiserem Uwa Sanbagiri aa jes bilipmilim jes gemerserem. Imam jei nalefe sapi tane jam ne munboyon ane aawisiserem ga gane gulbana Uwa Sanbagirfe, gwanan jes galapserem taterisi fwatermanaiserem Uwa Sanbagiri aa jes bilipmilim jemna igi fas. Jengga imam jepga sapi tane gane munbono ane aawisi jemna gane gulbana Uwa Sanbagirfe, ane jepga taterisi fwatermanaiserem Uwa Sanbagiri aa jes bilipmilim ga igi ga gam domola.

¹⁹Gwanan Nabi Musa hukumu seyafter gemerserem aa galap tabanulum jam nasipmif angtanefe, hukumu seyafter taterisi Uwa Sanbagirmanaiserem jebe, jepga jei sapi tane aawisi ga goltel, ane ga bunbunul fonabar. Ane hisop alna ga tasowil, ane benang berberem ga fwirel, ane mangkona sapi tane aawisibereiserem jep ga osoltel, ane ga titin-titintabaabil bukunu Hukumu Uwa Sanbagirmanaiserem jebe, ane angtane seyafter jeiserem jemnip mese.

²⁰Jei jeiserem jam aa galap eyebilim, jei ga enggam gul, “Aawisi aaiserem ga taterisi Uwa Sanbagiri nep nes jes bilipminirim aamei ijesa onsobiliserem ga jem tabanulsini.”

²¹Jes galapserem jei gamjon aa titin-titintabaabil aawisime Tenda Jena Uwa Sanbagirmana, ane apgal jigala seyafter jepmanaiserem.

²²Bunar-bunarsus Hukumu Uwa Sanbagirmana Nabi Musa aa jes tulistababilim ga enggam gunu, amkom seyaftersus aawisem safe jam ne wirtabaabisif. Hukumu jegme gunu, etam-etama kapka angtanemanaiserem jam gane wirtabaipsini aawisemfener afa jam gam tentenaram.

²³Tenda Jena Uwa Sanbagirmana mese, ane apgal jigala seyafter jeiserem ga sapi tane aawisem wirtabaabisini. Apgal jigala jeiserem ga uwufenna apgal jigala igsususerem, jengga igsususerem jei ga taman waaken-girip. Apgal jigala igsusu taman waaken-girip jeiserem, je aawisi Yesusmanaiserem jemfener je gam wirtabaipsini, sapi tane aawisem fas.

²⁴Aamei imsama towaswena enggame, Kristus Jei Jam kaweteyan Tenda Jena waakenaiserem angtane tafam aa jes ne eyebilim, aam temawer Tenda Jena jeiserem jei ga uwufenna jena bunarsusferaiserem taman waaken-giribe. Kristus Jei mes kautena taman waaken-giribe, ane namwer ga Uwa Sanbagirem tarnap nwini enggalfe nei nes gam batobaabif.

²⁵Imam sanbagirsususerem jei tahunu jeber-jeber Mwona Waakensususerem jep gam kawetena domba tane aawisibaner. Jengga Kristus Imam Sanbagirsususerem nemna, Jei unggwanfer jam terweyan etam-etama kapka nemnaiserem jem temawer, ane Jei unggwanfer jam kauteyan taman waaken-girip aawisi Jelemanaiserem jebar.

²⁶Afa Jei aawisi Jelemana uskambar gam kitulbowena imam sanbagirsususerem ogiri aaiserem jep gamserem, gam jega Jei sigini unggwanfersus gam domolwena gwanan towaiwulu Uwa Sanbagiri ogiri aaiserem aa galap eyebalam. Jengga namwer nunu umwef aaiserem, Jei mesam fortyant ogiri aaiserem jebe, jega Jei samfer etam-etama kapka nemna seyafter gemerserem nes gam wirtabaipmisif daamfenfener, Jei Jena aa galap gerantam.

²⁷Angtane seyafter jei daamfenfener gam tere, ane jewer ga Uwa Sanbagiri ga gam gunu afa jei waakena gam eyebili, afa kapka gam eyebili.

²⁸Jes gamserem Kristus Jeime gemer, Jei Jena daamfenfener gerant enggalfe, angtane unggwanfer gemerserem etam-etama kapka jemna gam wirulmif. Ane Jei gamjon aa jep waraufalsanyaram, Jei enggalf jam warauyan etam-etama kapka angtanemana gamjon gam wirtabaipmif. Jengga Jei enggalf se waraufalsanya angtane gam waakentababisif, angtane Jei aa jei ne fibanaram.