Read Berik 1Yohanes 1 Bible Online

1Yohanes 1 - Berik bible

1Yohanes 1

¹Surta aaiserem jemna igi ga Yesus Kristus. Jeiba Taterisi Uwa Sanbagirmana, ane Yesus Jeiba waakenfer gwelaiserem jamer abak-abaksus ga jes golmini. Gwanan-gwanansus Jeiba mesam gwel. Ane ai Yohanes, ane angtane nafsiserem jei mese ai Jei amsa sarbanant, ane Jei amsa damtanant nwena alemanaiserem jeme. Ai Jei amsama damdamtaasinint gwetmanawer, ane ai amsama entenent tafame.

²Abakfer gwela jeiserem mes iretyant ogiribe, ane ai Jei amsa damtanant. Ai angtane nafsi agma balbabili, “Seyafter aaiserem je bunar.” Taterisi aaiserem ibe isa ajesa nasipmiwenaram, je ga Yesus Kristusem temawer. Waakenfer gwelaiserem jamer abak-abaksus Jei gwirinfeltye. Jei gwanan Uwa Sanbagirfar ge nwin, ane namwer ga mes iretyant onabe, ane ai amsa damtanant.

³Seyafter ai ajesa domolantam ane ajesa sarbilintim, jeiserem aime ibe isa ajesa nasipmini, jega aamei ai ase gam isa onsobaabili, ane nei seyafter daamfennaber ga nesa nwini. Ane nei daamfennaber ga nesa gwena Uwafar ane Tane Jemna, Yesus Kristus mese Jebar.

⁴Surta aaiserem ai ga aJem temawera tulistaabili, jega aamei afa jam isa eyebilirim ai agma gunurum, ini nemna bunarsus saaser-saasersusfer ga nei sege folbamini.

⁵Ula ga aare ajesa sarbilintim Tane Uwa Sanbagirmana Jemniwer, ane ula jeiserem ai ibe isa ajama bilipmini enggame: Uwa Sanbagiri Jei waakenam nafa galserem, ane Jemnibe gwini bastantowaifer fasfasus.

⁶Nei afa jam nesa gunurum enggame nei Uwa Sanbagirfar daamfennaber neya gwena, jengga afa nei gwinibe jeber-jeber nesa gowena, gam jega nei nena nejama afaf-afafsowena. Nei ga nena nejama afaf-afafsowena, nei enggame jewer negama gunurum nei Uwa Sanbagirfar daamfennaber neya gwena, jengga nei etam-etama kapka gwinimanaiserem nejesa eyebuwena.

⁷Jengga afa nei nafaber nesa gwenaram, ane jeber-jeber waakenater nesa eyebuwena, Uwa Sanbagiri gamserem Jei nafap aa gemer gwenaram, gam jega nei angtane nafsiber daamfennaber ga nesa gwena, ane Tane Uwa Sanbagirmanaiserem, aawisi Jemnaiserem etam-etama kapka nemnaiserem seyafter ga nes jem wirtabaipmini.

⁸Afa nei enggam jam nesa gunurum nei etam-etama kapkaiserem fas, gam jega nei nena jam nesa afaf-afafsona; ane taterisi bunarsusfer aaiserem Uwa Sanbagirminiwer fas nem inibe.

⁹Jengga afa nei etam-etama kapka nemnaiserem jam negama balbaibenerem Uwa Sanbagirfe, jepga Uwa Sanbagiri etam-etama kapka nemna ga nes wirtabaipmini, ane Jei etam-etama kapka nemna seyafter gemerserem nei ga nes aftabaabunnu jewer. Uwa Sanbagiri Jei jeiserem gam eyebili, aam temawer Jei aa jes gam bilirim jam eyebife, Jei seyafter jeiserem bunarsusfer gam eyebili. Ane Uwa Sanbagiri aa jes bilirim je bunar-bunarsus.

¹⁰Uwa Sanbagiri enggam gunu nei etam-etama nesa eyebuwena. Afa nei enggam nesa gunurum, “Ai etam-etama kapka ajama eyebiyen.”, afa nei jes gamserem gam jam negama gunurum, nei enggam negama gunu Uwa Sanbagiri Jei afaf-afafa; ane Taterisi Uwa Sanbagirmana nem inip fas.