Read Berik 1Yohanes 2 Bible Online

1Yohanes 2 - Berik bible

1Yohanes 2

¹Am tane, ai surta aaiserem ip ai tulisulmini, jega aamei gam isa towaswena enggame aamei etam-etama kapkaiserem ijama eyebiyen. Jengga afa aamei etam-etama jam isa eyebilirim, Yesus Kristus sa damta, Jei nebe bunarsusfer eyeipmini, ane Jei waakenfer Jei se nasbili nem temawer Uwa Sanbagirem tarnap.

²Ane tere Yesusmanaiserem etam-etama kapka nemna ga nes jem wirtabaipmuwena. Ane etam-etama gam ke neman fenna, jengga angtane seyafter gemerserem etam-etama jeman mesna mesam wirtabaipmini.

³Afa nei jam nesa eyebilirim Uwa Sanbagiri aa jes bilirim, nei Jei nemsa gwebana Jei nem afelenf Jam gwefe.

⁴Angtane enggam aa jei gam gunurum, “Ai Uwa Sanbagirem afelna.”, jengga jei jam eyebiyen Uwa Sanbagiri aa jes gam bilirim, angtane jeiserem jei afaf-afafa, ane jei taterisi bunarsusfer aaiserem Uwa Sanbagirminiwer jam taabiyen.

⁵Jengga angtane taterisi Uwa Sanbagirmana aa jei gam taayibenerem, angtane jeiserem jei Uwa Sanbagiriserem ga jes gam nesiktene waakenfer. Nei Uwa Sanbagiri jewer negama nesiktenerem nei ga jem negama gwerauwulu enggame, neiba Uwa Sanbagirfar ne daamfennaber ma gwena.

⁶Angtane enggam aa jei gam gunurum, “Ai Uwa Sanbagirfar daamfennaber ge nwini.”, angtane jeiserem jei ga enggammer gam gwena gwela Yesusmana gemerserem.

⁷Am afelen mesna isa ajes nesiktababilirim, taterisi Uwa Sanbagiri aa jes balbabilim aamei ijesa eyebaabife, taterisi jeiserem ai ga ajes tulistaabili, taterisi jeiserem ibirimyen. Taterisi Uwa Sanbagirmana jeiserem jeba fwatermanam ijesa saribesiwenantam, aamei Yesus gwanan igalaba tebanantam.

⁸Jengga ai ajes bilirim ai ajes tulisulurum aafe, taterisi aaiserem jeba ibirmim. Taterisi aaiserem bunarsusfer aa jei gwerewantam Yesus Kristusminibe, ane ileminip mese. Taterisi jeiserem mes gwerauwulunt imnibe, aam temawer angtane gamjon gwinip jam ge nwinbeyen, jengga jei mes naawena Taterisi Uwa Sanbagirmanaiserem jem nafabe.

⁹Angtane enggam aa jei gam gunurum, “Ai nafap ai nwini.”, jengga angtane jeiserem jei jelem afelnaiserem gemer gam imei-imeitana, angtane jes galserem jei gwinip nwinwena jamere namwer aas jepserem.

¹⁰Angtane jelem afelen mesna aa jei gam nesiktenerem, angtane jes galserem jei ga nafap gam gwena, ane angtane jes galserem jem inip kapka fas angtane nafsi jem gwebafe etam-etama kapka jam eyebife.

¹¹Jengga angtane jelem afelna aa jei gam imei-imeitanaram, angtane jes galserem ga gwinip gam nwini. Angtane jes galserem jam wofelabe ga gwinip gamserem, jei taterisi Uwa Sanbagirmana bunarsusfer aaiserem jei jam towaswebiyen. Ane jei jam towaswebiyen jei jes eyebiliserem, aam temawer gwini jeiserem ga jei gam matana, jei waakenfer jam anggasiyen.

¹²Am tane, ai surta aaiserem ip ai tulisulmini enggalem temawer, Uwa Sanbagiri Jei etam-etama kapka imna is mesam wirtabaipmini Yesus aa jes eyebilintim jeme.

¹³Uwa mese, ai surta aaiserem ip ai tulisulmini, aam temawer aamei Jebar daamfennaber ima gwena, Jei aa jei gwenaram nalefe ogiri aaiserem jam eyebayan. Ane angtane tanis fenna, ai surta aaiserem ip ai tulisulmini, aam temawer aamei bawasa imsa jubonont dukabe, ane bawasa jei baabeta fas imnibe.

¹⁴Am tane, ai surta aaiserem ip ai tulisulmini, aam temawer aamei Uwa Sanbagirfar daamfennaber ima gwena. Uwa mese, ai surta aaiserem ip ai tulisulmini, aam temawer aamei Jebar daamfennaber ima gwena, Jei aa jei gwenaram nalefe ogiri aaiserem jam eyebayan. Ane angtane tanis fenna, ai surta aaiserem ip ai tulisulmini, aam temawer aamei baabetfenna. Taterisi Uwa Sanbagirmana jei im inip nuniton, ane baabeta bawasmana fas imnibe.

¹⁵Ane etam-etama kapkaiserem angtane kapka aa jes ne eyebaabuwefaram, seyafter jeiserem ijama nesiktababiyen. Ane jigal-jigala kapka seyafter bawasmanaiserem jes mese ijama nesiktababiyen. Afa aamei seyafter jeiserem jam isa nesiktababilirim, gam jega aamei Uwa Sanbagiri ijama nesikteyen.

¹⁶Etam-etama kapka seyafter angtane kapka aa jes ne eyebaabuwefaram — ga enggam jigal-jigala kapka ilem inip kapkaiserem jes igama balbabuwenaram, ane nwem jes igama domolaram ane jes igama balbabuwenaram, ane angtane jena jam gam gaartena, ane gam gutena, “Amna galgala uskambar.” — seyafter jeiserem jei Uwa Sanbagirminiweryan, jei seyafter bawasminiwer jela.

¹⁷Ogiri aaiserem, ane etam-etama kapka seyafter angtane kapka aa jes ne eyebaabuwefaram, seyafter sege barwebisi jamer saar. Jengga angtane aa jei eyebilirim Uwa Sanbagiri aa jes bilirim, angtane jeiserem ga jei se gwena jamer abak-abaksus.

¹⁸Am tane, nunu ogiri aaiserem jem barwelaiserem mes gwetmansweyal! Ane aamei imsa sarant enggame: Ginanggwa Kristusmana se fortya; ane namwer aas jepserem ginanggwana Kristusmana unggwanfer ga mes ge towaiwebili jam ge forobiyefe. Jega jem temawer nei nemsa towaswena enggame, nunu ogiri aaiserem jem barwelaiserem mes gwetmansweyal!

¹⁹Ginanggwana Kristusmanaiserem jei ga angtane nei nes jei ne mirtebitefalwenaram, aam temawer jei nem safanyan. Afa angtane jeiserem nemnaye, gam jega angtane jeiserem jei nebar negama nwini. Jengga jei nes mes ne mirtebitefala, gam jega nei bunarsusfer nemsama towaswena enggame angtane seyafter jeiserem jei nem safanyan.

²⁰Jengga aamei Mafnana Uwa Sanbagirmana imsa taayibene, Yesus Kristus is jes golminirim ibe, jega jem temawer aamei taterisi seyafter bunarsusfer aaiserem Uwa Sanbagirmana imsa towaswebili.

²¹Ai surta aaiserem ibe isa ajes tulisulminirim, jeke isa enggalem temawer ai tulisulmini aamei taterisi bunarsusfer aaiserem Uwa Sanbagirmana ijama towaswebiyene jewerserem. Wowo. Jengga enggam aamei taterisi bunarsusfer aaiserem imsama towaswebili. Ane aamei imsama towaswena, taterisi afaf-afafaiserem jam jelyan taterisi Uwa Sanbagirmana bunarsusfer aaiserem jemniwer.

²²Angtane afaf-afafaiserem jei ga enggam gam gunu angtanem tarnabe, “Yesus Jei Mesiasyan.” Angtane jes gamserem gam aa jewer gam gunurum, angtane jeiserem jei ga Ginanggwana Kristusmana. Ane jei Uwa Sanbagiri jam tebayan, ane Kristus mese jam tebayan.

²³Angtane Yesus jam tebayanaiserem, jei Uwa Sanbagiri mese jam tebayan. Ane angtane Yesus aa jei gam tebanaram, jeime Uwa Sanbagiri mes gam tebana.

²⁴Jega jem temawer, taterisi fwater ijesa sarbilintim, aamei gwanan Yesus igalaba tebanantam, taterisi jeiserem aamei waakenfer isa gwetaasini ilem inibe. Afa aamei taterisi jeiserem ilem inibe waakenfer jam isa gwetaasinirim, gam jega gwela imnaiserem Uwa Sanbagiri yo Tane Jelemanaiserem Jebar ise daamfennaber sege folbamini.

²⁵Ane aaiserem ga Kristus Jener nes jes bilipminintim nebe galap aa jei etamwemiliserem nemnibe, jeiserem ga aas waakenfer gwelaiserem jamer abak-abaksus.

²⁶Surta aaiserem ga isa ai tulisulmini, angtane aamei is jei ne afaf-afaftababiliserem jem temawer.

²⁷Jengga ilem temawer, Kristus Jei Mafnana Uwa Sanbagirmana is mes golmini. Ane Mafnana jeiserem Jei bunarsusfer im inip nuniton, jega jem temawer angtane nafsiserem jei safnant aamei is jam ne towas-towastababife. Mafnana jeiserem jei seyafter aamei ga is Jei gam towas-towastababili, ane seyafter Jei ibe is jes towas-towastabaipminirim, jeiserem ba bunaram, ol kabwakyan. Mafnana Uwa Sanbagirmana Jei aamei is mes towas-towastababilint enggame, aamei Kristusfar daamfennaber isa gwena. Ga jem temawer taterisi Mafnana ip ijes towas-towastabaipminirim, ga jeter isa sarbili waakenfer.

²⁸Am tane ga enggam, aamei Kristusfar daamfennaber isa gwena, jega nei nejama ereyen Yesus aa jep forsanyaram, ane nejama sefersweyan nunu Yesus aa jep jelaram.

²⁹Aamei imsama towaswena enggame, Uwa Sanbagiri aa jes gam bilirim, Kristus jeber-jeber ga jes gam eyebuwena. Jega jem temawer aamei jam isa towaswena, angtane jeber-jeber aa jes gam eyebuwenaram Uwa Sanbagiri aa jes gam bilirim, angtane jes galserem ga angtane Kristen.