Read Berik 1Yohanes 4 Bible Online

1Yohanes 4 - Berik bible

1Yohanes 4

¹Am afelen mesna ai isa ajes nesiktababilirim, angtane enggam aa jei ge gubilirim, “Mafnana Uwa Sanbagirmana amnip nuniton.”, aamei angtane jeiserem tatarfer ijama sarbabiyen. Jengga angtane jeiserem gwanan ga jam igama unggwasbaabili enggalfe aamei jei igama towaswebabif, mafnan jeiserem jei ke Uwa Sanbagirminiwer jela, afa fas. Aamei jes gamserem ga gemer isa eyebili, aam temawer nabi ol kapkaiserem unggwanfersus ge wofebili ogiri seyafter aa gemer falaram jebe.

²Nele enggalaiserem aamei ga jem igama towaswena Mafnana Uwa Sanbagirmana angtaneminip gam nuniton afa fas: Angtane enggam guluserem Yesus Kristus mes fortya ogiribe tifni nemna gamserem jeme, angtane jeiserem mafnana jemna ga Uwa Sanbagirminiwer gam jela.

³Jengga angtane enggam guyonoserem Yesus mes fortya onabe tifni nemna gamserem, angtane jeiserem jemna Mafnana Uwa Sanbagirmana fas. Angtane galserem mafnan jemna Ginanggwana Kristusmanaiserem jemniwer gam jela. Aamei gam imsa sara enggame mafnan jeiserem se fortya, ane mafnana jeiserem ga mes fortya ogiri aaiserem jebe.

⁴Jengga aamei tantantane amna, aameiba Uwa Sanbagirmanam, ane nabi ol kapkaiserem baabeta jemna fas imnibe. Mafnana imnip aaiserem, Mafnana jeiserem baabeta Jemna unggwandusa, mafnana angtane ogirip aa jei naawenaram mafnana jemnaiserem jemniwer.

⁵Nabi-nabi ol kapka jeiserem jei taterisi ogirmanaiserem ga jes ne nasbabili, ane angtane ogirmanaiserem jei ga taterisi jemna gane sarbaipmisini, aam temawer jei ogirmana.

⁶Jengga nei neiba tantantane Uwa Sanbagirmanam. Ane angtane Uwa Sanbagiri aa Jei ne tebanaram, jei taterisi nemna nesene sarbaipmisini; angtane Uwa Sanbagiri jam ne tebayanaiserem, jei taterisi nemna nes jam ne sarbaipmisiyen. Jeiserem jeme nei ga nejema towaswena enggame, Mafnana Uwa Sanbagirmana aa jei nasounaram bunarsusfer fwersa, ane mafnan afaf-afafa aa jei nasounaram fwersa.

⁷Am afelen mesna ai isa ajes nesiktababilirim, au, nei nen nena ga jam nesa nesiksonanna, aam temawer nesikteleiserem ba Uwa Sanbagirminiwer gam jela. Angtane, angtane nafsi aa jei gam nesiktenerem, angtane jeiserem jei tane Uwa Sanbagirmana, ane jei Uwa Sanbagiri mes tebana.

⁸Jengga angtane, angtane nafsi jam nesiktababiyeneiserem, jei Uwa Sanbagiri jam tebayan, aam temawer Uwa Sanbagiri Jei malnni.

⁹Uwa Sanbagiri Jei nes mes ge saamisini enggame Jei nei nes jam nesiktababili: Jei Tane Jemna daamfennaiserem Jes gera ogiri aaiserem jep Jam foryafe, jega Tane jeiserem Jemniwer nei waakenfer gwelaiserem gam nesa domola.

¹⁰Malnni ga aare, gam ke nei Uwa Sanbagiri nejewera nesiktenerem, jengga Uwa Sanbagiri Jei nei nes Jei nesiktababili, ane Tane Jelemanaiserem nep ga nes gaarmini enggalfe Jei gam terf etam-etama kapka nemnaiserem gam wirtabaabif.

¹¹Am afelen mesna ai isa ajes nesiktababilirim, afa Uwa Sanbagiri Jei nes mes nesiktababili, negme gemer angtane safe nenes-nensa ga jam nesa nesiktababili.

¹²Angtane afa fas Uwa Sanbagiri jam damtayan. Jengga afa nei malinmer negama gwenaram, Uwa Sanbagiri Jei nebar daamfennaber ga negama gwena, ane nei angtane nafsi nesa nesiktababili, Uwa Sanbagiri gemerserem Jei angtane nafsi gemer gam nesiktababilirim.

¹³Ane Uwa Sanbagiri Mafnana Jemna nebe nes mesam golmini, jega jem temawer nei nemsama towaswena enggame nei Uwa Sanbagirfar daamfennaber neya gwena, ane Uwa Sanbagiri Jei nebar daamfennaber neya gwena.

¹⁴Ai Tane Uwa Sanbagirmanaiserem aner amsama damtana, ane ai angtane nafsiserem ga aya towastababinenne enggame, Uwa Sanbagiri Jei Tane Jelemanaiserem Jeyam baftannunt enggalfe angtane seyafter ogirip aaiserem gam waakentababisif.

¹⁵Afa angtane enggam aa jei gam gunurum Yesus Jei Tane Uwa Sanbagirmana, Uwa Sanbagiri Jei daamfennaber gangge gwena angtane jeiserem jebar, ane angtane jeiserem jeime Uwa Sanbagirfar daamfennaber gangge gwena.

¹⁶Ane nei nener nemsama towaswena enggame Uwa Sanbagiri Jei nems nesiktababili, ane nei jeiserem jam nesa taabili. Uwa Sanbagiri Jei malnni. Ane angtane, angtane nafsi aa jei gam nesiktababilirim, angtane jeiserem Uwa Sanbagirfar daamfennaber gangge gwena, ane Uwa Sanbagiri Jeime angtane jeiserem jebar daamfennaber gangge gwena.

¹⁷Ga enggam, nei Uwa Sanbagiri gamjon uskambar nesa nesiktene, jega nei nejama ereyen nunu Uwa Sanbagiri angtane aa jem waksosisirim angtane waakena ane angtane kapka. Ane nei nejama ereyen, aam temawer nei ogiri aaiserem jebe enggammer neya gwena Kristus aa gemer gwenaram.

¹⁸Angtane Uwa Sanbagiri aa jei ne nesiktenerem jemnibe erele fas, ane angtane malnni unggwanfer jemanserem erele jemnibe fasfasus. Jengga angtane aa jei gam ernerem, jei jelem inibe enggam gam gunu, “Uwa Sanbagiri Jei ai as kabwaktana.” Afa angtane Uwa Sanbagiri jam gam erebenerem, gam jega jemnibe malnni unggwanfer fas.

¹⁹Nei Uwa Sanbagiri ane angtane nafsi negama nesiktababili, aam temawer Uwa Sanbagiri Jei nabala nems nesiktababili.

²⁰Angtane afa enggam aa jei gam gunurum, “Ai Uwa Sanbagiri ajam nesiktene.”, jengga jei jelem afelen mesna jam nesiktababiyeneye, angtane jes galserem jei angtane afaf-afafa. Ai jes gamserem gam ajewer gunurum, ai ga aam temawer ai gunu, angtane jelem afelen mesna jam nesikteyeneiserem jei aa jes gam damtanaram, gam jega jei Uwa Sanbagiri jam damtayanaiserem fas jam nesikteyen.

²¹Jeiserem ga jem temawer Kristus Jei taterisi aaiserem nep ga nes golmini: Angtane Uwa Sanbagiri aa jei gam nesiktenerem, jeime jelem afelen jamer gam nesiktene.