Read Berik 1Yohanes 5 Bible Online

1Yohanes 5 - Berik bible

1Yohanes 5

¹Angtane Yesusem temawer enggam aa jei gam balaram, “Yesus Jeiba Kristusam.”, angtane jeiserem ga tane Uwa Sanbagirmana. Afa angtane Jetaserem aa jei gam nesiktenerem, jeime Tannaiserem gam nesiktene.

²Afa nei Uwa Sanbagiri jam nesa nesiktenerem, ane Uwa Sanbagiri seyafter aa jes balbabilirim ga nesa eyebaabili, afa ga gam jes gemerserem, gam jega nei ga nesa towaswena enggame nei tantantane Uwa Sanbagirmanaiserem ga nejesa nesiktababili.

³Bunarsusfer ga enggam, Uwa Sanbagiri aa jes balbabilirim nei seyafter jeiserem jam jep negama eyebaabilirim, nei Uwa Sanbagiri ga galap negama nesiktene. Taterisi Jemna nep nejes balbaipminirim, taterisi jeiserem daran-daranyan nemnibe,

⁴aam temawer neiba tane Uwa Sanbagirmanaiserem ane ogiri je baabeta fas nemnibe. Jeje fomfoma ogiri jemna baabeta fas nemnibe? Aam temawer nei Yesus nemsa tebana.

⁵Ogiri aaiserem jebe baabetabara ga nansa? Angtane enggamfener aa jei gam gunurum, “Yesus Jeiba Tane Uwa Sanbagirmanam.”, angtane jeiserem baabetabara ga jes.

⁶Nei nemsama towaswena enggame Yesus Kristus Jeiba Tane Uwa Sanbagirmanam. Nei jeiserem ga enggalap nei towaswebili, Yesus fonawer jam aa galap tauwetyaram, Uwa Sanbagiri enggam ga gunu, “Tane Amna ga aare.” Uwa Sanbagiri Jeime jeiserem enggalap biltena Yesus aa galap terentem, ane ai taterisi jeiserem ga aya sarbilint. Ane Mafnana Uwa Sanbagirmana, bunarsusfer aa jei nasowenaram, Jeime taterisi jeiserem mese bili bunareme.

⁷Nawer-ningnaiserem ga je ge gubili enggame jeiserem ba bunaram:

⁸Nawer-ningna jeiserem daamfennaiserem ga Mafnana Uwa Sanbagirmana Jei nems towas-towastababili nem inibe. Ane nawerbarf aaiserem ga Yesus aa galap baptistenentem fonabe. Ane nawer-ningnabaraiserem ga Yesus aa galap terentem aawisi Jemna aa je tenbentetyantam. Ane nawer-ningna jeiserem jei seyafter daamfennater ne biltena enggame, Yesus Jeiba Tane Uwa Sanbagirmanam.

⁹Nei taterisi angtanemana ga nejesa taabili, jengga taterisi Uwa Sanbagirmana jei bunarsus ane baabetsusu, ane jeiserem ga jes Uwa Sanbagiri aa jes bilirim Tanem temawer.

¹⁰Ga jem temawer angtane Tane Uwa Sanbagirmana aa jei ne tebanaram, jei taterisi bunarsusfer jeiserem mes ne taabili jelem inibe. Jengga angtane Uwa Sanbagiri jam tebayanaiserem, jei enggam gam gunu Uwa Sanbagiri Jei jes afaf-afaftababili, aam temawer jei taterisi bunarsusfer aaiserem Uwa Sanbagiri aa jes bilirim Tanem temawer jei jam taabiyen.

¹¹Taterisi bunarsusfer aaiserem ga aare: Uwa Sanbagiri Jei nebe nes mes golmini waakenfer gwelaiserem jamer abak-abaksus. Jei ga angtane enggalaiserem ga jep golmini, angtane Tane Jelemanaiserem daamfennaber Jebar aa jei ge nwinbenerem.

¹²Angtane Tane Uwa Sanbagirmana aa Jei tebanaram, angtane jeiserem waakenfer gwelaiserem jamer abak-abaksus ga jei se domola. Angtane Tane Uwa Sanbagirmana jam tebayanaiserem, angtane jeiserem waakenfer gwelaiserem jamer abak-abaksus jam domolyan.

¹³Ai surta aaiserem ip tulisulmini, aamei Tane Uwa Sanbagirmana iJeya tebanaram, jega enggalf aamei igama towaswef enggame aamei waakenfer gwelaiserem jamer abak-abaksus imsama domola.

¹⁴Ane nei Uwa Sanbagirem tarnabe jam nejeba finaram, jes jepserem nei nejama ereyen, aam temawer Uwa Sanbagiri Jei sembayanga nemna nes mesam sarbaipmini, afa nei jam negama bilibenerem Uwa Sanbagiri aa jes gam bilirim.

¹⁵Nei enggam neya towaswebana, Jei nes mesam sarbabili afa nei janma bilibenerem. Ane neime negama towaswena nei jes negama bilibenerem Jemniwer, Jei jeiserem nes gam golmini.

¹⁶Afa aamei angtane Kristen jam igama damtanaram, jei etam-etama kapka jam gam eyebilirim, ane etam-etama kapka jeiserem jei gwebayan jam tikwefe Uwa Sanbagirfar ge gwefe, aamei sembayanga ga jam igama gwebabana Uwa Sanbagirfe jeiserem jem temawer; ane Uwa Sanbagiri Jei waakenfer gwelaiserem jamer abak-abaksus ga gam gulbana angtane jeiserem jebe. Ai jes gamserem gam ajewer gunurum, ai ga angtane enggalaiserem ga ajem temawer gunu: Angtane etam-etama kapka aa jei gam eyebilirim, jengga angtane jeiserem jei jam tikweyan Uwa Sanbagirfar ge gwefe. Jengga etam-etama kapkaiserem ga daamfenna angtane aa jei gam gwebanaram jam terfe, jeiserem ga aas: angtane Yesus baif aa jei gam gwebanaram jam tebafe. Jeiserem jem temawer ai aamei gam isa ajam balbabiyen aamei sembayanga Uwa Sanbagirfe jeiserem jem temawer ijama gwebabafe.

¹⁷Seyafter kapka nei nejesa eyebilirim jeiserem etam-etamsam, jengga etam-etama kapka aasaje angtane jei gam gwebana angtane jam teryenfe.

¹⁸Nei nemsama towaswena enggame angtane aa jei gam gwenaram Uwa Sanbagirem tanefe, jei etam-etama kapkaiserem jeber-jeber jam eyebuweyan, aam temawer Tane Uwa Sanbagirmana Jei angtane jeiserem waakenfer gam gerebaasnenne, ane bawasa dwona jam domolyan angtane jeiserem jam tebafe.

¹⁹Nei nemsama towaswena nei Uwa Sanbagirmana, bawasa ogiri aaiserem safe mes tebana.

²⁰Nei nemsama towaswena enggame Tane Uwa Sanbagirmana Jei mes fortya ogiri aaiserem jebe, ane Jei nes mes towastababili enggalfe nei Uwa Sanbagiri negama damdamtaasif, Uwa Sanbagiri bunarsusfer aaiserem. Nei Uwa Sanbagirfar daamfennaber nesa gwena, ane nei Tane Jemnaiserem Yesus Kristus Jebar daamfennaber nesa gwena. Jeiba Uwa Sanbagiri bunarsusfer aaiserem, ane Jei waakenfer gwelaiserem jamer abak-abaksus nep golmini.

²¹Am tane, sa gwisi seyafter gemerserem Uwa Sanbagirmanyan aaiserem jewer. Uwa Sanbagiri tefner sa onsoba! Tabana ga aaf. Amin.