Read Berik Wahyu 19 Bible Online

Wahyu 19 - Berik bible

Wahyu 19

¹Jes jepserem taban, ai taterisi unggwanfersus ga ai sarbili, angtane unggwanfersus taman waaken-giriwer enggam aa jei ge gubitenaram: “Uwa Sanbagiri sa pujite! Uwa Sanbagiri nes Jei waakentababisinirim, Jei nafa uskambar, baabeta Jemna unggwandusa!

²Tamtamtala Jei aa jes golminirim jeba bunaram ane ga waakena. Uwa Sanbagiri Jei angtane kota girip jep aa jei ge nwinbenerem, Jei jebe tamtamtala mesam golmini. Kota giri jeiserem ga wini maaryen-maaryenaiserem jes galserem. Uwa Sanbagiri Jei tamtamtala jebe mesam golbili, aam temawer jei ogiri aaiserem mes kabwaktana maaryena aa jes gwebuwenaram jeme. Uwa Sanbagiri Jei tamtamtala mes golbili wini jeiserem jebe, aam temawer jei angtane awelna Uwa Sanbagirmana aa jei ne gwebilirim, jei angtane jeiserem mesam munbobili.”

³Ane angtane unggwanfersus jeiserem gamjon enggam ga aa ge gubitena ol dagame: “Uwa Sanbagiri sa pujite! Kota giri jeiserem aa je taasinirim, nunggwana jewer aa jei ne tawenaram jeber-jeber jam ne tikweyan!”

⁴Angtane sanbak dua pulu empat jeiserem, ane malaikata nawer-naura galserem igsusu jeiserem, jei ga aa ge nwinbitena somwan dumeme, ane Uwa Sanbagiri gane pujitene, Uwa Sanbagiri aa jei nontenaram taman nwini sanbagiri jem sagabe. Jei enggam ga aa ge gubitena: “Ngga, jeiserem ba bunaram, Uwa Sanbagiri sa pujite!”

⁵Ane jepga taman nwini sanbagiri jemniwer tateris ga ai sarbili, enggame aa jei gutenaram: “Uwa Sanbagiri nemna sa pujite, aamei seyafter awelna Uwa Sanbagirmana ijeya gwebilirim, ane angtane seyafter gemerserem sanbagiri ane bastantouya, nei Uwa Sanbagiri ga Jes neya erebene.”

⁶Jepga ai taterisi gamjon ga ai sara, taterisi angtane uskambar ga gangge nasbawet jes galserem, afa mur tere jes galserem, afa iris tere unggwanfer gamserem. Jepga ai sarbabili jei ga enggam ge gubitena: “Uwa Sanbagiri sa pujite, aam temawer Tuhan nemna Jeiba Uwa Sanbagirem, ane baabeta Jemna ga unggwandwasusu. Jei namwer Sanbakfe Jei gwena!

⁷Au, neime ini nemna nese saaser-saaserfersusu sege folbamini, ane Jei sa pujite aam temawer baabeta Jemna unggwandusa. Nunu aaiserem je nunu Domba Tane wini jem golf, ane wini jeiserem jena mes menetulsini jam golfe.

⁸Uwa Sanbagiri Jei fene irif-irifi sinsinsusu mes kitulbili wini jeiserem jebe enggalfe jei gam kabwabife.” (Fene irif-irifi sinsinsusu jeiserem ga aas awelna waakena angtane Uwa Sanbagirmana aa jes ne eyebuwenaram.)

⁹Jepga malaikata jeiserem jei ga as bala, “Taterisi aaiserem jas tulistaabi: Ini imna is waakenfer sege folbamini aamei ijes jenbebilirim, masara Domba Tane wini jem golfe jepserem.” Malaikata jeiserem gamjon ga nasowena, “Taterisi aaiserem Uwa Sanbagirminiwer jeba bunaram.”

¹⁰Jepga malaikata jeiserem jem tarnabe ga ai nwintena somwan dumeme jei ajam sembatafe, jengga jei ga as enggam bala, “Safnant ai as ijam sembatayan! Ai as ijam sembatayan, aam temawer ai, aamei, ane angtane seyafter Yesus aa jei ne tebanaram, nei angtane nafisfe nemsa towasulmini enggame, Yesus Jeiba nem Tuhansam. Nei awelna Uwa Sanbagirmanaiserem seyafter ga nejesa gweyibene, nei Uwa Sanbagiri tefner ganma sembata!” Jei ga jes gamserem gam ga gunu, aam temawer taterisi nabi-nabi aa jes ne nasbabilirim, taterisi jeiserem jeba gemeram taterisi Yesus aa gemer towas-towastababilirim.

¹¹Jepga ai anggaswena, taman waaken-girip jep ga ai domsona, kudana sinsini ga jep fina, ane Angtane kuda sagap ga jep nontena. Angtane enggam ge gubili Jem temawer, “Jei jeber-jeber ba bunarsusferam nasouna, ane Jei aa jes bilirim jam eyebife jeiserem Jei gam eyebuwena.” Jei bunarsusfer balbabili afa angtane waakena afa kapka, ane Jei bunarsusfer ge erabana ginanggwa Jemna jebar.

¹²Nwena Jemna ga jam ne bwerebawena tokwana gamserem, ane Jem dukap nabalsir unggwanfer rajamana jes galserem ge falibaannu. Ane bosna ga jeleminip tulisulu, ane bosna jeiserem ga jenfentowai towaswebili.

¹³Fene Jei aa jes kamwinirim je ga mesam dumunsotena aawisibe, ane bosna Jemna ba “Taterisi Uwa Sanbagirmanaiserem.”

¹⁴Ginanggwana unggwanfer taman waaken-girmana jei Angtane jeiserem ne tikwebaatini. Ginanggwana unggwanfer jeiserem ga kudana sinsini jem ge sofobili, ane fene irif-irifi sinsinsusu ga jes ne kabwabili, oltunuboryan.

¹⁵Ane Angtane bosna Taterisi Uwa Sanbagirmana Jem aaremawer ga nombeya binbinsususerem ga jes ergetababisini. Ane negara-negara Jei baif ne gwebili Jam onsobafe, Jei negara jeiserem ga jem se targabaabinenne nombeya jeiserem jeme. Jei kakalmer Sanbakfe ga Jei se nwini, ane Jei besi dumu se tebasini. Ane Jei kakala Uwa Sanbagirmanaiserem gase destaipmini. Uwa Sanbagiri baabeta Jemna unggwandwasusu. Jei ginanggwana Uwa Sanbagirmana seyafter gemerserem se jubobinenne, angtane anggur tane jam jubobinenele gamserem.

¹⁶Fene Jemnaiserem ane Jelem gumap bose-bosna aaiserem ga jes tulistaabili: Jeiba Sanbaka rajamanam raja seyafter gemerserem, ane Jeiba Tuhansam tuhan seyafter gemerserem.

¹⁷Jepga malaikata aasaje ga ai damtana, jei gwer tarnap fina. Jei junu ol dagame ga aa balbabili junu seyafter aa jei ge ifubinennerem, “Au, aamei seyafter aaf isa betwena jam twenf masara unggwandusa Uwa Sanbagiri aa jes eyebilirim!

¹⁸Au, angtane nini seyafter gasa tombaabi angtane aas galserem: rajam nini, ginanggwana sanbakaiserem jem nini, ginanggwana afwer jeiserem jem nini, angtane kudam aa jei ge sofobilirim jem nini, ane kuda nin mese. Ane gasa tombaabi angtane aa jei armantanaram angtane nafsiminiwer jem nini, ane angtane jam armantayanaiserem jem nini, angtane sanbaka, ane bastantouya nini jeman mesna!”

¹⁹Jepga twen kakala galserem ane raja-raja ogirip aaiserem ga ai damtabili. Jei ginanggwana jemnaiserem jebaner ge betwebili enggalfe, Angtane kuda sinsini sagap aa jei nontenaram ane ginanggwana Jemnaiserem Jebar gam ge erabaf.

²⁰Jengga twen kakala jeiserem jei ga nabi ol kapkaiserem jebaner ga aane taamini. Nabi ol kapkaiserem jei gwanan bwembwema twena kakala galserem jem tarnabe gam eyebili. Angtane bwembwema jeiserem jame aa galap ne domolaram, ga jam afaftababili, ane jei twen kakala jeiserem jeter ga aane onsobana. Twen kakala jeiserem jei tandana jemna mes kitulmini angtanefe, ane angtane jei ga patunga jemna ga jes ne sembawulwena. Jepga twen kakala jeiserem ane jem nabi ol kapkaiserem, jei ga nawersamer nwinsansamer ga aane firsoniwili tokwagiribe, tokwana aa jei ne ertewenaram belerangabaner.

²¹Ane Angtane aa jei nontenaram kuda sagabe, Jei ginanggwana kakala seyafter gemerserem ga munbobili nombeya aaremap aa jes ergewulsinirim jeme. Ane junu seyafter gemerserem ga aa ge forobitye, ginanggwana jeiserem jem nini ga aane tombaabili jamere unu aa ge folbamini.