Read Besoa Pewaliꞌána 1 Bible Online

Pewaliꞌána 1 - Besoa bible

Pewaliꞌána 1

¹Rungu-runguna Pueꞌ Ala mampopewaliꞌ duniáꞌ hai upu-upu óntóꞌna.

²Tempó iti, duniáꞌ tiꞌara mani molenggeꞌá hai hoa mani. Bukeꞌ mani uwai hai modediꞌ mani, agáiáná Inaona Pueꞌ Ala mokale oaꞌ i wongko uwai.

³Mewaliꞌ, mongkóráꞌ miꞌi Pueꞌ Ala, Nauliꞌ, “Mewaliꞌ miꞌi mahingkaaꞌ!” Liliu mewaliꞌ mahingkaaꞌ.

⁴Góeꞌ laluNa mampeita kamaroꞌana apa to Nabábehi iti. Roo onoꞌ, Ia mogááꞌ kamahingkaaꞌ hangko i kamakáindi.

⁵To kamahingkaaꞌ Nahangaꞌ “mabaa”, hai kamakáindi Nahangaꞌ “káindi”. Liu miꞌi káindi, haweꞌ miꞌi mepulo. Iti miꞌi alo kaꞌisáꞌ.

⁶Roo onoꞌ, mongkóráꞌ wopiꞌi Pueꞌ Ala, Nauliꞌ, “Hangaa-ngaa ara laerawa to moparailiki upu-upu uwai i rombuaꞌ katoroꞌá.”

⁷Mewaliꞌ Pueꞌ Ala mampopewaliꞌ laerawa, hai mampopogááꞌ uwai i rombuaꞌ katoroꞌá, to ara i wóiꞌ laerawa hai to ara i wongkona.

⁸Laerawa iti Nahangaꞌ “langiꞌ”. Liu miꞌi káindi, haweꞌ miꞌi mepulo. Iti miꞌi alo kaduá.

⁹Roo onoꞌ, mongkóráꞌ wopiꞌi Pueꞌ Ala, Nauliꞌ, “Uwai to ara i wóiꞌ langiꞌ hangaa-ngaa moili i hambuaꞌ katoroꞌá bona mesupaꞌ kámárá.” Noꞌonoꞌ mpuꞌu miꞌi pewaliꞌna.

¹⁰Kámárá iti nahangaꞌ Pueꞌ Ala “lorena,” hai kahirámpuá uwai Nahangaꞌ “tahiꞌ”. Góeꞌ laluNa mampeita kamaroꞌana upu-upuna to Nabábehi iti.

¹¹Roo onoꞌ, mongkóráꞌ wopiꞌi Pueꞌ Ala, “Tampoꞌ hangaa-ngaa mopaꞌara mampopengaa tudaꞌ-tudaꞌ hai kau, maroꞌa to motumbeꞌ, maroꞌa to molihu wuaꞌna, bona ara tudaꞌ-tudaꞌ hai kau i duniáꞌ, mouláꞌ pákáꞌ-pákáꞌna.” Noꞌonoꞌ mpuꞌu miꞌi pewaliꞌna.

¹²Tampoꞌ mopaꞌara mampopengaa tudaꞌ-tudaꞌ hai kau. Góeꞌ Pueꞌ Ala mampeita kamaroꞌana upu-upuna to Nabábehi iti.

¹³Liu miꞌi káindi, haweꞌ miꞌi mepulo. Iti miꞌi alo katálu.

¹⁴Roo onoꞌ, mongkóráꞌ wopiꞌi Pueꞌ Ala, Nauliꞌ, “Hangaa-ngaa ara wangkaꞌ i langiꞌ to mopamabaa duniáꞌ bona tegááꞌ mabaa hai káindi. Iti to ina mopakanótó tempó, ia miꞌi alo, wulá hai pare.” Noꞌonoꞌ mpuꞌu miꞌi pewaliꞌna.

¹⁶Pueꞌ Ala mampopewaliꞌ rombuaꞌ wangkaꞌ to mahile, ia miꞌi alo to mowangkaꞌi mabaa, hai wulá to mowangkaꞌi káindi. Hai Nabábehi woꞌo handaꞌ betue.

¹⁷Alo, wulá hai betue iti Nawoli i langiꞌ bona mowangkaꞌi duniáꞌ

¹⁸mabaa hai káindi, bona mampopontaniꞌ kamabaa hai kamakáindi. Góeꞌ Pueꞌ Ala mampeita kamaroꞌana upu-upuna to Nabábehi iti.

¹⁹Liu káindi, haweꞌ miꞌi mepulo. Iti miꞌi alo kaꞌiba.

²⁰Mongkóráꞌ wopiꞌi Pueꞌ Ala, Nauliꞌ, “Hangaa-ngaa handaꞌ binataꞌ to tueꞌ i lalu uwai, hai hangaa-ngaa araheꞌ woꞌo mampopengaa tádáhi to membara-mbara i laerawa.”

²¹Noꞌonoꞌ miꞌi Pueꞌ Ala mampopewaliꞌ binataꞌ to mahile ntepuꞌu tueꞌ i tahiꞌ hai mampopengaa binataꞌ ntániꞌna tueꞌ i uwai, mouláꞌ pákáꞌ-pákáꞌna. Napopewaliꞌheꞌ woꞌo mampopengaa tádáhi, mouláꞌ pákáꞌ-pákáꞌna. Góeꞌ laluNa mampeita kamaroꞌana upu-upuna to Nabábehi iti.

²²Roo onoꞌ, Nawátiꞌmoheꞌ upu-upu to Napopewaliꞌ iti, haneꞌi Naweꞌiheꞌ párentá bona memuleꞌheꞌ duuꞌna tahiꞌ bukeꞌ hai bouꞌ, hai kahandaꞌraꞌ tádáhi tetátámbái i duniáꞌ.

²³Liu miꞌi káindi, haweꞌ miꞌi mepulo. Iti miꞌi alo kalima.

²⁴Mongkóráꞌ wopiꞌi Pueꞌ Ala, Nauliꞌ, “Tampoꞌ hangaa-ngaa mopaꞌara mampopengaa binataꞌ to tueꞌ, mouláꞌ pákáꞌ-pákáꞌna, maroꞌa to mendólóꞌ, maroꞌa to manondoꞌ, hai upu-upu binataꞌ to maila.” Noꞌonoꞌ mpuꞌu miꞌi pewaliꞌna. Pueꞌ Ala mampopewaliꞌ mampopengaa binataꞌ, mouláꞌ pákáꞌ-pákáꞌna. Góeꞌ laluNa mampeita kamaroꞌana upu-upuna to Nabábehi iti.

²⁶Mongkóráꞌ wopiꞌi Pueꞌ Ala, Nauliꞌ, “Maroꞌa Tabábehi tauna[1] mouláꞌ pambiáráNtaꞌ haduduáNtaꞌ.[2] Hira iti to ina mokuasaꞌiheꞌ hinángkáꞌ to ara i duniáꞌ, maroꞌa bouꞌ to i tahiꞌ, maroꞌa tádáhi to i laerawa, hai mampopengaa binataꞌ, tepasuaꞌ to manondoꞌ hai to mendólóꞌ.”

²⁷Noꞌonoꞌ miꞌi Pueꞌ Ala mampopewaliꞌ tauna mouláꞌ pambiáráNa haduduáNa. Napopewaliꞌheꞌ tobaleilo hai towawine.

²⁸Hangko ionoꞌ, Nawátiꞌheꞌ, Nauliꞌ, “Memuleꞌmokou duuꞌmi handaꞌ, bona pemuleꞌámi mokatoroꞌi hai mokuasaꞌi humalele duniáꞌ. Kuweꞌikou bágóꞌ mokádipurá hinángkáꞌna bouꞌ to i tahiꞌ, tádáhi to i laerawa, hai hinángkáꞌ binataꞌ to tueꞌ i lorena.”

²⁹Mongkóráꞌ wopiꞌi Pueꞌ Ala, Nauliꞌ, “Peita! Kuweꞌimokou pandeꞌmi hangko i hinángkáꞌ tudaꞌ-tudaꞌ to powuaꞌ hai kau to molihu wuaꞌna.

³⁰Hai i upu-upu binataꞌ to i lorena, tádáhi to i laerawa, hai binataꞌ to mendólóꞌ, i upu-upu to meinao, Kuweꞌimoheꞌ hinángkáꞌna rumpuꞌ hai taweꞌngkau mewaliꞌ pandeꞌraꞌ.” Noꞌonoꞌ mpuꞌu miꞌi pewaliꞌna.

³¹Napeita Pueꞌ Ala hinángkáꞌna to Nabábehi iti, hai góeꞌ ntepuꞌu laluNa mampeita kamaroꞌana. Liu miꞌi káindi, haweꞌ miꞌi mepulo. Iti miꞌi alo kaꞌini.