Read Besoa Pewaliꞌána 11 Bible Online

Pewaliꞌána 11 - Besoa bible

Pewaliꞌána 11

¹Rungu-runguna tauna i humalele duniáꞌ, hangaa peá básáraꞌ.

²I tempóraꞌ melimbá lao tándáꞌ i mata alo, teduuꞌheꞌ i hambuaꞌ ngamba i tampoꞌ Bábeli[40] hai toroꞌheꞌ ionoꞌ.

³Hangkani tempó, molaluitaheꞌ hadua hai hadua, rauliꞌ, “Maroꞌa ane tabábehi watu telá hai tatunu leháꞌ-leháꞌ bona matuꞌa.” Mobábehi mpuꞌuheꞌ watu telá,[41] hai rapakeꞌ taru to maiti rapopodaiꞌ.

⁴Roo onoꞌ, mangkaliwo wopaheꞌ, rauliꞌ, “Maroꞌa ntepuꞌu ane taꞌaró hambuaꞌ kótá, hai taꞌaró woꞌo hambuaꞌ támbi peántóꞌá to mahile hai tapamapángkáꞌ duuꞌna haweꞌ i langiꞌ. Hangaa-ngaa tabábehi noꞌonoꞌ bona tebámbári kamahilena hangaꞌtaꞌ hai bona tiꞌarakeꞌ tegááꞌ-gááꞌ i humalele duniáꞌ.”

⁵Agáiáná tangaꞌraꞌ moaró kótá hai támbi peántóꞌá iti, mendáulu miꞌi PUEꞌ mampeita apa to rabábehi,

⁶haneꞌi Nauliꞌ, “Tauna deꞌe hantina hai hangaa peá básáraꞌ. Demiꞌe hangko pantepuꞌuána apa to ina rabábehi. Ane marue-rueheꞌ mobágóꞌ nodeꞌe, apa peá to ratunggái ina mewaliꞌ.

⁷Maroꞌa ane mendáuluKeꞌ lao mampopontaniꞌ-ntaniꞌ básáraꞌ bona tiꞌarapoheꞌ mombeisá básá hadua hai hadua.”

⁸Mewaliꞌ Napopontaniꞌ-ntaniꞌ mpuꞌu miꞌi básáraꞌ duuꞌna mengkarooheꞌ moaró kótá iti. Onoꞌ miꞌi haneꞌi kótá iti rahangaꞌ Bábeli, to ina hibali hai “wuli”, hai mahawuꞌheꞌ tauna i humalele duniáꞌ.

¹⁰Deꞌe miꞌi daritakáná pemuleꞌánaheꞌ Semuꞌ. Liu miꞌi rompare hangko i kanalábóꞌána uwai duniáꞌ, Semuꞌ momuleáka hadua tobaleilo to rahangaꞌ Aripasa. I tempó iti, tinuwuꞌna Semuꞌ hangatu miꞌi parena.

¹¹Hangko ionoꞌ, Semuꞌ tueꞌ mani lima átuna parena, hai moánáꞌ maniheꞌ bahangapa ánáꞌraꞌ tobaleilo hai towawine.

¹²Magáná miꞌi tinuwuꞌna Aripasa tálu puloꞌna hai lima parena, moánáꞌmoheꞌ hadua tobaleilo to rahangaꞌ Sela.

¹³Hangko ionoꞌ, Aripasa tueꞌ mani iba átuna hai tálu parena, hai moánáꞌ maniheꞌ bahangapa ánáꞌraꞌ tobaleilo hai towawine.

¹⁴Magáná miꞌi tinuwuꞌna Sela tálu puloꞌna parena, moánáꞌmoheꞌ hadua tobaleilo to rahangaꞌ Eberi.[42]

¹⁵Hangko ionoꞌ, Sela tueꞌ mani iba átuna hai tálu parena, hai moánáꞌ maniheꞌ bahangapa ánáꞌraꞌ tobaleilo hai towawine.

¹⁶Magáná miꞌi tinuwuꞌna Eberi tálu puloꞌna hai iba parena, moánáꞌmoheꞌ hadua tobaleilo to rahangaꞌ Peleꞌ.

¹⁷Hangko ionoꞌ, Eberi tueꞌ mani iba átuna tálu puloꞌna parena, hai moánáꞌ maniheꞌ bahangapa ánáꞌraꞌ tobaleilo hai towawine.

¹⁸Magáná miꞌi tinuwuꞌna Peleꞌ tálu puloꞌna parena, moánáꞌmoheꞌ hadua tobaleilo to rahangaꞌ Rehu.

¹⁹Hangko ionoꞌ, Peleꞌ tueꞌ mani rongatu hai hahioꞌ parena, hai moánáꞌ maniheꞌ tobaleilo hai towawine.

²⁰Magáná miꞌi tinuwuꞌna Rehu tálu puloꞌna hai rompare, moánáꞌmoheꞌ hadua tobaleilo to rahangaꞌ Seru.

²¹Hangko ionoꞌ, Rehu tueꞌ mani rongatu hai pitu parena, hai moánáꞌ maniheꞌ bahangapa ánáꞌraꞌ tobaleilo hai towawine.

²²Magáná miꞌi tinuwuꞌna Seru tálu puloꞌna parena, moánáꞌmoheꞌ hadua tobaleilo to rahangaꞌ Nahori.

²³Hangko ionoꞌ, Seru tueꞌ mani rongatu parena, hai moánáꞌ maniheꞌ bahangapa ánáꞌraꞌ tobaleilo hai towawine.

²⁴Magáná miꞌi tinuwuꞌna Nahori rompuloꞌ hai hahioꞌ parena, momuleáka miꞌi hadua tobaleilo to rahangaꞌ Tera.

²⁵Hangko ionoꞌ, Nahori tueꞌ mani hangatu hampuloꞌ hai hahioꞌ parena, hai moánáꞌ maniheꞌ bahangapa ánáꞌraꞌ tobaleilo hai towawine.

²⁶Liu miꞌi tinuwuꞌna Tera pitu puloꞌna parena, moánáꞌmoheꞌ tálu tobaleilo, hangaꞌraꞌ iamoheꞌ Abura,[43] Nahori hai Hara.

²⁷Deꞌe miꞌi daritakáná pemuleꞌánaheꞌ Tera. Tera momuleáka Abura, Nahori hai Hara. Hara momuleáka hadua tobaleilo to rahangaꞌ Loꞌoti.

²⁸Tueꞌ mani umána, Hara mate i tampoꞌ kabubuána waheꞌna, i kótá Uri i tampoꞌraꞌ toKasidimi.[44]

²⁹Abura mampotoina Sarai, hai Nahori mampotoina Mika ánáꞌna Hara. Ara mani ánáꞌna Hara, hangaꞌna Isika.

³⁰Sarai iti tiꞌara peisá moánáꞌ láwiꞌ lalo.

³¹I tempó iti, Tera pohuꞌ hangko i kótá Uri i tampoꞌ Kasidimi hingkakani hai Abura ánáꞌna, hai Loꞌoti ueꞌna, hai Sarai mániána. Tunggáiáraꞌ ina lao i tampoꞌ Kánáꞌá, agáiáná kahaweꞌraꞌ i kótá Hara, toroꞌheꞌ ionoꞌ.

³²Ionoꞌ miꞌi Tera mate, hai tempó onoꞌ, tinuwuꞌna rongatu hai lima parena.