Read Besoa Pewaliꞌána 12 Bible Online

Pewaliꞌána 12 - Besoa bible

Pewaliꞌána 12

¹Mongkóráꞌ miꞌi PUEꞌ i Abura,[45] Nauliꞌ, “Pohuꞌmokoꞌ, nupálehi miꞌi tampoꞌmu, tinámu hai támbina umámu, hai laomokoꞌ i tampoꞌ to ina Kutudeꞌákoꞌ.

²Ina Kupahandaꞌ pemuleꞌámu duuꞌna mewaliꞌkou hambuaꞌ kadatuá to mahile. Ina Kuwátiꞌkoꞌ, hai ina Kupomahile hangaꞌmu bona mewaliꞌkoꞌ hambuaꞌ pewátiꞌ i upu-upu tauna.

³Ina Kuwátiꞌheꞌ tauna to mowátiꞌkoꞌ, hai ina Kuhukuheꞌ tauna to mampopeahiahiꞌkoꞌ. Ánti kaꞌiona, ina Kuwátiꞌ upu-upu tauna i humalele duniáꞌ.”[46]

⁴Mewaliꞌ pohuꞌ mpuꞌu miꞌi Abura hangko i kótá Hara, hiolaꞌ hai hawaꞌna PUEꞌ. I tempó onoꞌ, tinuwuꞌna Abura pitu puloꞌna hai lima parena. Ia lao i tampoꞌ Kánáꞌá hingkakani hai toinána hai Loꞌoti pinoánáꞌna. Naꞌánti woꞌo upu-upu párewána hai upu-upuheꞌ hawiꞌna to nalámbiꞌ i kótá Hara. Kahaweꞌraꞌ i tampoꞌ Kánáꞌá,

⁶mopaliliuheꞌ polumaoraꞌ duuꞌraꞌ haweꞌ i kótá Sikeꞌ. Ionoꞌ mengkarooheꞌ i hampóꞌá kau to marumbu i More. I tempó iti, toKánáꞌá toroꞌ maniheꞌ i tampoꞌ iti.

⁷Tempó onoꞌ, PUEꞌ mampatongawaꞌ miꞌi i Abura haneꞌi Nauliꞌ, “Tampoꞌ deꞌe ina Kuweꞌiheꞌ pemuleꞌámu.” Onoꞌ miꞌi haneꞌi Abura moaró hambuaꞌ paintuá popenómbá i PUEꞌ.

⁸Hangko ionoꞌ, rapaliliu wopiꞌi polumaoraꞌ lao i tampoꞌ to mobuluꞌ-buluꞌ tándáꞌ i mata alo wánuá Beteli, haneꞌi ionoꞌ ia moaró bambaruꞌ to rabábehi hangko i koliꞌ binataꞌ. Hangko i pobambaruꞌána iti, Beteli ara tándáꞌ i katámpuá alo, hai kótá Ai ara tándáꞌ i mata alo. Ionoꞌ napopombeusu-usu miꞌi watu moaró hambuaꞌ paintuá popenómbá, haneꞌi menómbá i PUEꞌ.

⁹Roo onoꞌ, pohuꞌ wopiꞌi ina lao i tampoꞌ Negeꞌ tándáꞌ i wóiꞌ.

¹⁰I tempó iti, tampoꞌ Kánáꞌá narampe rimi, onoꞌ haneꞌi Abura hantámbi melimbá wopaheꞌ lao tándáꞌ i wóiꞌ i tampoꞌ Másiriꞌ bona toroꞌheꞌ ionoꞌ láwiꞌ rumihi ntepuꞌu rimi iti.

¹¹Ina haweꞌmoheꞌ i tampoꞌ Másiriꞌ, molaluita miꞌi Abura i Sarai toinána, nauliꞌ, “Io to malásáꞌ ntepuꞌukoꞌ.

¹²Ane raitakoꞌ toMásiriꞌ, bateꞌna ina rauliꞌkoꞌ toinángkuꞌ, haneꞌi ina rapapateaꞌ bona raꞌalakoꞌ.

¹³Mewaliꞌ kupembiáꞌ bona nuhángáꞌáheꞌ ádingkuꞌ pekoꞌ. Ane nuꞌuliꞌ noꞌonoꞌ, ina rapatodáhiaꞌ tueꞌ hai ina rabábehi to maroꞌa i kódóꞌ ánti kaꞌiona.”

¹⁴I kahaweꞌraꞌ i tampoꞌ Másiriꞌ, raita toMásiriꞌ kamalásáꞌna Sarai.

¹⁵Karaitána topobágóꞌna Piraoꞌ, laomoheꞌ mopahaweꞌ i Piraoꞌ daturaꞌ[47] kaꞌárána to malásáꞌ, onoꞌ miꞌi haneꞌi Piraoꞌ mampopeala lao i támbina ina napohambokoá.

¹⁶Ánti kaSaraina, Piraoꞌ maroꞌa ntepuꞌu laluna i Abura, onoꞌ miꞌi haneꞌi handaꞌ to napeweꞌi i hia, ia miꞌi hawiꞌ, dimbá, bekeꞌ, gapiꞌ, kalide hai untá.

¹⁷Agáiáná ánti poalana Sarai, PUEꞌ mopaꞌara mampopengaa hakiꞌ to meriringkuꞌi i Piraoꞌ hai i upu-upu tauna to toroꞌ i támbina.

¹⁸Mewaliꞌ Piraoꞌ mokióꞌ miꞌi Abura, nahángáꞌá, “Apa tunggáiámu haneꞌi nubábehi noꞌonoꞌ i kódóꞌ? Moapa riꞌi haneꞌi tiꞌaraꞌaꞌ nuhángáꞌá kaꞌiana toinámu?

¹⁹Moapa riꞌi haneꞌi nuꞌuliꞌ ádimu? Ánti bábehiámu iti, onoꞌ haneꞌi kuala ina mewaliꞌ toinángkuꞌ. Masalaꞌ ntepuꞌukoꞌ! Deꞌe miꞌi toinámu. Nuala miꞌi hai pohuꞌmokou!”

²⁰Roo onoꞌ, Piraoꞌ mopárentá bahangapa topobágóꞌna bona lao mowawa Abura hai toinána hangko i tampoꞌ Másiriꞌ hingkakani hai upu-upu to ara i hia.