Read Besoa Pewaliꞌána 13 Bible Online

Pewaliꞌána 13 - Besoa bible

Pewaliꞌána 13

¹Mewaliꞌ Abura pohuꞌ hangko i tampoꞌ Másiriꞌ mesuleꞌ lao i tampoꞌ Negeꞌ to ara i tampoꞌ Kánáꞌá tándáꞌ i wóiꞌ. Toinána hai Loꞌoti meuláꞌheꞌ woꞌo, hai upu-upu to ara i hira raꞌánti woꞌo.

²I tempó onoꞌ, pebuku ntepuꞌu miꞌi Abura; handaꞌ dimbána, bekeꞌ, gapiꞌ hai handaꞌ woꞌo peráꞌ hai buláwána.

³Hangko i tampoꞌ Negeꞌ, Abura melimbá-limbá haneꞌi haweꞌ i wánuá Beteli, hai lao i hambuaꞌ katoroꞌá i hiliꞌna wánuá Beteli hai kótá Ai. Hangkoia ia moaró bambaruꞌna ionoꞌ

⁴hai paintuá popenómbá.[48] Ionoꞌ ia menómbá i PUEꞌ.

⁵Loꞌoti, to meuláꞌ i Abura, handaꞌ woꞌo dimbána, bekeꞌ hai gapiꞌna. Handaꞌ woꞌo bambaruꞌna hai taunána.

⁶Agáiáná kamaeláꞌna tampoꞌ iti tiꞌara gáná i hira rodua, láwiꞌ handaꞌ ntepuꞌu binataꞌraꞌ.

⁷Onoꞌ miꞌi haneꞌi topoewuraꞌ Abura hai Loꞌoti mohioroheꞌ. Tempó iti, toKánáꞌá hai toPerisi toroꞌ maniheꞌ i tampoꞌ iti.

⁸Mewaliꞌ Abura molaluita miꞌi i Loꞌoti, nauliꞌ, “Kitaꞌ deꞌe topohalalukeꞌ. Tiꞌara maroꞌa ane topoewuntaꞌ mohioroheꞌ.

⁹Rángina miꞌi mogááꞌkeꞌ. Tiꞌara paꞌi tampoꞌ deꞌe maeláꞌ? Mewaliꞌ nupileꞌi iumbá to nuꞌundeꞌ. Ane io lao tándáꞌ i kabeoꞌ, kódóꞌ ina laoaꞌ tándáꞌ i kuáná. Ane io lao tándáꞌ i kuáná, kódóꞌ hangaa-ngaa laoaꞌ tándáꞌ i kabeoꞌ.”

¹⁰Loꞌoti mampetiro humalele tampoꞌ iti, hai naita kamaruduꞌna tampoꞌ i lembona uwai Iarade haweꞌ-haweꞌ i kótá Soa. Ionoꞌ handaꞌ uwaina, naita nodo hinoena PUEꞌ hai nodo tampoꞌ Másiriꞌ. Iti mewaliꞌ hangko tiꞌara mani PUEꞌ mogero kótá Sodomo hai Gumora.

¹¹Kaupuána Loꞌoti mopileꞌi upu-upu tampoꞌ i lembona uwai Iarade haneꞌi melimbá lao tándáꞌ i mata alo. Noꞌonoꞌ miꞌi pogááꞌraꞌ topohalalu iti.

¹²Abura toroꞌ oaꞌ i tampoꞌ Kánáꞌá, agáiáná Loꞌoti moaró bambaruꞌna i lembo hungkuꞌ i kótá Sodomo hai i kótá-kótá ntániꞌna.

¹³Kótá Sodomo iti rakatoroꞌi tauna to madósá ntepuꞌuheꞌ woꞌo i peitána PUEꞌ láwiꞌ kadake ntepuꞌu bábehiáraꞌ.

¹⁴I kapohuꞌna Loꞌoti, PUEꞌ mongkóráꞌ i Abura, Nauliꞌ, “Hangko i tampoꞌ to nupeángkáꞌi deꞌe, nupetiro ngkaraoꞌ mantoleli.

¹⁵Upu-upu tampoꞌ to nuita deꞌe ina Kuweꞌikoꞌ mewaliꞌ gáláꞌmu hai gáláꞌraꞌ pemuleꞌámu duuꞌna i rue-ruena.

¹⁶Ina Kupahandaꞌ pemuleꞌámu nodo kahandaꞌna awu tampoꞌ i duniáꞌ to tiꞌara peisá raimbaꞌ. Ane rápáꞌna ara to peisá moimbaꞌ awu tampoꞌ, hangaa-ngaa pemuleꞌámu woꞌo peisá raimbaꞌ.

¹⁷Lao miꞌi nulumaohi nupeita humalele tampoꞌ deꞌe, láwiꞌ iti to ina Kuweꞌikoꞌ.”

¹⁸Hangko ionoꞌ, nalimbá miꞌi Abura pobambaruꞌána hungkuꞌ i kau to marumbu hungkuꞌ i kótá Hebero. Kau iti káuna hadua tauna to rahangaꞌ Mamere[49] Ionoꞌ ia mampopombeusu-usu watu moaró hambuaꞌ paintuá popenómbá i PUEꞌ.