Read Besoa Pewaliꞌána 14 Bible Online

Pewaliꞌána 14 - Besoa bible

Pewaliꞌána 14

¹I tempóna Abura toroꞌ i Hebero, ara bahangapa datu to mombealaheꞌ. Ara iba datu to makuasaꞌ, iamoheꞌ: Kedolaome datu hangko i tampoꞌ Ela, Amarape datu hangko i tampoꞌ Sinea, Ario datu hangko i tampoꞌ Elasa, hai Tidea datu hangko i tampoꞌ Goimi.

²Kaꞌiba datu iti moewaꞌheꞌ lima datu iamoheꞌ: Bera datu hangko i kótá Sodomo, Bisa datu hangko i kótá Gumora, Sinabi datu hangko i kótá Adma, Semebe datu hangko i kótá Seboimi hai hadua datu hangko i kótá Bela to rauliꞌ woꞌo Soa.

³I lalu hampuloꞌ hai rompare kamaruena, datu to limaheꞌ iti napárentáiheꞌ Datu Kedolaome, agáiáná i pare kahampuloꞌ hai tálu, láwiꞌ ina moewaꞌheꞌ Datu Kedolaome, datu to lima iti mohintuwuꞌheꞌ morámpu surudadoꞌraꞌ i lembo Sidimi to deꞌe-deꞌe rauliꞌ tahiꞌ Mate.

⁵Liu miꞌi hampare, ia miꞌi i pare kahampuloꞌ hai iba, lao miꞌi Datu Kedolaome hai tálu datu hampohintuwuꞌna ina mombeala. Mehupeꞌheꞌ mombeala, hai monangiheꞌ toRepaimi i wánuá Asetero-Kanai, toSusimi i wánuá Hama, toEmimi[50] i Sawe-Kiriatai,

⁶hai toHori i tampoꞌ Sei to mobuluꞌ-buluꞌ, duuꞌraꞌ manangi. ToHori iti radápáꞌheꞌ haweꞌ-haweꞌ i El-Parani i wiwi pádá loriꞌ.

⁷Roo onoꞌ, surudadoꞌ to modápáꞌheꞌ iti, mesuleꞌheꞌ huleꞌ i Ene-Misipaꞌ, to deꞌe-deꞌe rauliꞌ Kadesi. Ionoꞌ miꞌi, monangiheꞌ toAmaleꞌ haneꞌi mokuasaꞌiheꞌ upu-upu tampoꞌraꞌ, hai monangiheꞌ woꞌo toAmori to toroꞌ i Haseso-Tama.

⁸Hangko ionoꞌ, lima datu to hangko i kótá Sodomo, Gumora, Adma, Seboimi hai Bela mopatimamamoheꞌ surudadoꞌraꞌ i lembo Sidimi, haneꞌiheꞌ mombeala.

⁹Lima datu iti moewaꞌheꞌ iba datu to hangko i Ela, Goimi, Sinea hai Elasa.

¹⁰I lembo iti, handaꞌ taroboꞌ to kaladu to moꞌóntóꞌ taru to maiti. I tempóraꞌ daturaꞌ toSodomo hai daturaꞌ toGumora melangka rapobitiheꞌ ewáliraꞌ, ara to manawoꞌ i taroboꞌ iti. To ntániꞌna melangkaheꞌ lao i buluꞌ.

¹¹Mewaliꞌ datu to iba iti menangiheꞌ, onoꞌ miꞌi haneꞌi moántiheꞌ hinángkáꞌ párewáraꞌ toSodomo hai toGumora, hai upu-upu pandeꞌraꞌ.

¹²Tempó onoꞌ woꞌo, Loꞌoti pinoánáꞌna Abura to toroꞌ i Sodomo, ratawani raꞌánti woꞌo hingkakani hai párewána.

¹³Ara hadua tauna to melangka hangko i pombealaꞌá iti lao mobuáꞌ i Abura apa to pewaliꞌ. I tempó onoꞌ, Abura toIberani iti, toroꞌ hungkuꞌ i bahangapa kau to marumbu. Pueꞌna kau to marumbu iti ia miꞌi hadua toAmori to rahangaꞌ Mamere. Mamere hai halalunaheꞌ, to rahangaꞌ Esekoloꞌ hai Ane, hampohintuwuꞌna Abura.

¹⁴Kanahádina Abura pinoánáꞌna ratawani miꞌi ewáliraꞌ, ia morámpu upu-upu taunána to raꞌánáka i katoroꞌána[51] to mapánde mombeala. Kahandaꞌraꞌ tálu átuna hampuloꞌ hai uwalu. Roo onoꞌ, laomoheꞌ modápáꞌ datu to iba iti haweꞌ-haweꞌ i kótá Daa.

¹⁵I tangaꞌ káindi, Abura mogáláꞌ-gáláꞌ taunána i lalu bahangapa taguna, hai laomoheꞌ mampombealaꞌá ewáliraꞌ iti álána menangiheꞌ. Roo onoꞌ, radápáꞌheꞌ haweꞌ-haweꞌ i wánuá Hoba, tándáꞌ i wongko kótá Damasiꞌ.

¹⁶Abura hai taunánaheꞌ mamperampaꞌi huleꞌ hinángkáꞌ párewá to raperampaꞌi miꞌi ewáliraꞌ. Loꞌoti hai párewána ralámbiꞌ woꞌo. Noꞌonoꞌ woꞌo upu-upu towawine hai taunána ntániꞌna to ratawani.

¹⁷Karoona Datu Kedolaome hai datu hampohintuwuꞌna nanangiheꞌ Abura, mesuleꞌ miꞌi Abura lao i tampoꞌna. I pesuleꞌna, daturaꞌ toSodomo lao miꞌi modupaꞌ Abura i lembo Sawe to rauliꞌ woꞌo lembo Datu.

¹⁸I tempó iti, haweꞌ miꞌi woꞌo hadua datu to rahangaꞌ Mekisedeꞌ, ia miꞌi datu i kótá Sale[52] hai ia woꞌo tadulako menómbá i Pueꞌ Ala to i Surugáꞌ. Mekisedeꞌ iti mampoántiá Abura rótiꞌ hai anggoroꞌ,

¹⁹nauliꞌ: “Nawátiꞌkoꞌ Pueꞌ Ala to i Surugáꞌ[53] to mampopewaliꞌ duniáꞌ hai upu-upu óntóꞌna.

²⁰Tetóiá miꞌi Pueꞌ Ala to i Surugáꞌ to mampopenangikoꞌ hangko i ewálimu.” Roo onoꞌ, Abura mohuhuꞌ i Mekisedeꞌ hanggáláꞌ hampuloꞌ hangko i upu-upu párewá to napakaꞌala huleꞌ hangko i ewáliraꞌ.

²¹Roo onoꞌ, daturaꞌ toSodomo molaluita i Abura, nauliꞌ, “Nuala miꞌi párewá to nuperampaꞌi iti, agáiáná taunángkuꞌ nupopasuleꞌáꞌaꞌ.”

²²Agáiáná nahániki Abura, “Modándimoꞌ i lindoꞌna Pueꞌ Ala to i Surugáꞌ, to mampopewaliꞌ duniáꞌ hai upu-upu óntóꞌna.

²³Tiꞌaraꞌaꞌ ina moala ba apa-apa hangko i hio. Mogalo riꞌi hangkau peá lero ba petakaꞌ sandale, tiꞌaraꞌaꞌ pebáiꞌ moala bona ineeꞌ nuꞌuliꞌ ánti kaꞌiona haneꞌiaꞌ mewaliꞌ pebuku.

²⁴Tiꞌara kuꞌundeꞌ moala ba apa-apa bona kupopueꞌ haduduángkuꞌ. Bateꞌna peá kutarima apa to raꞌandeꞌ miꞌi taunángkuꞌ. Agáiáná rángángkuꞌ to hampohintuwuꞌkuꞌheꞌ, ia miꞌi Ane, Esekoloꞌ hai Mamere, kupembiáꞌ bona peisáheꞌ moala gáláꞌraꞌ.”