Read Besoa Pewaliꞌána 15 Bible Online

Pewaliꞌána 15 - Besoa bible

Pewaliꞌána 15

¹Hangko ionoꞌ, PUEꞌ mampatongawaꞌ miꞌi i Abura moliu pampetudeꞌá, Nauliꞌ: “Abura, ineeꞌkoꞌ malááꞌ. Kódóꞌ to ina mokámpáikoꞌ hangko i hinángkáꞌna to mepakarugiꞌ, hai ina Kuweꞌikoꞌ háwángina to mahile ntepuꞌu.”

²Agáiáná nauliꞌ Abura, “Ó Pueꞌ ALA. Tiꞌaraꞌaꞌ wongkódóꞌá Nupopemuleꞌ. To ina mampososora párewángkuꞌ, bateꞌna peá Eliese hawiꞌkuꞌ toDamasiꞌ. Mewaliꞌ apa miꞌi bunduꞌna Nuweꞌiaꞌ párewá to handaꞌ?”

⁴Agáiáná mongkóráꞌ wopiꞌi PUEꞌ i Abura, Nauliꞌ, “Tiꞌara hawiꞌmu to ina mampososora párewámu, agáiáná ina Kuweꞌikoꞌ ánáꞌmu haduduámu, hadua tobaleilo. Ia to ina mampososora párewámu.”

⁵Roo onoꞌ, PUEꞌ moánti Abura lao i rawa, haneꞌi Nahángáꞌá, “Mengoaꞌmokoꞌ i langiꞌ hai nupehukáꞌ moimbaꞌ betue. Ba upui nuimbaꞌ? Ina noꞌonoꞌ kahandaꞌraꞌ pemuleꞌámu duuꞌraꞌ tiꞌara piꞌi peisá raimbaꞌ.”

⁶Abura mepoinálái i Pueꞌ Ala, onoꞌ miꞌi haneꞌi narekeꞌ Pueꞌ Ala hadua tauna to manótó i peitáNa.

⁷Hangko ionoꞌ, nauliꞌ wopiꞌi PUEꞌ i hia, “Kódóꞌ miꞌi PUEꞌ to moántikoꞌ hangko i kótá Uri i tampoꞌraꞌ toKasidimi[54] bona tampoꞌ deꞌe Kuweꞌikoꞌ ina mewaliꞌ sosoramu.”

⁸Agáiáná mekuneꞌ Abura, nauliꞌ, “Ó Pueꞌ ALA, noumbá miꞌi kakuisána tampoꞌ deꞌe ina mewaliꞌ sosorangkuꞌ?”

⁹Mehániꞌ PUEꞌ, Nauliꞌ, “Lao mai nuala hambaꞌa gapiꞌ lundara, hambaꞌa bekeꞌ lundara hai hambaꞌa dimbá laki. Upu-upuraꞌ iti to motinuwuꞌ tálu parena. Noꞌonoꞌ woꞌo, hangaa-ngaa lao mai nuala hambaꞌa kokou hai hambaꞌa manggebodoꞌ.”

¹⁰Mewaliꞌ, naꞌala mpuꞌu miꞌi Abura upu-upu binataꞌ iti bona napopenómbáheꞌ i PUEꞌ. Hambaꞌa gapiꞌ, hambaꞌa bekeꞌ hai hambaꞌa dimbá iti nabikáꞌ ntangaꞌheꞌ haneꞌi natereha rontere hambiká-hambiká napopombetoto. Agáiáná tádáhi to rombaꞌa iti tiꞌara nabikáꞌ.

¹¹Roo onoꞌ, bahangapa tádáhi to mandeꞌ bauꞌ mengkatóá ina mandeꞌheꞌ óntóꞌ binataꞌ iti, agáiáná nawuraheꞌ Abura.

¹²Hangko kaꞌina támpuna alo, letaꞌ mposoꞌ miꞌi Abura. Hangkaꞌ-hangkaꞌ perái modediꞌ, hai rumihi ntepuꞌu kamalááꞌna Abura.

¹³Hangko ionoꞌ, nauliꞌ PUEꞌ i hia, “Bona nuisá ntepuꞌu, pemuleꞌámu ina toroꞌheꞌ nodo tauna to haweꞌ peá i tampoꞌraꞌ tauna ntániꞌna, hai iba átuna parena kamaruena, ina rapohawiꞌheꞌ hai rapopeahiahiꞌheꞌ i tampoꞌ iti.[55]

¹⁴Agáiáná hangkani tempó, ina Kuhukuheꞌ tauna to mampohawiꞌheꞌ,[56] hai i kapohuꞌraꞌ pemuleꞌámu hangko i tampoꞌ iti, ina moántiheꞌ handaꞌ párewá.[57]

¹⁵Hai io, ina matinuwuꞌkoꞌ, hai ina matekoꞌ i katinda lalu.

¹⁶Ane roomoheꞌ rapohawiꞌ iba lápina pemuleꞌámu, ina mesuleꞌheꞌ huleꞌ i tampoꞌ deꞌe, láwiꞌ deꞌe-deꞌe tiꞌara mani tempóna Kuwuraheꞌ toAmori hangko i tampoꞌ deꞌe. Ane rumihi miꞌi kakadakeraꞌ, hangko Kuhukuraheꞌ.”

¹⁷Támpu miꞌi alo hai káindi miꞌi, iaperái naita Abura hambuaꞌ tándi to merámbu hai hambuaꞌ huluꞌ to roreꞌ moliu i hiliꞌraꞌ binataꞌ to rabikáꞌ ntangaꞌ ininá.

¹⁸Tempó iti miꞌi mototowi PUEꞌ i Abura, Nauliꞌ, “Kódóꞌ modándi i hio. Ina Kuweꞌiheꞌ pemuleꞌámu upu-upu tampoꞌ deꞌe, mantepuꞌu i parailiꞌna tampoꞌ Másiriꞌ haweꞌ-haweꞌ i uwai Epara.

¹⁹Tepasuaꞌ woꞌo tampoꞌraꞌ toKeni, toKenasi, toKadamo,

²⁰toHeti, toPerisi, toRepaimi,

²¹toAmori, toKánáꞌá, toGirigasi hai toEbusi.”[58]