Read Besoa Pewaliꞌána 16 Bible Online

Pewaliꞌána 16 - Besoa bible

Pewaliꞌána 16

¹Sarai toinána Abura tiꞌara mani ara ánáꞌna, agáiáná ara hawiꞌna toMásiriꞌ, hadua ánáꞌntawine to rahangaꞌ Hagari.

²Onoꞌ miꞌi haneꞌi molaluita miꞌi Sarai i Abura, nauliꞌ, “Tiꞌaraꞌaꞌ naweꞌi PUEꞌ moánáꞌ. Rángina miꞌi nupoiluhi miꞌi sieruꞌ deꞌe hawiꞌkuꞌ bona ane moánáꞌi, ara ánáꞌtaꞌ to ina kupoánáꞌ.” Napokana Abura apa to nauliꞌ toinána,

³onoꞌ miꞌi haneꞌi Sarai mampeweꞌi hawiꞌna napoiluhi Abura. I tempó iti, hampuloꞌ miꞌi parena Abura toroꞌ i tampoꞌ Kánáꞌá.

⁴Mewaliꞌ Abura hai Hagari hampapaturuámoheꞌ álána káláꞌeá miꞌi towawine iti. Agáiáná kanaisána Hagari kakáláꞌeána, mampepemahile hai tiꞌara piꞌi mengkoruꞌ i Sarai.

⁵Onoꞌ miꞌi haneꞌi nauliꞌ Sarai i Abura, “Kuweꞌimokoꞌ hawiꞌkuꞌ Hagari, agáiáná ánti kanaisána kakáláꞌeána, tiꞌara piꞌi mengkoruꞌ i kódóꞌ. Io to masalaꞌ! Kuhárungá PUEꞌ ina mopakanótóákeꞌ posisalaꞌ deꞌe.”

⁶Mehániꞌ Abura, “Ia hawiꞌmu, mewaliꞌ io to makuasaꞌ i hia. Nubábehi peundeꞌámu, apa to maroꞌa nupekiri.” Mantepuꞌu ionoꞌ, Sarai mopakapári Hagari duuꞌna melangka.

⁷I kapohuꞌna Hagari iti, malaꞌekana PUEꞌ lao mampohidupaꞌá Hagari hungkuꞌ i katumbuꞌá uwai i pádá loriꞌ, i rárá to lao i Suruꞌ.

⁸Nauliꞌ malaꞌeka iti, “Hagari hawiꞌna Sarai, hangko iumbákoꞌ mai hai iumbákoꞌ lao?” Mehániꞌ Hagari, “Melangkaꞌaꞌ mai hangko i pueꞌkuꞌ Sarai.”

⁹Nauliꞌ wopiꞌi malaꞌeka iti, “Mesuleꞌmokoꞌ i pueꞌmu, hai mengkoruꞌmokoꞌ i hia.”

¹⁰Napaliliu miꞌi malaꞌeka laluitana nauliꞌ: “Ina Kuweꞌikoꞌ handaꞌ pemuleꞌámu duuꞌraꞌ tiꞌara piꞌi peisá raimbaꞌ.

¹¹Tiꞌara piꞌi marue ina moánákakoꞌ hadua ánángkóiꞌ tobaleilo. Ánáꞌmu iti ina nuhangaꞌ Sumaila[59] láwiꞌ nahádi miꞌi PUEꞌ kateriaꞌmu i lalu kamapárimu.

¹²Ánáꞌmu iti ina tueꞌ nodo hambaꞌa kalide to maila. Ia ina moewaꞌ upu-upu tauna, hai ia woꞌo ina raewaꞌ upu-upu tauna. I katoroꞌána, ia ina moewaꞌ woꞌo upu-upu halaluna.”

¹³Roo onoꞌ, nauliꞌ Hagari, “Toꞌu mpuꞌu paꞌi kuita miꞌi PUEꞌ to mampeitaꞌaꞌ?” Onoꞌ miꞌi haneꞌi ia mohangaꞌ Pueꞌ Ala “El-Roi”, lempóna: “Pueꞌ Ala to mampeitaꞌaꞌ”.

¹⁴Onoꞌ miꞌi haneꞌi tibubuꞌ iti rahangaꞌ tibubuꞌ Lahai-Roi, lempóna: “tibubuꞌNa To Tueꞌ hai Mampeitaꞌaꞌ”. Tibubuꞌ iti ara mani i hiliꞌna Kadesi hai Bered.

¹⁵Tiꞌara marue hangko ionoꞌ, moánáꞌ mpuꞌu miꞌi Hagari hadua tobaleilo, hai Abura mohangaꞌ ánángkóiꞌ iti Sumaila.

¹⁶Tempó iti, tinuwuꞌna Abura uwalu miꞌi puloꞌna hai ini parena.