Read Besoa Pewaliꞌána 17 Bible Online

Pewaliꞌána 17 - Besoa bible

Pewaliꞌána 17

¹Magáná miꞌi tinuwuꞌna Abura hahioꞌ puloꞌna hai hahioꞌ parena, mampatongawaꞌ miꞌi PUEꞌ i Abura, Nauliꞌ, “Kódóꞌ miꞌi Pueꞌ Ala to Makuasaꞌ.[60] Mengkoruꞌmokoꞌ i Kódóꞌ hai mampeuláꞌimokoꞌ upu-upuna peundeꞌáNgkuꞌ.

²Ina Kupaꞌara pototowi i hio, hai ina Kuweꞌikoꞌ pemuleꞌámu to handaꞌ ntepuꞌu.”

³Molingkudu miꞌi Abura, motóngkóꞌ haweꞌ i tampoꞌ, haneꞌi mongkóráꞌ wopiꞌi Pueꞌ Ala i hia, Nauliꞌ,

⁴“Deꞌe miꞌi pototowi to ina Kupaꞌara i hio: ina mewaliꞌkoꞌ umáraꞌ handaꞌ kadatuá.

⁵Onoꞌ miꞌi haneꞌi hangaꞌmu tiꞌara piꞌi rauliꞌ Abura, lempóna: ‘umaꞌ to teádái’, agáiáná rahangaꞌmokoꞌ Burahima, lempóna: ‘umáraꞌ handaꞌ tauna’.

⁶Ina Kuweꞌikoꞌ handaꞌ pemuleꞌámu duuꞌraꞌ mewaliꞌ handaꞌ kadatuá, hai handaꞌ pemuleꞌámu ina mewaliꞌ datu.

⁷Ina Kupaꞌara pototowi i hio hai i upu-upu pemuleꞌámu. Pototowi iti tiꞌara ina mokahópóꞌá. Kódóꞌ miꞌi to mewaliꞌ Pueꞌmu hai Pueꞌraꞌ pemuleꞌámu duuꞌna i rue-ruena.

⁸Deꞌe-deꞌe tampoꞌ Kánáꞌá nikatoroꞌi nodo pekou tauna to haweꞌ. Agáiáná tampoꞌ deꞌe ina Kuweꞌikoꞌ haweꞌ-haweꞌ i upu-upu pemuleꞌámu duuꞌna i rue-ruena, hai Kódóꞌ miꞌi to ina mewaliꞌ Pueꞌraꞌ.”

⁹Mongkóráꞌ wopiꞌi Pueꞌ Ala i Burahima, Nauliꞌ, “Noꞌonoꞌ woꞌo, hangaa-ngaa nupeuláꞌi pototowi deꞌe, io hai upu-upu pemuleꞌámu.

¹⁰Deꞌe miꞌi pototowiNgkuꞌ to hangaa-ngaa nipeuláꞌi. Io hai upu-upu pemuleꞌámu tobaleilo hangaa-ngaa ratileꞌ,

¹¹láwiꞌ iti to ina mewaliꞌ tandaꞌ to motakaꞌ pototowiNgkuꞌ i kómu.

¹²Mewaliꞌ, mantepuꞌu deꞌe-deꞌe, io hai upu-upu pemuleꞌámu hangaa-ngaa motileꞌkou ánáꞌmi tobaleilo to tinuwuꞌna uwalu alona, tepasuaꞌ upu-upu tauna to raꞌánáka i katoroꞌámi, maroꞌa ánáꞌmi, maroꞌa ánáꞌna hawiꞌmi. Mogalo riꞌi hawiꞌmi to rahóló hangko i tauna ntániꞌna, hangaa-ngaa nitileꞌheꞌ woꞌo.

¹³Upu-upu tobaleilo hangaa-ngaa ratileꞌ, láwiꞌ iti to motakaꞌ pototowiNgkuꞌ i kómu haweꞌ i rue-ruena.

¹⁴Upu-upu tobaleilo to tiꞌara ratileꞌ, tiꞌaraheꞌ rarekeꞌ taunáNgkuꞌ, láwiꞌ tiꞌaraheꞌ mampeuláꞌi pototowiNgkuꞌ.”

¹⁵Mongkóráꞌ wopiꞌi Pueꞌ Ala i Burahima, Nauliꞌ, “Ane toinámu, ineeꞌ miꞌi nukióꞌ Sarai, agáiáná nuhangaꞌ miꞌi Sáráꞌ.[61]

¹⁶Sáráꞌ ina Kuwátiꞌ bona moánáka hadua ánángkóiꞌ tobaleilo to Kuweꞌikoꞌ,[62] hai Sáráꞌ iti ina Kupopewaliꞌ ináraꞌ handaꞌ kadatuá. Hangko i pemuleꞌána, ina araheꞌ to mewaliꞌ datu.”

¹⁷Molingkudu miꞌi Burahima motóngkóꞌ haweꞌ i tampoꞌ, agáiáná matawa riꞌi hai nauliꞌ i laluna, “Mesuaꞌ paꞌi i akala, tobaleilo to hangatu miꞌi parena tinuwuꞌna, nabuku mani memuleꞌ? Hai Sáráꞌ toinángkuꞌ, tinuwuꞌna hahioꞌ miꞌi puloꞌna parena, nabuku mani paꞌi moánáꞌ?”

¹⁸Roo onoꞌ, nauliꞌ Burahima i Pueꞌ Ala, “Ane peisái, Sumaila miꞌi to mewaliꞌ pueꞌ sosora to Nudándiáꞌaꞌ.”

¹⁹Agáiáná nauliꞌ Pueꞌ Ala, “Tiꞌara. Sáráꞌ toinámu, ia riꞌi to ina moánáka hadua ánángkóiꞌ tobaleilo, hai ina nuhangaꞌ Isakiꞌ, lempóna: ‘matawa’. Ina Kupaꞌara pototowiNgkuꞌ to tiꞌara mokahópóꞌá i ánáꞌmu iti hai i upu-upu pemuleꞌána.

²⁰Agáiáná Kupehádingi woꞌo pembiáꞌmu kana i Sumaila. Onoꞌ miꞌi haneꞌi ina Kuwátiꞌ hai Kupahandaꞌ ntepuꞌu pemuleꞌána. Ia ina mewaliꞌ toioruraꞌ hampuloꞌ hai rodua tadulako, hai pemuleꞌánaheꞌ ina Kupopewaliꞌ hambuaꞌ kadatuá to mahile.

²¹Agáiáná pototowiNgkuꞌ ina Kubukeki i Isakiꞌ, ánáꞌmu to ina napoánáka Sáráꞌ pare mai i tempó to hibali hai deꞌe.”

²²Roo mongkóráꞌ noꞌonoꞌ, Pueꞌ Ala mopálehi miꞌi Burahima.

²³Alo iti pemiꞌi, Burahima mampeuláꞌi hawaꞌna Pueꞌ Ala, motileꞌ Sumaila hai upu-upuheꞌ tobaleilo to ara i katoroꞌána, tepasuaꞌ hawiꞌna to mesupaꞌheꞌ ionoꞌ hai hawiꞌna to nahóló hangko i tauna ntániꞌna.

²⁴I karatileꞌna Burahima, tinuwuꞌna hahioꞌ miꞌi puloꞌna hai hahioꞌ parena,

²⁵hai Sumaila, ánáꞌna, hampuloꞌ miꞌi hai tálu parena tinuwuꞌna.

²⁶Hira rodua ratileꞌ alo iti,

²⁷noꞌonoꞌ woꞌo upu-upu hawiꞌna Burahima.