Read Besoa Pewaliꞌána 19 Bible Online

Pewaliꞌána 19 - Besoa bible

Pewaliꞌána 19

¹Kalumbaꞌ miꞌi, malaꞌeka to rodua iti haweꞌheꞌ i kótá Sodomo. Tempó onoꞌ, Loꞌoti mehoda i babaꞌá bente kótá.[64] Kamoitána malaꞌeka iti haweꞌ, kásáliu meángkáꞌ lao mampombelámbiꞌáheꞌ hai molingkudu i lindoꞌraꞌ motóngkóꞌ haweꞌ i tampoꞌ,

²nauliꞌ, “Tuá, mehupeꞌmokeꞌ sieruꞌ i támbingkuꞌ. Tabahoꞌi miꞌi bitintaꞌ hai hambengimokeꞌ ieneꞌ. Kahalo rái mepulo haneꞌi tapaliliu polumaontaꞌ.” Rahániki, rauliꞌ, “Ineeꞌ miꞌi hampaiꞌ. Ina maturu peangkaiꞌ i tanalapa i tangaꞌ kótá deꞌe.”

³Agáiáná napembiáꞌ ntepuꞌu Loꞌoti bona hambengiheꞌ i támbina. Kahópóꞌána mesuaꞌ mpuꞌumoheꞌ i lalu támbina. Roo onoꞌ, napatimama miꞌi pandeꞌraꞌ, natunuámoheꞌ rótiꞌ to tiꞌara raragiꞌi, haneꞌiheꞌ mandeꞌ.

⁴Hangko tiꞌara maniheꞌ maturu, upu-upu tobaleilo i humalele kótá iti, mantepuꞌu hangko i pamuda haweꞌ-haweꞌ i tosae, laoheꞌ molibuꞌ támbina Loꞌoti.

⁵Monganga-ngangaheꞌ pueꞌ wánuá iti, rauliꞌ, “Iumbámoheꞌ tauna to mai hambengi i támbimu? Nupopesuwuꞌheꞌ mai tobaleilo to roduaheꞌ iti bona kipakeꞌheꞌ!”

⁶Mesuwuꞌ miꞌi Loꞌoti haneꞌi motuko ntaleuꞌ babaꞌ támbi iti.

⁷Nahángáꞌáheꞌ toSodomo, “Halalungkuꞌ, kupembiáꞌ ntepuꞌu i kómu bona ineeꞌkou mobábehi to kadake iti.

⁸Nipehádingi maroꞌa. Araheꞌ ánáꞌkuꞌ rodua to ánáꞌntawine maniheꞌ. Rángina miꞌi hira kuweꞌikou bona nibábehi apa peá mouláꞌ peundeꞌámi. Agáiáná kupembiáꞌ ntepuꞌu ineeꞌkou mosilakai torarengkuꞌ deꞌe, láwiꞌ maiheꞌ i kódóꞌ, onoꞌ miꞌi haneꞌi kódóꞌ miꞌi to hangaa-ngaa mokámpáiheꞌ.”

⁹Agáiáná rauliꞌ peá tauna to handaꞌ iti i Loꞌoti, “Pobaeꞌ! Io tiꞌara ara kuasaꞌmu mopárentáꞌangkaiꞌ láwiꞌ io tohaweꞌ pekoꞌ. Ina melumbuꞌ bábehiángkiꞌ i hio haneꞌi i tauna to rodua iti!” Roo onoꞌ, rahumbángá miꞌi Loꞌoti ina laoheꞌ mogero babaꞌ.

¹⁰Agáiáná torare to rodua iti modiiꞌ Loꞌoti mesuaꞌ i lalu támbi, haneꞌi motukoheꞌ babaꞌ.

¹¹Roo onoꞌ, rapabilo miꞌi mátáraꞌ upu-upu tauna to ara i rawa. Mewaliꞌ kehapiꞌ noumbá miꞌi kamampeliꞌraꞌ babaꞌ támbi, mbero-mbero peá.

¹²Hangko ionoꞌ, rauliꞌ tauna to rodua iti i Loꞌoti, “Ane ara maniheꞌ ánáꞌmu, mániámu ba halalumu i kótá deꞌe, hangaa-ngaa laoheꞌ nuala bona pohuꞌkou upu-upu hangko ieneꞌ,

¹³láwiꞌ kótá deꞌe ina kigero. Nahádi miꞌi PUEꞌ peraruaꞌraꞌ tauna kana i kótá deꞌe, hai Naisá miꞌi kakadakena tauna to toroꞌ ieneꞌ. Onoꞌ miꞌi haneꞌiangkaiꞌ Nahuoꞌ mai mogero kótá Sodomo deꞌe hai moropuꞌ upu-upu óntóꞌna.”

¹⁴Roo onoꞌ, lao miꞌi Loꞌoti mampombelámbiꞌá rodua tobaleilo to mokalembákimoheꞌ ánáꞌna, haneꞌi nahángáꞌáheꞌ, “Kawiáꞌmokou pohuꞌ hangko i kótá deꞌe, láwiꞌ ina nagero miꞌi PUEꞌ.” Agáiáná rauliꞌ riꞌi wadi-wadina peá Loꞌoti.

¹⁵Mepulo-pulo, malaꞌeka to rodua iti mopahumpeꞌheꞌ Loꞌoti, rauliꞌ, “Kawiáꞌmokou pohuꞌ hingkakani hai toinámu hai ánáꞌmu towawine to rodua, bona tiꞌarakou meuláꞌ mate ane kótá deꞌe ragero.”

¹⁶Bata-bata mani laluna Loꞌoti, agáiáná ánti kamaꞌahiꞌna PUEꞌ i hia, onoꞌ miꞌi haneꞌi malaꞌeka to rodua iti motibaaꞌ taeraꞌ Loꞌoti, toinána hai ánáꞌna to rodua iti, moántiheꞌ mesuwuꞌ hangko i kótá Sodomo.

¹⁷Kahaweꞌraꞌ i rawa kótá, nahángáꞌá wopaheꞌ hadua malaꞌeka, “Melangkamokou bona tueꞌ pekou. Ineeꞌkou mehaileꞌ i taleuꞌmi hai ineeꞌkou mengkaroo i apa peá i lembo Iarade. Melangkamokou lao i buluꞌ, bona tiꞌarakou mate!”

¹⁸Agáiáná nauliꞌ Loꞌoti, “Tuá, ineeꞌ wongkaiꞌkaa nihuoꞌ melangka lao i buluꞌ.

¹⁹Maroꞌa ntepuꞌu lalumi i kódóꞌ, hai toꞌu-toꞌu mpuꞌu nitulungi hai nipatueꞌmoꞌ. Agáiáná buluꞌ rupeꞌo karaoꞌ. Tiꞌara kubuku. Kupokalááꞌ ina nalámbiꞌ peangkaiꞌ to mepakarugiꞌ iti, hai ina mateangkaiꞌ hangko tiꞌara maniangkaiꞌ haweꞌ ionoꞌ.

²⁰Peita, i lindoꞌtaꞌ ara wánuá to kókóiꞌ, tiꞌara gaga karaoꞌ. Ane peisái, nipaliuangkaiꞌ melangka lao ionoꞌ bona tueꞌ peangkaiꞌ.”

²¹Mehániꞌ malaꞌeka, “Peisánto. Pembiáꞌmu iti woꞌo kutarima. Wánuá to kókóiꞌ iti tiꞌara ina kugero,

²²agáiáná hangaa-ngaa melangkakou hawiáꞌ-wiáꞌ, láwiꞌ tiꞌara mani peisá kubábehi ba apa-apa ane tiꞌara manikou haweꞌ ionoꞌ.” Onoꞌ miꞌi haneꞌi wánuá iti rahangaꞌ Soa, lempóna: “kókóiꞌ”.

²³Membeto miꞌi alo hangko haweꞌ riꞌi Loꞌoti i wánuá Soa.

²⁴Hangkaꞌ-hangkaꞌ perái PUEꞌ mampopendáulu hangko i langiꞌ udá watu belerang to keapi i kótá Sodomo hai Gumora.

²⁵Kótá to rombuaꞌ iti maropuꞌ haweꞌ-haweꞌ i humalele lembona Iarade. Tudaꞌ-tudaꞌ, binataꞌ hai tauna, upu aha maropuꞌ.

²⁶Agáiáná toinána Loꞌoti to metuntungi i hia, mehaileꞌ riꞌi i taleuꞌna, onoꞌ miꞌi haneꞌi mewaliꞌ watu bure.

²⁷Kahalona mepulo-pulo, mearó miꞌi Burahima haneꞌi nagagu lao i peángkáꞌáraꞌ hai PUEꞌ iamáindina.[65]

²⁸Napetiro tándáꞌ i Sodomo, Gumora, hai i humalele lembona Iarade iti. Naita miꞌi rámbu to rumukuꞌ mentumbuꞌ hangko i tampoꞌ iti, nodo rámbu topohunui.

²⁹Noꞌonoꞌ miꞌi kótá iti nagero Pueꞌ Ala, agáiáná Nabuhinao miꞌi pembiáꞌna Burahima, onoꞌ miꞌi haneꞌi Loꞌoti Napopesuwuꞌ hangko tiꞌara mani kótá iti Nagero.

³⁰Loꞌoti malááꞌ toroꞌ oaꞌ i Soa, onoꞌ haneꞌi ia pohuꞌ miꞌi lao i buluꞌ hingkakani hai ánáꞌna towawine to rodua, hai toroꞌheꞌ ionoꞌ i lalu balamba watu.

³¹Hangkani tempó, ánáꞌna towutuꞌ molaluita i ádina, nauliꞌ, “Umántaꞌ matoama miꞌi, hai tiꞌara ara tobaleilo ieneꞌ to peisá tapotoama bona ara ánáꞌtaꞌ nodo to biásá i humalele duniáꞌ.

³²Rángina miꞌi tapamalangu umántaꞌ haneꞌi tapoiluhi. Ina moánáꞌkeꞌ bona tiꞌara madepuꞌ pemuleꞌána umántaꞌ.”

³³Káindi iti, umáraꞌ rapopainu miꞌi anggoroꞌ duuꞌna malangu, haneꞌi ánáꞌna towutuꞌ lao mampoiluhi. Ánti kamalanguna, tiꞌara piꞌi naisá umáraꞌ apa to mewaliꞌ.

³⁴Kahalona wopiꞌi ánáꞌna towutuꞌ molaluita i ádina, “Iakáindi, mampoiluhimoꞌ umántaꞌ. Deiná káindi, tapamalangu wopiꞌi, bona io to mampoiluhi. Ane tabábehi noꞌonoꞌ, kitaꞌ rodua ina moánáꞌkeꞌ bona pemuleꞌána umántaꞌ tiꞌara madepuꞌ.”

³⁵Loꞌoti rapamalangu wopiꞌi, hai ánáꞌna to adi lao mampoiluhi. Ánti kamalanguna, tiꞌara piꞌi naisá apa to mewaliꞌ.

³⁶Mewaliꞌ káláꞌeámoheꞌ ánáꞌna to rodua iti hangko i umáraꞌ.

³⁷Ánáꞌna towutuꞌ moánáka hadua ánángkóiꞌ tobaleilo to nahangaꞌ Moabiꞌ.[66] Ia miꞌi to momuleꞌákaheꞌ toMoabiꞌ to tueꞌ maniheꞌ deꞌe-deꞌe.

³⁸Ánáꞌna to adi moánáka woꞌo hadua tobaleilo to nahangaꞌ Beni-Ami.[67] Ia miꞌi to momuleꞌákaheꞌ toAmoni to tueꞌ maniheꞌ deꞌe-deꞌe.[68]