Read Besoa Pewaliꞌána 2 Bible Online

Pewaliꞌána 2 - Besoa bible

Pewaliꞌána 2

¹Noꞌonoꞌ miꞌi Pueꞌ Ala mampopewaliꞌ duniáꞌ hai upu-upu óntóꞌna i lalu ini alona kamaruena.

²I alo kapitu Ia mengkaroo, láwiꞌ hópóꞌ miꞌi bágóꞌNa.

³Alo kapitu iti Nawátiꞌ, hai Napopontaniꞌ hangko i alo ntániꞌna, láwiꞌ i alo kapitu iti Ia mengkaroo hangko i upu-upu bágóꞌNa mampopewaliꞌ duniáꞌ.

⁴[3] Deꞌe miꞌi daritakáná pampopewaliꞌna duniáꞌ hai upu-upu óntóꞌna.[4] I tempóna PUEꞌ Ala mampopewaliꞌ langiꞌ hai tampoꞌ,

⁵tiꞌara mani ara tinudaꞌ to tueꞌ ba motumbeꞌ, hai tiꞌara mani ara tudaꞌ-tudaꞌ ba kau i duniáꞌ, láwiꞌ udá tiꞌara mani Napaꞌara hai tiꞌara mani woꞌo ara tauna to mampobágóꞌ tampoꞌ iti.

⁶To mewaliꞌ peá, uwai masisiꞌ mai hangko i lapi tampoꞌ hai moloeꞌi wongko tampoꞌ.

⁷Hangko ionoꞌ, PUEꞌ Ala moala tampoꞌ haneꞌi moteru hadua tauna.[5] Roo onoꞌ, natawueꞌ PUEꞌ Ala inao ngkatueꞌ i lalu bóbeꞌ hilóna, haneꞌi tueꞌ mpuꞌu miꞌi tauna iti.

⁸Kaliliuána, nabábehi miꞌi PUEꞌ Ala hambuaꞌ hinoe i tampoꞌ Párádesiꞌ tándáꞌ i mata alo, hai tauna iti Napatoroꞌ i hinoe iti.

⁹Ionoꞌ PUEꞌ Ala mopatueꞌ miꞌi mampopengaa kau to mababe hai to matamaꞌ wuaꞌna. I tangaꞌ-tangaꞌ hinoe iti ara rompóꞌá kau, ia miꞌi: Kau to Mopaꞌara Katueꞌ[6] hai Kau to Mampoweꞌi Kanótó Lalu Apa to Maroꞌa hai Apa to Kadake.

¹⁰Ara hampenga uwai to moili hangko i tampoꞌ Párádesiꞌ to mouwaihingi hinoe iti. I rawa hinoe, uwai iti mogááꞌ mewaliꞌ iba pengána.

¹¹Pengána to kaꞌisáꞌ hangaꞌna Piso. Uwaina moili melempó i tampoꞌ Hawila.

¹²Ionoꞌ telámbiꞌ buláwá to maroꞌa ntepuꞌu, huloꞌ, hai watu paramata.

¹³Pengána to kaduá hangaꞌna Giho.[7] Uwaina moili melempó i tampoꞌ Kusi.

¹⁴Pengána to katálu hangaꞌna Tigiri. Uwaina moili i hambali tampoꞌ Asuri tándáꞌ i mata alo. Pengána to kaꞌiba hangaꞌna Epara.

¹⁵PUEꞌ Ala mopatoroꞌ tauna iti i hinoe Párádesiꞌ bona hinoe iti napobágóꞌ hai nakádipurá.

¹⁶Napohawaꞌá miꞌi tauna iti, Nauliꞌ, “Upu-upu wuaꞌngkau to ara i hinoe deꞌe peisá nuandeꞌ,

¹⁷agáiáná wuaꞌngkau to mampoweꞌi kanótó lalu apa to maroꞌa hai apa to kadake, tiꞌara peisá nuandeꞌ, láwiꞌ ane nuandeꞌi, tempó iti woꞌo bateꞌmu ina mate.”

¹⁸Mongkóráꞌ wopiꞌi PUEꞌ Ala, Nauliꞌ, “Tiꞌara maroꞌa tauna iti tueꞌ haduduána. Hangaa-ngaa Kubábehi rángána to hintotoꞌ medurei oaꞌ.”

¹⁹Naꞌala miꞌi tampoꞌ haneꞌi Napopewaliꞌ mampopengaa binataꞌ to tueꞌ i lorena hai tádáhi to ara i laerawa. Hinángkáꞌna binataꞌ naꞌántiheꞌ PUEꞌ Ala lao i lindoꞌna tauna iti, bona ia moitaheꞌ hai mopakanótó hangaꞌraꞌ. Noꞌonoꞌ miꞌi rárána binataꞌ i lorena hai i laerawa molámbiꞌheꞌ hangaꞌraꞌ hampákáꞌ-hampákáꞌ.

²⁰Mewaliꞌ tauna iti mohangaꞌheꞌ hinángkáꞌna binataꞌ to manondoꞌ, tádáhi to i laerawa, hai binataꞌ to maila, agáiáná tiꞌara mani ara rángána to hintotoꞌ ina medurei.

²¹Onoꞌ miꞌi haneꞌi PUEꞌ Ala mopaletaꞌ Adama, hai i tempóna letaꞌ mposoꞌ, naꞌala miꞌi Pueꞌ Ala óhóꞌna hangkau haneꞌi Naiwungi huleꞌ hai óntóꞌna.

²²Hangko i óhóꞌna iti, Nabábehi miꞌi hadua towawine, haneꞌi Naꞌánti lao i hia.

²³Tempóna moita towawine iti, molaluita miꞌi tauna iti nauliꞌ: “Hangko deꞌe riꞌi ara to hibali hai kódóꞌ! Buꞌuna hangko i buꞌungkuꞌ. Óntóꞌna hangko i óntóꞌkuꞌ. Ina kuhangaꞌ ‘towawine’, láwiꞌ ia raꞌala hangko i tobaleilo.”[8]

²⁴Onoꞌ miꞌi haneꞌi tobaleilo hangaa-ngaa mopálehi umána hai inána, hai tueꞌ hingkakani hai toinána, bona to rodua iti mewaliꞌheꞌ hawátá-wátá.

²⁵Tobaleilo hai towawine iti menggelá maniheꞌ, agáiáná tiꞌara raisá mahili.