Read Besoa Pewaliꞌána 20 Bible Online

Pewaliꞌána 20 - Besoa bible

Pewaliꞌána 20

¹Roo onoꞌ, Burahima melimbá miꞌi lao i tampoꞌ Negeꞌ to ara i tampoꞌ Kánáꞌá tándáꞌ i wóiꞌ. Kahaweꞌraꞌ ionoꞌ, toroꞌheꞌ i kótá Gera i hiliꞌna tampoꞌ Kadesi hai Suruꞌ. Toroꞌheꞌ nodo tohaweꞌ i kótá iti.

²I tempó onoꞌ, nauliꞌ Burahima, “Sáráꞌ deꞌe ádingkuꞌ.” Onoꞌ miꞌi haneꞌi Abimeleꞌ, daturaꞌ toGera, mohuoꞌ taunána lao moala Sáráꞌ ina napohambokoá.

³Hangkani tempó tangaꞌ káindi, mampatongawaꞌ miꞌi Pueꞌ Ala i Abimeleꞌ moliu paturuna, Nauliꞌ, “Hangaa-ngaa matekoꞌ láwiꞌ towawine to nuala iti, ara miꞌi toámána!”

⁴Agáiáná Abimeleꞌ tiꞌara mani mampoiluhi Sáráꞌ, onoꞌ haneꞌi nauliꞌ, “Pueꞌ! Tiꞌara kódóꞌ to masalaꞌ. Ba ina Nupapateaꞌ hai taunángkuꞌheꞌ?

⁵Tiꞌara paꞌi Burahima haduduána to manguliꞌ Sáráꞌ iti ádina? Noꞌonoꞌ woꞌo panguliꞌna towawine iti. Kubábehi iti hangko i kabulána lalungkuꞌ, tiꞌaraꞌaꞌ masalaꞌ.”

⁶Mehániꞌ Pueꞌ Ala i Abimeleꞌ moliu paturuna, Nauliꞌ, “Kuisá tiꞌara nutunggái mobábehi salaꞌ, onoꞌ miꞌi haneꞌi Kukámpáikoꞌ bona tiꞌarakoꞌ mampoiluhi towawine iti haneꞌi mobábehi dósá i Kódóꞌ.

⁷Agáiáná deꞌe-deꞌe, hangaa-ngaa nupopasuleꞌ towawine iti i toámána láwiꞌ toámána iti hadua nabiꞌ. Ia to ina mampekakaeákoꞌ bona tiꞌarakoꞌ mate. Agáiáná ane tiꞌarai nupopasuleꞌ, io hai upu-upu taunámu hangaa-ngaa matekou.”

⁸Kahalona mepulo-pulo, nakióꞌmoheꞌ Abimeleꞌ upu-upu topobágóꞌna, haneꞌiheꞌ napopaisáꞌá apa to pewaliꞌ. I karahádina, malááꞌ ntepuꞌuheꞌ.

⁹Roo onoꞌ, ia mokióꞌ Burahima, haneꞌi nakuneꞌ, “Moapa riꞌi haneꞌi nupanoꞌonoꞌaꞌ? Apa riꞌi salaꞌkuꞌ i hio haneꞌi nupaꞌara kapári i kódóꞌ hai rugiꞌ i popárentáꞌángkuꞌ. Tiꞌara maroꞌa bábehiámu iti!

¹⁰Apa riꞌi tunggáiámu haneꞌi nubábehi noꞌonoꞌ.”

¹¹Mehániꞌ Burahima, “Kuꞌuliꞌ riꞌi tiꞌara ara tauna ieneꞌ to mengkoruꞌ i Pueꞌ Ala, mewaliꞌ kupekiri ina rapapateaꞌ ánti pepokaeluraꞌ tauna i toinángkuꞌ.

¹²Hai katoꞌuána, ia ádingkuꞌ, láwiꞌ kaiꞌ hadua peá umángkiꞌ, agáiáná tiꞌaraꞌangkaiꞌ hangina-ngina. Hai hambokoangkaiꞌ woꞌo.

¹³I kanahuoꞌkuꞌ Pueꞌ Ala mopálehi tampoꞌna umángkuꞌ, moliloangkaiꞌ i tampoꞌraꞌ tauna ntániꞌna. Onoꞌ miꞌi haneꞌi kuhángáꞌá toinángkuꞌ, ‘Ane nupokaꞌahiꞌ ntepuꞌuaꞌ, iumbá peá kalaoántaꞌ, hangaa-ngaa nupahaweꞌáheꞌ kaꞌiona ádingkuꞌ.’ ”

¹⁴Roo onoꞌ, Abimeleꞌ mampopasuleꞌ Sáráꞌ i Burahima, hai naweꞌi woꞌo hawiꞌ, dimbá hai gapiꞌ.

¹⁵Nauliꞌ datu iti i Burahima, “Deꞌe miꞌi tampoꞌkuꞌ to talindoꞌ. Peisákoꞌ toroꞌ iumbá peá peundeꞌámu.”

¹⁶Haneꞌi nahángáꞌá woꞌo Sáráꞌ, “Wutuꞌmu kuweꞌi miꞌi hasábu dóiꞌ peráꞌ ánti karaꞌántimu i támbingkuꞌ, bona tongawaꞌ i upu-upu tauna katiꞌárámu masalaꞌ.”

¹⁷Roo onoꞌ, Burahima mampekakaeá Datu Abimeleꞌ hantámbi, láwiꞌ ánti kanaꞌalana Sáráꞌ, nahukuheꞌ PUEꞌ, álána laloheꞌ toinána hai upu-upu hawiꞌna. Roo Burahima mekakae, Datu Abimeleꞌ mauriꞌ miꞌi hai to i támbina tiꞌarapoheꞌ lalo, agáiáná moánáꞌ wopaheꞌ.