Read Besoa Pewaliꞌána 21 Bible Online

Pewaliꞌána 21 - Besoa bible

Pewaliꞌána 21

¹Hangko ionoꞌ, PUEꞌ mambuhinao miꞌi Sáráꞌ, haneꞌi Nawátiꞌ hintotoꞌ hai dándiNa.

²I kamatoámána miꞌi Burahima, káláꞌeá miꞌi Sáráꞌ, hai i tempó to napakanótó miꞌi ami Pueꞌ Ala,[69] ia moánáka hadua ánángkóiꞌ tobaleilo.

³Ánáꞌraꞌ iti nahangaꞌ Burahima Isakiꞌ, lempóna: “matawa”.[70]

⁴Magáná miꞌi tinuwuꞌna Isakiꞌ uwalu alona, ia natileꞌ Burahima hiolaꞌ hai hawaꞌna Pueꞌ Ala.[71]

⁵I karapoánákana Isakiꞌ, tinuwuꞌna Burahima hangatu miꞌi parena.

⁶I tempó iti, nauliꞌ Sáráꞌ, “Pueꞌ Ala mampopatawaꞌaꞌ, hai upu-upu tauna to mohádi poánáꞌkuꞌ ina matawaheꞌ woꞌo ánti kagóeꞌraꞌ hingkakani hai kódóꞌ.

⁷Hangkoia heáná paꞌi to mohángáꞌá Burahima kaꞌina árána ánáꞌkiꞌ? Agáiáná deꞌe-deꞌe moánáꞌntoaꞌ hadua ánángkóiꞌ tobaleilo i kasaeána toámángkuꞌ.”

⁸Kamahile-hileá Isakiꞌ, i tempóna tiꞌara piꞌi mehuhu,[72] Burahima mopaꞌara posusa mahile.

⁹I tempó iti, Sáráꞌ moita Sumaila mampopowadi-wadi Isakiꞌ.[73] Sumaila iti ia miꞌi ánáꞌraꞌ Burahima hai Hagari, towawine toMásiriꞌ.

¹⁰Kanaitána Sáráꞌ apa to pewaliꞌ, nauliꞌ i Burahima, “Nuwuramoheꞌ hawiꞌtaꞌ iti hingkakani hai ánáꞌna, láwiꞌ ánáꞌna iti tiꞌara peisá ina molámbiꞌ ba apa peá hangko i upu-upu to ina napososora ánáꞌkuꞌ Isakiꞌ.”

¹¹Masusa laluna Burahima mohádi laluitana toinána iti, láwiꞌ Sumaila iti woꞌo ánáꞌna.

¹²Agáiáná nauliꞌ Pueꞌ Ala i Burahima, “Ineeꞌ nupomasusa lalu kana i ánáꞌmu hai Hagari. Nupeuláꞌi peá peundeꞌána Sáráꞌ, láwiꞌ Isakiꞌ riꞌi to ina momuleáka pemuleꞌámu mouláꞌ apa to Kudándiámokoꞌ hangkoia.

¹³Ane ánáꞌna Hagari, ina Kuweꞌi woꞌo handaꞌ pemuleꞌána duuꞌraꞌ mewaliꞌheꞌ hambuaꞌ kadatuá, láwiꞌ ia woꞌo ánáꞌmu.”

¹⁴Kahalona mepulo-pulo, Burahima moala miꞌi rótiꞌ hai pemboliá uwai,[74] naweꞌi Hagari rapoboku i rárá. Bokuraꞌ napatiubangiá Burahima, haneꞌi nahuoꞌ miꞌi pohuꞌ hingkakani hai ánáꞌna. Mewaliꞌ Hagari pohuꞌ miꞌi, hai polumaoraꞌ menggoli-nggoli peheꞌ i pádá loriꞌ Baraseba.

¹⁵I kaupuna uwai to raꞌánti, nawoli miꞌi ánáꞌna i tóáꞌ kau,

¹⁶haneꞌi lao mehoda rekeꞌ-rekeꞌna hangatu mete kakaraoꞌna. Nauliꞌ i laluna, “Tiꞌara tuꞌu inaongkuꞌ mampeita ánáꞌkuꞌ mate.” Tangaꞌna mehoda-hoda, ia teriaꞌ rumihi.

¹⁷Nahádi miꞌi Pueꞌ Ala kateriaꞌna Sumaila, onoꞌ miꞌi haneꞌi molaluita miꞌi malaꞌekana Pueꞌ Ala i Hagari hangko i langiꞌ, nauliꞌ, “Hagari, apa to nuposusa? Ineeꞌkoꞌ malááꞌ, láwiꞌ Pueꞌ Ala mohádi miꞌi kateriaꞌna ánáꞌmu.

¹⁸Laomokoꞌ i ánáꞌmu, nupopeángkáꞌ hai nupalindó, láwiꞌ ina Kupahandaꞌ pemuleꞌána duuꞌraꞌ mewaliꞌheꞌ hambuaꞌ kadatuá to mahile.”

¹⁹Roo onoꞌ, napetudeꞌá miꞌi Pueꞌ Ala i Hagari hambuaꞌ tibubuꞌ, haneꞌi lao miꞌi Hagari moꞌóntóki pemboliá uwairaꞌ hai mampopainu ánáꞌna.

²⁰Pueꞌ Ala mamporángá oaꞌ Sumaila duuꞌna mahile. Ia toroꞌ i pádá loriꞌ, hai mewaliꞌ topoahu to mapánde.

²¹Tangaꞌraꞌ toroꞌ i pádá loriꞌ Para, Sumaila napopohamboko miꞌi inána hai hadua towawine to hangko i tampoꞌ Másiriꞌ.

²²I tempó iti, Datu Abimeleꞌ hingkakani hai Pikoloꞌ tadulako surudadoꞌna, laoheꞌ mampohidupaꞌá Burahima. Nauliꞌ Abimeleꞌ i Burahima, “Tongawaꞌ Pueꞌ Ala mamporángákoꞌ hai motulungikoꞌ i upu-upu to nubábehi.

²³Onoꞌ miꞌi haneꞌi kupembiáꞌ bona modándikoꞌ deꞌe-deꞌe i lindoꞌna Pueꞌ Ala, bona tiꞌaraꞌaꞌ nubagiuꞌ ba ánáꞌkuꞌ ba pemuleꞌángkuꞌheꞌ. Nodo kamaroꞌana lalungkuꞌ i hio, kupembiáꞌ bona hangaa-ngaa nubábehi woꞌo noꞌonoꞌ i kódóꞌ hai i upu-upu taunángkuꞌ to ara i tampoꞌ to nikatoroꞌi deꞌe.”

²⁴Nauliꞌ Burahima, “Kódóꞌ modándiaꞌ noꞌonoꞌ.”

²⁵Agáiáná ara woꞌo to mopamasusa laluna Burahima, onoꞌ miꞌi haneꞌi napahaweꞌ miꞌi i Datu Abimeleꞌ kana i bábehiáraꞌ hawiꞌna datu to morámpáki hambuaꞌ tibubuꞌna.

²⁶Nahániki Abimeleꞌ, “Tiꞌara kuisá heáná to mobábehi iti, hai tiꞌara mani haweꞌ hangkani nupolaluita i kódóꞌ. Hangko deꞌe-deꞌe riꞌi kakuhádina.”

²⁷Hangko ionoꞌ, Burahima mampeweꞌi dimbá hai gapiꞌ i Datu Abimeleꞌ, haneꞌi tauna to rodua iti mopaꞌaraheꞌ podándi.

²⁸Roo onoꞌ, lao miꞌi Burahima mopataniꞌ pitu báꞌána ánáꞌ dimbá lundara.

²⁹Napekuneꞌ Abimeleꞌ i hia, “Apa riꞌi tunggáiámu haneꞌi nubábehi noꞌonoꞌ?”

³⁰Mehániꞌ Burahima, “Kupembiáꞌ bona nutarima pitu báꞌána ánáꞌ dimbá deꞌe, tandaꞌ kamosabikimu kakódóꞌna miꞌi to mokae tibubuꞌ deꞌe.”

³¹Onoꞌ miꞌi haneꞌi katoroꞌá iti rahangaꞌ Baraseba, lempóna: “tibubuꞌ podándiá”,[75] láwiꞌ ionoꞌ miꞌi podándiraꞌ tauna to rodua iti.

³²Karooraꞌ mobábehi podándi i Baraseba, Datu Abimeleꞌ hai Pikoloꞌ tadulako surudadoꞌna, mesuleꞌheꞌ i tampoꞌraꞌ toPelisitiꞌ.

³³Natudaꞌ miꞌi Burahima hampóꞌá kau tamarika i Baraseba, hai ionoꞌ miꞌi ia menómbá i PUEꞌ to Tiꞌara Mokahópóꞌá.[76]

³⁴Hai Burahima marue mani toroꞌ i tampoꞌraꞌ toPelisitiꞌ.