Read Besoa Pewaliꞌána 22 Bible Online

Pewaliꞌána 22 - Besoa bible

Pewaliꞌána 22

¹Marue hangko ionoꞌ, Pueꞌ Ala mokióꞌ Burahima bona Napehukáꞌ pepoináláina, Nauliꞌ, “Burahima.” Mehániꞌ Burahima, “Deꞌentoaꞌ, Pueꞌ.”

²Nauliꞌ wopiꞌi Pueꞌ Ala, “Laomokoꞌ i tampoꞌ Moria, hai nuánti Isakiꞌ, ánáꞌmu to haduduána to nupokaꞌahiꞌ ntepuꞌu. Ionoꞌ ara hambuaꞌ buluꞌ to ina Kutudeꞌákoꞌ.[77] Nusambale ánáꞌmu iti hai nuintu mewaliꞌ popenómbámu i Kódóꞌ.”

³Kahalona mepulo-pulo, mearó miꞌi Burahima haneꞌi molámpiꞌi kalidena. Roo onoꞌ, mobeho kau popeintu popenómbá, natomboꞌ hai napateke i kalidena. Timama miꞌi upu-upuna, pohuꞌmoheꞌ hingkakani hai Isakiꞌ hai rodua hawiꞌna, laoheꞌ i katoroꞌá to ina natudeꞌá Pueꞌ Ala.

⁴Tálu miꞌi aloraꞌ molumao, naita miꞌi ngkaraoꞌ buluꞌ iti.

⁵Mewaliꞌ nahángáꞌáheꞌ hawiꞌna to rodua, “Ieneꞌmokou mepegiá hingkakani hai kalidentaꞌ. Kaiꞌ ntaliánáꞌ ina laoangkaiꞌ indoreá menómbá i Pueꞌ Ala. Roo onoꞌ, ina mesuleꞌangkaiꞌ mai huleꞌ.”

⁶Roo onoꞌ, Burahima moángkáꞌ kau popeintu popenómbá nahumpádá i wángána Isakiꞌ, hai ia to moánti ladiꞌ hai api. Tangaꞌraꞌ molumao,

⁷nauliꞌ Isakiꞌ i umána, “Umaꞌ!” Mehániꞌ Burahima, “Apa riꞌi, ánáꞌkuꞌ?” Mekuneꞌ Isakiꞌ, “Ara miꞌi api hai kau, agáiáná iumbá miꞌi ánáꞌ dimbá to ina tapopenómbá?”

⁸Mehániꞌ Burahima, “Pueꞌ Ala to ina mopaꞌara ánáꞌ dimbá iti,” haneꞌi rapaliliu polumaoraꞌ.

⁹Kahaweꞌraꞌ i katoroꞌá to napakanótó Pueꞌ Ala i Burahima, naꞌaró miꞌi Burahima hambuaꞌ paintuá popenómbá, naparampiꞌ kau i wongkona, hai ia motimpuku ánáꞌna, haneꞌi nawoli i wongko kau iti.

¹⁰Roo onoꞌ, ia moala ladiꞌna ina napoposambale ánáꞌna.

¹¹Agáiáná malaꞌekana PUEꞌ mekióꞌ hangko i langiꞌ, nauliꞌ, “Burahima, Burahima!” Mehániꞌ Burahima, “Deꞌentoaꞌ, Pueꞌ.”

¹²Nauliꞌ malaꞌekana PUEꞌ, “Ineeꞌ nupopoapa ánáꞌmu iti. Kuisá miꞌi deꞌe-deꞌe noumbá kamaróhóna pengkoruꞌmu i Kódóꞌ, láwiꞌ tiꞌara mpuꞌu nupekabohiꞌ ánáꞌmu to haduduána, nupeweꞌi i Kódóꞌ.”

¹³Roo onoꞌ, mehaileꞌ miꞌi Burahima hai moita hambaꞌa dimbá laki to tekaika tánduꞌna i wáláá. Naꞌala dimbá iti, nasambale, haneꞌi naintu napopenómbá i Pueꞌ Ala, onoꞌ miꞌi paháwángina ánáꞌna.[78]

¹⁴Onoꞌ miꞌi haneꞌi katoroꞌá iti nahangaꞌ Burahima, “PUEꞌ Mopaꞌara Apa to Paraluu.”[79] Mewaliꞌ haweꞌ deꞌe-deꞌe, paka rauliꞌ tauna, “I wongko buluꞌna PUEꞌ, Ia ina mopaꞌara apa to raparaluu.”[80]

¹⁵Hangkani mani malaꞌeka iti molaluita i Burahima hangko i langiꞌ,

¹⁶nauliꞌ, “Node laluitana PUEꞌ: ‘Kutotowi miꞌi i lalu hangaꞌKuꞌ haduduáNgkuꞌ. Ánti kanupeuláꞌina hawaꞌKuꞌ hai katiꞌárána nupekabohiꞌ ánáꞌmu to haduduána,

¹⁷ina Kuwátiꞌ mpuꞌukoꞌ bona maroꞌa katueꞌmu hai ina Kupahandaꞌ pemuleꞌámu nodo kahandaꞌna betue i langiꞌ hai nodo wungi i wiwi tahiꞌ.[81] Pemuleꞌámu iti ina monangiheꞌ ewáliraꞌ hai mokatoroꞌiheꞌ kótáraꞌ.

¹⁸Hangko i pemuleꞌámu, upu-upu tauna i duniáꞌ ina molámbiꞌheꞌ pewátiꞌ.[82] Upu-upu iti ina Kubukeki, láwiꞌ nupeuláꞌi ntepuꞌu miꞌi hawaꞌKuꞌ.’ ”

¹⁹Roo onoꞌ, Burahima hai Isakiꞌ mesuleꞌmoheꞌ lao i hawiꞌraꞌ to rodua, haneꞌi mesuleꞌheꞌ hingkakani lao i wánuá Baraseba hai toroꞌheꞌ ionoꞌ.

²⁰Tangaꞌna Burahima i wánuá Baraseba, nahádi miꞌi bámbári kana i Nahori wutuꞌna hai Mika toinána. Moánáꞌmoheꞌ uwalu, paka tobaleilo, iamoheꞌ:

²¹to towutuꞌ Us, ádina Us, Bus, ádina Bus, Kemueli to mewaliꞌ umána Árá,

²²haneꞌi Keseꞌ, Haso, Pilida, Idala hai Betueli

²³to mewaliꞌ umána Ribeka.

²⁴Noꞌonoꞌ woꞌo, Nahori mokarodua hai hadua hawiꞌ to rahangaꞌ Reuma, hai moánáꞌheꞌ Teba, Gahama, Tahasi hai Maꞌaka.