Read Besoa Pewaliꞌána 23 Bible Online

Pewaliꞌána 23 - Besoa bible

Pewaliꞌána 23

¹Magáná miꞌi tinuwuꞌna Sáráꞌ hangatu rompuloꞌ hai pitu parena,

²hangko mate riꞌi i tampoꞌ Kánáꞌá i kótá Kiria-Aba to rauliꞌ woꞌo Hebero. Wiora ntepuꞌu laluna Burahima i kamatena toinána, hai moteriahi.

³Roo onoꞌ, napálehi miꞌi hampaiꞌ Sáráꞌ toinána to tangaꞌna rapowátá, haneꞌi lao i toHeti to toroꞌ i tampoꞌ iti,

⁴nauliꞌ, “Kódóꞌ deꞌe tohaweꞌ peaꞌ to toroꞌ i oloꞌmi. Maiaꞌ wongkódóꞌá membiáꞌ tampoꞌ ina kupopatawui toinángkuꞌ.”

⁵Mehániꞌheꞌ rauliꞌ,

⁶“Tuá, nupehádingi. Kiádáikoꞌ láwiꞌ io miꞌi hadua tadulako to makuasaꞌ i oloꞌkiꞌ. Mewaliꞌ góeꞌ lalungkiꞌ ane nupileꞌi popatawuá to maroꞌa ntepuꞌu bona peisá nupopatawui toinámu ionoꞌ. Tiꞌara ara tauna to tiꞌara mampokana toinámu ratawu i popatawuána.”

⁷Roo onoꞌ, motóngkóꞌ miꞌi Burahima i lindoꞌraꞌ toHeti, pueꞌ tampoꞌ,

⁸haneꞌi nauliꞌ, “Ane nipokana pembiáꞌkuꞌ, toinángkuꞌ ina kutawu ieneꞌ. Kupembiáꞌ tulungi bona nipembiáꞌáꞌaꞌ i Epero ánáꞌna Soha,

⁹bona napobaluꞌáꞌaꞌ hambuaꞌ balamba watu i Mapela to ara i wiwi hinoena. Hólóna tampoꞌ iti ina kubaiari bukeꞌ-bukeꞌ i lindoꞌmi bona mewaliꞌ tampoꞌkuꞌ to ina kipopatawui.”

¹⁰Hangko ionoꞌ, Epero, to tangaꞌna mehoda i oloꞌraꞌ toHeti hungkuꞌ i babaꞌá bente kótá, mohániki Burahima i lindoꞌraꞌ tauna iti, nauliꞌ,

¹¹“Tuá, tiꞌara paraluu nuhóló tampoꞌ iti, láwiꞌ hinoengkuꞌ hai balamba to ara ionoꞌ kuhuhuꞌ i hio bona nupotawui toinámu. Halalungkuꞌheꞌ deꞌe to mewaliꞌ sabiꞌkuꞌ.”

¹²Mewaliꞌ Burahima motóngkóꞌ wopiꞌi i lindoꞌraꞌ toHeti,

¹³haneꞌi nauliꞌ i Epero bona rahádi upu-upu, “Kupembiáꞌ bona nipehádingi laluitangkuꞌ deꞌe. Ina kubaiari hólóna hinoemu. Kupembiáꞌ hangaa-ngaa nutarima dóiꞌ hólóna tampoꞌ iti, bona toinángkuꞌ peisá kutawu ionoꞌ.”

¹⁴Mehániꞌ Epero,

¹⁵“Tuá, nupehádingi. Halimboꞌ tampoꞌ iti hólóna iba peá átuna dóiꞌ peráꞌ. Agáiáná tapoapa paꞌi dóiꞌ iti i kitaꞌ rodua. Nutawu miꞌi ionoꞌ toinámu.”

¹⁶Burahima mampokana hólóna iti. Naimbaꞌ miꞌi kahandaꞌna dóiꞌ hintotoꞌ hai panguliꞌna Epero, ia miꞌi iba átuna dóiꞌ peráꞌ. Dóiꞌ iti ratimbá i timbánga to rapakeꞌ topobaluꞌ-baluꞌ, haneꞌi nabaiari i Epero i lindoꞌraꞌ upu-upu toHeti to ara ionoꞌ.

¹⁷Mewaliꞌ tampoꞌna Epero i Mapela, to tándáꞌ i mata alo i Mamere, mewaliꞌ miꞌi gáláꞌna Burahima. Tampoꞌ iti tepasuaꞌ hinoena, balamba, hai upu-upu kau to ara ionoꞌ, raweꞌi Burahima.

¹⁸Upu-upu toHeti to moromu-romuheꞌ hungkuꞌ i babaꞌá bente kótá iti, mosabikiheꞌ kanahólóna Burahima tampoꞌ iti.

¹⁹Roo onoꞌ, natawu miꞌi Burahima Sáráꞌ toinána i tampoꞌ Kánáꞌá i lalu balamba Mapela hungkuꞌ i Mamere to rauliꞌ woꞌo Hebero.

²⁰Noꞌonoꞌ miꞌi daritakáná hinoe hai balamba Mapela. Rungu-runguna tampoꞌ iti tampoꞌraꞌ toHeti, agáiáná mewaliꞌ miꞌi gáláꞌna Burahima bona mewaliꞌ tampoꞌ popatawuáraꞌ.