Read Besoa Pewaliꞌána 24 Bible Online

Pewaliꞌána 24 - Besoa bible

Pewaliꞌána 24

¹Burahima matoama ntepuꞌu miꞌi, hai nawátiꞌ PUEꞌ i pákáꞌ-pákáꞌna.

²Hangkani tempó, Burahima molaluita i hawiꞌna to rapoinálái ntepuꞌu[83] to mokádipurá upu-upu párewána, nauliꞌ, “Nuwoli taemu i páꞌángkuꞌ,

³hai modándikoꞌ i lalu hangaꞌna PUEꞌ, pueꞌna langiꞌ hai tampoꞌ hai upu-upu óntóꞌna, bona ánáꞌkuꞌ Isakiꞌ ineeꞌ nupampeliꞌá to ina mewaliꞌ toinána i tampoꞌ Kánáꞌá deꞌe.

⁴Ngkáliꞌna riꞌi, hangaa-ngaa laokoꞌ i tampoꞌ kabubuána waheꞌkuꞌ, nupampeliꞌá hadua ánáꞌntawine hangko i oloꞌraꞌ halalungkuꞌ to ina mewaliꞌ toinána ánáꞌkuꞌ Isakiꞌ.”

⁵Mekuneꞌ hawiꞌna, “Tuángkuꞌ, noumbá ane towawine iti tiꞌara mau meuláꞌ i kódóꞌ mai ieneꞌ? Ba kuánti peá ánáꞌmu lao i tampoꞌ kabubuána waheꞌmu?”

⁶Agáiáná nahániki Burahima, “Ineeꞌ nuánti ánáꞌkuꞌ lao ionoꞌ!

⁷PUEꞌ, pueꞌna langiꞌ, Ia miꞌi to moántiaꞌ mai hangko i támbina umángkuꞌ hai hangko i tampoꞌraꞌ halalungkuꞌ, hai modándi miꞌi i kódóꞌ node: ‘Ina Kupeweꞌi tampoꞌ deꞌe i pemuleꞌámuheꞌ.’ Mewaliꞌ, Ia woꞌo ina mohuoꞌ malaꞌekaNa mampoioruákoꞌ bona nulámbiꞌ hadua towawine ionoꞌ to hintotoꞌ napotoina ánáꞌkuꞌ.

⁸Agáiáná ane ánáꞌntawine iti tiꞌara mau meuláꞌ mai ieneꞌ, tekábáhámokoꞌ hangko i dándimu deꞌe i kódóꞌ. Kehapiꞌ noumbá miꞌi, ánáꞌkuꞌ tiꞌara kupaliu nuánti lao ionoꞌ.”

⁹Mewaliꞌ hawiꞌna mowoli taena i páꞌána Burahima, hai modándi ina mampeuláꞌi apa to napehuoꞌá pueꞌna i hia.

¹⁰Roo onoꞌ, nakádipurá miꞌi hawiꞌ iti hampuloꞌ báꞌána untá hai párewána pueꞌna to masuliꞌ, haneꞌiheꞌ pohuꞌ lao i wánuána Nahori[84] to karaoꞌ i tampoꞌ Árá-Mesopotamia.

¹¹Bahanoumbá alona molumao, haweꞌ mpuꞌumoheꞌ i wánuána Nahori. Kahaweꞌraꞌ ionoꞌ, kalumbaꞌ miꞌi, tempóraꞌ towawine lao mantámbuꞌ i tibubuꞌ. I tempó iti, napopengkaroo miꞌi untána i rawa kótá hungkuꞌ i tibubuꞌ.

¹²Roo onoꞌ, mekakae miꞌi hawiꞌ iti, nauliꞌ, “PUEꞌ to napenómbái pueꞌkuꞌ Burahima, Nutulungiaꞌ wongkódóꞌá bona alo deꞌe kulámbiꞌ tunggáiángkuꞌ. Kupembiáꞌ bona Nupatongawaꞌ ahiꞌMu i pueꞌkuꞌ Burahima.

¹³Nuitaꞌaꞌ meángkáꞌ i hintáiꞌ tibubuꞌ deꞌe, hai ánáꞌntawine hangko i wánuá ina maiheꞌ mantámbuꞌ i tibubuꞌ deꞌe.

¹⁴Mewaliꞌ, ane haweꞌ hadua ánáꞌntawine, ina kuꞌuliꞌ, ‘Nutulungiaꞌ. Nukándó mai uwai to i gumbaꞌmu bona mainuaꞌ.’ Ane nahánikiaꞌ node: ‘Mainukoꞌ, hai upu-upu untámu ina kupopainu woꞌo,’ ina kuisá kaꞌiana to Nupileꞌi bona napotoina Isakiꞌ huoꞌáMu, hai ina kuisá woꞌo kamaꞌahiꞌMu i pueꞌkuꞌ Burahima.”

¹⁵Tangaꞌna mani mekakae, haweꞌ miꞌi hadua ánáꞌntawine to malásáꞌ ntepuꞌu to tiꞌara mani moisá tobaleilo. Hangaꞌna Ribeka. Ribeka iti ueꞌna Burahima, ánáꞌna Betueli, hai tosaena Betueli iamoheꞌ Mika hai Nahori wutuꞌna Burahima. I tempó iti, Ribeka mopáháꞌá gumbaꞌ uwai lao i tibubuꞌ iti. Kahaweꞌna ionoꞌ, ia moꞌóntóki miꞌi gumbaꞌna haneꞌi ina mesuleꞌ miꞌi.

¹⁶

¹⁷Nagagu miꞌi hawiꞌna Burahima lao mohungkuki ánáꞌntawine iti, nauliꞌ, “Ánáꞌntawine, membiáꞌaꞌ tulungi. Nupoweꞌiaꞌ uwai to i gumbaꞌmu, ina kuinu hantódiꞌ.”

¹⁸Mehániꞌ Ribeka, “Tuá, mainukeꞌ.” Kásáliu napopendáulu gumbaꞌna hangko i wángána haneꞌi mepopainu.

¹⁹Roo miꞌi mepopainu, nauliꞌ ánáꞌntawine iti, “Tuá, ina kupopainuheꞌ woꞌo deꞌe untámu duuꞌna raporái.”

²⁰Hangko ionoꞌ, hawiáꞌ miꞌi nakándó uwai napopoꞌóntóki dulá, mampopainuheꞌ untá. Roo onoꞌ, melangka wopiꞌi lao i tibubuꞌ moꞌóntóki gumbaꞌna, hai mampopainuheꞌ untá iti duuꞌna raporái upu-upu.

²¹Hawiꞌna Burahima mopailalu apa to nabábehi ánáꞌntawine iti, láwiꞌ napoinao naisá ane PUEꞌ ina mobukeki tunggáiána.

²²Roomoheꞌ mainu upu-upu untána, hawiꞌna Burahima moala dali hai kálá to matimi hai masuliꞌ hólóna. Dali buláwá napatakaꞌ i hilóna Ribeka, hai rombuaꞌ kálá buláwá napusaꞌ i taena,[85]

²³haneꞌi nauliꞌ, “Heáná umámu? Ba peisáꞌangkaiꞌ hambengi i támbina umámu?”

²⁴Mehániꞌ Ribeka, “Umángkuꞌ Betueli, ánáꞌraꞌ Nahori hai Mika.

²⁵Tuá, i támbingkiꞌ aranto kahambengiá, hai ara woꞌo pandeꞌ binataꞌ.”

²⁶Roo onoꞌ, hawiꞌ iti molingkudu motóngkóꞌ haweꞌ i tampoꞌ menómbá i PUEꞌ, nauliꞌ,

²⁷“KutóiáKoꞌ PUEꞌ to napenómbái pueꞌkuꞌ Burahima. Tongawaꞌ miꞌi kamaꞌahiꞌMu to Nupatongawaꞌ oaꞌ i pueꞌkuꞌ! Io to moteteꞌaꞌ haneꞌiaꞌ haweꞌ i halaluna pueꞌkuꞌ to toroꞌ ieneꞌ.”

²⁸Hangko ionoꞌ, melangka miꞌi Ribeka lao i támbina inána, hai napolaluita apa to mewaliꞌ.

²⁹Wutuꞌna Ribeka, hangaꞌna Lábá. Kanahádina Lábá laluitana ádina hai kanaitána ara woꞌo dali hai kálá buláwá i taena, kásáliu mesuwuꞌ hangko i támbiraꞌ mogagu mampohidupaꞌá hawiꞌna Burahima to meángkáꞌ mani i hintáiꞌraꞌ untána hungkuꞌ i tibubuꞌ.

³⁰

³¹Nauliꞌ Lábá, “Tuá to nawátiꞌ PUEꞌ! Ineeꞌkeꞌ ieneꞌ i rawa. Maikeꞌ, laokeꞌ i támbi. Kipatimama miꞌi lintuꞌ to peisá takatoroꞌi, hai kipatimama miꞌi woꞌo katoroꞌáraꞌ untántaꞌ.”

³²Mewaliꞌ, meuláꞌ miꞌi hawiꞌna Burahima i Lábá. Kahaweꞌraꞌ i támbina, natáurá miꞌi Lábá inántiraꞌ untá, haneꞌi moala rumpuꞌ napopopaꞌandeꞌáheꞌ untá iti. Roo onoꞌ, naꞌala miꞌi uwai napopobahoꞌi bitina hawiꞌ iti hai taunánaheꞌ.

³³Hangko ionoꞌ, rahuhuꞌáheꞌ pandeꞌraꞌ, agáiáná hawiꞌna Burahima molaluita, nauliꞌ, “Tiꞌara maniaꞌ ina mandeꞌ ane tiꞌara mani kupohaweꞌ tunggáiángkuꞌ mai ieneꞌ.” Nauliꞌ Lábá, “Maroꞌa ane tapolaluita miꞌi deꞌe-deꞌe.”

³⁴Mewaliꞌ, natepuꞌu miꞌi hawiꞌ iti molaluita, nauliꞌ, “Kódóꞌ miꞌi deꞌe hawiꞌna Burahima.

³⁵PUEꞌ Ala mowátiꞌ ntepuꞌu miꞌi pueꞌkuꞌ Burahima haneꞌi mewaliꞌ topebuku. Naweꞌi PUEꞌ handaꞌ dimbána, bekeꞌ, gapiꞌ, untá, hai kalide. Handaꞌ woꞌo peráꞌ, buláwá hai hawiꞌnaheꞌ tobaleilo hai towawine.

³⁶I kamatoinána miꞌi, Sáráꞌ toinána moánáꞌ hadua ánángkóiꞌ tobaleilo. Upu-upu párewána pueꞌkuꞌ napososora ánáꞌna iti.

³⁷Hai nahuoꞌaꞌ modándi bona kupeuláꞌi hawaꞌna, nauliꞌ, ‘Ineeꞌkoꞌ mopileꞌi to ina mewaliꞌ toinána ánáꞌkuꞌ hangko i oloꞌraꞌ ánáꞌntawine toKánáꞌá, i tampoꞌ to kukatoroꞌi deꞌe.

³⁸Ngkáliꞌna riꞌi hangaa-ngaa laokoꞌ i támbina umángkuꞌ hai halalungkuꞌheꞌ, hai nuala hadua ánáꞌntawine to ina napotoina ánáꞌkuꞌ.’

³⁹Haneꞌi kupekuneꞌ i hia, ‘Noumbá ane tiꞌarai mau towawine iti meuláꞌ i kódóꞌ?’

⁴⁰Nahániki, ‘PUEꞌ to kupengkoruꞌi ina mohuoꞌ malaꞌekaNa mamporángákoꞌ bona nulámbiꞌ tunggáiámu. Ina molámbiꞌkoꞌ to ina mewaliꞌ toinána ánáꞌkuꞌ hangko i oloꞌraꞌ halalungkuꞌ, ia miꞌi pemuleꞌána umángkuꞌ.

⁴¹Ane haweꞌmokoꞌ ionoꞌ, hai tiꞌaraheꞌ mau mampeweꞌi ánáꞌraꞌ, tekábáhámokoꞌ hangko i dándimu iti.’

⁴²Kahaweꞌkuꞌ i tibubuꞌ ininá, mekakaeaꞌ i lalungkuꞌ, kuꞌuliꞌ, ‘Ó PUEꞌ to napenómbái pueꞌkuꞌ Burahima, kupembiáꞌ i Hio bona Nupopewaliꞌ apa tunggáiána polumaongkuꞌ mai ieneꞌ.

⁴³Meángkáꞌaꞌ i hintáiꞌ tibubuꞌ deꞌe. Ane haweꞌ hadua ánáꞌntawine to mai mantámbuꞌ, ina kupembiáꞌ i hia bona naweꞌiaꞌ uwai kuinu.

⁴⁴PUEꞌ, ane rápáꞌna naweꞌiaꞌ uwai kuinu, hai napopainu woꞌo untángkuꞌ, ina kuisá kaꞌiana to Nupileꞌi to ina mewaliꞌ toinána ánáꞌna pueꞌkuꞌ Burahima.’

⁴⁵Tiꞌara mani hópóꞌ pekakaengkuꞌ, haweꞌ miꞌi Ribeka mopáháꞌá gumbaꞌna, hai mantámbuꞌ uwai i tibubuꞌ iti. Hangko ionoꞌ, kuꞌuliꞌ i hia, ‘Membiáꞌaꞌ tulungi, nupoweꞌiaꞌ uwai ina kuinu.’

⁴⁶Kásáliu napopendáulu gumbaꞌna hangko i wángána, nauliꞌ, ‘Tuá, mainukeꞌ, hai untántaꞌ ina kupopainuheꞌ woꞌo.’ Roo onoꞌ, mainuaꞌ, hai upu-upu untángkuꞌ napopainuheꞌ woꞌo.

⁴⁷Onoꞌ miꞌi haneꞌi kupekuneꞌ, ‘Heáná umámu?’ Nahániki, ‘Umángkuꞌ Betueli, ánáꞌraꞌ Nahori hai Mika.’ Hangko ionoꞌ, kupatakaꞌ dali buláwá i hilóna hai kupusaꞌ kálá buláwá i taena.

⁴⁸Roo onoꞌ, molingkuduaꞌ motóngkóꞌ i tampoꞌ menómbá hai motóiá PUEꞌ to napenómbái pueꞌkuꞌ Burahima, láwiꞌ Ia miꞌi to moteteꞌaꞌ haneꞌi kubuku haweꞌ ieneꞌ i halalunaheꞌ pueꞌkuꞌ. Hai Ia to motulungiaꞌ mampohidupaꞌá ánáꞌntawine deꞌe, ánáꞌna halaluna pueꞌkuꞌ, bona napotoina ánáꞌna pueꞌkuꞌ.

⁴⁹Mewaliꞌ deꞌe-deꞌe, ane maꞌahiꞌkou hai bulá lalumi i pueꞌkuꞌ iti, nipahaweꞌáꞌaꞌ noumbá polámbiꞌmi bona kuisá apa to hangaa-ngaa kubábehi.”

⁵⁰Mehániꞌheꞌ Lábá hai Betueli, “To mewaliꞌ deꞌe, PUEꞌ miꞌi to mopakanótó upu-upuna. Mewaliꞌ tiꞌara piꞌi ara to peisá kiuliꞌ.

⁵¹Deꞌe miꞌi Ribeka. Niánti miꞌi bona ia mewaliꞌ toinána ánáꞌna pueꞌmu hintotoꞌ hai apa to natudeꞌákoꞌ PUEꞌ.”

⁵²Kanahádina hawiꞌna Burahima laluitaraꞌ, ia molingkudu motóngkóꞌ haweꞌ i tampoꞌ menómbá i PUEꞌ.

⁵³Roo onoꞌ, hawiꞌna Burahima moala párewá to rabábehi hangko i buláwá hai peráꞌ, hai waruꞌ to masuliꞌ. Upu-upuna iti napeweꞌi i Ribeka, noꞌonoꞌ woꞌo i wutuꞌna hai i hinána.

⁵⁴Roo onoꞌ, hawiꞌna Burahima hai taunánaheꞌ, mandeꞌmoheꞌ hai mainu, haneꞌi hambengiheꞌ ionoꞌ. Mearómoheꞌ mepulo, nauliꞌ hawiꞌna Burahima, “Mepálákánámoꞌ. Ina mesuleꞌmongkaiꞌ i pueꞌkuꞌ.”

⁵⁵Agáiáná wutuꞌna hai inána Ribeka manguliꞌ, “Nupatodáhi sieruꞌ Ribeka i kaiꞌ hubaꞌ haminggu ba hampuloꞌ alona, hangko peisá riꞌi lao.”

⁵⁶Agáiáná hawiꞌ iti manguliꞌ, “Ineeꞌmoꞌ nitaha, láwiꞌ natulungiaꞌ PUEꞌ duuꞌna mewaliꞌ tunggáiána pueꞌkuꞌ. Nipaliumoꞌ mesuleꞌ i hia.”

⁵⁷Mehániꞌheꞌ, “Takióꞌ sieruꞌ mai Ribeka bona taisá noumbá pekirina.”

⁵⁸Rakióꞌ mpuꞌu miꞌi Ribeka haneꞌi rakuneꞌ, “Ba nuꞌundeꞌ miꞌi meuláꞌ i tauna deꞌe?” Mehániꞌ Ribeka, “Ió, kuꞌundeꞌ miꞌi.”

⁵⁹Mewaliꞌ Ribeka hai hadua to mopaꞌala hangko kókóiꞌ,[86] rapaliumoheꞌ pohuꞌ hingkakani hai hawiꞌna Burahima hai taunánaheꞌ.

⁶⁰Roo onoꞌ, Ribeka rawátiꞌ, rauliꞌ: “Ribeka, tapembiáꞌ Pueꞌ Ala mowátiꞌkoꞌ bona mewaliꞌkoꞌ ináraꞌ i sábuna tauna hai pemuleꞌámu monangiheꞌ upu-upu ewáliraꞌ.”

⁶¹Roo ionoꞌ, mangkádipurámoheꞌ Ribeka hai bahangapa hawiꞌna towawine, haneꞌi mesaweꞌheꞌ i untá, pohuꞌmoheꞌ meuláꞌ i hawiꞌna Burahima.

⁶²Tempó iti, Isakiꞌ toroꞌ i tampoꞌ Negeꞌ. Ia mesuleꞌ miꞌi hangko i tibubuꞌ to rauliꞌ “Lahai-Roi.”[87]

⁶³Kalumbaꞌ miꞌi, ia mesuwuꞌ hangko i bambaruꞌna ina lao molulumao i pádá. Naita araheꞌ untá to haweꞌ.

⁶⁴I kanaitána Ribeka iti Isakiꞌ, mendáulu miꞌi hangko i untána,

⁶⁵haneꞌi napekuneꞌ i hawiꞌna Burahima, nauliꞌ, “Heáná tobaleilo iti to maikeꞌ modupaꞌ?” Mehániꞌ hawiꞌ iti, “Ia miꞌi pueꞌkuꞌ Isakiꞌ.” Kanahádina noꞌonoꞌ, Ribeka moala miꞌi bóbóna napopotuko lindoꞌna.[88]

⁶⁶Hangko ionoꞌ, hawiꞌ iti mopahaweꞌ miꞌi i Isakiꞌ upu-upu to nabábehi i polumaoraꞌ.

⁶⁷Hai Isakiꞌ moánti Ribeka mesuaꞌ i bambaruꞌna Sáráꞌ inána, hai napohambokoá. Isakiꞌ moundeꞌ ntepuꞌu Ribeka. Mewaliꞌ lindó miꞌi laluna Isakiꞌ i kamatena inána.