Read Besoa Pewaliꞌána 25 Bible Online

Pewaliꞌána 25 - Besoa bible

Pewaliꞌána 25

¹Burahima mampotoina wopiꞌi hadua towawine to rahangaꞌ Ketura.

²Ánáꞌna Burahima to napoánáka toinána iti iamoheꞌ: Simara, Iokasa, Meda, Midia, Isibaꞌ hai Sua.

³Iokasa momuleáka Seba hai Deda, hai pemuleꞌána Deda ia miꞌi toAsu, toLetusi hai toLeuma.

⁴Midia momuleáka: Epa, Epe, Henoꞌ, Abida hai Eleda. Upu-upu tauna iti tepasuaꞌ pemuleꞌánaheꞌ Ketura.

⁵Upu-upu párewána Burahima napososora Isakiꞌ,

⁶agáiáná i tempóna mani tueꞌ, nagáláꞌ-gáláꞌámoheꞌ woꞌo ánáꞌna hangko i rodua towawinenaheꞌ to nakarodua, ia miꞌi Hagari hai Ketura, hai nahuoꞌheꞌ melimbá lao i tampoꞌ ntániꞌna to tándáꞌ i mata alo bona karaoꞌheꞌ hangko i Isakiꞌ.

⁷Matinuwuꞌ ntepuꞌu Burahima, magáná miꞌi hangatu pitu puloꞌna hai lima parena, hangko mate riꞌi.

⁹Isakiꞌ hai Sumaila motawuheꞌ wátána umáraꞌ i lalu balamba Mapela i hambuaꞌ hinoe tándáꞌ i mata alo i Mamere. Hangkoia hinoe iti tampoꞌna Epero ánáꞌna Soha toHeti,

¹⁰agáiáná tampoꞌ iti nahóló miꞌi Burahima. Ionoꞌ miꞌi woꞌo Sáráꞌ toinána Burahima ratawu.[89]

¹¹Mate miꞌi Burahima, Pueꞌ Ala mowátiꞌ Isakiꞌ ánáꞌna. I tempó iti, Isakiꞌ toroꞌ hungkuꞌ i tibubuꞌ Lahai-Roi.

¹²Deꞌe miꞌi daritakáná pemuleꞌánaheꞌ Sumaila. Sumaila iti ia miꞌi ánáꞌna Burahima hangko i Hagari toMásiriꞌ, hawiꞌna Sáráꞌ.

¹³Ia momuleáka hampuloꞌ hai rodua ánángkóiꞌ tobaleilo. Deꞌe miꞌi hangaꞌraꞌ mouláꞌ pombeusuána karapoánákaraꞌ: Nebaioꞌ, Keda, Adebele, Mibesa,

¹⁴Misama, Duma, Masa,

¹⁵Hadaꞌ, Tema, Etu, Napisi haneꞌi Kedema.

¹⁶Ánáꞌnaheꞌ Sumaila deꞌe mewaliꞌheꞌ tadulakoraꞌ hampuloꞌ hai rontina. Hangaꞌna wánuáraꞌ mouláꞌ woꞌo hangaꞌraꞌ hadua-hadua.

¹⁷Magáná miꞌi tinuwuꞌna Sumaila hangatu tálu puloꞌna hai pitu parena, hangko mate riꞌi.

¹⁸Pemuleꞌána iti,[90] toroꞌheꞌ i tampoꞌ i hiliꞌna Hawila hai Suruꞌ tándáꞌ i mata alo tampoꞌ Másiriꞌ to mombetoto hai tampoꞌ Asu. Hira megáákiheꞌ hangko i pemuleꞌána Burahima to ntániꞌna.[91]

¹⁹Deꞌe miꞌi daritakáná Isakiꞌ ánáꞌna Burahima.

²⁰Magáná miꞌi tinuwuꞌna Isakiꞌ iba puloꞌna parena, hambokomoheꞌ hai Ribeka, ádina Lábá ánáꞌna Betueli. Betueli iti, hadua toÁrá to toroꞌ i tampoꞌ Pádá-Árá.

²¹Bahangapa miꞌi kamaruena hangko ionoꞌ, Ribeka tiꞌara mani moánáꞌ, onoꞌ miꞌi haneꞌi napekakaeá Isakiꞌ, hai pekakaena iti napehádingi PUEꞌ, haneꞌi káláꞌeá miꞌi Ribeka.

²²To nakákáláꞌeánga iti, moropaꞌheꞌ. Hangko tiꞌara maniheꞌ mesupaꞌ, momberusuꞌ-rusuꞌmoheꞌ i lalu taꞌina ináraꞌ. Nauliꞌ Ribeka, “Moapa riꞌi haneꞌi node riꞌe wátángkuꞌ?” Onoꞌ miꞌi haneꞌi napembiáꞌ paturoꞌ i PUEꞌ.

²³Nauliꞌ PUEꞌ i hia: “To nukákáláꞌeánga iti ina mampopewaliꞌheꞌ rombuaꞌ kadatuá, hai ina moewaliheꞌ. Maróhó mani ádina haneꞌi wutuꞌna, hai towutuꞌ ina mengkoruꞌ i toadi.”[92]

²⁴Haweꞌ miꞌi tempóna Ribeka moánáꞌ, mesupaꞌ miꞌi rodua tobaleilo.

²⁵Towutuꞌ lenggeꞌna mangkakalei, hai mowulu wátána, onoꞌ miꞌi haneꞌi rahangaꞌ Esau, lempóna: “mowulu”.

²⁶I karapoánákana, ánáꞌna to adi tangaꞌna motibaaꞌ padóꞌna Esau, onoꞌ miꞌi haneꞌi rahangaꞌ Iako, lempóna: “motibaaꞌ padóꞌna”.[93] I karapoánákaraꞌ toporopaꞌ iti, tinuwuꞌna Isakiꞌ ini miꞌi puloꞌna parena.

²⁷Kamarue-rueá kamahile-hileáheꞌ ánángkóiꞌ to rodua iti. Esau mapánde moahu, hai naundeꞌ peá toroꞌ i pádá, agáiáná Iako tinda pampekirina hai naundeꞌ peá roo-roo i bambaruꞌ.

²⁸Isakiꞌ mampomahile ntepuꞌu Esau láwiꞌ naundeꞌ mandeꞌ rasiꞌna moahu, agáiáná Ribeka mampomahile ntepuꞌu Iako.

²⁹Hangkani tempó, tangaꞌna Iako moundá tambue to malei, haweꞌ miꞌi Esau hangko i poahuána, hai rumihi kamarimina.

³⁰Nauliꞌ Esau i Iako, “Marimi mpiiꞌaꞌ noeneꞌ! Nuweꞌiaꞌ wongkódóꞌá hantóiꞌ tambue to malei to nuꞌundá iti.” Onoꞌ miꞌi haneꞌi ia rauliꞌ woꞌo Edom, lempóna: “malei”.

³¹Mehániꞌ Iako, “Peisánto kuweꞌikoꞌ, agáiáná hangaa-ngaa nulimbá sieruꞌ katowutuꞌmu i kódóꞌ.”

³²Nauliꞌ Esau, “Apa paꞌi pobunduꞌána katowutuꞌkuꞌ haneꞌiaꞌ mate holo.”

³³Nauliꞌ wopiꞌi Iako, “Modándimokoꞌ sieruꞌ kanuweꞌingkuꞌ miꞌi katowutuꞌmu.” Mewaliꞌ modándi mpuꞌu miꞌi Esau, hai napeweꞌi miꞌi katowutuꞌna i Iako.

³⁴Roo onoꞌ, hangko naweꞌi riꞌi Iako rótiꞌ hai haloꞌ tambue to malei iti. Mandeꞌ miꞌi Esau hai mainu haneꞌi pohuꞌ. Moliu bábehiána iti, tongawaꞌ miꞌi katiꞌárána mobiláꞌ katowutuꞌna.[94]