Read Besoa Pewaliꞌána 26 Bible Online

Pewaliꞌána 26 - Besoa bible

Pewaliꞌána 26

¹Haweꞌ wopiꞌi tempó rimi i tampoꞌ iti, nodo to mewaliꞌ miꞌi i tempóna mani Burahima tueꞌ. Ánti kamarimi iti, Isakiꞌ lao i Abimeleꞌ,[95] daturaꞌ toPelisitiꞌ i kótá Gera.

²Ia toroꞌ ionoꞌ láwiꞌ PUEꞌ mampatongawaꞌ i hia, Nauliꞌ, “Ineeꞌkoꞌ lao i tampoꞌ Másiriꞌ. Toroꞌmokoꞌ i tampoꞌ deꞌe mouláꞌ hawaꞌKuꞌ i hio.

³Ina Kuporángákoꞌ hai ina Kuwátiꞌkoꞌ, láwiꞌ humalele tampoꞌ deꞌe ina Kupeweꞌi i hio hai i pemuleꞌámuheꞌ mouláꞌ pototowiNgkuꞌ to Kupahaweꞌ miꞌi i umámu Burahima.

⁴Ina Kupahandaꞌ pemuleꞌámu nodo kahandaꞌna betue i langiꞌ, hai humalele tampoꞌ deꞌe ina Kuweꞌiheꞌ. Ánti kahirana, upu-upu tauna i duniáꞌ ina molámbiꞌheꞌ pewátiꞌ.

⁵Ina Kubábehi upu-upuna iti, láwiꞌ Burahima mampehádingi apa to Kuhángáꞌá, hai mampeuláꞌi miꞌi upu-upu hawaꞌKuꞌ.”

⁶Mewaliꞌ Isakiꞌ toroꞌ i tampoꞌ Gera.

⁷Tempóraꞌ tobaleilo to ara ionoꞌ mekuneꞌ kana i Ribeka toinána, mehániꞌ Isakiꞌ, nauliꞌ, “Ia ádingkuꞌ.” Nauliꞌ noꞌonoꞌ, láwiꞌ malááꞌ ina rapapate tauna to ionoꞌ to mampoinao moala toinána ánti kamalásáꞌna.

⁸Maruemoheꞌ toroꞌ ionoꞌ. Hangkani tempó, tingkáráꞌ Datu Abimeleꞌ moita hangko i sungkekeꞌna, Isakiꞌ hai Ribeka tangaꞌraꞌ mombepokagóeꞌ.

⁹Onoꞌ miꞌi haneꞌi datu iti mokióꞌ Isakiꞌ, nauliꞌ, “Tiꞌara paꞌi towawine iti toinámu? Moapa riꞌi haneꞌi nuꞌuliꞌ ia ádimu?” Mehániꞌ Isakiꞌ, “Kuꞌuliꞌ noꞌonoꞌ láwiꞌ kupekiri, hangaa-ngaa ina rapapateaꞌ ane kuꞌuliꞌ toinángkuꞌ.”

¹⁰Nauliꞌ Abimeleꞌ, “Moapa riꞌi haneꞌi nubábehi noꞌonoꞌ i kaiꞌ? Masalaꞌmokoꞌ! Ane rápáꞌna ara taunángkuꞌ to mampoiluhi toinámu, io miꞌi to mopaꞌara kamasalaꞌkiꞌ!”

¹¹Hangko ionoꞌ, Datu Abimeleꞌ mompopaisá i taunánaheꞌ, nauliꞌ node: “Heáná peá to mosilakai tauna deꞌe ba toinána, hangaa-ngaa rahuku mate.”

¹²I pare iti, Isakiꞌ mantudaꞌ i tampoꞌ Gera iti. Mewaliꞌ ntepuꞌu wuaꞌna powiáꞌna, láwiꞌ nawátiꞌ PUEꞌ. Porasiꞌána hangatu kánina kahandaꞌna hangko i tinudaꞌna.

¹³Katetátámbáiá kapebukuna, duuꞌna mewaliꞌ pebuku ntepuꞌu.

¹⁴Handaꞌ ntepuꞌu hawiꞌna, dimbá hai gapiꞌna, onoꞌ miꞌi haneꞌi kóiꞌ inaoraꞌ toPelisitiꞌ i hia,

¹⁵haneꞌi upu-upu tibubuꞌna ratámbungi hai tampoꞌ. Tibubuꞌ iti to rakae hawiꞌna Burahima hangkoia.

¹⁶Hangko ionoꞌ, nauliꞌ Abimeleꞌ i Isakiꞌ, “Pohuꞌmokoꞌ hangko i tampoꞌkiꞌ deꞌe, láwiꞌ makuasaꞌmokoꞌ gaga.”

¹⁷Mewaliꞌ pohuꞌ mpuꞌu miꞌi Isakiꞌ melimbá lao i lembo Gera haneꞌi toroꞌ ionoꞌ.

¹⁸Upu-upu tibubuꞌ to rakae hawiꞌna Burahima hangkoia hai to ratámbungi toPelisitiꞌ, nakae huleꞌ Isakiꞌ. Hai tibubuꞌ iti nahangaꞌ hintotoꞌ hai hangaꞌ to napakanótó miꞌi umána hangkoia.[96]

¹⁹Tangaꞌraꞌ hawiꞌna Isakiꞌ mokae hambuaꞌ tibubuꞌ i lembo Gera, molámbiꞌheꞌ uwai to tumbuꞌ.

²⁰Agáiáná topoewuraꞌ toGera mombeheheꞌmoheꞌ hai topoewuna Isakiꞌ, rauliꞌ, “Uwai deꞌe kaiꞌ pueꞌna.” Onoꞌ miꞌi haneꞌi Isakiꞌ mohangaꞌ tibubuꞌ iti Eseꞌ, lempóna: “pombeheheꞌá”.

²¹Roo onoꞌ, hawiꞌna Isakiꞌ mokae wopiꞌi tibubuꞌ to hambuaꞌna, agáiáná i tibubuꞌ iti, aramoheꞌ woꞌo tauna to lao mombeheheꞌ hai hawiꞌna Isakiꞌ. Onoꞌ miꞌi haneꞌi Isakiꞌ mohangaꞌ tibubuꞌ iti Sitina, lempóna: “poewaliá”.

²²Hangko ionoꞌ, melimbá wopaheꞌ mokae tibubuꞌ to katáluna, hai tempó onoꞌ, tiꞌara piꞌi ara posisalaꞌ. Onoꞌ miꞌi haneꞌi nahangaꞌ Isakiꞌ tibubuꞌ iti Rehoboꞌ. Nauliꞌ, “Deꞌe-deꞌe PUEꞌ mampoweꞌimokeꞌ katoroꞌá haneꞌi ina maroꞌa katueꞌtaꞌ hai handaꞌ pemuleꞌántaꞌ.”

²³Hangko ionoꞌ, melimbá wopiꞌi Isakiꞌ lao i wánuá Baraseba.

²⁴I wengi iti, PUEꞌ mampatongawaꞌ i Isakiꞌ, Nauliꞌ, “Kódóꞌ miꞌi Pueꞌ Ala to napenómbái umámu Burahima. Ineeꞌkoꞌ malááꞌ, láwiꞌ ina Kuporángákoꞌ. Ina Kuwátiꞌkoꞌ hai ina Kuweꞌikoꞌ pemuleꞌámu to handaꞌ mouláꞌ dándiNgkuꞌ i umámu to mengkoruꞌ i Kódóꞌ.”

²⁵Mewaliꞌ Isakiꞌ moaró miꞌi hambuaꞌ paintuá popenómbá, hai menómbá i PUEꞌ. Ionoꞌ woꞌo ia moaró bambaruꞌna, hai hawiꞌna mokae wopaheꞌ hambuaꞌ tibubuꞌ.

²⁶Hangkani tempó, haweꞌ miꞌi Datu Abimeleꞌ hangko i kótá Gera mampombelámbiꞌá Isakiꞌ. To meuláꞌ i hia ia miꞌi Ahusaꞌ topepatentena, hai Pikoloꞌ tadulako surudadoꞌna.

²⁷Mekuneꞌ miꞌi Isakiꞌ, “Moapa riꞌi haneꞌi maiaꞌ nitunggái, mole hangkoia nipoewaliáꞌaꞌ hai niwuraꞌaꞌ hangko i tampoꞌmi.”

²⁸Mehániꞌ Datu Abimeleꞌ, nauliꞌ, “Kiꞌisánto io naporángákoꞌ PUEꞌ. Mewaliꞌ kipepekiri, maroꞌa ane mopaꞌarakeꞌ podándi. Modándimokoꞌ,

²⁹bona tiꞌarakoꞌ mobábehi to kadake i kaiꞌ, láwiꞌ tiꞌaraꞌangkaiꞌ woꞌo kadake i hio. Hai nuisá ntepuꞌu kamaroꞌana lalungkiꞌ i kómu. Hangkoia kipopeángkáꞌkou maroꞌa hangko i tampoꞌkiꞌ, tiꞌarakou kipopoapa. Hai tongawaꞌ miꞌi kanawátiꞌmi PUEꞌ.”

³⁰Roo onoꞌ, naposusaiheꞌ Isakiꞌ, napaꞌandeꞌheꞌ hai napopainuheꞌ.

³¹Kahalona mepulo-pulo, mopaꞌaraheꞌ podándi. Karooraꞌ modándi, Datu Abimeleꞌ hai rángána napopeángkáꞌheꞌ Isakiꞌ i kamaroꞌa-roꞌa.

³²Alo iti woꞌo, hawiꞌna Isakiꞌ laoheꞌ mampopaisáꞌá karalámbiꞌna miꞌi uwai i tibubuꞌ to hangko rakae,

³³haneꞌi tibubuꞌ iti nahangaꞌ Isakiꞌ Seba, lempóna: “podándi”. Hai mantepuꞌu hangko ionoꞌ, wánuá iti rahangaꞌ Baraseba, lempóna: “tibubuꞌ podándiá”.

³⁴Magáná miꞌi tinuwuꞌna Esau iba puloꞌna parena, mohamboko miꞌi hai rodua towawine toHeti. Hadua hangaꞌna Iudi ánáꞌna Beꞌeri, hai to haduána hangaꞌna Basama ánáꞌna Eloni.

³⁵Toinána to rodua iti mopamapári Isakiꞌ hai Ribeka.