Read Besoa Pewaliꞌána 29 Bible Online

Pewaliꞌána 29 - Besoa bible

Pewaliꞌána 29

¹Roo onoꞌ, napaliliu wopiꞌi Iako polumaona lao i tampoꞌ tándáꞌ i mata alo.[108]

²I kahaweꞌna ionoꞌ, naita miꞌi hambuaꞌ tibubuꞌ i pádá to ratuko hai watu to mahile. Ara woꞌo tálu tobuna dimbá to molukuꞌ hungkuꞌ i tibubuꞌ iti, láwiꞌ ionoꞌ miꞌi painuáraꞌ.

³Biásá ane haweꞌmoheꞌ upu-upu dimbá hangko rabungkáhi riꞌi topoewu watu petukona tibubuꞌ iti haneꞌi mampopainuheꞌ dimbáraꞌ. Roo onoꞌ, tibubuꞌ iti ratuko huleꞌ.

⁴Mekuneꞌ Iako i topoewu iti, nauliꞌ, “Halalungkuꞌ, hangko iumbákou mai?” Mehániꞌheꞌ, “Hangko i Hara.”

⁵Nakuneꞌ wopaheꞌ, “Ba niꞌisánto paꞌi Lábá ueꞌna Nahori?” Rauliꞌ, “Kiꞌisánto.”

⁶Napekuneꞌ wopiꞌi, “Maroꞌa-roꞌanto paꞌi?” Mehániꞌheꞌ, “Maroꞌa-roꞌanto. Peita, doꞌontoi maiꞌo ánáꞌna towawine moánti dimbána. Hangaꞌna Raheli.”

⁷Nauliꞌ wopiꞌi Iako, “Deꞌe-deꞌe mabaa mani. Tiꞌara mani tempóraꞌ dimbá rarámpu hai rapopesuaꞌ i gimpuraꞌ. Rángina miꞌi nipopainuheꞌ sieruꞌ, haneꞌi niewu wopaheꞌ i pádá.”

⁸Agáiáná mehániꞌheꞌ, “Tiꞌaraheꞌ sieruꞌ kipopainu dimbá ane tiꞌara mani hirámpu hantobu-hantobu. Ane hirámpumoheꞌ upu-upu, hangko kinduli riꞌi watu petuko tibubuꞌ hai kipopainuheꞌ.”

⁹Tangaꞌna mani Iako molaluita hai topoewu iti, haweꞌ miꞌi Raheli moánti dimbána umána láwiꞌ ia hadua topoewu towawine.

¹⁰I kanaitána miꞌi Iako kahaweꞌna Raheli moánti dimbána Lábá umána, lao miꞌi i tibubuꞌ monduli watu petukona hai napopainuheꞌ dimbána pinoumána iti.

¹¹Roo onoꞌ, ia mokápui hai moángki Raheli haneꞌi teriaꞌ napasimbuku ánti kagóeꞌna.

¹²Tempó onoꞌ woꞌo, nahángáꞌá, “Kódóꞌ deꞌe ánáꞌnaꞌaꞌ Ribeka, ádina umámu.” Onoꞌ miꞌi haneꞌi Raheli melangka mesuleꞌ lao i támbina, mampolaluitaꞌá umána.

¹³Kanahádina Lábá kahaweꞌna Iako pinoánáꞌna, ia hawiáꞌ lao mampohidupaꞌá. Liu-liu nakápui hai naꞌángki haneꞌi naꞌánti lao i támbina. Karoona Iako mampodarita mampopengaa to mewaliꞌ,

¹⁴nauliꞌ Lábá, “Toꞌu-toꞌu kitaꞌ deꞌe hawaheꞌ-waheꞌkeꞌ.” Hambulá miꞌi Iako toroꞌ i Lábá,

¹⁵nauliꞌ Lábá i hia, “Tiꞌara maroꞌa ane mobágóꞌkoꞌ mbero i kódóꞌ ánti kamohalaluntaꞌ. Nuꞌuliꞌ hangapa to hangaa-ngaa kuweꞌikoꞌ mewaliꞌ saromu.”

¹⁶Lábá ara ánáꞌna rodua ánáꞌntawine. Towutuꞌ rahangaꞌ Lea, hai toadi rahangaꞌ Raheli.

¹⁷Lea mababe mátána,[109] agáiáná Raheli malásáꞌ mpiiꞌ.

¹⁸Iako moundeꞌ ntepuꞌu Raheli, onoꞌ miꞌi haneꞌi nauliꞌ, “Umaꞌ, mauaꞌ mobágóꞌ i hio pitu parena bona ánáꞌmu Raheli kupotoina.”

¹⁹Nauliꞌ Lábá, “Maroꞌa mani kuweꞌikoꞌ haneꞌi i tauna ntániꞌna. Toroꞌmokoꞌ i kódóꞌ.”

²⁰Mewaliꞌ mobágóꞌ miꞌi Iako pitu parena, agáiáná pitu parena iti nahádi nodo peá bahangapa alona, láwiꞌ rumihi peundeꞌna i Raheli.

²¹Roo onoꞌ, molaluita miꞌi Iako i Lábá, nauliꞌ, “Nuweꞌimoꞌ to ina mewaliꞌ toinángkuꞌ, láwiꞌ hópóꞌ miꞌi tempóna pobágóꞌkuꞌ.”

²²Haneꞌi nakióꞌ Lábá upu-upu tauna to toroꞌ hungkuꞌ i hia bona mopaꞌara susa to mahile.

²³Agáiáná káindi iti, Lábá moala riꞌi Lea, haneꞌi naꞌántiá Iako bona napoiluhi,

²⁴hai Silipa hawiꞌna Lábá napeweꞌi woꞌo i Lea mewaliꞌ hawiꞌna.

²⁵Agáiáná mepulona, naita Iako Lea riꞌi, onoꞌ miꞌi haneꞌi nauliꞌ Iako i Lábá, “Moapa haneꞌi noꞌonoꞌ riꞌi bábehiámu i kódóꞌ? Tiꞌaraꞌaꞌ paꞌi mobágóꞌ bona nuweꞌiaꞌ Raheli? Moapa riꞌi haneꞌi nubagiuꞌaꞌ?”

²⁶Mehániꞌ Lábá, “Mouláꞌ ádángkiꞌ, tiꞌara hintotoꞌ ane ánáꞌkiꞌ to adi mampehindorungi potoámána wutuꞌna.

²⁷Tapagáná sieruꞌ pitu alona pohambokomi deꞌe, hangko kuweꞌirakoꞌ Raheli nupotoina, asalaꞌ mobágóꞌ wopakoꞌ pitu mani parena i kódóꞌ.”

²⁸Laluitana iti napokana Iako, hai hópóꞌ miꞌi pitu alona posusa petauna, Lábá mampeweꞌi miꞌi Raheli napotoina Iako.

²⁹Hai Biláꞌ hawiꞌna Lábá, napeweꞌi woꞌo i Raheli mewaliꞌ hawiꞌna.

³⁰Tempó iti, Iako mampotoina miꞌi Raheli, hai moundeꞌ mani Raheli haneꞌi Lea. Roo onoꞌ, ia mobágóꞌ wopiꞌi pitu parena i Lábá.

³¹PUEꞌ mampeita Lea tiꞌara gaga naundeꞌ toámána, onoꞌ miꞌi haneꞌi Ia mowátiꞌ iti Lea bona moánáꞌ, agáiáná Raheli lalo.

³²Mewaliꞌ Lea káláꞌeá hai moánáka hadua ánángkóiꞌ tobaleilo, nauliꞌ, “Naita miꞌi PUEꞌ kamapáringkuꞌ. Deꞌe-deꞌe ina naundeꞌaꞌ toámángkuꞌ.” Ánáꞌna iti nahangaꞌ Rube, lempóna: “peita, ánángkóiꞌ tobaleilo”.[110]

³³Káláꞌeá wopiꞌi Lea, hai moánáka hadua ánángkóiꞌ tobaleilo, nauliꞌ, “Toꞌu-toꞌu mpuꞌu PUEꞌ mampehádingiaꞌ, hai Naweꞌi wopaꞌaꞌ ánángkóiꞌ, láwiꞌ tiꞌaraꞌaꞌ naundeꞌ toámángkuꞌ.” Onoꞌ miꞌi haneꞌi nahangaꞌ ánángkóiꞌ iti Simeoꞌ. I lalu básá Iberani hungkuꞌ hibali hai “to mampehádingi.”

³⁴Káláꞌeá wopiꞌi Lea, hai moánáka hadua ánángkóiꞌ tobaleilo, nauliꞌ, “Deꞌe-deꞌe ina mentakaꞌ laluna toámángkuꞌ i kódóꞌ, láwiꞌ moánákamoꞌ tálu tobaleilo.” Onoꞌ miꞌi haneꞌi ánáꞌna iti nahangaꞌ Lewi.[111] I lalu básá Iberani, hibali hai “mentakaꞌ”.

³⁵Hangko ionoꞌ, káláꞌeá wopiꞌi Lea, hai moánáka hadua ánángkóiꞌ tobaleilo, nauliꞌ, “Deꞌe-deꞌe motóiáꞌaꞌ PUEꞌ.” Onoꞌ miꞌi haneꞌi ánáꞌna iti nahangaꞌ Iudá, lempóna: “motóiá”.[112] Roo onoꞌ, Lea tiꞌara piꞌi moánáꞌ.