Read Besoa Pewaliꞌána 3 Bible Online

Pewaliꞌána 3 - Besoa bible

Pewaliꞌána 3

¹Ara hambaꞌa lelótó to melumbuꞌ ákálána hangko i hinángkáꞌ binataꞌ to napopewaliꞌ PUEꞌ Ala. Lelótó iti mekuneꞌ i towawine, nauliꞌ, “Toꞌu mpuꞌu paꞌi tiꞌarakou napaliu Pueꞌ Ala mandeꞌ hinángkáꞌna wuaꞌngkau to ara i hinoe deꞌe?”

²Nahániki towawine iti, “Upu-upu wuaꞌngkau to ara i hinoe deꞌe peisá kiandeꞌ,

³agáiáná nauliꞌ Pueꞌ Ala, ‘Wuaꞌngkau to i tangaꞌ-tangaꞌ hinoe deꞌe tiꞌara peisá niandeꞌ, hai tiꞌara woꞌo peisá nikamaꞌ, láwiꞌ ane nikamaꞌ ba niandeꞌ, ina matekou.’ ”

⁴Mehániꞌ lelótó, “Tiꞌara toꞌu iti. Tiꞌarakou ina mate.

⁵Pueꞌ Ala manguliꞌ noꞌonoꞌ láwiꞌ Naisá, ane mandeꞌkou wuaꞌngkau iti, ina tebungkáhi pekirimi. Hai ane noꞌonoꞌi, kómu hangaa-ngaa ina hibali pekirimi hai Pueꞌ Ala, láwiꞌ ina niꞌisá apa to maroꞌa hai apa to kadake.”

⁶Kanaitána peá towawine wuaꞌngkau iti mababe hai matamaꞌ raꞌandeꞌ, nauliꞌ i laluna: maroꞌa ntepuꞌu ane upu-upuna peisá kuisá.[9] Hangko ionoꞌ, napupu miꞌi wuaꞌngkau iti haneꞌi naꞌandeꞌ, hai naweꞌi toámána to hingkakani hai ia bona naꞌandeꞌ woꞌo.

⁷Kásáliu tebungkáhi miꞌi pekiriraꞌ haneꞌi raisá miꞌi penggeláraꞌ. Onoꞌ haneꞌi moalamoheꞌ taweꞌngkau ara, rapatakaꞌ, rapopoháláꞌ wátáraꞌ.

⁸Kalumbaꞌna, rahádi miꞌi PUEꞌ Ala molulumao i lalu hinoe iti, haneꞌiheꞌ lao mentabuni i tangaꞌna kau bona tiꞌaraheꞌ Naita.

⁹Agáiáná PUEꞌ Ala mokióꞌ tauna iti, Nauliꞌ, “Iumbámokoꞌ?”

¹⁰Nahániki, “Deꞌentoaꞌ, Pueꞌ. KuhádiKoꞌ molulumao i lalu hinoe. Malááꞌaꞌ láwiꞌ tiꞌaraꞌaꞌ mewaruꞌ, onoꞌ miꞌi haneꞌi mentabuniaꞌ.”

¹¹Napekuneꞌ PUEꞌ Ala, “Heáná to mohángáꞌákoꞌ katiꞌárámu mewaruꞌ? Ineeꞌ mpuꞌu paꞌi nuandeꞌ miꞌi wuaꞌngkau to Kularaꞌámokou ineeꞌ niandeꞌ.”

¹²Nahániki, “Towawine to Nuweꞌiaꞌ mamporángáꞌaꞌ, ia miꞌi to mampoweꞌiaꞌ haneꞌi kuandeꞌ wuaꞌngkau iti.”

¹³Mewaliꞌ mekuneꞌ wopiꞌi PUEꞌ Ala i towawine iti, Nauliꞌ, “Apa riꞌi to nubábehi?” Mehániꞌ towawine, “Naꞌákálángiaꞌ lelótó, onoꞌ miꞌi haneꞌi kuandeꞌ wuaꞌngkau iti.”

¹⁴Roo onoꞌ, PUEꞌ Ala molaluita i lelótó iti, Nauliꞌ: “Ánti bábehiámu iti, io hangaa-ngaa molámbiꞌkoꞌ pehuku. Hangko i hinángkáꞌ binataꞌ, to manondoꞌ hai to maila, bateꞌna io to tehuku. Mantepuꞌu deꞌe-deꞌe duuꞌmu mate, io hangaa-ngaa mendólóꞌkoꞌ hai taꞌimu, hai awu tampoꞌ peá to ina mewaliꞌ pandeꞌmu.

¹⁵Ina Kupopoewalikoꞌ hai towawine iti. Pemuleꞌámu hai pemuleꞌána ina moewaliheꞌ. Pemuleꞌána ina mopangka wuáꞌmu,[10] hai ina nutilóꞌ padóꞌna.”

¹⁶Hangko ionoꞌ, nauliꞌ PUEꞌ Ala i towawine iti: “Ina Kutámbái kapárimu i tempómu káláꞌeá ba moánáꞌ. Agáiáná kehapiꞌ noꞌonoꞌ, bateꞌ-bateꞌna peá ina nuꞌundeꞌ toámámu, hai toámámu ina mokuasaꞌikoꞌ.”

¹⁷Nauliꞌ wopiꞌi PUEꞌ Ala i Adama, “Ánti kanupeuláꞌina laluitana towawinemu, haneꞌikoꞌ woꞌo mandeꞌ wuaꞌngkau to Kularaꞌmokoꞌ ineeꞌ nuandeꞌ, tampoꞌ deꞌe tehuku. Onoꞌ miꞌi haneꞌi mantepuꞌu deꞌe-deꞌe duuꞌmu mate, ina maꞌángkárá nuhádi mampeliꞌ pandeꞌmu.

¹⁸Mampopengaa pákáꞌna dui ina tueꞌ hangko i tampoꞌ, hai apa to tueꞌ i pádá ina mewaliꞌ pandeꞌmu.

¹⁹Hangaa-ngaa mobágóꞌkoꞌ matimi, bona nulámbiꞌ pandeꞌmu. Noꞌonoꞌ miꞌi katueꞌmu duuꞌmu mesuleꞌ huleꞌ i tampoꞌ, láwiꞌ hangko i tampoꞌkoꞌ Kuteru, hai ina mesuleꞌkoꞌ huleꞌ mewaliꞌ tampoꞌ.”

²⁰Hangko ionoꞌ, Adama mohangaꞌ toinána Hewá, lempóna “tueꞌ” ba “to mopatueꞌ”, láwiꞌ ia miꞌi to ina momuleáka upu-upu tauna to tueꞌ i duniáꞌ.

²¹Roo onoꞌ, PUEꞌ Ala mampobábehiáheꞌ waruꞌ hangko i koliꞌ binataꞌ[11] haneꞌi Nawaruꞌiáheꞌ.

²²Nauliꞌ PUEꞌ Ala, “Deꞌe-deꞌe tauna hibalimoheꞌ hai Kitaꞌ,[12] láwiꞌ raisá miꞌi apa to maroꞌa hai apa to kadake. Mewaliꞌ hangaa-ngaa Tapakaraoꞌheꞌ hangko i hinoe deꞌe bona tiꞌaraheꞌ woꞌo mandeꞌ hangko i Kau to Mopaꞌara Katueꞌ,[13] láwiꞌ ane mandeꞌheꞌ wuaꞌngkau iti, ina tueꞌheꞌ duuꞌna i rue-ruena.”

²³Onoꞌ miꞌi haneꞌi tohamboko iti Nawuraheꞌ PUEꞌ Ala hangko i hinoe Párádesiꞌ, hai Adama Nahuoꞌ lao mampobágóꞌ tampoꞌ, láwiꞌ hangko i tampoꞌ wátána Adama nateru Pueꞌ Ala.

²⁴Karooraꞌ Nawura, Nahuoꞌmoheꞌ bahangapa kerubi[14] lao mokámpái hinoe Párádesiꞌ tándáꞌ i mata alo. Nawoli woꞌo ionoꞌ hamata pihoꞌ to roreꞌ, to membara-mbara mokámpái babaꞌ pesuaꞌá. Nabábehi noꞌonoꞌ bona tiꞌara ara tauna to peisá mesuaꞌ i hinoe hai mohungkuki Kau to Mopaꞌara Katueꞌ iti.