Read Besoa Pewaliꞌána 30 Bible Online

Pewaliꞌána 30 - Besoa bible

Pewaliꞌána 30

¹Kanaitána Raheli ia tiꞌara mani moánáꞌ, mahiniꞌ miꞌi i wutuꞌna, haneꞌi nauliꞌ i Iako, “Nuweꞌiaꞌ woꞌo moánáꞌ. Ane tiꞌarai, rángingkuꞌ mate!”

²Mabukoꞌ ntepuꞌu Iako mohádi laluitana Raheli, haneꞌi nauliꞌ, “Nuꞌuliꞌ ripaꞌi kódóꞌ deꞌe Pueꞌ Ala? Ia to mopalalokoꞌ.”

³Nauliꞌ Raheli, “Deꞌe miꞌi Biláꞌ, hawiꞌkuꞌ. Nupoiluhi bona moánáꞌ. Ane moánáꞌi,[113] ara ánáꞌtaꞌ to ina kupoánáꞌ.”

⁴Mewaliꞌ Biláꞌ napeweꞌi miꞌi i toámána, haneꞌiheꞌ moiluhi.

⁵Tiꞌara marue hangko ionoꞌ, káláꞌeá miꞌi Biláꞌ, haneꞌi moánáka hadua ánángkóiꞌ tobaleilo.

⁶Nauliꞌ Raheli, “Pueꞌ Ala mopakanótó miꞌi katiꞌárángkuꞌ masalaꞌ. Napehádingi miꞌi pembiáꞌkuꞌ, hai Naweꞌimoꞌ hadua ánángkóiꞌ tobaleilo.” Onoꞌ miꞌi haneꞌi ánángkóiꞌ iti nahangaꞌ Daa, lempóna: “mopakanótó katiꞌárángkuꞌ masalaꞌ”.

⁷Roo onoꞌ, Biláꞌ káláꞌeá wopiꞌi, hai moánáka hadua ánángkóiꞌ tobaleilo.

⁸Nauliꞌ Raheli, “Kupári-pári momberii hai wutuꞌkuꞌ haneꞌiaꞌ menangi!” Onoꞌ miꞌi haneꞌi ánángkóiꞌ iti nahangaꞌ Natali, lempóna: “momberii”.

⁹Lea mampekiri tiꞌara piꞌi ina moánáꞌ, onoꞌ haneꞌi napeweꞌi miꞌi Silipa hawiꞌna, napoiluhi Iako.

¹⁰I tempóna Silipa moánáka hadua ánángkóiꞌ tobaleilo,

¹¹nauliꞌ Lea, “Morasiꞌaꞌ,” haneꞌi ánángkóiꞌ iti nahangaꞌ Gati, lempóna: “morasiꞌ”.

¹²Silipa moánáka wopiꞌi hadua ánángkóiꞌ tobaleilo,

¹³haneꞌi nauliꞌ Lea, “Góeꞌaꞌ. Deꞌe-deꞌe upu-upu towawine ina manguliꞌ kakódóꞌna to góeꞌ.” Onoꞌ miꞌi haneꞌi ánángkóiꞌ iti nahangaꞌ Asere, lempóna: “góeꞌ”.

¹⁴I tempó pepare, Rube lao molulumao i tangaꞌ pádá hai mohumba hangaa wuaꞌngkau to raꞌandeꞌ towawine mopahampei bona moánáꞌ, haneꞌi wuaꞌngkau iti naꞌántiá Lea inána. Nauliꞌ Raheli i Lea, “Nuweꞌiaꞌ wongkódóꞌá hantóiꞌ wuaꞌngkau to nahumba ánáꞌmu.”

¹⁵Agáiáná nahániki Lea, “Tiꞌara mani paꞌi nupogáná moala toámángkuꞌ, hai deꞌe-deꞌe ina moala wopakoꞌ wuaꞌngkau to nahumba ánáꞌkuꞌ?” Nauliꞌ Raheli, “Ane nuweꞌiaꞌ wuaꞌngkau iti, wengi deꞌe peisákoꞌ moiluhi hai Iako.”

¹⁶Kalumbaꞌ, i kapesuleꞌna Iako hangko i pádá, lao miꞌi Lea mampohidupaꞌá, nauliꞌ, “Moiluhikeꞌ wengi deꞌe, láwiꞌ kubaiari miꞌi hai wuaꞌngkau to nahumba ánáꞌkuꞌ ininá.” Mewaliꞌ wengi iti, Iako moiluhiheꞌ hai Lea.

¹⁷Káláꞌeá wopiꞌi Lea, láwiꞌ Pueꞌ Ala mampehádingi miꞌi pekakaena, haneꞌi moánáka hadua ánángkóiꞌ tobaleilo to kalima.

¹⁸Nauliꞌ Lea, “Naweꞌimoꞌ Pueꞌ Ala háwángina, láwiꞌ Silipa kuweꞌi miꞌi toámángkuꞌ.” Onoꞌ miꞌi haneꞌi ánángkóiꞌ iti nahangaꞌ Sakari. I lalu básá Iberani, hibali hai “háwángina”.

¹⁹Roo onoꞌ, káláꞌeá wopiꞌi Lea, hai moánáka miꞌi hadua ánángkóiꞌ tobaleilo to kaꞌini.

²⁰Nauliꞌ Lea, “Naweꞌimoꞌ Pueꞌ Ala parasee to meraeꞌ. Deꞌe-deꞌe toámángkuꞌ ina moádáiaꞌ, láwiꞌ ini miꞌi ánáꞌkuꞌ paka tobaleilo.” Onoꞌ miꞌi haneꞌi ánángkóiꞌ iti nahangaꞌ Sebuloꞌ, lempóna: “moádái”.

²¹Roo onoꞌ, moánáꞌ wopiꞌi Lea hadua ánángkóiꞌ towawine, hai ánángkóiꞌ iti nahangaꞌ Dina.

²²Hangko ionoꞌ, Pueꞌ Ala mambuhinao miꞌi Raheli, hai Napehádingi pekakaena. Onoꞌ miꞌi haneꞌi Nabungkáhi miꞌi wánuánáꞌna bona moánáꞌ.

²³Roo onoꞌ, káláꞌeá miꞌi Raheli hai moánáka hadua ánángkóiꞌ tobaleilo. Nauliꞌ Raheli, “Nawehángi miꞌi Pueꞌ Ala kamahilingkuꞌ.

²⁴Kupembiáꞌ bona natámbái mani Pueꞌ Ala ánáꞌkuꞌ tobaleilo.” Onoꞌ miꞌi haneꞌi ánángkóiꞌ iti nahangaꞌ Iusupu, lempóna: “Natámbái”.

²⁵Karoona Iusupu rapoánáka, nauliꞌ Iako i Lábá, “Mesabiꞌmoꞌ bona mesuleꞌmoꞌ lao i wánuángkuꞌ i kabubuána waheꞌkuꞌ.

²⁶Nupaliumoꞌ bona pohuꞌangkaiꞌ hingkakani hai rodua toinángkuꞌ hai ánáꞌkuꞌheꞌ to mewaliꞌ sarongkuꞌ mobágóꞌ i hio. Umaꞌ, nuisánto karumihina pobágóꞌkuꞌ i hio.”

²⁷Agáiáná nauliꞌ Lábá i Iako, “Ane nupokaꞌahiꞌaꞌ, toroꞌkoꞌ oaꞌ ieneꞌ, láwiꞌ ininá mebaoaꞌ haneꞌi kuisá, ánti kaꞌiona haneꞌiaꞌ nawátiꞌ PUEꞌ.”

²⁸Nupakanótóámoꞌ bahangapai saromu to hangaa-ngaa kubaiari.

²⁹Mehániꞌ Iako, “Umaꞌ, nuisánto kamatimina pobágóꞌkuꞌ i hio duuꞌna tetátámbái binataꞌmu, láwiꞌ kódóꞌ to mopiaraꞌ.

³⁰Hangko tiꞌara maniaꞌ haweꞌ ieneꞌ, binataꞌmu tiꞌara maniheꞌ handaꞌ, agáiáná ánti kakódóꞌna, PUEꞌ mowátiꞌkoꞌ duuꞌna mewaliꞌmokoꞌ tauna to pebuku. Agáiáná deꞌe-deꞌe, noumbá miꞌi kapeisángkuꞌ mampobágóꞌá toinángkuꞌ hai ánáꞌkuꞌheꞌ?”

³¹Nauliꞌ Lábá, “Mewaliꞌ, apa miꞌi to ina kuweꞌikoꞌ?” Mehániꞌ Iako, “Ineeꞌmoꞌ nuweꞌi ba apa-apa. Ane mobágóꞌ maniaꞌ i hio mopiaraꞌ binataꞌmu, bateꞌna hampákáꞌ peá deꞌe to kupembiáꞌ:

³²alo deꞌe, nupaliuaꞌ moala upu-upu binataꞌ to butitoꞌ ba loba: dimbá to maiti hai bekeꞌ to loba ba to butitoꞌ. Iti peá sarongkuꞌ.

³³I bókóꞌna ina tongawaꞌ katiꞌárángkuꞌ mobábehi salaꞌ i hio. Ane nupáresáꞌ binataꞌkuꞌ hai nulámbiꞌi hambaꞌa dimbá to tiꞌara maiti ba hambaꞌa bekeꞌ to tiꞌara loba ba butitoꞌ, lempóna: iti to kupakanako.”[114]

³⁴Mehániꞌ Lábá, “Kupokana ntepuꞌu laluitamu iti.”

³⁵Agáiáná alo iti woꞌo, napataniꞌ Lábá upu-upu bekeꞌ laki to mobátiꞌ-bátiꞌ ba loba hai upu-upu bekeꞌ lundara to loba hai butitoꞌ, hai napataniꞌ woꞌo dimbá to maiti. Roo onoꞌ, napohawaꞌámoheꞌ ánáꞌna moewu binataꞌ iti,

³⁶haneꞌi pohuꞌmoheꞌ Lábá hai ánáꞌna lao mogááki ngkániiꞌ-niiꞌ upu-upu binataꞌna to napembiáꞌ Iako, haneꞌi laoheꞌ rawoli karaoꞌ hangko i Iako. Kakaraoꞌna tálu alona polumaoraꞌ. Mewaliꞌ pentáráꞌána bekeꞌ hai dimbá, itiramoheꞌ to napiaraꞌ Iako.

³⁷Hangko ionoꞌ, Iako moala miꞌi tálu pákáꞌna dáꞌángkau to mataꞌ[115] haneꞌi napekoliki hantódiꞌ bona burikoꞌ.

³⁸Kau iti nawoli i painuáraꞌ dimbá hai bekeꞌ bona raita ane laoheꞌ mainu, láwiꞌ i tempóraꞌ mainu raundeꞌ metawine.

³⁹Mewaliꞌ ane bekeꞌ hai dimbá mombepotawine i lindoꞌ kau to napekoliki iti, moánákaheꞌ ánáꞌraꞌ to mobátiꞌ-bátiꞌ ba to butitoꞌ ba to loba,

⁴⁰haneꞌi binataꞌ iti naꞌala Iako napataniꞌ mewaliꞌ gáláꞌna. I oloꞌraꞌ dimbána Lábá ara mani to mobátiꞌ-bátiꞌ hai to maiti. Mewaliꞌ ane ina mombepotawineheꞌ, dimbána Lábá napopombelindoꞌheꞌ hai binataꞌ to napataniꞌ miꞌi iti. Noꞌonoꞌ miꞌi kanabábehina Iako bona tetátámbái dimbána, hai dimbána iti napataniꞌheꞌ hangko i dimbána Lábá.

⁴¹Ane binataꞌ to maróhó ina metawine, naꞌala Iako dáꞌángkau to napekoliki nawoli i painuáraꞌ.

⁴²Agáiáná ane binataꞌ to tiꞌara maróhó ina metawine, tiꞌara nabábehi noꞌonoꞌ. Mewaliꞌ binataꞌ to tiꞌara maróhó iti mewaliꞌ gáláꞌna Lábá, hai binataꞌ ntániꞌna to maróhó mewaliꞌ gáláꞌna Iako.

⁴³Onoꞌ miꞌi to nabábehi Iako haneꞌi pebuku. Handaꞌ miꞌi bekeꞌna, dimbá, untá, kalide hai handaꞌ woꞌo hawiꞌna.