Read Besoa Pewaliꞌána 31 Bible Online

Pewaliꞌána 31 - Besoa bible

Pewaliꞌána 31

¹Hangkani tempó, Iako mohádi ánáꞌna Lábá molaluita, rauliꞌ, “Iako moala miꞌi binataꞌna umántaꞌ. Upu-upu kapebukuna mentóáꞌ hangko i umántaꞌ!”

²Naita miꞌi woꞌo Iako pambiárána pinoumána tiꞌara piꞌi bákeróꞌ nodo to liu.

³Hangko ionoꞌ, nauliꞌ PUEꞌ i Iako, “Mesuleꞌmokoꞌ lao i halalumu i tampoꞌna toiorumu, hai ina Kuporángákoꞌ.”

⁴Mewaliꞌ Iako mohuoꞌ miꞌi tauna lao mokióꞌ Raheli hai Lea bona mohidupaꞌheꞌ i pádá poewuána bekeꞌ hai dimbá.

⁵Kahaweꞌraꞌ toinána ionoꞌ, nahángáꞌáheꞌ Iako, “Kupeita, umámi tiꞌara piꞌi bákeróꞌ i kódóꞌ nodo to liu. Agáiáná Pueꞌ Ala to napenómbái umángkuꞌ, Ia miꞌi to mamporángáꞌaꞌ oaꞌ.

⁶Niꞌisánto noumbá kamatimina pobágóꞌkuꞌ i umámi,

⁷agáiáná kehapiꞌ noꞌonoꞌ, handaꞌ miꞌi káningkuꞌ naꞌákálángi, láwiꞌ hampuloꞌ miꞌi kánina nabáliki sarongkuꞌ hangko i apa to nadándiáꞌaꞌ. Agáiáná Pueꞌ Ala tiꞌara mopatodáhi umámi mobábehi to kadake i kódóꞌ.

⁸{Tongawaꞌ miꞌi kanawátiꞌkuꞌ Pueꞌ Ala,} láwiꞌ ane nauliꞌ umámi, ‘Binataꞌkuꞌ to butitoꞌ nuposaro,’ upu-upu binataꞌna moánákaheꞌ to butitoꞌ. Hai ane nauliꞌ umámi, ‘Binataꞌkuꞌ to mobátiꞌ-bátiꞌ nuposaro,’ upu-upu binataꞌna moánákaheꞌ to mobátiꞌ-bátiꞌ.

⁹Noꞌonoꞌ miꞌi rárána Pueꞌ Ala moala binataꞌna umámi haneꞌi Naweꞌiaꞌ mewaliꞌ gáláꞌkuꞌ.

¹⁰Hangkani tempó, i tempóraꞌ binataꞌ metawine, mampaturuáꞌaꞌ. Kuita bekeꞌ laki to metawineheꞌ iti, paka to mobátiꞌ-bátiꞌ hai butitoꞌ hai paka to loba.

¹¹Hangkaꞌ-hangkaꞌ perái, malaꞌekana Pueꞌ Ala molaluita i kódóꞌ, nauliꞌ, ‘Iako.’ Mehániꞌaꞌ, ‘Deꞌentoaꞌ, Pueꞌ.’

¹²Nauliꞌ wopiꞌi malaꞌeka, ‘Peita. Upu-upu bekeꞌ laki to metawine iti, mobátiꞌ-bátiꞌ, butitoꞌ hai lobaheꞌ. Kutunggáikoꞌ mowátiꞌ noꞌonoꞌ, láwiꞌ Kuita miꞌi upu-upu bábehiána Lábá i hio.

¹³Kódóꞌ miꞌi Pueꞌ Ala to nupenómbái hangkoia i Beteli, i kamopatindáꞌmu hambuaꞌ watu haneꞌi nububuhi hai lana mewaliꞌ watu penómbáꞌá i Kódóꞌ,[116] hai modándikoꞌ i Kódóꞌ. Mewaliꞌ deꞌe-deꞌe, hangaa-ngaa mangkádipurámokoꞌ hai mesuleꞌmokoꞌ i tampoꞌ kabubuána waheꞌmu.’ ”

¹⁴Mehániꞌheꞌ Raheli hai Lea, “Tiꞌara piꞌi ara párewá to ina kipososora hangko i umángkiꞌ.

¹⁵Kaiꞌ deꞌe napahibalimongkaiꞌ hai tohaweꞌ peá. Napopohambokoáꞌangkaiꞌ hai io, hai ádángkiꞌ to narangaꞌ umángkiꞌ[117] napoupu miꞌi aha.

¹⁶Upu-upu kapebukuna umángkiꞌ naꞌala miꞌi Pueꞌ Ala haneꞌi Naweꞌikoꞌ. Iti miꞌi to mewaliꞌ gáláꞌkiꞌ hai gáláꞌraꞌ woꞌo ánáꞌkiꞌ. Mewaliꞌ nubábehi miꞌi apa to nahángáꞌaꞌámokoꞌ Pueꞌ Ala.”

¹⁷Mewaliꞌ mangkádipurá miꞌi Iako, napopesaweꞌheꞌ towawinena hai ánáꞌna i untá,

¹⁸haneꞌiheꞌ pohuꞌ lao i tampoꞌ Kánáꞌá, tampoꞌna Isakiꞌ umána. Upu-upu binataꞌraꞌ raeri, hai upu-upu párewáraꞌ to ralámbiꞌ i tampoꞌ Pádá-Árá raꞌánti woꞌo.

¹⁹I tempó iti, Lábá tangaꞌna mani mogundiꞌheꞌ dimbána i pádá, onoꞌ miꞌi haneꞌi Raheli mopanako watutaunána umána {to rapenómbái hai to rapoinálái mokámpái támbiraꞌ}.

²⁰I kapohuꞌraꞌ iti, Lábá toÁrá iti naꞌákálángi Iako, láwiꞌ tiꞌara napopaisáꞌá kapohuꞌraꞌ.

²¹Naꞌala miꞌi Iako upu-upu párewána, haneꞌiheꞌ pohuꞌ kawiáꞌ mengkalimba i uwai Epara lao i buluꞌ-buluꞌna i tampoꞌ Gileaꞌ.[118]

²²Liu miꞌi tálu alona hangko naisá riꞌi Lábá kapohuꞌraꞌ miꞌi Iako hantámbi.

²³Kásáliu nakióꞌheꞌ halaluna haneꞌiheꞌ modápáꞌ Iako. Pitu miꞌi alona polumaoraꞌ, hangko ralámbiꞌraheꞌ i buluꞌ-buluꞌna i tampoꞌ Gileaꞌ.

²⁴Agáiáná tangaꞌ káindi, Pueꞌ Ala mampatongawaꞌ i Lábá toÁrá iti i lalu paturuna, Nauliꞌ, “Maroꞌa-roꞌakoꞌ. Ineeꞌkoꞌ mampopalááꞌ Iako kehapiꞌ hantepóꞌ peá laluitamu.”

²⁵Iako hantina mobambaruꞌmoheꞌ i buluꞌ-buluꞌna i Gileaꞌ. Mewaliꞌ i kahaweꞌna Lábá hai taunánaheꞌ, mobambaruꞌheꞌ woꞌo hungkuꞌ ionoꞌ.

²⁶Roo onoꞌ, Lábá lao mampombelámbiꞌá Iako, nauliꞌ, “Moapa riꞌi haneꞌi nubagiuꞌaꞌ hai mampelangkahakoꞌ ánáꞌkuꞌ nodoheꞌ toratawani.

²⁷Moapa riꞌi haneꞌi nuákálángiaꞌ? Pohuꞌkoꞌ ngkániiꞌ-niiꞌ, tiꞌarakoꞌ mesabiꞌ. Ane kemesabiꞌntokoꞌ, bateꞌna kekupopangkaliwokou maroꞌa hai kekuposusaikou sieruꞌ, raponaniákou hai kándá hai kasapi, hangko pohuꞌrakou.

²⁸Mogalo riꞌi moángkiaꞌ ánáꞌkuꞌ hai ueꞌkuꞌheꞌ, tiꞌaraꞌaꞌ nampakaꞌ. Bebe ntepuꞌukoꞌ; tiꞌara maroꞌa bábehiámu iti.

²⁹Ane kuꞌundeꞌnto mobábehi to kadake i hio, peisá, agáiáná iakáindi Pueꞌ Ala to napenómbái umámu mopaingáꞌiaꞌ bona ineeꞌkoꞌ kupopalááꞌ.

³⁰Hai ane ina mesuleꞌmokoꞌ i wánuámu láwiꞌ mabilakoꞌ i umámu hai halalumuheꞌ, moapa riꞌi haneꞌi nupanakoheꞌ watutaunángkuꞌ to mokámpái támbingkuꞌ?”

³¹Mehániꞌ Iako, “Pohuꞌangkaiꞌ ngkániiꞌ-niiꞌ, láwiꞌ kupokalááꞌ ina nutahaheꞌ ánáꞌmu bona tiꞌaraheꞌ meuláꞌ i kódóꞌ.

³²Kana i watutaunámu to nukábelái ininá, ane rápáꞌna nulámbiꞌ i kaiꞌ, heáná to mopanako hangaa-ngaa rapapate. I lindoꞌraꞌ halaluntaꞌ deꞌe, nupáresáꞌ sieruꞌ ane ara mpuꞌui párewámu i kaiꞌ. Ane arai, nualamonto.” Mole tiꞌara riꞌi naisá Iako kaRahelina to mopanako watutaunána Lábá iti.

³³Rungu-runguna, mesuaꞌ miꞌi Lábá i bambaruꞌna Iako mampeliꞌ watutaunánaheꞌ. Hangko ionoꞌ, mesuaꞌ wopiꞌi i bambaruꞌna Lea hai i bambaruꞌraꞌ rodua hawiꞌraꞌ, agáiáná tiꞌara nalámbiꞌ. Kaupuána ia mesuaꞌ i bambaruꞌna Raheli.

³⁴Hangko tiꞌara mani haweꞌ umána, Raheli moala miꞌi watutaunaheꞌ iti nahóhóká i lalu lámpi untá, haneꞌi napehodai. Pesuaꞌna Lábá i bambaruꞌna iti, napeliꞌ agáiáná tiꞌara woꞌo nalámbiꞌ.

³⁵Nauliꞌ Raheli i umána, “Umaꞌ, ineeꞌkoꞌ mabukoꞌ. Tiꞌaraꞌaꞌ peisá meángkáꞌ modupaꞌkoꞌ, láwiꞌ tangaꞌkuꞌ nahumba.” Watutauna iti napeliꞌ ntepuꞌu Lábá agáiáná tiꞌara nalámbiꞌ.

³⁶Mabukoꞌ miꞌi Iako, haneꞌi nauliꞌ, “Apa kakadakengkuꞌ to kubábehi? Apa salaꞌkuꞌ haneꞌi nudápáꞌ ntepuꞌuaꞌ?

³⁷Deꞌe-deꞌe, roo miꞌi nupáresáꞌ upu-upu párewángkuꞌ. Ara paꞌi párewámu to nulámbiꞌ? Nupatóá i lindoꞌtaꞌ bona raita halaluntaꞌ hai bona raisá upu-upu heáná to toꞌu.

³⁸Rompuloꞌ miꞌi parena toroꞌaꞌ i hio. Dimbá hai bekeꞌmu kupiaraꞌ maroꞌa haneꞌiheꞌ memuleꞌ-muleꞌ.[119] Tiꞌara ara haweꞌ hambaꞌa bekeꞌmu to kusambale bona kuandeꞌ.

³⁹Ane hambaꞌa mate nahakaꞌ binataꞌ to maila, tiꞌara haweꞌ hangkani kuánti wátána i hio. Bateꞌna kódóꞌ to mopaháwángi hangko i binataꞌkuꞌ. Ane ara to rapanako mabaa ba káindi, paka nupopepaháwángi i kódóꞌ.

⁴⁰Mobágóꞌaꞌ oaꞌ i hio. Ane mabaa, kanaꞌaꞌ alo, ane káindi, kanaꞌaꞌ lengiꞌ. Handaꞌ kánina tiꞌaraꞌaꞌ peisá maturu. Noꞌonoꞌ miꞌi kamapárina pobágóꞌkuꞌ i hio.

⁴¹Rompuloꞌ miꞌi parena toroꞌaꞌ i hio, mobágóꞌaꞌ hampuloꞌ hai iba parena i hio bona nuweꞌiaꞌ ánáꞌmu rodua kupotoina. Mobágóꞌ maniaꞌ ini parena i hio bona kulámbiꞌ sarongkuꞌ, ia miꞌi dimbá hai bekeꞌ deꞌe. Tempóngkuꞌ mobágóꞌ i hio, hampuloꞌ miꞌi kánina nubáliki sarongkuꞌ hangko i apa to nudándiáꞌaꞌ.

⁴²Ane ketiꞌaraꞌaꞌ naporángá Pueꞌ Ala to napenómbái pueꞌkuꞌ Burahima hai to napomahile umángkuꞌ Isakiꞌ, kehangaa-ngaa mesuleꞌaꞌ ntooꞌ. Agáiáná Pueꞌ Ala moita miꞌi kamapáringkuꞌ i pobágóꞌkuꞌ, onoꞌ miꞌi haneꞌi iakáindi moliu paturumu, napakanótó miꞌi Pueꞌ kamasalaꞌmu.”

⁴³Hangko ionoꞌ, Lábá mehániꞌ i Iako, nauliꞌ, “Toinámu to rodua, ánáꞌkuꞌheꞌ; ánáꞌmi iti, ueꞌkuꞌheꞌ, hai upu-upu binataꞌmu deꞌe, kódóꞌ pueꞌna. Katoꞌuána, upu-upu to nuita deꞌe, kódóꞌ miꞌi pueꞌna. Agáiáná tapanoumbá paꞌi deꞌe-deꞌe? Tiꞌarapoheꞌ peisá kutaha deꞌe ánáꞌkuꞌ hai ueꞌkuꞌ.

⁴⁴Rángina miꞌi mopaꞌarakeꞌ podándi. Tapopombeusu-usu watu deꞌe mewaliꞌ tandaꞌ podándintaꞌ.”

⁴⁵Hangko ionoꞌ, naꞌala miꞌi Iako hambuaꞌ watu haneꞌi napatindáꞌ mewaliꞌ watu pambuhinaoá.

⁴⁶Roo onoꞌ, nahuoꞌheꞌ halaluna morámpu watu hai moꞌódóꞌ mpakaroꞌa ionoꞌ, haneꞌiheꞌ mandeꞌ hingkakani hungkuꞌ i watu iti.

⁴⁷Watu to raódóꞌ iti nahangaꞌ Lábá i lalu básá Árá watu Ega-Sahaduta, hai watu iti nahangaꞌ woꞌo Iako i lalu básá Iberani Galeꞌ.[120]

⁴⁸Nauliꞌ Lábá i Iako, “Watu to raódóꞌ deꞌe mewaliꞌ popambuhinaoá podándintaꞌ.” Onoꞌ miꞌi haneꞌi watu iti rauliꞌ Galeꞌ.

⁴⁹Watu iti rahangaꞌ woꞌo Mispa, lempóna: “katoroꞌá pekámpáiá”, láwiꞌ nauliꞌ Lábá, “Tapembiáꞌ i PUEꞌ bona Nakámpái katueꞌtaꞌ bona tiꞌarakeꞌ moliungi dándintaꞌ, kehapiꞌkeꞌ mombekaraohi.

⁵⁰Ane mobábehikoꞌ to kadake i ánáꞌkuꞌheꞌ to nupotoina, ba nuala towawine ntániꞌna nupotoina, kehapiꞌ tiꞌara ara to mai mopahaweꞌ i kódóꞌ, maingáꞌ-ingáꞌkoꞌ láwiꞌ Pueꞌ Ala to mosabikikeꞌ.

⁵¹Watu to raódóꞌ hai watu to rapatindáꞌ deꞌe

⁵²mewaliꞌ tandaꞌ parailiꞌtaꞌ to mampopaingáꞌiákeꞌ bona tiꞌara kuliungi lao mampoewaliákoꞌ, noꞌonoꞌ woꞌo io, tiꞌarakoꞌ peisá moliungi watu deꞌe mampoewaliáꞌaꞌ.

⁵³Pueꞌ Ala to napenómbái Burahima pueꞌmu, hai Nahori umángkuꞌ, hai to rapenómbái woꞌo umáraꞌ, Ia miꞌi to motangaꞌ-tangaꞌi podándintaꞌ deꞌe.” Roo onoꞌ, Iako modándi i lalu hangaꞌna Pueꞌ Ala to napomahile Isakiꞌ umána, bona ina napeuláꞌi ntepuꞌu dándiraꞌ.

⁵⁴I wongko buluꞌ iti, ia mosambale miꞌi hambaꞌa binataꞌ napopenómbá i Pueꞌ Ala. Roo onoꞌ, nawáwáháheꞌ upu-upu bona mandeꞌheꞌ hingkakani, hai roomoheꞌ mandeꞌ, hambengiheꞌ ionoꞌ.

⁵⁵Kahalona mepulo-pulo, Lábá moángkiheꞌ ánáꞌna hai ueꞌna, nawátiꞌheꞌ, haneꞌi mesuleꞌ miꞌi lao i tampoꞌna.