Read Besoa Pewaliꞌána 32 Bible Online

Pewaliꞌána 32 - Besoa bible

Pewaliꞌána 32

¹Kanapaliliuna Iako polumaona, ia mampohidupaꞌá bahangapa malaꞌekana Pueꞌ Ala.

²Kanaitáraꞌ Iako, liu-liu nauliꞌ, “Deꞌe miꞌi katoroꞌáraꞌ surudadoꞌna Pueꞌ Ala.” Onoꞌ miꞌi haneꞌi nahangaꞌ katoroꞌá iti Mahanai.[121]

³Roo onoꞌ, nahuoꞌmoheꞌ bahangapa taunána moioru lao i buluꞌ-buluꞌna Sei, i tampoꞌraꞌ toEdom,[122] bona mampombelámbiꞌá Esau wutuꞌna.

⁴Nahángáꞌáꞌáheꞌ taunána iti, nauliꞌ, “Nipahaweꞌ i wutuꞌkuꞌ Esau node: Deꞌe miꞌi laluitana Iako hawiꞌmu. ‘Kódóꞌ maruemoꞌ toroꞌ i Lábá halaluntaꞌ.

⁵I kódóꞌ deꞌe-deꞌe ara miꞌi gapiꞌ, kalide, dimbá, bekeꞌ, hai hawiꞌkuꞌheꞌ. Wutuꞌkuꞌ to kuádái, kupahaweꞌ bámbári deꞌe i kitaꞌ, bona maroꞌa laluntaꞌ i kódóꞌ.’ ”

⁶I pesuleꞌraꞌ to nahuoꞌ iti, rauliꞌ, “Laomongkaiꞌ mampohidupaꞌá Esau wutuꞌmu, hai deꞌe-deꞌe tangaꞌna i polumaoána ina mai mampohidupaꞌákoꞌ. Araheꞌ woꞌo iba áturaꞌ tobaleilo to mamporángá.”

⁷Kanahádina bámbári iti, malááꞌ ntepuꞌu Iako hai masusa laluna. Onoꞌ miꞌi haneꞌi nagáláꞌmoheꞌ taunána to meuláꞌ i hia mewaliꞌ rontobu. Noꞌonoꞌheꞌ woꞌo bekeꞌna, dimbá, gapiꞌ hai untána.

⁸Nauliꞌ i laluna, “Ane Esau mai mampombealaꞌá to hantobu, ara mani to hantobu to peisá mopatueꞌ wátáraꞌ.”

⁹Hangko ionoꞌ, mekakae miꞌi Iako, nauliꞌ, “Ó Pueꞌ Ala to rapenómbái pueꞌkuꞌ Burahima hai umángkuꞌ Isakiꞌ. Nupehádingi wongkódóꞌá láwiꞌ Io to mohuoꞌaꞌ mesuleꞌ mai i tampoꞌkuꞌ hai i halalungkuꞌheꞌ. PUEꞌ, Nudándi miꞌi ina Nukádipuráꞌaꞌ maroꞌa.[123]

¹⁰Katoꞌuána tiꞌaraꞌaꞌ hintotoꞌ motarima kamaroꞌaMu hai katetidaꞌ to Nupatongawaꞌ oaꞌ i lalu katueꞌkuꞌ. I tempóngkuꞌ pohuꞌ hangko i támbina umángkuꞌ hai mengkalimba i uwai Iarade hangkoia, tiꞌara ara apa-apa to kuánti, bateꞌna peá laiꞌ to kutibaaꞌ. Agáiáná i pesuleꞌkuꞌ miꞌi deꞌe, handaꞌmongkaiꞌ, mewaliꞌmongkaiꞌ rontobu.

¹¹Kupembiáꞌ bona Nupelaeaꞌ wongkódóꞌá hangko i Esau wutuꞌkuꞌ, láwiꞌ kupokalááꞌ ia ina mai mampombealaꞌáꞌaꞌ hai mopapateangkaiꞌ, tepasuaꞌ toinángkuꞌ hai ánáꞌkuꞌheꞌ.

¹²Agáiáná Nudándi miꞌi hangkoia ina Nukádipuráꞌaꞌ maroꞌa hai ina Nupahandaꞌ pemuleꞌángkuꞌ nodo kahandaꞌna wungi i wiwi tahiꞌ to tiꞌara peisá raimbaꞌ.”

¹³Hambengi miꞌi Iako ionoꞌ. Kahalona mepulo, napataniꞌ miꞌi hanggááꞌ hangko i binataꞌna bona naweꞌi Esau,

¹⁴ia miꞌi: rongatu báꞌána bekeꞌ lundara, rompuloꞌ báꞌána bekeꞌ laki, rongatu báꞌána dimbá lundara, rompuloꞌ báꞌána dimbá laki,

¹⁵tálu puloꞌna untá hante ánáꞌraꞌ to tangaꞌraꞌ mani mehuhu, iba puloꞌna báꞌána gapiꞌ lundara, hampuloꞌ báꞌána gapiꞌ laki, rompuloꞌ báꞌána kalide lundara, hai hampuloꞌ báꞌána kalide laki.

¹⁶Napataniꞌ binataꞌ iti hantobu-hantobu, haneꞌi nahuoꞌheꞌ hawiꞌna mokámpái. Nahángáꞌáheꞌ, “Moiorumokou hangko i kódóꞌ, hai nikámpáiheꞌ hantobu-hantobu bona ineeꞌheꞌ mombehungkuki.”

¹⁷Napolaluitaꞌá miꞌi Iako hawiꞌna to moioru ntepuꞌu, nauliꞌ, “Ane mampohidupaꞌákoꞌ Esau wutuꞌkuꞌ, hai ane napekuneꞌ node: ‘Heáná pueꞌmu? Iumbákoꞌ lao? Hai heáná pueꞌna binataꞌ to nuewu deꞌe?’

¹⁸hangaa-ngaa nuhániki node: ‘Tuá, demiꞌe binataꞌna hawiꞌmu Iako, pakatuna i hio. Hawiꞌmu Iako ara mani mai i bókóꞌ.’ ”

¹⁹Noꞌonoꞌ miꞌi polaluitana Iako, maroꞌa i hawiꞌna to kaduá hai to katálu, hai upu-upu hawiꞌna to mokámpái binataꞌna iti, nauliꞌ, “Nodo polaluitangkuꞌ ininá, hangaa-ngaa nihángáꞌá Esau.

²⁰Ane mohidupaꞌkou, hangaa-ngaa niuliꞌ woꞌo, ‘Hawiꞌmu Iako ara mani mai i bókóꞌ.’ ” Nauliꞌ Iako i laluna, “Maroꞌa miꞌi kupamalulu sieruꞌ laluna hai pakatungkuꞌ, hangko kuita riꞌi lindoꞌna. Babilaꞌ ina natarima mpuꞌuaꞌ maroꞌa.”

²¹Mewaliꞌ to napakatu iti raꞌánti hawiꞌna to moioruheꞌ, agáiáná Iako hambengi mani i bambaruꞌna.

²²Káindi iti, mearó miꞌi Iako moántiheꞌ toinána rodua, hawiꞌnaheꞌ towawine to rodua, hai ánáꞌnaheꞌ to hampuloꞌ hai hadua, haneꞌi mengkalimbaheꞌ i uwai Iaboꞌ.

²³Kalimbáraꞌ towawinena hai ánáꞌnaheꞌ, napalimbáheꞌ woꞌo párewána hai taunána,

²⁴mewaliꞌ ia perái haduduána. Roo onoꞌ, haweꞌ miꞌi hadua tobaleilo mampohakaꞌá Iako duuꞌna mepulo.

²⁵Kanaisána tauna iti katiꞌárána ina menangi, mopahái perái tóáꞌ páꞌána Iako haneꞌi halagogi.

²⁶Nauliꞌ tauna iti, “Nukábáhámoꞌ láwiꞌ hungkuꞌ miꞌi mabaa!” Agáiáná mehániꞌ Iako, “Tiꞌarakoꞌ ina kukábáhá, ane tiꞌara maniaꞌ nuwátiꞌ.”

²⁷Mekuneꞌ tauna iti, “Heáná hangaꞌmu?” Mehániꞌ, “Kódóꞌ deꞌe Iako.”

²⁸Nauliꞌ tauna iti, “Deꞌe-deꞌe tiꞌarapokoꞌ ina rahangaꞌ Iako.[124] Rabáliki miꞌi hangaꞌmu. Ina rahangaꞌmokoꞌ Sáráeliꞌ,[125] láwiꞌ moewaꞌmokoꞌ Pueꞌ Ala hai tauna, hai menangikoꞌ.”

²⁹Nauliꞌ Iako, “Nuhángáꞌáꞌaꞌ woꞌo heáná hangaꞌmu.” Agáiáná mehániꞌ tauna iti, “Moapa riꞌi haneꞌi nupekuneꞌ hangaꞌkuꞌ?” Roo onoꞌ, ia mowátiꞌ Iako.

³⁰Mewaliꞌ nauliꞌ Iako, “Mampombelindoꞌámoꞌ Pueꞌ Ala, agáiáná tueꞌ maniaꞌ.” Onoꞌ miꞌi haneꞌi katoroꞌá iti nahangaꞌ Penieli lempóna “lindoꞌna Pueꞌ Ala”.

³¹Mesupaꞌ miꞌi alo, pohuꞌ miꞌi Iako hangko i Penieli hai mongkeho láwiꞌ halagogi tóáꞌ páꞌána.

³²Onoꞌ miꞌi haneꞌi haweꞌ deꞌe-deꞌe toSáráeliꞌ tiꞌaraheꞌ mandeꞌ óntóꞌ to mentakaꞌ i uáꞌ tóáꞌ paꞌa binataꞌ, láwiꞌ mambuhinaoheꞌ noumbá Pueꞌ Ala mopahái tóáꞌ páꞌána Iako.