Read Besoa Pewaliꞌána 33 Bible Online

Pewaliꞌána 33 - Besoa bible

Pewaliꞌána 33

¹Hangko karaoꞌ, Iako moitamoheꞌ mai Esau hai taunána to iba átuna tobaleilo. Onoꞌ miꞌi haneꞌi ánáꞌna nagáláꞌáheꞌ Lea, Raheli hai hawiꞌraꞌ to rodua.

²Napopombeuláꞌmoheꞌ hawiꞌraꞌ to rodua hingkakani hai ánáꞌraꞌ, Lea hai ánáꞌnaheꞌ, haneꞌi Raheli hai Iusupu napaibókóꞌ ntepuꞌuheꞌ.

³Moioru miꞌi Iako. Tangaꞌna mohungkuki wutuꞌna, molingkudu pitu kánina motóngkóꞌ haweꞌ i tampoꞌ, tandaꞌ kamampomahilena ntepuꞌu wutuꞌna.

⁴Agáiáná Esau melangka lao mampohidupaꞌá Iako, nakápui hai naꞌángki, hai mombeteriahiheꞌ.

⁵Kanaitáraꞌ Esau towawine hai ánángkóiꞌ iti, napekuneꞌ, “Heánáheꞌ to nupohiolaꞌ deꞌe?” Nahániki Iako, “Deꞌemoheꞌ ánáꞌkuꞌ to naweꞌiaꞌ Pueꞌ Ala ánti kabulána laluNa i kódóꞌ.”

⁶Roo onoꞌ, hawiꞌna towawine hai ánáꞌraꞌ laoheꞌ molingkudu motóngkóꞌ i bitina Esau,

⁷haneꞌi laoheꞌ woꞌo Lea hai ánáꞌna molingkudu motóngkóꞌ i hia. Hai kaupuána, Iusupu hai Raheli.

⁸Napekuneꞌ Esau, “Apa tunggáiámu mopakatu bahangapa tobuna binataꞌ to kupohidupaꞌá ininá?” Mehániꞌ Iako, “Wutuꞌkuꞌ to kuádái. Upu-upu binataꞌ iti, io miꞌi pueꞌna hai kupembiáꞌ bona maroꞌa lalumu i kódóꞌ.”

⁹Agáiáná nauliꞌ Esau, “Handaꞌ miꞌi i kódóꞌ. Tiꞌaraꞌaꞌ paraluu nupoweꞌi apa-apa.”

¹⁰Nauliꞌ Iako, “Ineeꞌkoꞌ noꞌonoꞌ, láwiꞌ ane maroꞌa lalumu i kódóꞌ, kupembiáꞌ bona nutarima apa to kupakatu iti i hio. Góeꞌ ntepuꞌuaꞌ láwiꞌ mohidupaꞌ wopakeꞌ. I poitángkuꞌ lindoꞌmu ininá, nodoaꞌ to moita lindoꞌna Pueꞌ Ala, láwiꞌ maroꞌa lalumu i kódóꞌ.

¹¹Kupembiáꞌ bona nutarima miꞌi apa to kuweꞌikoꞌ deꞌe, láwiꞌ maꞌahiꞌ laluna Pueꞌ Ala i kódóꞌ haneꞌi Naweꞌimoꞌ i pákáꞌ-pákáꞌna to kuparaluu i katueꞌkuꞌ.” Iako monáráhi ntepuꞌu wutuꞌna bona motarima apa to naweꞌi iti, duuꞌna natarima.[126]

¹²Roo onoꞌ, nauliꞌ Esau, “Mangkádipurámokou bona laomokeꞌ, hai ina kuporángákou.”

¹³Agáiáná mehániꞌ Iako, “Nuisánto kamawewena polumaongkiꞌ láwiꞌ moántiangkaiꞌ ánángkóiꞌ to tiꞌara mani rabuku molumao. Hai araheꞌ woꞌo binataꞌ to mopahuhu mani. Ane kipasimbukuheꞌ molumao dehangaloá, bateꞌraꞌ ina mate.

¹⁴Rángina miꞌi moiorumokoꞌ; i bókóꞌramongkaiꞌ, mouláꞌ peangkaiꞌ polumaoraꞌ binataꞌ hai ánáꞌkuꞌheꞌ. Hidupaꞌramokeꞌ i tampoꞌ Sei.”

¹⁵Nauliꞌ Esau, “Ane noꞌonoꞌi, kuweꞌikoꞌ bahangapa taunángkuꞌ ina mamporángákou i polumaoámi.” Mehániꞌ Iako, “Tiꞌara paraluu. To kuparaluu, bona maroꞌa lalumu i kódóꞌ.”

¹⁶Mewaliꞌ i alo iti, pohuꞌ miꞌi Esau mesuleꞌ lao i tampoꞌ Sei, to rauliꞌ woꞌo Edom.

¹⁷Agáiáná Iako lao riꞌi i wánuá Sukoꞌ, hai ionoꞌ moaró támbi hai bambaruꞌ pebóungáꞌána binataꞌ. Onoꞌ miꞌi haneꞌi wánuá iti rahangaꞌ Sukoꞌ, lempóna “bambaruꞌ pebóungáꞌá”.

¹⁸I polumaoána Iako iti, mantepuꞌuheꞌ hangko i Pádá-Árá, hai kahópóꞌána haweꞌheꞌ i kamaroꞌa-roꞌa i kótá Sikeꞌ i tampoꞌ Kánáꞌá.[127] I kahaweꞌraꞌ ionoꞌ, moarómoheꞌ bambaruꞌ i pádá, i rawa kótá iti.

¹⁹Pádá to nakatoroꞌi iti, nahóló hangko i ánáꞌna Hemo, umána Sikeꞌ. Hólóna hangatu dóiꞌ peráꞌ.

²⁰Ionoꞌ, Iako moaró miꞌi hambuaꞌ paintuá popenómbá, haneꞌi nahangaꞌ, “Pueꞌ Ala Pueꞌraꞌ toSáráeliꞌ.”[128]