Read Besoa Pewaliꞌána 34 Bible Online

Pewaliꞌána 34 - Besoa bible

Pewaliꞌána 34

¹Bahangapa parena hangko ionoꞌ, Dina ánáꞌraꞌ Lea hai Iako, lao moádáꞌ hai bahangapa towawine toKánáꞌá.

²I tempó onoꞌ, ara hadua ánáꞌtuꞌáná to rahangaꞌ Sikeꞌ, ánáꞌna Hemo toHewi to mokuasaꞌi tampoꞌ iti. I kanaitána Sikeꞌ iti Dina, ia mampelangkaha haneꞌi napogauꞌ.

³Mentakaꞌ laluna Sikeꞌ i Dina, hai naundeꞌ ntepuꞌu ánáꞌntawine iti. Napamalulu laluna bona laluna Dina mentakaꞌ woꞌo i hia.

⁴Nauliꞌ i umána, “Umaꞌ, nupembiáꞌáꞌaꞌ i tosaena towawine iti bona kupotoina.”

⁵I kanahádina Iako karapakedáina miꞌi wátána ánáꞌna, ia mampengkaniika sieruꞌ mampegiá pesuleꞌraꞌ ánáꞌnaheꞌ tobaleilo hangko i pádá poewuáraꞌ.

⁶Hemo umána Sikeꞌ lao mampohidupaꞌá Iako bona peisáheꞌ molaluita.

⁷Tempó iti, mesuleꞌmoheꞌ ánáꞌna Iako hangko i pádá. Karahádina apa to pewaliꞌ iti, masusa ntepuꞌu laluraꞌ hai rumihi kamabukoꞌraꞌ, láwiꞌ Sikeꞌ moala miꞌi Dina ánáꞌna Iako haneꞌi napogauꞌ. Bábehiána iti mopakedái hangaꞌraꞌ upu-upu toSáráeliꞌ láwiꞌ tiꞌara hintotoꞌ.

⁸Nauliꞌ Hemo i Iako hai ánáꞌnaheꞌ, “Ánáꞌkuꞌ Sikeꞌ, naundeꞌ ntepuꞌu mampotoina ánáꞌmu. Onoꞌ miꞌi haneꞌi kupembiáꞌ maroꞌa i kitaꞌ, bona ánáꞌkuꞌ hai ánáꞌmu tapahambokoheꞌ.

⁹Maroꞌa ane hintuwuꞌkeꞌ, bona tinámu hai tinángkiꞌ mombetatakaꞌi i pohamboko,

¹⁰bona peisámokou toroꞌ i oloꞌkiꞌ i tampoꞌ deꞌe iumbá peá peundeꞌámi. Peisákou woꞌo mobaluꞌ-baluꞌ ieneꞌ hai mampopueꞌ tampoꞌ.”

¹¹Roo onoꞌ, nauliꞌ woꞌo Sikeꞌ i umána Dina hai halalunaheꞌ, “Kupembiáꞌ bona nipokaꞌahiꞌaꞌ. Ina kuweꞌikou apa peá to nipembiáꞌ.

¹²Nihángáꞌáꞌangkaiꞌ ba apa peá to nipoinao, hai nipakanótó hólóna ba ádána. Ina kuweꞌikou apa to nipembiáꞌ bona nipokana peá towawine iti mewaliꞌ toinángkuꞌ.”

¹³Ánti bábehiána Sikeꞌ to mopakedái wátána Dina, ánáꞌnaheꞌ Iako moákálángiheꞌ Sikeꞌ hai Hemo umána,

¹⁴rauliꞌ, “Kipokahili ane kipokana iti ádingkiꞌ mampotoama tauna to tiꞌara ratileꞌ.

¹⁵Ina kipokana pembiáꞌmi ane nipeuláꞌi ádángkiꞌ: upu-upukou tobaleilo hangaa-ngaa ratileꞌ bona hibalikou hai kaiꞌ.

¹⁶Ane nibábehi miꞌi noꞌonoꞌ, ina kipokana miꞌi pembiáꞌmi. Peisámokeꞌ mombetatakaꞌi i pohamboko. Ina kipeweꞌi ánáꞌntawinengkiꞌ nipotoina, hai ina kipotoina woꞌo ánáꞌntawinemi. Hangko ionoꞌ, peisákeꞌ toroꞌ hingkakani hai ina mewaliꞌkeꞌ to hampohalaluá.

¹⁷Agáiáná ane tiꞌara niundeꞌ mampeuláꞌi ádángkiꞌ deꞌe, hai tiꞌarakou mau ratileꞌ, ádingkiꞌ hangaa-ngaa kiala huleꞌ hai ina pohuꞌangkaiꞌ hangko ieneꞌ.”

¹⁸Pembiáꞌraꞌ iti rapokana Hemo hai Sikeꞌ ánáꞌna.

¹⁹Ánti peundeꞌna ntepuꞌu i Dina, onoꞌ miꞌi haneꞌi napoinao ntepuꞌu Sikeꞌ mampeuláꞌi pembiáꞌraꞌ iti. Hai Sikeꞌ iti to teádái ntepuꞌu i támbina umána.

²⁰Hangko ionoꞌ, laomoheꞌ Hemo hai Sikeꞌ i pogómbóá i babaꞌá bente kótá haneꞌi molaluitaheꞌ i tauna, rauliꞌ,

²¹“ToSáráeliꞌ iti, raundeꞌ mohintuwuꞌ hai kitaꞌ. Mewaliꞌ kipembiáꞌ bona nipatodáhiheꞌ toroꞌ hingkakani hai kitaꞌ i tampoꞌ deꞌe, hai mobaluꞌ-baluꞌheꞌ woꞌo ieneꞌ, láwiꞌ tampoꞌtaꞌ deꞌe maeláꞌ mani. Kitaꞌ, peisákeꞌ hamboko hai ánáꞌntawineraꞌ, hai hira woꞌo peisáheꞌ hamboko hai ánáꞌntawinentaꞌ.

²²Agáiáná taunaheꞌ iti, tiꞌara raundeꞌ toroꞌ hingkakani hai kitaꞌ nodo to hampohalaluá, ane tiꞌarakeꞌ mouláꞌ ádáraꞌ to node: upu-upu tobaleilo hangaa-ngaa ratileꞌ hibali hai hira.

²³Ane tabábehi noꞌonoꞌ, upu-upu binataꞌraꞌ hai párewáraꞌ ina mewaliꞌ woꞌo gáláꞌtaꞌ. Kipekiri maroꞌa ane tapokana pembiáꞌraꞌ iti, bona toroꞌkeꞌ hingkakani.”

²⁴Upu-upu tauna to mogómbó i babaꞌá kótá mampokana pembiáꞌraꞌ Hemo hai Sikeꞌ iti, onoꞌ haneꞌi ratileꞌmoheꞌ upu-upu tobaleilo i kótá iti.

²⁵Tálu miꞌi alona hangko ionoꞌ, tangaꞌraꞌ mani mantódihá kamaháina karatileꞌraꞌ, rodua wutuꞌna Dina, iamoheꞌ Simeoꞌ hai Lewi, moalamoheꞌ pihoꞌraꞌ laoheꞌ mosuaki kótá iti haneꞌi mopapateheꞌ upu-upu tobaleilo to ara ionoꞌ, tepasuaꞌ woꞌo Hemo hai Sikeꞌ.[129] Tauna i kótá iti tiꞌara mampekiri ina mewaliꞌ noꞌonoꞌ. Roo onoꞌ, Dina raꞌala miꞌi Simeoꞌ hai Lewi hangko i támbina Sikeꞌ, haneꞌi pohuꞌheꞌ.

²⁷Karooraꞌ mepapate, ánáꞌna Iako to ntániꞌna laomoheꞌ merámpáki i lalu kótá iti, láwiꞌ ionoꞌ ádiraꞌ rapakedái.

²⁸Handaꞌ to raperampaꞌi, tepasuaꞌ bekeꞌ, dimbá, gapiꞌ, kalide hai apa-apa to rahumba i lalu hai i rawa kótá iti.

²⁹Towawineraꞌ hai ánáꞌraꞌ ratawaniheꞌ, hai upu-upu kapebukuraꞌ raꞌánti, tepasuaꞌ hinángkáꞌ to rahumba i lalu támbiraꞌ.

³⁰I pesuleꞌraꞌ, nauliꞌ Iako i Simeoꞌ hai Lewi, “Nipakasusamoꞌ hai nipakadake hangaꞌkuꞌ i toKánáꞌá hai i toPerisi to toroꞌheꞌ i tampoꞌ deꞌe. Kitaꞌ deꞌe, tiꞌarakeꞌ handaꞌ. Ane hintuwuꞌheꞌ tauna iti hai moewaꞌkeꞌ, tongawaꞌ ina ranangikeꞌ, hai ina tunakeꞌ upu-upu.”

³¹Agáiáná mehániꞌheꞌ, “Maroꞌa paꞌi ane ádingkiꞌ rapahibali hai hadua towawine to mampobaluꞌ wátána?”