Read Besoa Pewaliꞌána 35 Bible Online

Pewaliꞌána 35 - Besoa bible

Pewaliꞌána 35

¹Hangko ionoꞌ, nauliꞌ Pueꞌ Ala i Iako, “Mesuleꞌmokoꞌ lao i Beteli, pampatongawaꞌáNgkuꞌ i hio i pelangkamu hangko i Esau wutuꞌmu.[130] Toroꞌmokoꞌ ionoꞌ hai mobábehikoꞌ hambuaꞌ paintuá popenómbá i Kódóꞌ.”

²Onoꞌ miꞌi haneꞌi Iako mampolaluitaꞌáheꞌ tinána hai upu-upu tauna to ara hingkakani hai ia, nauliꞌ, “Nitibe miꞌi upu-upu lenggeꞌ ánituraꞌ tauna to toroꞌ i tampoꞌ deꞌe. Nipamagasaꞌ wátámi mouláꞌ ádá ágámántaꞌ, hai nipaháwángi waruꞌmi.

³Hangaa-ngaa nibábehi noꞌonoꞌ, láwiꞌ ina laokeꞌ i Beteli. Ionoꞌ kódóꞌ ina moaró hambuaꞌ paintuá popenómbá i Pueꞌ Ala. Ia miꞌi to motulungiaꞌ i lalu kamapáringkuꞌ hai mamporángáꞌaꞌ iumbá-umbá peá kalaoángkuꞌ.”

⁴Karahádina laluitana, rapeweꞌi miꞌi i Iako upu-upu lenggeꞌ ánitu, hai noꞌonoꞌ woꞌo daliraꞌ. Upu-upu iti natawu Iako i wóiꞌ hampóꞌá kau to marumbu hungkuꞌ i kótá Sikeꞌ.

⁵I kapohuꞌraꞌ Iako hai tinánaheꞌ, Pueꞌ Ala mopaꞌara kamalááꞌ i upu-upu tauna to toroꞌ i wánuá-wánuá to hungkuꞌ ionoꞌ, bona tiꞌaraheꞌ modápáꞌ ánáꞌnaheꞌ Iako.

⁶Kahópóꞌána, haweꞌmoheꞌ Iako hai upu-upu tauna to napohingkakaniá i tampoꞌ Kánáꞌá i kótá Beteli to rauliꞌ woꞌo Lusi.

⁷Ionoꞌ Iako moaró miꞌi hambuaꞌ paintuá popenómbá haneꞌi nahangaꞌ El-Beteli lempóna, “Pueꞌ Ala to ara i Beteli”, láwiꞌ ionoꞌ miꞌi Pueꞌ Ala mampatongawaꞌ i Iako i pelangkana hangko i wutuꞌna.

⁸Tempóraꞌ ionoꞌ, Debora topopaꞌala Ribeka mate hai ratawu i wóiꞌ kau to marumbu hungkuꞌ i wánuá iti. Onoꞌ miꞌi haneꞌi kau iti rahangaꞌ “Kau Petatangiá”.

⁹Kahaweꞌna miꞌi Iako i Beteli hangko i tampoꞌ Pádá-Árá, Pueꞌ Ala mampatongawaꞌ wopiꞌi i hia, haneꞌi Nawátiꞌ,

¹⁰Nauliꞌ, “Io tiꞌarapokoꞌ rahangaꞌ Iako, agáiáná rahangaꞌmokoꞌ Sáráeliꞌ,” lempóna: “moewaꞌ Pueꞌ Ala”.[131] Noꞌonoꞌ miꞌi Pueꞌ Ala mobáliki hangaꞌna Iako mewaliꞌ Sáráeliꞌ.

¹¹Roo onoꞌ, nauliꞌ wopiꞌi Pueꞌ Ala, “Kódóꞌ miꞌi Pueꞌ Ala to Makuasaꞌ. Memuleꞌmokoꞌ duuꞌna handaꞌ pemuleꞌámu. Hangko i pemuleꞌámu ina Kupopewaliꞌ hambuaꞌ kadatuá to mahile hai handaꞌ kadatuá ntániꞌna, hai hangko i pemuleꞌámu, handaꞌheꞌ woꞌo to ina mewaliꞌ datu.

¹²Tampoꞌ deꞌe to Kuweꞌi miꞌi Burahima hai Isakiꞌ, ina Kuweꞌikoꞌ woꞌo haweꞌ-haweꞌ i pemuleꞌámuheꞌ.”

¹³Roo molaluita noꞌonoꞌ, Pueꞌ Ala mopálehi miꞌi Iako.

¹⁴Roo onoꞌ, Iako moaró miꞌi hambuaꞌ watu pambuhinaoá kaꞌionoꞌna miꞌi Pueꞌ Ala molaluita i hia. Watu iti nabubuhi anggoroꞌ[132] hai lana saitu, onoꞌ miꞌi popenómbána i Pueꞌ Ala.

¹⁵Katoroꞌá iti nahangaꞌ Beteli, lempóna: “támbina Pueꞌ Ala”, láwiꞌ ionoꞌ miꞌi Pueꞌ Ala molaluita i Iako.[133]

¹⁶Roo onoꞌ, Iako hai tinána pohuꞌ wopaheꞌ hangko i Beteli. Karaoꞌ maniheꞌ hangko i wánuá Eparata, haweꞌ miꞌi tempóna Raheli moánáꞌ. Poánáꞌna iti maꞌángkárá ntepuꞌu,

¹⁷hai kahópóꞌána nauliꞌ sando i hia, “Ineeꞌkoꞌ malááꞌ. Deꞌe-deꞌe moánáka wopakoꞌ hadua tobaleilo.”[134]

¹⁸Ina upu miꞌi inaona, nahangaꞌ miꞌi Raheli ánáꞌna iti Benoni, lempóna “ánáꞌkuꞌ i lalu kamapáringkuꞌ”, agáiáná nahangaꞌ Iako Benami, lempóna “ánáꞌkuꞌ to morasiꞌ”.[135]

¹⁹Mate miꞌi Raheli haneꞌi ratawu i wiwi rárá to lao i wánuá Eparata, ia miꞌi i Beteleme.

²⁰Ionoꞌ miꞌi Iako mopatindáꞌ hambuaꞌ watu pambuhinaoá, hai popatawuána Raheli rapetándái hai watu iti haweꞌ deꞌe-deꞌe.

²¹Roo onoꞌ, napaliliu miꞌi Iako polumaona moliu Migdal-Ede, haneꞌiheꞌ moaró bambaruꞌraꞌ i hambali wánuá iti.

²²Tangaꞌraꞌ toroꞌ ionoꞌ, Rube mampoiluhi Biláꞌ to nakarodua umána. Bábehiána iti nahádi umána.[136] Deꞌemoheꞌ ánáꞌna Iako tobaleilo to hampuloꞌ hai rodua.

²³Ánáꞌna hai Lea: to towutuꞌ Rube, haneꞌi Simeoꞌ, Lewi, Iudá, Sakari hai to toadi Sebuloꞌ.

²⁴Ánáꞌna hai Raheli: Iusupu towutuꞌ hai Benami toadi.

²⁵Ánáꞌna hai Biláꞌ hawiꞌna Raheli: Daa towutuꞌ hai Natali toadi.

²⁶Ánáꞌna hai Silipa hawiꞌna Lea: Gati towutuꞌ hai Asere toadi. Itimoheꞌ ánáꞌna Iako tobaleilo to rapoánáka i Pádá-Árá.

²⁷Hangko i wánuá Migdal-Ede, lao miꞌi Iako i Isakiꞌ umána i Mamere hungkuꞌ i kótá Kiria-Aba to rauliꞌ woꞌo Hebero. Hangkoia Burahima toroꞌ woꞌo ionoꞌ.

²⁸Matinuwuꞌ ntepuꞌu miꞌi Isakiꞌ. Tinuwuꞌna hangatu miꞌi hai uwalu puloꞌna parena hangko mate riꞌi. I kamatena iti, to motawu iamoheꞌ Esau hai Iako ánáꞌna to rodua.