Read Besoa Pewaliꞌána 37 Bible Online

Pewaliꞌána 37 - Besoa bible

Pewaliꞌána 37

¹Iako toroꞌ i tampoꞌ Kánáꞌá, katoroꞌána umána.

²Deꞌe miꞌi daritakáná pemuleꞌána Iako. Tempóna tinuwuꞌna Iusupu hampuloꞌ miꞌi hai pitu parena, biásá miꞌi woꞌo mampoewu bekeꞌ hai dimbána umána hingkakani hai wutuꞌnaheꞌ, ánáꞌraꞌ Biláꞌ hai Silipa to nakaroduaheꞌ Iako. Iusupu lao mampehángáꞌá kakadakena bábehiáraꞌ wutuꞌnaheꞌ iti i umána.

³Iusupu napomahile ntepuꞌu Iako[137] hangko i halalunaheꞌ, láwiꞌ ia rapoánáka i katoámána miꞌi. Onoꞌ miꞌi haneꞌi hangkani tempó, rapandauá hantau badu to mababe.

⁴Karaitána halaluna ia to napomahile umáraꞌ melumbuꞌ mani hangko i hira, onoꞌ haneꞌi mantepuꞌumoheꞌ mokáhihiꞌ Iusupu, hai tiꞌara piꞌi maroꞌa polaluitaraꞌ i hia.

⁵Hangkani tempó, Iusupu mampaturuá, hai paturuna iti natuntuáheꞌ halaluna, onoꞌ haneꞌi tetámbái miꞌi karakáhihiꞌna.

⁶Nauliꞌ node: “Nipehádingi. Ina kutuntuákou paturungkuꞌ!

⁷Mampaturuáꞌaꞌ kitaꞌ deꞌe upu-upu tangaꞌtaꞌ i hinoe, mobáhá pare. Iaperái kuita parengkuꞌ meángkáꞌ tindáꞌ i tangaꞌ, hai paremi motolelingi motóngkóꞌ i parengkuꞌ iti.”

⁸Rauliꞌ halaluna, “Ba nupoinao paꞌi ina mewaliꞌ datu to makuasaꞌ i kaiꞌ?” Ánti potuntuna paturuna, tetámbái wopiꞌi karakáhihiꞌna halalunaheꞌ.

⁹Hangkani mampaturuá wopiꞌi Iusupu hai natuntuá wopaheꞌ halaluna, nauliꞌ, “Kódóꞌ mampaturuá wopaꞌaꞌ. Kuita alo, wulá hai betue hampuloꞌ hai hambuaꞌ motóngkóꞌheꞌ i kódóꞌ.”

¹⁰Paturuna iti natuntu woꞌo i umána, onoꞌ miꞌi haneꞌi nakámbáróá umána, nauliꞌ, “Paturu apa to noꞌonoꞌ? Ba nupoinao paꞌi, kódóꞌ, inámu hai halalumuheꞌ ina motóngkóꞌangkaiꞌ i hio?”

¹¹Kóiꞌ ntepuꞌu inaoraꞌ halaluna, agáiáná umáraꞌ mopailalu peá paturuna Iusupu iti.

¹²Hangkani tempó, wutuꞌna Iusupu laoheꞌ moewu bekeꞌ hai dimbána umáraꞌ hungkuꞌ i kótá Sikeꞌ.

¹³Nauliꞌ Iako i Iusupu, “Wutuꞌmu moewuheꞌ bekeꞌ hai dimbá hungkuꞌ i Sikeꞌ. Pohuꞌmokoꞌ lao i hira.” Mehániꞌ Iusupu, “Noꞌonoꞌ miꞌi, umaꞌ. Ina laoaꞌ.”

¹⁴Nauliꞌ umána, “Laomokoꞌ mampeita wutuꞌmuheꞌ, bekeꞌraꞌ hai dimbáraꞌ. Roo onoꞌ, mesuleꞌkoꞌ mai nupahaweꞌáꞌaꞌ banoumbáheꞌ.” Onoꞌ miꞌi haneꞌi Iusupu pohuꞌ hangko i lembo Hebero. Tiꞌara marue polumaona, haweꞌ miꞌi Iusupu i Sikeꞌ.

¹⁵Tangaꞌna molumao i pádá ngkálu soꞌu ngkálu mai mampeliꞌ kaꞌaraꞌáraꞌ wutuꞌna, ia mampohidupaꞌá hadua tobaleilo, hai tobaleilo iti mekuneꞌ i hia, “Apa riꞌi to nupeliꞌ?”

¹⁶Mehániꞌ Iusupu, “Wutuꞌkuꞌ maiheꞌ moewu bekeꞌ hai dimbá ieneꞌ. Babilaꞌ nuisá iumbá kaꞌaraꞌáraꞌ?”

¹⁷Nauliꞌ tauna iti, “Tiꞌarapoheꞌ ieneꞌ. Kuhádi rauliꞌ ina laoheꞌ i wánuá Dota.” Onoꞌ haneꞌi pohuꞌ miꞌi Iusupu motutuháheꞌ wutuꞌna, hai nalámbiꞌ mpuꞌuheꞌ i Dota.

¹⁸Karaoꞌ mani Iusupu, raitaheꞌ halaluna, hai hangko tiꞌara mani teduuꞌ i hira, raliwo miꞌi ina rapapate.

¹⁹Molaluitaheꞌ hadua hai hadua, rauliꞌ, “Peita, louꞌ miꞌ maiꞌo to paka mampaturuá.

²⁰Rángina miꞌi tapapate, hai wátána tanawoꞌ i lalu tibubuꞌ haneꞌi tapahaweꞌ i umántaꞌ kamatena miꞌi nahakaꞌ singá. Tapeita mpuꞌu dupaꞌna paturuna.”

²¹Poliworaꞌ iti nahádi Rube, onoꞌ miꞌi haneꞌi napeliꞌ rárá ina mopatueꞌ Iusupu. Nahángáꞌáꞌáheꞌ, “Ineeꞌ woia tapapate.

²²Tanawoꞌ peá i lalu tibubuꞌ i pádá loriꞌ deꞌe, agáiáná ineeꞌ tapahái ba tabelái wátána.” Tunggáiána Rube bona mampelae Iusupu hai moánti huleꞌ i umáraꞌ.

²³Kahaweꞌna Iusupu i hira, liu-liu rahakaꞌ hai ralosui baduna to mababe,

²⁴haneꞌi radiiꞌ soso lao ranawoꞌ i lalu tibubuꞌ to maꞌáti.

²⁵Roo onoꞌ, mehodaheꞌ mandeꞌ. Tangaꞌraꞌ mandeꞌ, iaperái raita handaꞌ topadangkaꞌ toSumaila hangko i tampoꞌ Gileaꞌ to ina lao i tampoꞌ Másiriꞌ. Untáraꞌ rapopatekei huloꞌ, balasee hai mire.[138]

²⁶Nauliꞌ Iudá i halalunaheꞌ, “Apa miꞌi bunduꞌna ane ádintaꞌ tapapate hai tawuniángi?

²⁷Rángina miꞌi tapobaluꞌ i toSumaila. Ineeꞌ woia tapopeahiahiꞌ láwiꞌ ia woꞌo toꞌu-toꞌu ádintaꞌ.” Rapokana mpuꞌu miꞌi halalunaheꞌ polaluitana iti.

²⁸I tempó iti, melempóheꞌ topadangkaꞌ toMidia,[139] hai Iusupu raoreꞌ miꞌi hangko i lalu tibubuꞌ, haneꞌi rapobaluꞌ i toSumaila hai hólóna rompuloꞌ dóiꞌ peráꞌ. Roo onoꞌ, raꞌánti miꞌi lao i tampoꞌ Másiriꞌ.

²⁹Bábehiáraꞌ iti tiꞌara naisá Rube. I pesuleꞌna, ia lao mampetiro tibubuꞌ. Iusupu tiꞌara piꞌi ara i lalu! Onoꞌ miꞌi haneꞌi Rube mohepaꞌ-hepaꞌ waruꞌna ánti kamasusana laluna.

³⁰Hangko ionoꞌ, mesuleꞌ miꞌi Rube i ádinaheꞌ haneꞌi nauliꞌ, “Iusupu tiꞌara piꞌi ara i lalu tibubuꞌ! Apa miꞌi to hangaa-ngaa kubábehi deꞌe-deꞌe?”

³¹Hangko ionoꞌ, rasambale miꞌi hambaꞌa bekeꞌ, haneꞌi rahóngkó waheꞌna rapoemei baduna Iusupu.

³²Roo onoꞌ, badu to mababe to piriꞌ miꞌi waheꞌ raꞌánti lao i umáraꞌ hai rapahaweꞌ, “Badu deꞌe kihumba. Tapáresáꞌ sieruꞌ umaꞌ, babilaꞌ badunantoi Iusupu ánáꞌmu?”

³³Iako moisá ntepuꞌu badu iti, haneꞌi nauliꞌ, “Toꞌu, deꞌe baduna ánáꞌkuꞌ! Tongawaꞌ ánáꞌkuꞌ nahakaꞌ miꞌi singá haneꞌi nahepaꞌ-hepaꞌ.”

³⁴Iako liu-liu mohepaꞌ-hepaꞌ waruꞌna ánti kamasusana laluna, hai roo onoꞌ napakeꞌ miꞌi waruꞌ hangko i karuꞌ.[140] Marue ntepuꞌu Iako motatangi ánáꞌna.

³⁵Upu-upu ánáꞌna tobaleilo hai towawine mampehukáꞌ mopalindó umáraꞌ, agáiáná tiꞌara mau rapalindó. Nauliꞌ riꞌi, “Ina kutatangi oaꞌ ánáꞌkuꞌ duuꞌkuꞌ mate, hai ina hidupaꞌ wopangkaiꞌ i katoroꞌá tomate.” Noꞌonoꞌ mpuꞌu miꞌi Iusupu natatangi umána.

³⁶Kahaweꞌraꞌ toMidia i tampoꞌ Másiriꞌ, Iusupu rapobaluꞌ wopiꞌi i Potipa, tadulakoraꞌ topokámpái támbi kadatuána Piraoꞌ.