Read Besoa Pewaliꞌána 39 Bible Online

Pewaliꞌána 39 - Besoa bible

Pewaliꞌána 39

¹Iusupu raꞌánti miꞌi toSumaila lao i tampoꞌ Másiriꞌ, haneꞌi rapobaluꞌ i Potipa, hadua toMásiriꞌ to motadulakoi topokámpái támbi kadatuána Piraoꞌ.

²Iusupu toroꞌ i támbina pueꞌna iti, hai ia naporángá PUEꞌ, onoꞌ miꞌi haneꞌi maroꞌa pampopewaliꞌna upu-upu bágóꞌna.

³Kanaitána pueꞌna kaPUEꞌ Alana to mamporángá Iusupu haneꞌi hinángkáꞌna to napobágóꞌ mewaliꞌ maroꞌa,

⁴góeꞌ ntepuꞌu laluna Potipa i Iusupu, onoꞌ miꞌi haneꞌi naꞌángkáꞌ mewaliꞌ topobágóꞌna to rapoinálái ntepuꞌu, hai naweꞌi kuasaꞌ motadulakoi tauna to mobágóꞌ i támbina, hai mokádipurá woꞌo upu-upu párewána.

⁵Mantepuꞌu hangko ionoꞌ, ánti kaꞌIusupuna, PUEꞌ mowátiꞌ katueꞌna Potipa toMásiriꞌ iti hai hinángkáꞌna kapebukuna, maroꞌa to i támbina maroꞌa i hinoena.[144]

⁶Upu-upu párewána Potipa napeweꞌi miꞌi i Iusupu mokádipurá. Onoꞌ miꞌi haneꞌi Potipa tiꞌara piꞌi mampekiri hinángkáꞌ bágóꞌ i lalu támbina, ngkáliꞌna riꞌi pandeꞌna tiꞌara naurusi Iusupu.[145] Iusupu hadua ánáꞌntomoane to maróhó hai malápáká,

⁷onoꞌ miꞌi haneꞌi marue-rue napokaelu toinána Potipa, hai nawáwáhá bona maturuheꞌ hingkakani.

⁸Agáiáná Iusupu tiꞌara mau, nauliꞌ, “Ineeꞌkoꞌ noꞌonoꞌ. Kódóꞌ to napoináláiáꞌaꞌ pueꞌkuꞌ Potipa mokádipurá upu-upu párewána hai hawiꞌnaheꞌ. Ia tiꞌara piꞌi paraluu mampekiri óntóꞌ támbi deꞌe.

⁹Kuasaꞌkuꞌ i támbi deꞌe hibali hai kuasaꞌna. Upu-upu naweꞌimoꞌ kukádipurá, i rawa hangko i hio, láwiꞌ toinánakoꞌ. Noumbá kapeisángkuꞌ mobábehi to kadake ba madósá i peitána Pueꞌ Ala?”[146]

¹⁰Kehapiꞌ alo-alona toinána Potipa mokeloꞌ-keloꞌ Iusupu, agáiáná ia tiꞌara mau mampeuláꞌi peundeꞌána towawine iti maturu hingkakani.

¹¹Hangkani tempó, Iusupu mesuaꞌ i lalu támbi ina mobágóꞌ, agáiáná tiꞌara ara tauna ntániꞌna ionoꞌ.

¹²Toinána Potipa mohintáki kumbána hai nadiiꞌ, haneꞌi nauliꞌ, “Maikoꞌ moiluhikeꞌ.” Agáiáná Iusupu mengkawuke mengkábáhá hangko i kumbána, haneꞌi melangka lao i rawa, mewaliꞌ kumbána iti napálehi miꞌi i taena towawine iti.

¹³I kanaitána towawine Iusupu iti melangka miꞌi hai mopálehi kumbána,

¹⁴ia mokióꞌ topedureinaheꞌ hai nauliꞌ, “Nipeita, toIberani to naꞌánti mai toámángkuꞌ i támbi deꞌe maikeꞌ napakadake. Ia mesuaꞌ i lintuꞌkuꞌ ina napoiluhiaꞌ, agáiáná monganga-ngangaꞌaꞌ kupasimbuku.

¹⁵Ánti pongángángkuꞌ, ia melangka lao i rawa. Dentoiꞌe kumbána to napálehi.”

¹⁶Mewaliꞌ ia mowoli kumbána Iusupu iti, mampegiá pesuleꞌna toámána.

¹⁷I pesuleꞌna toámána, napahaweꞌ miꞌi apa to pewaliꞌ, nauliꞌ, “Soꞌuꞌo toIberani to nuánti mai, mesuaꞌ i lintuꞌ paturuántaꞌ ina napakadakeaꞌ.

¹⁸Agáiáná monganga-ngangaꞌaꞌ, haneꞌi ia melangka lao i rawa. Dentoiꞌe kumbána to napálehi.”

¹⁹Kanahádina Potipa laluitana toinána, mabukoꞌ miꞌi,

²⁰haneꞌi Iusupu napopehakaꞌ hai napopesuaꞌ i lalu tarungku, potarungkuáraꞌ tauna to masalaꞌ i datu.

²¹Agáiáná PUEꞌ mamporángá hai mampokaꞌahiꞌ Iusupu, onoꞌ miꞌi haneꞌi góeꞌ laluna tadulako tarungku i hia.

²²Mewaliꞌ ia napoinálái tadulako tarungku mokádipurá toratarungku hai hinángkáꞌ bágóꞌ ionoꞌ.

²³Tadulako tarungku tiꞌara piꞌi paraluu mampekiri apa to napoináláiá miꞌi Iusupu, láwiꞌ Iusupu naporángá oaꞌ PUEꞌ. Onoꞌ miꞌi haneꞌi maroꞌa pampopewaliꞌna upu-upu bágóꞌna.