Read Besoa Pewaliꞌána 4 Bible Online

Pewaliꞌána 4 - Besoa bible

Pewaliꞌána 4

¹Adama hai Hewá mohambokoheꞌ. Morodua miꞌi Hewá haneꞌi moánáka hadua ánángkóiꞌ tobaleilo. I tempó iti nauliꞌ Hewá, “Ánti petulungina PUEꞌ i kódóꞌ, kulámbiꞌ miꞌi hadua ánángkóiꞌ tobaleilo.” Onoꞌ miꞌi haneꞌi ánáꞌraꞌ iti rahangaꞌ Kaiꞌ, lempóna “molámbiꞌ”.

²Roo onoꞌ, ia moánáꞌ wopiꞌi hadua tobaleilo to rahangaꞌ Abeli, ádina Kaiꞌ. Abeli iti mewaliꞌ topoewu dimbá, hai Kaiꞌ mewaliꞌ topohinoe.

³Tiꞌara marue hangko ihinti, Kaiꞌ moala miꞌi hanggááꞌ hangko i powiáꞌna, napopenómbá i PUEꞌ.

⁴Abeli woꞌo moala bahangapa uluánáꞌ dimbána, nasambale, hai óntóꞌna to kelompoꞌ napopenómbá i PUEꞌ. Abeli hai popenómbána iti napokagóeꞌ PUEꞌ,

⁵agáiáná Kaiꞌ hai popenómbána tiꞌara Napokagóeꞌ. Onoꞌ miꞌi haneꞌi Kaiꞌ mampematuꞌa láwiꞌ rumihi kamabukoꞌna.

⁶Nauliꞌ PUEꞌ i hia, “Moapa riꞌi haneꞌikoꞌ mabukoꞌ? Moapa riꞌi haneꞌikoꞌ mampematuꞌa?

⁷Ane maroꞌa bábehiámu, hangaa-ngaa Kupokanakoꞌ. Agáiáná ane kadake bábehiámu, ina nakuasaꞌikoꞌ dósá. Dósá iti moundeꞌ mokuasaꞌi lalumu, agáiáná hangaa-ngaa nuewaꞌ duuꞌna nunangi.”

⁸Roo onoꞌ, nauliꞌ Kaiꞌ i Abeli, “Maikoꞌ, laokeꞌ i hinoe.” Tangaꞌraꞌ i hinoe, Kaiꞌ mohakaꞌ miꞌi ádina, haneꞌi napapate.

⁹Napekuneꞌ PUEꞌ i Kaiꞌ, Nauliꞌ, “Iumbá miꞌi Abeli ádimu?” Mehániꞌ Kaiꞌ, “Tiꞌara kuisá. Kódóꞌ ripaꞌi topokámpái ádingkuꞌ?”

¹⁰Nauliꞌ PUEꞌ, “Moapa riꞌi haneꞌi nubábehi to kadake deꞌe? Nupehádingi! Waheꞌna ádimu to mabubu i tampoꞌ meraruaꞌ i Kódóꞌ, bona bábehiámu to kadake iti ina Kuháwángi.[15]

¹¹Deꞌe miꞌi hukumu: Ánti kanupapatena ádimu duuꞌna waheꞌna mabubu i tampoꞌ, tiꞌara piꞌi ina nubuku mampobágóꞌ tampoꞌ.

¹²Ane nupantudaꞌi tampoꞌ deꞌe, tudaꞌ-tudaꞌmu tiꞌara ina mowuaꞌ. Hangaa-ngaa mewaliꞌkoꞌ topolilo to tiꞌara tinda.”

¹³Nauliꞌ Kaiꞌ i PUEꞌ, “Matimi gaga hukungkuꞌ deꞌe. Tiꞌara kubuku mokili!

¹⁴Deꞌe-deꞌe Nuwuramoꞌ karaoꞌ hangko i katoroꞌá deꞌe hai ina karaoꞌaꞌ woꞌo hangko i lindoꞌMu. Ina mewaliꞌaꞌ topolilo i duniáꞌ deꞌe. Mewaliꞌ heáná peá to mampohidupaꞌáꞌaꞌ ina mopapateaꞌ.”

¹⁵Agáiáná nauliꞌ PUEꞌ, “Tiꞌara noꞌonoꞌ. Ane arai to mopapatekoꞌ, tauna iti ina molámbiꞌ pehuku pitu kánina karumihina hangko i apa to nabábehi i hio.” Hangko ionoꞌ, Napoanaꞌi miꞌi Pueꞌ Ala tandaꞌ i Kaiꞌ, bona heáná peá to mampohidupaꞌá, tiꞌara ina mopapate.

¹⁶Mewaliꞌ pohuꞌ miꞌi Kaiꞌ hangko i lindoꞌna PUEꞌ, hai toroꞌ i tampoꞌ to rauliꞌ Nod, lempóna: “poliloá”. Tampoꞌ iti tándáꞌ i mata alo hinoe Párádesiꞌ.

¹⁷Kaiꞌ hai toinána moánáꞌheꞌ hadua tobaleilo to rahangaꞌ Henoꞌ. Roo onoꞌ, Kaiꞌ moaró hambuaꞌ kótá.[16] Kótá iti nahangaꞌ Henoꞌ mouláꞌ hangaꞌna ánáꞌna.

¹⁸Henoꞌ momuleáka Iraꞌ. Iraꞌ momuleáka Mehuiaele. Mehuiaele momuleáka Metusaele, hai Metusaele momuleáka Lame.

¹⁹Lame iti, rodua toinána to rahangaꞌ Ádá hai Sila.

²⁰Ádá moánáka Iaba. Iaba hai pemuleꞌánaheꞌ, hira to rungu-runguna to mopiaraꞌ binataꞌ hai toroꞌheꞌ i bambaruꞌ to rabábehi hangko i koliꞌ binataꞌ.

²¹Ádina hangaꞌna Iuba. Iuba hai pemuleꞌánaheꞌ, hira to rungu-runguna mokasapi hai motulali.

²²Sila moánáka woꞌo hadua tobaleilo to rahangaꞌ Tuba-Kaiꞌ. Tuba-Kaiꞌ hai pemuleꞌána to rungu-runguna mobábehiheꞌ hinángkáꞌna párewá hangko i tembaga hai besiꞌ. Ádina Tuba-Kaiꞌ towawine to rahangaꞌ Naꞌama.

²³Hangkani tempó, molaluita miꞌi Lame i toinána to rodua, nauliꞌ: “Ádá hai Sila, nipehádingi! Kómu toinángkuꞌ, nipailalu laluitangkuꞌ. Kupapate miꞌi hadua tobaleilo to maleheꞌ mani láwiꞌ napaháiaꞌ. Kubábehi noꞌonoꞌ láwiꞌ ánáꞌntomoane iti mobeláiaꞌ.

²⁴Ane ara tauna to mopahái Kaiꞌ, tauna iti molámbiꞌ pehuku pitu kánina karumihina. Agáiáná ane ara woꞌo tauna to mopaháiaꞌ, tauna iti ina molámbiꞌ pehuku pitu puloꞌna hai pitu kánina karumihina.”

²⁵Adama hai Hewá moánáꞌ wopaheꞌ hadua tobaleilo. Nauliꞌ Hewá, “Naweꞌiaꞌ Pueꞌ Ala hadua tobaleilo, paháwángina Abeli to napapate Kaiꞌ.” Onoꞌ miꞌi haneꞌi nahangaꞌ Setiꞌ, lempóna: “Ia mampeweꞌi”.

²⁶Setiꞌ momuleáka hadua tobaleilo to nahangaꞌ Enoꞌ. Tempó onoꞌ, tauna mantepuꞌuheꞌ mokábelái hangaꞌna PUEꞌ[17] ane menómbáheꞌ.