Read Besoa Pewaliꞌána 41 Bible Online

Pewaliꞌána 41 - Besoa bible

Pewaliꞌána 41

¹Liu miꞌi rompare, mampaturuá miꞌi Piraoꞌ. I lalu paturuna, ia meángkáꞌ i wiwi uwai Nili.

²Iaperái naita mesupaꞌ hangko i uwai pitu báꞌána gapiꞌ to maruduꞌ hai mahile, haneꞌi mangkukuꞌheꞌ rumpuꞌ to i wiwi uwai iti.

³Hangko ionoꞌ, mesupaꞌ miꞌi woꞌo pitu báꞌána gapiꞌ to ntániꞌna. Gapiꞌ iti maduhuꞌheꞌ, buꞌu perái nabungkuhi koliꞌ. Gapiꞌ to maduhuꞌ iti meángkáꞌheꞌ i hintáiꞌraꞌ gapiꞌ to maruduꞌ i wiwi uwai,

⁴haneꞌi gapiꞌ to maduhuꞌ moameꞌheꞌ gapiꞌ to maruduꞌ. Roo onoꞌ, pehádi miꞌi Piraoꞌ.

⁵Tiꞌara marue, tekapidi wopiꞌi Piraoꞌ haneꞌi mampaturuá. I lalu paturuna, naita hangkau pare to mowuaꞌ pitu wulina to moꞌóntóꞌ.

⁶Hai tueꞌ woꞌo hangkau pare mowuaꞌ pitu wulina to langkoꞌ láwiꞌ paka nawui wui to maꞌámuꞌ hangko i pádá wungi tándáꞌ i mata alo.

⁷Pare to langkoꞌ iti moameꞌ pare to moꞌóntóꞌ. Roo onoꞌ, pehádi miꞌi Piraoꞌ hai naisá kamampaturuána.

⁸Mearó miꞌi mepulo, tiꞌara maroꞌa pekirina, onoꞌ miꞌi haneꞌi napopekióꞌheꞌ upu-upu topodoti hai tauna to mapánde i tampoꞌ Másiriꞌ, haneꞌi natuntuáheꞌ paturuna iti, agáiáná tiꞌara ara to peisá molempónga paturuna iti.

⁹Kahópóꞌána nauliꞌ topokádipurá painu i Piraoꞌ, “Datu, membiáꞌaꞌ ámpu. Alo deꞌe monóákámoꞌ salaꞌkuꞌ.

¹⁰Iaꞌo, Piraoꞌ mabukoꞌ i toporótiꞌ hai i kódóꞌ, onoꞌ miꞌi haneꞌi rapopesuaꞌangkaiꞌ i lalu petarungkuá i támbina tadulako topokámpái támbi kadatuána Piraoꞌ.

¹¹Hangkani tempó, kaiꞌ rodua mampaturuáꞌangkaiꞌ, hai paturungkiꞌ tiꞌara hibali lempóna.

¹²Ionoꞌ ara hadua ánáꞌntomoane toIberani, to ratarungku woꞌo hingkakani hai kaiꞌ. Ia hawiꞌna tadulako topokámpái támbina datu. Kituntu paturungkiꞌ i hia, hai nalempóꞌáꞌangkaiꞌ paturungkiꞌ iti.

¹³To napolaluita iti mewaliꞌ aha, láwiꞌ datu mampopesuleꞌmoꞌ i bágóꞌkuꞌ hangkoia, agáiáná toporótiꞌ iti ratóe duuꞌna mate.”

¹⁴Kanahádina Piraoꞌ laluitana, ia mampopeala miꞌi Iusupu, hai hawiáꞌ-wiáꞌ rapopesuwuꞌ hangko i petarungkuá. Roo mokáiꞌ danggona hai mempaháwá, lao miꞌi i lindoꞌna Piraoꞌ.

¹⁵Nauliꞌ Piraoꞌ i hia, “Kódóꞌ mampaturuáꞌaꞌ, agáiáná tiꞌara ara haweꞌ hadua to peisá molempónga paturungkuꞌ iti. Ara to mopahaweꞌ i kódóꞌ, io to peisá molempónga paturu.”

¹⁶Mehániꞌ Iusupu, “Tiꞌara kódóꞌ, Piraoꞌ, agáiáná Pueꞌ Ala to ina molempónga paturumu.”

¹⁷Roo onoꞌ, nauliꞌ Piraoꞌ, “I lalu paturungkuꞌ, kódóꞌ meángkáꞌaꞌ i wiwi uwai Nili.

¹⁸Iaperái kuita mesupaꞌ hangko i uwai iti pitu báꞌána gapiꞌ to maruduꞌ hai mahile, mangkukuꞌheꞌ i wiwi uwai.

¹⁹Roo onoꞌ, mesupaꞌheꞌ woꞌo mai pitu báꞌána gapiꞌ to ntániꞌna to maduhuꞌ ntepuꞌu; wátáraꞌ buꞌu perái nabungkuhi koliꞌ. Tiꞌara mani haweꞌ hangkani kuita gapiꞌ to noꞌonoꞌ kamaduhuꞌraꞌ gaga i tampoꞌ Másiriꞌ.

²⁰Gapiꞌ to maduhuꞌ iti moameꞌheꞌ pitu báꞌána gapiꞌ to maruduꞌ,

²¹agáiáná gapiꞌ to maduhuꞌ iti, bateꞌ-bateꞌna peá kamaduhuꞌraꞌ. Roo onoꞌ, pehádimoꞌ.

²²Tiꞌara marue, tekapidi wopaꞌaꞌ hai mampaturuáꞌaꞌ; ionoꞌ kuita hangkau pare mowuaꞌ pitu wulina to moꞌóntóꞌ hai mangka.

²³Hai tueꞌ woꞌo hangkau pare mowuaꞌ pitu wulina to langkoꞌ láwiꞌ paka nawui wui to maꞌámuꞌ hangko i pádá wungi tándáꞌ i mata alo.

²⁴Pare to langkoꞌ iti moameꞌ pare to moꞌóntóꞌ. Paturungkuꞌ to rompákáꞌ deꞌe roo miꞌi kupahaweꞌ i topangisá, agáiáná tiꞌara haweꞌ hadua to peisá molempónga i kódóꞌ.”

²⁵Roo onoꞌ, nauliꞌ Iusupu i Piraoꞌ, “Rompákáꞌ paturu iti, hibali peá lempóna. Pueꞌ Ala mopatongawaꞌ miꞌi i pueꞌkuꞌ Piraoꞌ apa to ina Nabábehi.

²⁶Pitu báꞌána gapiꞌ to maruduꞌ hai pitu wulina pare to moꞌóntóꞌ, lempóna pitu parena ina maroꞌa katueꞌraꞌ tauna; rompákáꞌ iti hibali peá lempóna.

²⁷Pitu báꞌána gapiꞌ to maduhuꞌ hai pitu wulina pare to langkoꞌ, lempóna pitu parena kamaruena ina ara tempó rimi.

²⁸Deꞌe miꞌi to kupahaweꞌ i hio Piraoꞌ, láwiꞌ Pueꞌ Ala mopatongawaꞌ miꞌi i pueꞌkuꞌ Piraoꞌ apa to ina Nabábehi.

²⁹I lalu pitu parena, ina handaꞌ rasiꞌ i powiáꞌraꞌ tauna, hai ina maroꞌa katueꞌtaꞌ i humalele tampoꞌ Másiriꞌ.

³⁰Agáiáná roo hangko ionoꞌ, ina haweꞌ tempó rimi pitu woꞌo parena, hai kagóeꞌtaꞌ iti ina takáláliꞌá, láwiꞌ tempó kapári ina morampe tampoꞌ deꞌe duuꞌna bangi.

³¹

³²Rongkani miꞌi pueꞌkuꞌ Piraoꞌ mampaturuá. Lempóna, Pueꞌ Ala mopakanótó miꞌi peundeꞌáNa, hai kawiáꞌ kaꞌina Nabábehina.

³³Mewaliꞌ ane maroꞌa pueꞌkuꞌ Piraoꞌ, nupileꞌi miꞌi hadua tauna to mapánde hai manótó laluna, nuweꞌi kuasaꞌ mokádipurá tampoꞌ deꞌe.

³⁴Pueꞌkuꞌ Piraoꞌ, hangaa-ngaa nuángkáꞌheꞌ topobágóꞌ to ntániꞌna hai nuweꞌiheꞌ kuasaꞌ bona i lalu pitu parena i tempó mabuhu iti, moróróꞌheꞌ hanggáláꞌ lima hangko i powiáꞌraꞌ tauna, bona rarámpu i kótá-kótá hai rakádipurá i lalu hangaꞌna Piraoꞌ.

³⁵

³⁶Pare iti hangaa-ngaa rapatimama, bona ara pandeꞌraꞌ tauna i lalu pitu parena tempó rimi to ina mewaliꞌ i tampoꞌ Másiriꞌ deꞌe. Mewaliꞌ ane noꞌonoꞌi, taunámu tiꞌaraheꞌ ina mate holo.”

³⁷Piraoꞌ hai upu-upu topobágóꞌna mampokana polámbiꞌna Iusupu.

³⁸Nauliꞌ Piraoꞌ i hira, “Ara mani paꞌi to hibali hai Iusupu, to nateteꞌ Inaona Pueꞌ Ala?”

³⁹Hangko ionoꞌ, nauliꞌ Piraoꞌ i Iusupu, “Láwiꞌ Pueꞌ Ala to mampopaisá upu-upuna iti i hio, tongawaꞌ io to mapánde hai bukeꞌ timbá hangko i tauna ntániꞌna.

⁴⁰Ina kulántiꞌkoꞌ mewaliꞌ sulewátángkuꞌ i támbi kadatuángkuꞌ deꞌe, hai upu-upu taunángkuꞌ hangaa-ngaa mampeuláꞌi párentámu, agáiáná bateꞌna kódóꞌ to i reámu.”

⁴¹Roo onoꞌ, naposu Piraoꞌ hingkoliꞌ kadatuá hai napusaꞌ i karaweꞌna Iusupu, haneꞌi nauliꞌ, “Deꞌe-deꞌe kulántiꞌkoꞌ mewaliꞌ sulewátángkuꞌ i tampoꞌ Másiriꞌ.” Hangko ionoꞌ, rabaduiá wopiꞌi hantau badu to maꞌálusuꞌ bánána, hai rapopeáwóló rante buláwá.

⁴²

⁴³Roo onoꞌ, raweꞌi miꞌi kereta kadatuá to kaduá napengkaheꞌi, hai topokámpái moioru haneꞌi rapopaisá i upu-upu tauna, “Poweꞌi rárá! Nibiláꞌ tauna deꞌe!” Noꞌonoꞌ miꞌi karalántiꞌna Iusupu mepárentá i tampoꞌ Másiriꞌ.

⁴⁴Nauliꞌ Piraoꞌ i hia, “Kódóꞌ miꞌi deꞌe Piraoꞌ, hai ina kupahaweꞌ i upu-upu tauna, ane tiꞌaraheꞌ mesabiꞌ i hio, tiꞌara mpuꞌuheꞌ peisá mobábehi apa-apa i tampoꞌ Másiriꞌ.”

⁴⁵Roo onoꞌ, Piraoꞌ mohangaꞌ Iusupu Sapana Panea haneꞌi naweꞌi woꞌo towawine napotoina. Towawine iti rahangaꞌ Asina. Ia ánáꞌna Potipera, hadua kapalaꞌ tadulako menómbá ágámáraꞌ toMásiriꞌ i kótá On.[149] I pantepuꞌuána Iusupu mobágóꞌ i tampoꞌ Másiriꞌ mosulewátái Piraoꞌ daturaꞌ, tinuwuꞌna tálu puloꞌna parena. Pohuꞌ miꞌi Iusupu hangko i támbina Piraoꞌ lao motolelingi upu-upu wánuá i tampoꞌ Másiriꞌ.

⁴⁶

⁴⁷Pitu parena kamaruena, maroꞌa katueꞌraꞌ tauna. Hinángkáꞌna powiáꞌraꞌ mewaliꞌ ntepuꞌu, pelumbuꞌna miꞌi wuaꞌ pareraꞌ.

⁴⁸Nahawaka miꞌi Iusupu bona pare iti rarámpu hangko i powiáꞌraꞌ haneꞌi rawoli i lalu buhoꞌ to mahile i kótá-kótá.

⁴⁹Ánti kahandaꞌna miꞌi pare to rarámpu iti, Iusupu tiꞌara piꞌi mohukáꞌ, láwiꞌ kahandaꞌna pare iti nodo kahandaꞌna wungi i wiwi tahiꞌ.

⁵⁰Hangko tiꞌara mani haweꞌ tempó rimi, Asina toinána Iusupu moánáꞌ miꞌi rodua tobaleilo.

⁵¹Nauliꞌ Iusupu, “Ánti kamaroꞌana Pueꞌ Ala i kódóꞌ, onoꞌ miꞌi haneꞌi kukáláliꞌá hinángkáꞌ kapáringkuꞌ hai upu-upu tinána umángkuꞌ.” Onoꞌ miꞌi haneꞌi nahangaꞌ ánáꞌna towutuꞌ “Manase” lempóna: “nakáláliꞌá miꞌi”.

⁵²Hai nauliꞌ wopiꞌi, “Naweꞌimoꞌ Pueꞌ Ala rodua ánáꞌkuꞌ i tampoꞌ kapáriángkuꞌ,” haneꞌi nahangaꞌ ánáꞌna to adi “Eparai” lempóna: “mowuaꞌ handaꞌ”.

⁵³Hópóꞌ miꞌi pitu parena katueꞌraꞌ tauna i tampoꞌ Másiriꞌ mewaliꞌ maroꞌa,

⁵⁴haweꞌ miꞌi tempó rimi. Pitu parena kamaruena, tauna i humalele duniáꞌ narampe rimi to rumihi, hintotoꞌ hai apa to nauliꞌ Iusupu. I tampoꞌ Másiriꞌ peá ara pandeꞌ.

⁵⁵I tempóraꞌ toMásiriꞌ mantepuꞌu marimi, laomoheꞌ membiáꞌ pandeꞌraꞌ i Piraoꞌ, agáiáná nauliꞌ, “Laomokou i Iusupu, hai nipeuláꞌi upu-upu to nahawaka i kómu.”

⁵⁶I karurumihiána miꞌi rimi i humalele tampoꞌ iti, nahuoꞌmoheꞌ Iusupu bona upu-upu buhoꞌ rabungkáhi hai pare iti rapobaluꞌ i toMásiriꞌ.

⁵⁷Ánti karumihina kamarimi iti, tauna to hangko i humalele duniáꞌ haweꞌheꞌ i tampoꞌ Másiriꞌ mohóló pare i Iusupu.